Oni Du Na Wingbaduse Wa Yeremaya

“Mo súngudi Yekova; mo dú nyanyaki, kpotoro yo ki ngarã; ii, mo súngudi Yekova!”—ATAMBUAHE 27:14.

1. Gini bazagino amaku aDezire Yekova agbia ngbarago behe?

ADEZIRE YEKOVA naraka rogo gu paradiso nga ga toro. (Yesaya 11:6-9) Rogo gi totorotototoroto zegino re, i naraka na akurayo aKristano dagba agu apai nga ga toro du nikparakparaha, nga agu akurayo duna pazereda dagbayo na Yekova Mbori na dagbayo nga aKristano. (Atambuahe 29:11; Yesaya 54:13) Na kurii gure, gayo paradiso nga ga toro nasona asona. Agu aboro dunduko ‘namanga gupai na mbisimoyo dũ Mbori akpinyemuhe’ nakoda beyo ka zugosi gu paradiso re. (AEfeso 6:6) Rogo gini gene i azugosihe? Niraka yo ringbisihe kuti agu arugute nga ga Ziazia Kekeapai adunga ngburungburu ya, na niyugo yo pai fu kura aboro i mangi kina gu bangisapai re, rogo gi gene re, i kini yambu agu aboro re tipa i ye kadu ti gi bazagino amaku re na yo.—Matayo 28:19, 20; Yoane 15:8.

2, 3. Gine si aida ndikidi aKristano hihe?

² Ono tie, anga pa raka ani rogo gu paradiso nga ga toro nayugo gupai nga, ani zanga fudifudiapai nga gu si aida ani hihe te. Ani kindi nga kpakpa aboro na kini rungo arungo be akaza, be gbinza, na kini kpiki a niyangaraha. Kurii gure, ani nambu ambu be digisidigisi gu sangbaanebi du tipa ‘yangara arame.’ (2 Timoteo 3:1) Agu apai kura aboro arungo behe du wa avura, kuondiko, akaza, angbongi, gbiati gu kura kereapai, aDezire Yekova narungo arungo behe a.—Marako 13:3-10; Ruka 21:10, 11.

³ Kurii agi apai re dunduko, ani ima rugatirani na gupai nga, wa ani avura niraki rogo gu paradiso nga ga toro, agu aboro adunga na ani rogoho ya, i nasoga rani asoga. Yesu aza apefuo ko i banda tiyo niyaa: “Bambiko wa adu nga oni ni aboro zegino ya, mi asia roni asia zegino, si aboro zegino asoga roni ti ni. Oni tíngidi gu pai mi agumba fu roni ya, ‘Moyambu nakia nga susi bairani te.’ Si ngia i arungosi re . . . i arúngosi roni arungosi a.” (Yoane 15:18-21) Anga apai areme kia ti gu nadu re te. Dungu aboro ataruganga tiyo na ngbatunga gaani irisombori te watadu i abinga ha na kikiipaha te. Gu kura aboro nabisirapa rani, nasawia rani, na i nasoga rani a, a wa Yesu agumbaha. (Matayo 10:22) Dedede, aboro namanga asadatise ka imisa rani rogo gbandaka iraira apangbangaa gbiati gbegbere aporopoganda tipa rani rogo aũgbandaka apangbangaa. (Atambuahe 109:1-3) Ii, ani dunduko nagbia tirani agbia na fudifudiapai, na si rengbe ka zeresa kpoto bete rani yo. Wai rengbe ani ka hipai?

4. Wari ani angera ni tipa undo ka hipai?

⁴ Yekova aundo rani aundo. Gu tingidapai naye be ga Mbori toro asa kumba sa dagba bakeke Atambuahe ko kepai ki yaa: “Gbigbitapai namanga ruru boro ngenge; ono Yekova nabatasa ni be he dunduko.” (Atambuahe 34:19; 1 AKorindo 10:13) Dungu rani rengbe ka gumbaha nigaani rengo nga, ho ani akido ni kuti Yekova rogo apai dunduko, ko nafu ome afu fu rani ani hi kereapai. Gu nyemuse du ani nani tipa ko gbiati gu ngbarago moi yo ho ku barabangirani, si naundo rani ani sovura kuti zerakpotoseyo na kuti gunde. (AEbere 12:2) Ngba gi gene re, ka ani vura gbia tirani na kpakarakpakaraapai, ani aru kindi ngutete.

Fugo Mbori Anyakasi Yeremaya

5, 6. (a) Gini kpiaapai du berani nga ga agu airisimbori nahipai? (b) Ginipai Yeremaya agumbaha ho Mbori ayambu ko ni tipa ko mangisunge ninebi?

⁵ Rogo kuru apangbangaa naabaha dunduko, ga Yekova ruru amoyambu aima digo nigbia ngbarago i ki vura du rogo kpakarakpakarapai vurũ. Bete aguyo araki ti agu aregbo Yekova asaringbangaa kuti gbegbere aboro. Boro sa dagba gu ruru amoyambu re angia Yeremaya gbiati agu aboro naaraka ti ragoko, kodihe na agu aKristano nadu rogo bambata sa kama agarã. I akeke gu kuru apangbangaa re rogo Ziazia Kekeapai tipa si ngarasi rani, na ani rengbe arengba ka wirika dungu apai be wisigoho. (ARomo 15:4) Nikpiapai, ani wisiginga gupai nadu tipa Yeremaya.

⁶ Ho Yeremaya aduni niparanga, Mbori ayambu ko tipa ko mangisunge ninebi ringara Yuda yo. Gi sunge re angianga taata sunge te. Dungu aboro naariso kungbo ambori ti gu regbo re. Wa Yosiya nangia bakindo avura du niruru ko ho Yeremaya atona gako sunge ni ninebi, ono tie agu abakindo dunduko nanadia zogarago fuo ko angianga ruru aboro te, na dungu agu anebi gbiati aboromotumo si aida i naayugopai fu aboro, i anasongodanga rengo te. (Yeremaya 1:1, 2; 6:13; 23:11) Ginipai Yeremaya aberẽhe ho Yekova ayani fuko wee ko di sunge nebi kubeko? Kina gunde nazi ko! (Yeremaya 1:8, 17) Yeremaya atingidi gu bambatapai ko agumba ki yaa: “Mi ki ya, ‘Ako Gbia Mbori! Mo ngére, mi aina nga waĩ ka fura te, bambiko mi nga kina paranga.’”—Yeremaya 1:6.

7. Gini apai Yeremaya agbia tiko nani rogo gu ba ko aatungusapai rogoho, na ginipai ko amangihe tipaha?

⁷ Gu rago Yeremaya aatungusapai rogoho adu bakere gbe na kina aboro sakparakpa rogoho, na ko anagbia tiko dedede na kina kere sogote. Ti kura regbo sa, Pasura, nangia boromotumo, ayawa ko na ki kisi ko kurogo angboro. Yeremaya agumba gupai ko aberẽhe kpotokoyo ti gu regbo re niyaa: “Mi ape nga pa ko [Yekova] te, watadu gumba pai berewe ti rimoko te.” Isoke oni nivura berã wa kina gure ti kura aregbo kini kpinyemu ka mbu sunge tungusapai. Oni kparia gupai naundo Yeremaya ko kpatagara kuti tungusapai kindi. Ko ayaa: “[Fugo Mbori adu] kpotore yo wa ka si du nga we kisi yo ku rogo amemere yo, mi ki nimbu be zada ha koyo, ka mi arengba nga . . . [ka hihe] ya.” (Yeremaya 20:9) Ya mo Fugo Mbori namanga kina gupai re ngbaduroniyo?

Abadiangba Yeremaya

8, 9. (a) Ginipai gu nebi nangia Uria angaranga rogoho ya, na gine nangia sangbanaha? (b) Tipagine kpoto Baruka yo azere ti ni, na wai i aundo ko?

⁸ Yeremaya adunga nisako ti gako sunge nga ga fura tipa apai kumbatayo te. Abadiangbako adu kinaho nadu na ko ti ni, na zanga kapa, i aima ngarasa ko nirengo. Ono tie, ti kura aregbo, agi abadiangbako re anamanganga apai rogo tatamana te. Nikpiapai, gu kurako nebi rimoko angia Uria aamangasunge kakaka kaa takapande ga Mbori sapangbangaa kuti Yerusarema na kuti ringara Yuda “wa kina gu [takapande ga Mbori sapangbangaa nangia] ga Yeremaya.” Ono tie, ho Bakindo Yoyakima azinahe ni ya i imi Uria, gu nebi re agunde ki oro ku Ezipeta yo. Pa ora ko ku Ezipeta yo abatasanga ko te. Ga bakindo akumba ado fuo ko koyo, ki zi ko, ki ye na ko ku Yerusarema yo, na ki imi ko. Zanga kapa, gupai re aima fuda Yeremaya bakere gbe!—Yeremaya 26:20-23.

⁹ Gu kura badiangba Yeremaya angia gako bakeapai, nangia Baruka. Baruka angia bawene bafu-undo fu Yeremaya, ono ti kura regbo sa, ko a, ko ambu bi agu apai nadu tipa ko rogo gu gene nangia ga toro. Ko atona kaa kpakanahe niyaa: “Na gbere he fere! bambiko Yekova gbia rungo kuti gi imisiri; mi nambu be gi uko, ka mi abi nga [ba] ongoda ya.” Fuo kpoto Baruka yo zere, ko atona ka bi agu apai nangia ga toro na paha kusende. Wa si avura du wo, rogo nyemuse, Yekova afu gu rugute nga ga tatamana fuko, na ko ki aria gako bipai. Fuo gure tie, Mbori akido ko ya ko abata abata ho i ka gbarasa Yerusarema ni. (Yeremaya 45:1-5) Nairiwo wai si avura ngarasa Yeremaya ka bi gupai nga, Baruka ima unga rogo toroyo berewe!

Yekova Asongodi Gako Nebi

10. Gini afugo nga ga kidohe ka undo Yeremaya Yekova agumbaha fuko?

¹⁰ Gupai nyakipaha gbe nga, Yekova ambunga Yeremaya te. Ko aima rugatiko na gupai nadu tipa gako nebi na ki fu gu ome fuko gbiati undo si aida si du beko. Nikpiapai, ti tonatona ga Yeremaya sunge tungusapai ho ko ayani wee ko arẽnga na gu sunge re te, Yekova aya fuko wee: “Ka mo gúnde nga be yo ya, bambiko mi du na mo ka batasa ro, wo poi Yekova.” Fuo gure, fuo Yekova fu arugute fu gako nebi tipa gako sunge, ko aya fuko wee: “I asó vura [aso] kuti ro; ono i adía nga be ro te, bambiko mi du na mo, ka batasa ro, wo poi Yekova.” (Yeremaya 1:8, 19) Nangbaa agu afugo nafu wasa re! Na kina gupai re Yekova amangihe nirengo.

11. Wai ani aino gupai nga, Yekova aima digiso gako kidohe ka undo Yeremaya?

¹¹ Si ki ta du were, fuo i moi Yeremaya kurogo angboro na ki kusi ko fu aboro i sawia ko gbaiga, ko aya nigako rengo wee: “Yekova . . . na mi wa kikii borosovura; si du abarungosi re akótoka ti ni, i adía nga be re te. I adú na bakere zee.” (Yeremaya 20:11) Rogo agu agarã naye kusa, ho i amangi asadatise ni ka imo Yeremaya, Yekova adu kindi na kina ko, na wa kina Baruka, Yeremaya abati ho i agbarasi Yerusarema ni na kini ra ngbariko, baraho i aimi abarungosi ko ni gbiati agu aboro nabasasangbako watadu i azi yo ki ga na yo ku Babera yo.

12. Ka apai vura duho nga gu nazeresa kpotoraniyo, ginipai si aida ani moihe ku berã rani yo?

¹² Wa kina Yeremaya, dungu aDezire Yekova areme nahi arungosi. A wa ani nigumbaha mbata, bete agi arungosi re naye fu rani mbiko gaani zangarengba, agu akuraha naye mbiko gu vunduvunduapai du rogo gu zegino du ani rogoho, na agu akura naye be agu aboro nasogote gaani sunge tungusapai. Ngbatunga agu arungosi re rengbe ka zeresa kina kpoto boro yo. Wa kina Yeremaya, ani rengbe arengba ka dakuti bakabangirise singia ani rengbe kaa ndu kumbatayo kindi na gaani sunge ke. Nirengo, ani rengbe arengba ka maabangirani ya kpotoraniyo rengbe arengba ka zera ti kura aregbo. Zerakpotoseyo namaa rani ti asada ka bihe singia ani na nyemuse tipa Yekova ke. Sidu tie, ani diberã ka zanga mbu zerakpotoseyo si sa rani ani mbu ga Yekova sunge wa gu Uria ambuhe. Kuba gure, ani wiriki Yeremaya na kidu na kido ya Yekova nikaa undo rani aundo kindi.

Gu Gene Rengbe Ani Rogoho ka Sovura Kuti Zerakpotoseyo

13. Wai rengbe ani ka pefuo gu kpiapai nangia ga Yeremaya na ga Davide?

¹³ Yeremaya anafura na Yekova dedede, kini gumba agu apai fuko nadu ngbadukoyo na kini hõ ome beko. Gupai re nga wene kpiapai tipa ani pefuo ho. Davide, nga gu kumba naraki bakuru kusayo, na nanakido kina kuti gu bangisa Mburu ome re, akepai ki yaa: “Ako Yekova, mo ye turo sa gimi apai; mo kparia nga pa gi makia pai. Gi Bakindo, nga gi Mbori, mo dege turo tipa gi kpe ku ari; bambiko mi nakpara foro.” (Atambuahe 5:1, 2) Agu apangbangaa du tipa ga Davide raka ga Mbori toro adu kugiipa kehe nayugo gupai fu rani nga, wo Yekova anakaragapai kuti ga Davide akpee tipa undo. (Atambuahe 18:1, 2; 21:1-5) Rogo gu gene du wa kina gure, ho du ani ni rogo bakere fudifudiapai watadu rogo gu kpakarakpakaraapai nawira wa omehe ima susa rii omerani, si afu wasa fu rani ka ani aria tirani koyo du Yekova ni nikpee na kini gumba agu apai du ngbaduraniyo fuko. (AFiripoio 4:6, 7; 1 ATesaroniko 5:16-18) Yekova akánga ka degatuko fu rani te. Kuba gure, ko narugusapai bangirani ya ‘ko nangera angera fuo rani.’ (1 Petero 5:6, 7) Ono tie, si dunga niruru berã ka kparakpee fu Yekova na ki zanga degatue fuko te, ya mo ruhe aru wo?

14. Gine nangia asangbana afugo Yekova kurii Yeremaya?

¹⁴ Wai Yekova afura fu rani? Ani wisiginga gupai nadu tipa Yeremaya berewe. Wa duhe nga Yeremaya angia nebi, Yekova anafura nibasa kina ku ngbako. Yeremaya afura tipa gu sangbana Fugo Mbori nadu ngbadukoyo niyaa: “Mi bi gamo apai, mi ki ri he, ga pai ki sa tihe fere ni ngbarago ni gu pai kpotore yo nangi mbiko ho; bambiko i yambu re ti rimoro, Ako Yekova, Mbori nga ga arimbasa ko.” (Yeremaya 15:16) Ii, Yeremaya aduna ngbarago be gu rengo nga, i ayambu rimo Mbori kurii ko, na gu nebi re abi Fugo Mbori na kikiipaha. Sidu, wa kina gu mokedi nangia Pauro, Yeremaya aduna nyemu ka takapande gu pangbangaa i afuhe fuko.—ARomo 1:15, 16.

15. Wai rengbe ani ka sigira afugo Yekova ku ngbaduraniyo, na ginipai nika sa rani ka ani ongonga aonga nani ya?

¹⁵ Yekova afuranga areme nibasa kina ku ngba aboro te. Ono tie, ani na Fugo Mbori berani rogo Ziazia Kekeapai. Sidu, kangia ani nawisigo Ziazia Kekeapai kakaka na kini berẽ dudunguroo kurii gupai ani awirikaha, afugo Mbori kini mo ka sa tihe ‘nipa ngbarago na nigu pai kpotoraniyo angi mbikoho’ a. Na ani rengbe kadu na ngbarago mbiko ani na rimo Yekova rirani ho ani andu ni na agu afugo re fu kura aboro. Ka bangirani gonga ti gu rengopai nga, kina rani sa nga gu yangara aboro duho areme natakapande rimo Yekova ya. Kina gako aDezire sa natakapande gu wene pangbangaa nga ga gako Kindo ko asigiraha na kini yugupai fu bayee aboro tipa wai rengbe yo ka sa tiyo niga Yesu Kristo abawiriki. (Matayo 28:19, 20) Nairiwo gu maku du berani re! Nibipa gu wene pangbangaa Yekova nafuhe fu rani rogo nyemuse re, wai rengbe ani ka onga aonga nani?

Ani Bandatirani ti Gbegbere Kpamiatise

16, 17. Gine nangia ga Yeremaya bipai tipa kpamiatise na kura aboro, na wai rengbe ani ka wirika ko?

¹⁶ Fugo Yeremaya natingida rani na gu kurapai naundo ko ko du na wingbaduse. Ko ayaa: “Mi asunga nga dagba gu rika nga ga airasawia te; mi angi nga a te; mi asungu ni sa re, bambiko bero naadu ti re, bambiko mo ahisi re na imisiri ngbaduse.” (Yeremaya 15:17) Gupai Yeremaya asiaha nga kaa sungo nisako tigu nga ka kpamia tiko na gbegbere aboro i gbarasi riko yo. Kinawo a ani abi apai areme. Bangirani agonga ti agu arugute nangia ga gu mokedi nangia Pauro te nga gu naya “gbegbere kpamiatise nagbarasa wene sino,” zavura gu wene asino a niima du berani tipa dungu agarã.—1 AKorindo 15:33.

¹⁷ Gbegbere kpamiatise rengbe arengba ka mbu gu sino mangaapai nga ga zegino si birikosi gaani aberã. (1 AKorindo 2:12; AEfeso 2:2; Yakoba 4:4) Sidu tie, ani raba gaani tandu berãpai tipa ka rengbe ka kparia gbegbere kpamiatise na ki nehe rogo apai dunduko. (AEbere 5:14) Wa ka i niya Pauro areme ti unga auru kpotosende, ginipai oni aberã ya si ka ko agumbaha fu gu Kristano nangana wasiwasi asinima watadu gu nga ga zuũ watadu agu ambaro nga ga zuũ? Gini arugute ka ko nifuhe fu gu wirina nazio bakure rogo Internet na agu aboro ni ainonga yo wa gu tooni ya? Ginipai ka ko berẽhe tipa gu Kristano nadia dungu asaa kupati ngi ambaro rogo vidio watadu kaa ngana terevizioni ono ki zanga wene sino nga ga wisigopai nisase?—2 AKorindo 6:14b; AEfeso 5:3-5, 15, 16.

Oni Nye Kina Rogo gu Paradiso Nga ga Toro

18. Gine nika undo rani ani nye nyanyakii rogo toroyo?

¹⁸ Ani nabi gu gaani paradiso nga ga toro na kikiipaha. Anga he ho nawiraha areme rogo zegino wa gu tooni te. Zavura agu aboro adunga na ani ti gaani idapase ya, i nafura afura tipa gu nyemuse, berãpa kura aboro, gbiati weneringise ani nga aKristano ayugoho fu akuarani. (AEfeso 4:31, 32) Wa apai navura du tipa rani were, ani naida ka sovura kuti zerakpotoseyo susi gu ani naasoho mbata. Kpamiatise na wene sino aboro, kparakpee, gbiati wene wisigopai rengbe arengba ka undo rani ani nye nyanyakii rogo toroyo. Si nika undo rani ani sovura kuti asada kidu na kido nga Yekova aundo rani aundo.—2 AKorindo 4:7, 8.

19, 20. (a) Gine nika undo rani ani hipai? (b) Ada ke yo gu papara kekepai naye fuo gere fuyo, na ada a si ka ngba angba tiyo?

¹⁹ Si aidanga ani mbu agu aboro nasoga gu gaani pangbangaa nga ga Ziazia Kekeapai i gundesi rani na ki rungburasi gaani idapase te. Wa kina agu akare narungosi Yeremaya, agu aboro nasovura kuti rani, anga ani i asovura kuti rani te, Mbori du nzunzu i asovura kutiko. I adunga na diabese te. Yekova, nga gu boro ima nyaka gbe kisusi avura rani, naya fu rani wee: “Mo súngudi Yekova; mo dú nyanyaki, kpotoro yo ki ngarã; ii, mo súngudi Yekova!” (Atambuahe 27:14) Fuo du ani na maabangirise kuti Yekova nga gu maabangirise du tarãha nyanyakii ngbaduraniyo, ani adiaberã tie ka zanga mbupa manga gupai ruaru. Ani dunga na gu kido nga, ani ake zuzu gaani sunge ake ka omerani abatanga ya wa kina Yeremaya na Baruka.—AGaratio 6:9.

²⁰ Pa sovura kuti zerakpotoseyo nga gu vura dungu aKristano asoho zanga piriga. Ono tie, paranga aboro gbe ni agu aboro nagbia tiyo ti kparakpara a’asada. Ono i a na dungu amamu beyo. Ke yo gi papara kekepai naye fuo gere tipa agu aparanga du dagbarani. Si angba angba a ti avunguagude na ti gu sosono aboro dunduko naima kpara gayo raka fu Mbori du rogo dungurati, nga agu aboro du rogo wene ba ka undo aparanga nigayo afugo, nigayo kpiapai, na ka songoda yo.

Gaoni Karagapai Nga Gine?

• Tipagine rengbe ani arengba ti ni ka maabangirani ya kpotoraniyo azera azera ti kura aregbo, na da si aida ani ngere kubeni tipa undo?

• Wai Yeremaya adibe zerakpotoseyo wa gako sunge avura du nikpakarakpakaraha vurũ?

• Gine nika ye na ‘ngbarago’ ku ngbaduraniyo zavura ho du ani ni rogo fudifudiapai vurũ?

[Gu kpiahe du ti kpewaraga 19]

Yeremaya aberẽ gupai nga, ko adu kindi nitooni gude na ki zanga inohe tipa ka mangasunge ninebi

[Gu kpiahe du ti kpewaraga 20]

Zavura ho i aarungosi Yeremaya ni, ko aima ino gupai nga, Yekova adu na kina ko “wa kikii borosovura”