Sosono Akristano Nga Kikiipa Aboro Rogo Gaani Kodatise Nga Ga Awirina

‘Agu aboro rũ yo yo rogo ga Yekova bambu, i nikaa zúka ti rago gbinza yo kindi.’—Atambuahe 92:13, 14.

1. Wai dungu aboro abi sosono aboro?

YEKOVA nakpinyemu gako ruru amoyambu dunduko, kodiyo na gu gbinza yo. Ono tie, ringbisihe kuti gu wisigopai gu zogarago nga ga Amerika amangihe, ya rogo agarã nibasasa, aboro namanga gbegberee fu sosono aboro du bangeyo mbembedii kuti bebere mirioni watadu kaa taka yo. Agu apangbangaa du wa kina gure rogo kura arago rogo zegino, nayugo gupai nga, pa manga aboro gbegberee fu sosono aboro, nigu fudifudiapai rengbe na arago dunduko rogo zegino. Gupai du nitarã gipai re nga gupai riigbu sa ayambaha nga, “gu sino berã moipai dagba dungu aboro . . . nga sosono aboro ima raka kisusi gu regbo rengbe yo ka fu undo fu aboro, ya wiri sunge berewe tiyo te na i nakido kina kube aboro tipa aboro naaundo yo rogo dungu apai.”

2. (a) Wai Yekova abi gu gako ruru amoyambu nga sosono aboro? (b) Gini ringbisapa aboro nafu wasa fu rani ani abihe rogo Atambuahe 92:12-15?

² Yekova Mbori nabi gu gako ruru amoyambu nga sosono aboro na kikiipayo. Ko namaaberã ko kuti ‘gu bororani du ku dimo yo,’ nga agu apai du tipa rani rogo toroyo, angianga agu apai du ti bororani kuzagi ya. (2 AKorindo 4:16) Rogo Fugo ko, nga Ziazia Kekeapai, ani nabi agu afugo yo nafu wasa fu rani nayaa: “Ruru boro nazuga wa sikisa [“wa katakpa tamuru,” NW], ni nasona wa ngua kedara Rebanona yo. Agu yo rũ yo [yo] rogo ga Yekova bambu i nazuga rogo agu avurukporo nga ga gaani Mbori. I azúka ti rago gbinza yo kindi, i ahi be tomehe ki nifuna, ka yugo ho ya Yekova du ni ruru ko.” (Atambuahe 92:12-15) Pa wisigo oni agi averesi re nika yugo apapara gu kikiipa pai rengbe oni nga sosono aboro ka mangaha tipa agu awirinaroni nga aKristano.

“I Azúka ti Rago Gbinza Yo Kindi”

3. (a) Tipagine i aringbisapa ruru aboro ti ni kuti katakpa tamuru? (b) Wai rengbe sosono aboro kaa ‘zuka kindi ti rago gbinza yo’?

³ Fugo bake papara Atambuahe naringbisapa ruru boro kuti katakpa tamuru, nga gu ngua du wa sikisa du kpiaha bebere waraga re, nga gu ‘rũ yo ho rogo gu vurukporo nga ga gaani Mbori.’ Gi ruru aboro re ‘nazuka kindi ti rago gbinza yo.’ Ya mo oni aidanga kuti gupai nga, gi berã re nangarasa rani nirengo tee? Angua tamuru angia agu angua nanirundu diiri ki rengbe na avurukporo rogo aringara ku Uroyo, nga agu aringara Ziazia Kekeapai afura tipaha. Kuriipa fonga ahe na akpehe, geno gi ngua re aima kio a tipa agu azuzuhe du zoozoo. Gu kura anguaha nanye kaa zuka kindi tipa agarã susi kama sa.a Nikpatagara oni kindi kuti ndikidi irisombori, oni rengbe arengba a “kaa zuka zuzu ahe rogo wene mangaapai dunduko.”—AKorosaio 1:10, NW.

4, 5. (a) Gini nyanyakipa zuzuhe si aida aKristano zukuhe? (b) Oni funga kpiaapai rogo Ziazia Kekeapai tipa agu aboro nazuku gu ‘zuzu ahe nga ga ngbaa.’

⁴ Yekova namaabangiriko nga aKristano nika ‘zuka gu zuzuahe nga ga ngbaa,’ nga agu afugo i agumbaha ka sambuo ko nani na tipa gako ringbisapai. (AEbere 13:15) Ya mo gipai re wo tipa roni nga sosono boro? Ii, wo duhe nirengo.

⁵ Ziazia Kekeapai na kpiaapai rogoho tipa gu sosono aboro namangi dezirepai tipa rimo Yekova na tipa gako ringbisapai zanga gunde. Ani dinga Mose nikpiapai, garãko aima susa “70” ho Yekova afu sunge ni fuko nigako nebi na nigu boro nikaa fura kubako. (Atambuahe 90:10; Gate 4:10-17) Gbinza akanga na gu nebi nangia Daniere ti manga dezirepai zanga gunde tipa Yekova ya ko nga bakerepa gbia te. Si nawira garã Daniere aima susa kugii 90 yo ho Beresasara ayambu ko ni ko ye ka sakarogo gu iiriwo kekepai nadu ti vurobambu. (Daniere, kapita 5) Na ginipai tigaha namangi tipa gu gbinza mokedi nangia Yoane? Nimbedi kuti digido gako dungu agarã kuti wene ruru mangasunge, ko abi tiko bambukiso yo rogo gu kisanga nangia Patemo “mbiko gu pai nga ga Mbori na gu dezire pai nga ga Yesu.” (Yugoti 1:9) Si nawiraha gbe nga, oni rengbe arengba ka tingidapa agu aboro du payo rogo Ziazia Kekeapai nga agu aboro nazuku gu ‘zuzuahe nga ga ngbaa’ i nagbinza.—1 Samuere 8:1, 10; 12:2; 1 Abakindo 14:4, 5; Ruka 1:7, 67-79; 2:22-32.

6. Wai Yekova namangisunge na “gbinza aboro” i fura tipa apai kumbatayo rogo gi yangara areme re?

⁶ Wa gu mokedi nangia Petero aadia fugo gu nebi ni Ebere nangia Yoere ka gumbaha, ko ayaa: ‘Ya Mbori wee, si adu wa gere ti yangara arame, mi auka torore kurii aboro dunduko, [kodihe na “gbinza aboro”] tipa i nifura tipa apai kumbatayo.’ (Amokedi 2:17, 18; Yoere 2:28) Na ngbanyaa kuti gipai re, rogo gi yangara areme re, Yekova ima mangasunge na gu sosono aboro du rogo gu riko nga ga mbedimbedi aKristano gbiati aguyo du dagba “kura akandoro” i takipande gako ringbisapai. (Yoane 10:16) Bete aboro dagba agi amoyambu re aima digo nizuku gu zuzuahe nga ga Kindo tipa dungu agarã.

7. Oni yugu wai na kpiapai sosono aboro andu kindi kumbatayo kaa zuka gu zuzuahe nga ga Kindo i ki vura nimbu be asigaro nga ga gbinza vurũ.

⁷ Ani wisiginga gupai du tipa Sonia, nga gu dee naima digo nitungusipa Kindo ti aregbo dunduko tona rogo 1941. Wa ri avura nisota tipa gbanga regbo na bangabanga kaza, ri ananungusa wisigopai anungusa na aboro rogo Ziazia Kekeapai kpuri yo. Sonia nayaa: “Tungusa wene pangbangaa nga papara gimi raka. . . . Nirengo, mi ima saha nisino re. Ka mi mbunga ha wagusa te.” Bambeda kusayo, Sonia na unvurari nga Olive, ape gu pangbangaa du rogo Ziazia Kekeapai nga ga maabangirise fu dee nga Janet, nga gu dee naawoka sa kpio i agbia ri rogo bambu sungudo munganga bambungua yo. Navungu Janet nga gu dee naima fu tiri tipa irisombori kakaka kua Katoriko yo. Ngbari azere ka bi gi ngbatunga nyemuse aSonia ayuguhe fu wiiri nga Janet re, si ki sa ri ri idipa wisigo Ziazia Kekeapai na awirina kpuri yo, na ri nasona awere wenengai rogo gari wisigopai. Ya mo oni rengbe ka mangasunge na gu mamu ka kuru fu roni wa kina gure tipa ka zuka gu zuzuahe nga ga Kindo?

8. Wai gu sosono bakumba nangia Kareba ayugu gupai nga, ko aakido kuti Yekova, na wai rengbe sosono aKristano ka wirika gako kpiapai?

⁸ Nikpatagara sosono aKristano kindi kuti sunge tungusapa Kindo ngangaraa, i ki vura kaa rungo be agu asigaro nga ga gbinza vurũ, gure nga i napefuo gupai gu ruru Yisaraere nangia Kareba amangihe, nga guko nanapefuo Mose ngbakungbo yo kindi tipa agarã biama bawe. Garã Kareba adu nga 79 ho ko asi Yaradene ni kurogo Ringara Mokido. Wa ka ko angia gu boro, ka ko aima ndu ka ongoda fuo ko sovura tipa agarã sita dagba agu akurako abanzengere nangia aYisaraere nangia abadibevura. Ono tie wo ko amangihe te, ko asanahe niwingbaduse ya i idihe fuko ko ndu ka sovura tipa ka zio agu “abaakporo [nadu] ni babakere he na angapa pati he” nadu rogo gu ringara agangara nadu Yuda yo, nangia gu dagbarago gu diangbadiangba aboro i anayamba yo nga aAnaka anaraka rogoho. Mbiko gu undo Yekova afuhe, Kareba ‘ado yo yo, a wa Yekova agumbaha.’ (Yosua 14:9-14; 15:13, 14) Wa oni andu kumbatayo kindi kaa zuka gu zuzuahe nga ga Kindo ngba gbinza roni, oni du na gu kido nga, Yekova na kina roni a wa ko aduna Kareba. Na ka oni nye kindi nikina ruru roni, ko afu ba afu fu roni rogo gu vovo zegino kido ko he tipaha.—Yesaya 40:29-31; 2 Petero 3:13.

‘I Anye Kini Funa Kindi’

9, 10. Wai sosono aKristano anye kindi ngangaraa rogo gayo idapase na ki nye kindi ngangaraa rogo toroyo? (Oni bi gu sanduki du ti kpewaraga 11.)

⁹ Wa bake papara Atambuahe aagbeberã aboro kuti gu sunge nga ga ga Yekova sosono amoyambu, ko abibia ki yaa: “Ruru boro nazuga wa sikisa [“wa katakpa tamuru,” NW], ni nasona wa ngua kedara Rebanona yo. Agu yo rũ yo [yo] rogo ga Yekova bambu i nazuga rogo agu avurukporo nga ga gaani Mbori. I azúka ti rago gbinza yo kindi, i ahi be tomehe ki nifuna.”—Atambuahe 92:12, 14.

¹⁰ Wai rengbe oni ka banda gaoni ngara rogo toroyo oni ki vura nigbinza vurũ? Gu memepai nasa ngua tamuru si du nifunafunaha ti aregbo dũ nga gu ime si anyoraha sandeyo. Teketeke wa kina gure a, oni rengbe ka gbia agu ahe nikaa songoda roni nimbira oni agu aime nga ga rengo du rogo Ziazia Kekeapai niwisigo oni he na nikoda oni tironi na agu aboro du rogo ga Yekova riigbu. (Atambuahe 1:1-3; Yeremaya 17:7, 8) Gaoni ngara rogo toroyo nasa roni nikikiipa aboro fu akuarani aidipase. Oni kparianga wai gipai re ada nirengo tipa gu gbinza Gbiamotumo nangia Yoyada.

11, 12. (a) Gini nyanyakipa pai Yoyada amangihe du paha rogo gu kuru pangbangaa du tipa gu kindo nangia ga Yuda? (b) Wai Yoyada amangisunge na gu ome nadu beko ka songoda ndikidi irisombori?

¹¹ Si nawira garã Yoyada aima susa sa kama ho Nakindo Ataraya azi gu zogarago ni kuberi ngbaome nangia ga Yuda na ki iimi agu agude nangia kina boro ndikidi atitari. Gine ka gu sosono bakumba nangia Yoyada re arengbe ka mangaha? Yoyada gbiati diako aoko Yoasa yekaru yo tipa agarã sita, nga gu gude nangia gu yangara dikumbo nadu ti unga. Fuo gure, ho garã Yoasa adani ti saba, Yoyada akusi ko ba gbuko yo ki takipande ko nivovo bakindo na ki imi Ataraya kusayo.—2 Pekapai 22:10-12; 23:1-3, 15, 21.

¹² Fuo du Yoyada nigu boro naabanda gi bakindo re, ko amangisunge na gu ome nadu beko ka songoda ndikidi pambori nani. Ko ‘amangi zungahe dagba ko na aboro dunduko gbiati bakindo a, ya i nika du kindi niga Yekova aboro.’ Ni irisa gu zinahe Yoyada azinaha, aboro aguari ki gburuwa gu bambu iriso kungbo mbori nangia Bara na ki gburuwa gaha angbama, seke-seke kpiaahe, na ki do aboromotumo kusayo ti sunge. Mbiko agu arugute Yoyada afuhe fu Yoasa, si du ko aguari ti ni ka karaga gu sunge kubaha i anamangaha tii yekaru yo na ka mbakada agu apaparaha nagbere. “Yoasa amangi agu apai naru aru bangiri Yekova ti arameko dunduko, nga agu apai Yoyada boromotumo arugu ko kuti ni.” (2 Pekapai 23:11, 16-19; 24:11-14; 2 Abakindo 12:2) Ho Yoyada akpi ni garãko nada ti 130, i afu gu kparakpara irisa fuko nga ga kpisido ko dagba mura abakindo yo mbiko “ko amangi wenepai ringara aYisaraere yo, fu Mbori na tipa [ga Mbori] bambu a.”—2 Pekapai 24:15, 16.

13. Wai rengbe sosono aKristano ka ‘manga wenepai fu Mbori na tipa gako bambu’?

¹³ Isoke si vura du nga oni gu du adu poporopoporo watadu kura apai gu duho naumbasi bakio gupai rengbe oni ka mangaha ka turuso ndikidi irisombori. Ka si vura du nga wo duhe, oni rengbe arengba kindi ‘ka manga wenepai fu Mbori na tipa gako bambu.’ Oni rengbe arengba ka yugo gaoni ngara tipa gu ga Yekova bambu nga ga toro, nidu oni pati agu adunguratise nga ga dungurati dedede na kini karagapai na kini tungusipai ti agu aregbo rengbe oni ka tungusaha. Padu oni na nyemu ka irisa agu arugute nga ga Ziazia Kekeapai gbiati nyemu songoda ‘ruru kangara moyambu’ na ka songoda dungurati nika nyakasa agu awirina nga aKristano wa du yo nibadona. (Matayo 24:45-47) Oni rengbe arengba a ka ngarasa akuaroni airisimbori “kuti nyemuse na wene mangaapai.” (AEbere 10:24, 25; Firemona 8, 9) Na oni afu undo a fu kura aboro ka oni mangipai na ngbanyaa kuti gu ga Pauro arugute nayaa: “Sosono akumba rugu gu nyemuhe du kpotoyo yo ki du ni airanyaka, ni airarugatise, ki du nzunzu [“kidu nyanyakii,” An American Translation] rogo idapase yo, rogo nyemuse yo, rogo zadapai yo. Sosono ade a wo, i du na zee, ka i adú nga ni airasoapai ya, ka i fú nga tiyo fu bakere buda ya. I du ni ayugu gu pai ngba angba.”—Tito 2:2-4.

14. Gine agu aKristano nga ababiapai naima digo nimangisunge tipa gbanga regbo narengbe ka mangaha tipa ka zugosi ndikidi irisombori?

¹⁴ Oni aima digo nimangisunge nigu bakumba nga ga dungurati ko tipa dungu agarã? Ka si du wo, oni irisi agu arugute tie gu bakumba nga ga dungurati ko naima digo nimangisunge tipa dungu agarã agumbaha ki yaa: “Oni mangisunge zanga gbangbati na gu tatamana oni agbiaha wa oni asona. . . . Oni fuku kura asunge fu kura aboro, na oni ki kpara bete gaoni inohe fu agu aboro naidaha. . . . Oni asadi ka ino gupai rengbe kura aboro ka mangaha. Oni sonosi gu inohe du beyo tipa manga gupai re na ki kiisihe. Oni mbakaditironi tipa raka kumbatayo.” (Pa Fu Rugute ni Ue he 3:27, 28) Gu ndikidi nyemu agu apai du tironi rogo gu sunge nga ga Kindo nazugo kina kumbatayo, nika ye na dungu amaku fu gu kura awirinarani nga aKristano.

‘Oni Gumba Gupai fu Aboro Nga Yekova Niruru Ko’

15. Wai sosono aKristano ayugu gupai nga, ‘Yekova niruru ko’?

¹⁵ Gu ga Mbori amoyambu nga sosono aboro, i namanga gayo asunge na ngbarago tiyo kaa fura fu aboro ‘ya Yekova niruru ko.’ Kangia oni nga sosono Kristano, agu afugo oni agumbaha na agu apai oni amangaha rengbe ka yugo gupai nga, ‘Yekova nga gaoni mbia, adunga irairapai tiko ya.’ (Atambuahe 92:15) Ngua tamuru namanga dezirepai kukiri tipa asino Bakusihe, nga agu asino adunga be kura boro ya. Ono tipa roni nga sosono aboro, Yekova ima fu gu mamu fu roni nga oni mangi dezirepai tipa ko fu agu aboro nadia ndikidi irisombori awere kugume. (Pa Fu Rugute ni Ue he 32:7; Atambuahe 71:17, 18; Yoere 1:2, 3) Tipagine du gipai ti ni re ninyanyakipa pai?

16. Gini kpiapai rogo Ziazia Kekeapai nayugo nyakapa ‘fura tipa Yekova ya ko niruru ko’?

¹⁶ Ho gu ga aYisaraere barumbatayo nangia Yosua ‘agbinza ni dungu agarã ki saki ko,’ ko ‘ayambu aYisaraere dunduko, na gayo abaakumba na gayo abazogo na gayo abasapungbangaa, na gayo abarumbatayo’ koyo du ko ni tipa ka tingida yo na pa ga Mbori ruru mangaapai. Ko ayaa: “A nga wenepai nakpa sa dagba agu apai dunduko Yekova gaoni Mbori akido pa ha fu roni te; si amangi dunduko fu roni, a nga pai sa nakpa te.” (Yosua 23:1, 2, 14) Agi afugo re anyakasi ga aboro berã tipa bete regbo i nye niruru yo. Ono tie, fuo kpio Yosua, ‘gu kura riko ngbatungayo akuru, nga aguyo naainonga Yekova ya, na naainonga agu apai ko anamangaha fu aYisaraere a ya. Awiri aYisaraere kini mangi agu apai nadu nigbigbitaha bangiri Yekova, na kini mangipa aBara.’—Abasapungbanga 2:8-11.

17. Wai Yekova namangisunge na gako aboro rogo gi gaani regbo re?

¹⁷ Gu kakuti ruru mangaapai nga ga agu aboro du rogo gu dungurati nga ga aKristano du areme arunga riipa agu afugo ga Mbori sosono amoyambu agumbaha te. Ono, wa vura duhe wo, gaani idapase kuti Yekova nanyaka ho ani agia agu apangbangaa ni kina boro airaha nigumbaha tipa gu “iiriwo apai” Mbori namangihe tipa gako aboro rogo gi yangara areme re. (Abasapungbanga 2:7; 2 Petero 1:16-19) Kangia oni aima digo nikodi tironi na agu aboro du rogo ga Yekova riigbu tipa dungu agarã, oni rengbe arengba tie ka tingidapa gu regbo bange atakipande Kindo adu gbua tooni rogo gaoni dagbarago watadu rogo gaoni ringara watadu gu regbo aboro aasoga gaoni sunge tungusapai kakaka. Niyangaraha tie, oni bi gupai nga, Yekova ima dia kura apai kusayo nga gu naakiso gene fu roni na ki ‘ngeesi’ bange abatungusipai. (Yesaya 54:17; 60:22) Oni ima bi wai i naziasi agu arengo nga ga Ziazia Kekeapai na ki bi gu mbakadapai namanga tooni tooni rogo gu ga Mbori riigbu i abihe abi. (Asanza 4:18; Yesaya 60:17) Oni nagbata gene ka sonosa kura aboro nikpara oni bete gaoni inohe fuyo nga gu gaoni inohe du na pagume dagbaha na ga Yekova ruru mangaapai? Nangbaa wai ka gipai re du na wene sangbanaha kurii agu awirinarani nga aKristano!

18. (a) Oni yugungo gu sangbanapai na kpiapai rengbe ka manga gizo be tingida aboro na gupai nga, ‘Yekova niruru ko.’ (b) Wai kina boro oni nitironi naini pai tipa ga Yekova ruru mangaapai?

¹⁸ Ginipai rengbe oni ka gumbaha tipa agu aregbo oni abi gupai rogoho nga, Yekova angere fuo roni rogo nyemuse tipa agu apai nadu tipa kina boro oni? (Atambuahe 37:25; Matayo 6:33; 1 Petero 5:7) Sosono wirinarani du rimori nga Martha anangarasa kura aboro niyaa: “Ka kina ginipai vura manga roni, ka oni ya mbunga Yekova ya. Ko asongoda roni asongoda.” Agi arugute re aduna wene sangbanaha ti ni kurii dee nga Tolmina, nga dee sa dagba agu aboro Martha ananungusa wisigo Ziazia Kekeapai na yo, na ri azi bapatiza rogo tonatona agu agarã nangia ga 1960. Tolmina natingida gupai nga: “Ho kumbaami akpi ni, rago agbere tire bakere gbe, ono agu afugo re asa re ka mi kpanga ti adunguratise kandara bara sa ya. Na Yekova aima nyakasa re nirengo mi naandu kindi kumbatayo.” Tolmina anafu kina gu bangisa arugute re fu agu aboro ri naawisigo Ziazia Kekeapai na yo vuru agu agarã susi. Nirengo, ningarasa oni kura aboro na kini pepa ga Yekova ruru mangaapai fuyo, oni rengbe arengba ka mangaapai bakere gbe rogo sonosa ga akuaroni idapase.

Yekova Nabi Gako Ruru Sosono Amoyambu na Kikii Payo

19, 20. (a) Wai Yekova abi gu mangaapai nga ga gu gako amoyambu nga sosono aboro? (b) Gine ani ka wisigoho rogo gu papara kekepai naye fuo gere?

¹⁹ Gu zegino du areme, adunga sino tambuahe ti ni ya, angeranga fuo sosono aboro bakere te. (2 Timoteo 3:1, 2) Ho aboro atingida pa sosono aboro ni, i natingidaha dedede tipa kina gu kuruapai i amangihe mbata, angianga ada nga yo ya. Ni gupai dukia ti gure, Ziazia Kekeapai nayaa: “Mbori ni iraira ko te. Bangiriko ago nga ti gaoni sunge te, na ti gu nyemuse oni ayugu ti rimoko, na ti gu pai oni amangi fu gako aboro, a wa oni namanga pa yo awere kindi.” (AEbere 6:10) Rengo ngaha nga, Yekova Mbori natingidapa gu kuru ruru apai atingida oni amangihe. Ono pa roni gu kii akio bangiriko tipa agu apai oni amangaha kindi wa du rago re rogo gako sunge. Ii, ko nabi sosono aKristano ni agu aboro nazuka azuka, du wenengai rogo toroyo, ni ngangara aKristano, niunga dezirepai tipa gako ome.—AFiripoio 4:13.

²⁰ Oni nabi gu sosono aboro du dagba akuarani aKristano wa gu Yekova abi yo? Kangia wo duhe, pai afõngbaduroniyo afõ tie oni kpinyemu yo. (1 Yoane 3:18) Gu papara kekepai naye fuo gere nika yugo agu agene rengbe ani rogoho ka yugo nyemuse fuyo na ka ngera fuo yo na gayo azingo.

[Gu rukutu kekeapai du bandu kpewaraga yo]

Gaoni Akaragapai Nga Gine?

• Wai sosono aboro ‘azuka’?

• Tipagine du gu ngara rogo toroyo nga ga sosono aKristano ti ni niguhe nafu undo?

• Wai rengbe sosono aboro ka fura tipa Yekova ‘ya ko niruru ko’?

• Tipagine Yekova abi gu gako amoyambu naima digo nimangisunge tipa gbanga regbo ti ni na kikii payo?

[Gu kpiahe du ti kpewaraga 17]

I Abasanga Pa Gari Azingo Te

Ho kaza angbundasi Ada ni ku kpuri, nga sosono Kristano du garãri 85 naraka Australia yo, agu abaakumba nga ga dungurati yo ambakadipai tipa kaa fu undo furi. I ambakadipai tipa gu badona awirina narengbe ka fu undo furi. Agi awirina re aduna ngbarago ka manga agu asunge nadu wa girisorago, zunda ahe, manga riahe, na kekeda ri yo.

I atona fu gu undo re mbata fu agarã wa bawe kusayo. Daa ku awere, aDezire Yekova du bangeyo wa 30 nafu tiyo kindi kaa undo Ada. I nandu kindi kaa bi ri, kini gedi agu abuku du mburuhe rii Ziazia Kekeapai furi, kini gumbapa gu sonakumbatayo furi agu aboro du rogo dungurati amangaha, na kini kparikpee na ri dedede.

Bakumba sa nga Kristano rogo gayo dungurati ayaa: “Agu aboro nangera fuo Ada, i nabihe nimamu ka undo ri. Dungu aboro gu gari ruru sunge ri amangihe vuru dungu agarã afõngbaduyo yo, sidu ka si arunga fuyo i basapa undo ri ya.”

[Gu kpiahe du ti kpewaraga 9]

Sosono aboro nazuka gu wene zuzuahe nga ga Kindo

[Gu kpiahe du ti kpewaraga 12]

Gu ngara rogo toroyo nga ga sosono aboro, niguhe nafu undo

[Gu kpiahe du ti kpewaraga 12]