Pa Ngerakuriisunge Tipa Ka Digiso Ga Mbori Ringbisapai

“[Mbori] namanga pai dunduko kina ku sangba gu berã yo nga ga [a]gu apai ko akpi nyemu he.”—AEFESO 1:11.

1. Ndu gupai agu adungurati nga ga aDezire Yekova dunduko nika manga dunguratise ti ni rogo Zerekpe ti rameru 12, 2006, nikangia gine?

RAGO BIATA SUNGE nyemu, rogo Zerekpe 12, 2006, aboro bangeyo nikadu mbembedii wa amirioni 16 nika dunguratiyo kurogo aba nibasasa ka tingidapa Ga Gbia Riahe Nga ga Nyemu. Rogo aba dunguratise nibasasa, i amaa mbisa rogoho nga gi i nika maa gu kpakuto riihe adunga na agbooro rogoho ya, nga gu kpakuto narukuba kpoto Kristo, na zamba gu imekakue narukuba gu kureko nauka. Mbembedii kuti digido gu gumbapai nga ga sakarogo pa Tingidapa Kpio Yesu yo, gu kpakuto narukuba kpoto Yesu gbiati gu imekakue narukuba kureko, i afuhe si tanga ngbabe agu aboro dunduko nikadu pati dunguratise. Kina rogo umba bange adungurati gbua nga ga aDezire Yekova, boro kadu ni kandara sa watadu susi sa dagba agu aboro nikadu pati dunguratise, nika ri gu kpakuto re na ki mbiri gu imekakue re. Ono rogo dungu adungurati, boro adunga ho sa kandara sa nika ri kpakuto na ki mbiri imekakue te. Tipagine duhe ti ni nga kina bete aKristano gbua, nga aguyo duna maabangirise tipa raka ngbangbaturũ yo, nari kpakuto na kini mbiri imekakue, baraho gu badunguyo duna maabangirise tipa raka auru kpotosende nyeanye kindi aringa kpakuto ni na kini mbiri imekakue ya?

2, 3. (a) Wai Yekova atona ka kusaahe ringbisihe kuti gako ringbisapai? (b) Tipagine Yekova akusi kpotosende na ngbatunga aboro ti ni?

² Yekova nga gu Mbori namanga aringbisapai. Rogo gako digiso ringbisapai yo, ko “namanga [a]pai dunduko kina ku sangba gu berã yo nga ga [a]gu apai ko akpi nyemu he.” (AEfeso 1:11) Ko akusi bangisa Wiriko nibambatapai. (Yoane 1:1, 14; Yugoti 3:14) Fuo gure, nimanga Yekova sunge rogo Wiriko yo, ko akusi agu awiriko nga atoro, na niyangaraha ko ki kusi gu zegino i abihe abi, nakoda kpotosende na gu ngbatunga aboro du auruhe.—Eyobo 38:4, 7; Atambuahe 103:19-21; Yoane 1:2, 3; AKorosaio 1:15, 16.

³ Yekova akusanga kpotosende ki kusi aboro kurogoho ni asadapai ka bihe singia i arẽ tipa ko kodiyo kuti gu gako aborokporo nga agu awiriko nga atoro du ngbangbaturũ yo te, wagu agu akanisa naayugoho i aya tipaha wee si nga ga aKristano. Ono tie, ko akusi kpotosende na ziazia ringbisapai bangiriko, “ko ambakadi he aboro niraki rogo ho!” (Yesaya 45:18) Mbori akusi kpotosende tipa ngbatunga aboro na ki kusi ngbatunga aboro tipa i raki auru kpotosende. (Atambuahe 115:16) Zegino naabaha dunduko si aaida si dani paradiso, ki hi be ruru aboro, nga aguyo kaa sopabino rogoho na kini ngerefuoho. Yekova afunga gu maabangirise fu gu bambata aboro ue nangia arogotise nga i raki auru kpotosende tipa bete regbo fuoho i ki ga ku ngbangbaturũ yo te.—Bambata Pai 1:26-28; 2:7, 8, 15.

Satana Atikango ga Yekova Ringbisapai

4. Wai kango atona tipa ga Yekova bakere pagbia ti kina boro tonatona ga ngbatunga aboro raka?

⁴ Wiri Mbori nitoro asamungu kutiko ki diberã ka gbarasapa ga Yekova ringbisapai, kini gbarasipa gu gamahe nga ga siapai nisase Yekova afuhe fuko. Ko agbarasipa gu zereda naye tipa agu aboro dunduko nayugo gu ranigose nga ga nyemuse tipa ga Yekova bakere pagbia. Satana naangbembatayo fu gu bambata arogotise nadu ue i tona gu gene raka nga ga ranirii zanga Mbori. (Bambata Pai 3:1-6) Ko atinga kango gupai nga Yekova na bakere ome tiko te, ono ko amoi gu gene Yekova amangasunge na gako bakere pagbia ngbaha rogo sanahe, na fuo duhe wo, ko ki ti kango ga Yekova rengo ka zoga aboro ngba ruru gene. Sidu, gu nyanyakipa ngbangaa du tipa ga Yekova bakere pagbia ka zoga aboro ki tona ti gipai re auru kpotosende no, ti kina boro tonatona ga ngbatunga aboro raka.

5. Gini ngbangaa i akusihe berewe niuehe, na ga ada idapase kango adu tipaha nisangbanaha?

⁵ Gu kura ue ngbangaa koditihe kuti gu nyanyakipa ngbangaa du tipa ga Yekova rengo ka zoga haurago, si nga gu Satana akusihe ti rago Eyobo. Satana aduna kapa tipa ndu gu mangaapai nga ga agu aboro Yekova akusi yo, nibipa gayo ranigose Fuko gbiati gayo sunge Fuko. Satana akusi gupai nga, aboro nairiso Mbori kinaho ko afu ahe ni fuyo, ono ka i du rogo asada, i asamungu asa kutiko. (Eyobo 1:7-11; 2:4, 5) Wa si avura du nga, Satana agumba gipai re tipa boro sa nangia ga Yekova moyambu, gi kango re akodi agu awiri Mbori a nga atoro, zavura bangisa Wiri Yekova a.

6. Wai Yekova ayugu go padu ko niruru ko kuti gako ringbisapai na kuti rimoko?

⁶ Nidu Yekova niruru ko kuti gako ringbisapai na kuti rogo gupai yo rimoko ayugoho, ko asa tiko kadu ni Nebi na ni Batasi.a Ko aya fu Satana wee: “Mi amáa sogote dagba roni na de, dagba atitaro na atitari a; ko ki mburu riro, mo ki mburu gidako.” (Bambata Pai 3:15) Rogo gu Tunga yo nga ga gako “de,” watadu gu papara gako riigbu nga ga ngbangbaturũ, si adu nga Yekova nika karagapai kuti ga Satana kango na ki fu maabangirise fu atita Adamu tipa bata gbiati unga.—ARomo 5:21; AGaratio 4:26, 31.

‘Gu Ziazia Okõokõpai Nga ga Gupai Ko Akpinyemuhe’

7. Gini ringbisapai Yekova ayuguhe rogo gu mokedi yo nangia Pauro?

⁷ Rogo gu waraga gu mokedi nangia Pauro akehe fu agu aKristano nadu Efesa yo, Ko asakirogopaiyo nibawenehe tipa wai Yekova angerakurii apai tipa ka digiso gako ringbisapai. Pauro akepai ki yaa: “Ko ayugu gupai fu rani ko akpinyemuhe, nga ziazia okõokõpai. Si nga gupai ngbaa tiko kina boro ko nitiko aringbisihe tipa gu mbakadapai nga ga ngerakurii pasunge ti digido ringbisiringbisi regbo, nga gu sunge du tipa dungura ahe dunduko berewe si du sa rogo Kristo yo, nga agu ahe du ngbangbaturũ yo na agu du auru kpotosende no.” (AEfeso 1:9, 10, NW) Ga Yekova bawene ringbisapai nga ka sa zegino si du nikpamiakpamiaha, agu aboro kini raki rogoho nga aguyo nara kutii gako bakere pagbia ninyemuse. (Yugoti 4:11) Rogo gi gene re, rimoko nikadu niziaziaha, si ki yugu Satana niboro ziree, na gupai Mbori akpinyemuhe kidu nidigisidigisihe ‘auru kpotosende a wa duhe ngbangbaturũ yo.’—Matayo 6:10.

8. Gine nga rogo gu fugoyo i asaha nga “ngerakurii pasunge”?

⁸ Gupai ‘ngbati kina boro’ Yekova, watadu gako ringbisapai, adu nidigisidigisihe rogo gu gene nga ga “ngerakurii pasunge.” Pauro amangisunge na gu fugo du rogoho yo ngburungburu nga “ngerakurii agu apai nga ga kporo.” Si afuranga tipa zogarago wa ngbatunga gu duwa gu Kindo nga ga Masiya te, ono si nafura tipa gu gene nga ga ngerakurii apai.b Gu iiriwo gene si adu nga Yekova nika ngerakurii apai ngbaha tipa ka digiso gako ringbisapai akodi “ziazia okõokõpai” nga gu si adu nga i nikaa yugoho tooni tooni wa regbo nikaa susa.—AEfeso 1:10; 3:9.

9. Wai Yekova ayugu gu ziazia okõokõpai tooni tooni nga ga gupai ko akpinyemuhe?

⁹ Rogo agu amokido Yekova amangihe nga gu tingbafuo gu kuraha, tooni tooni, Yekova aayugo wai gako ringbisapai tipa gu Tunga ko akidohe tipaha Edene yo nikadu nidigisidigisihe. Gu gako mokido ko amangihe na Abarayama ayugu gupai nga, gu Tunga ko akidohe tipaha ya si aye ku auru kpotosende rogo ga Abarayama gene ngbatunga, na si nikangia gu gene i ka fu maku rogoho fu “rikaaboro zegino dunduko.” Gu mokido re ayugu gupai a nga, kura aboro aduadu nikodikodi yo kuti bambata papara gu Tunga re. (Bambata Pai 22:17, 18) Agu aNdiko nga ga mokido Mbori amangihe na ndikidi aYisaraere ayugu ga Yekova ringbisapai nga ko aaida kadu na ‘kindo nga ga aboromotumo’ beko. (Gate 19:5, 6) Gu mokido Yekova amangihe na Davide ayugu gupai nga gu Tunga re nikadu ni Bakindo rogo gu Kindo adunga digidoho ti ni ya. (2 Samuere 7:12, 13; Atambuahe 89:3, 4) Fuo agu aNdiko nga ga mokido ngbembatayo fu aYuda koyo du Masiya ni kindi, Yekova ayugu gu kura apai tipa gako digisidigisi ringbisapai. (AGaratio 3:19, 24) Agu aboro si adu nga i nika kodatiyo kuti bambata papara gu tunga re, i si adu nga i nikangia gu ‘kindo nga ga aboromotumo’ i agumbapaha kumbatayo, na i nga agu aboro i nika dia yo kurogo “vovo mokido” nigu vovo “aYisaraere,” nga ga toroyo.—Yeremaya 31:31-34; AEbere 8:7-9.c

10, 11. (a) Wai Yekova ayugu gu Tunga i aima fura tipaha kumbatayo? (b) Tipagine bangisa Wiri Mbori aye ti ni ku auru kpotosende no?

¹⁰ Tipa ngerakurii sunge wenengai rogo ga Mbori ringbisapai, regbo ada gu Tunga kuru ku auru kpotosende i aima gumbapaha kumbatayo. Yekova akedi gu maraika nga Gaburere ko gumba gupai fu Maria nga ri nika batika kumbagude i ka yamba rimoko nga Yesu. Gu maraika re aya furi wee: “Ko adú ni bahe, i ayá ti ko Wiri Mbori nga Bahe; Gbia Mbori amáa ko ni bakindo a wa titako adu nangia [Davide], ko ki zogo ngbatunga Yakoba azoga kindi; gako ngbi adíga nga te.” (Ruka 1:32, 33) Rogo gi gene re, i kini mo ka ino gu Tunga i akidohe tipaha re ziazia.—AGaratio 3:16; 4:4.

¹¹ Si adu nga bangisa Wiri Yekova aye ku auru kpotosende i asadi ko nikerehe. Si adu nga pagbia wene karagapai kuti gu kango Satana atihe na Yekova aru rii ga Yesu gene raka. Ya mo ka ko anye niruru ko fu Bako? Gipai re akodipa ziazia okõokõpai. Kusa, gu mokedi nangia Pauro asakirogopaiyo tipa ga Yesu sunge ki yaa: “Na kii gu gbugbu pai nga sinombori, ka i ti nga kangu he te; Gu ko i ayugu ko rogo borose yo, Ziazia Toro ayugu pa ko ni ruru ko; amaraika abi ko, aboro atungusi pa ko dagba arikaaboro, i ki idi pako zegino, i ki di ko ku ari yo na taarimo.” (1 Timoteo 3:16) Ii, nigako kakuti ruru mangaapai ndätätä dati kpio, Yesu afu ndikidi karagapai kuti gu kango Satana akusihe. Ono kura futufutu apai nga ga gu ziazia okõokõpai re anye nigbugbuhe kindi.

‘Gu Gbugbu Pai Nga ga gu Ngbii Nga ga Mbori’

12, 13. (a) Gine nga papara “gu ziazia okõokõpai [sa] nga ga gu kindo nga ga Mbori”? (b) Ginipai nadu nikodikodihe kuti ga Yekova siaka ringbisiringbisi bange aboro i ndu ku ngbangbaturũ yo?

¹² Ti regbo ga Yesu nunguro sa nga ga tungusapai Gariraya yo, ko ayugu gupai nga, gu ziazia okõokõpai re aduna mbembedi ngbanyaa dagbaha na gu gako zogarago nga ga ga Masiya Kindo. Ko aya fu gako abawiriki wee: “I fu he [fu] roni oni ini gu gbugbu pai nga ga gu ngbi nga ga ngbangbaturũ [“nga ga ga Mbori kindo,” Marako 4:11, NW].” (Matayo 13:11) Papara gu okõokõpai re sa akodipa siaka ga Yekova “umba rika aboro” nga aguyo du bangeyo 144,000 i koditiyo na Wiriko nipapara gu Tunga re, tipa ka zogarago ngbangbaturũ yo.—Ruka 12:32; Yugoti 14:1, 4.

¹³ Wa duhe nga i akusi aboro i niraki auru kpotosende, si aidi Yekova ‘kusi aboro nivovo yo’ i ndu ku ngbangbaturũ yo tipa ka rẽ na gu raka du yo. (2 AKorindo 5:17) Nifura gu mokedi nangia Petero niboro sa dagba aguyo i asia yo i duna gi kparakpara maabangirise nga ga ngbangbaturũ re, ko akepai ki yaa: “I táasi rimo Mbori, Ba gaani Gbia Yesu Kristo, wa du ko navungu rani berewe ni gako bakere inapai ku rogo ga unga maabangirise mbiko gu zingabekpio nga ga Yesu Kristo, ku rogo gu ũkumbo azirã nga ya, agberã nga ya, agbandaka nga a ya, du ni igiigi he fu roni ngbangbaturũ yo.”—1 Petero 1:3, 4.

14. (a) Wai agu aboro naangianga aYuda ya adu nirimisirimisi yo kurogo ‘gu ziazia okõokõpai nga ga ga Mbori kindo’? (b) Tipagine rengbe ani ti ni ka giarogo gi “dudungura apai nga ga Mbori” re?

¹⁴ Gu kura papara ziazia okõokõpai nibipa gu zogarago nga ga Kindo du kumbatayo angia gupai Mbori akpinyemuhe, nga ka koda agu aboro angianga aYuda ya ku dagba gu umba bange aboro i nika yamba yo i zogorago na Kristo ngbangbaturũ yo. Pauro asakirogo gi papara ga Yekova “ngerakurii pasunge” re, watadu gene nga ga mbakadapa digiso gako ringbisapai na agi afugo re: “Gu [okõokõpai] i ayugo nga ha fu wiri aboro ni kura arago, wa du he ni yuguyugu he awere fu gako ziazia amokedi na anebi rogo Toro yo ya. Si nga aGendiria nga adikumbo a, na apa boroko, na adikidohe rogo Kristo Yesu yo mbiko wene pangbanga.” (AEfeso 3:5, 6) I ayugu giarogo gi papara ziazia okõokõpai yo re fu “ziazia amokedi.” Teketeke a wa kina gure areme, ka si angianga mbiko gu undo nga ga ziazia toro ya, ka ani aininga gi “dudungura apai nga ga Mbori” re te.—1 AKorindo 2:10; 4:1; AKorosaio 1:26, 27.

15, 16. Tipagine Yekova asia agu abadiangba Kristo ti ni du naako ti zogarago dagba ngbatunga aboro?

¹⁵ Agu aboro du bangeyo nga “144,000” i abiyo i narundu na “Wiri Kandoro” rii gu Bagangara Siona du ngbangbaturũ yo, i naya tipa yo wee “i atumo yo rogo kpotosende,” ngawee “i atumo . . . yo dagba aboro yo . . . i du ni amakawa fu Mbori, na fu Wiri Kandoro a,” nga Kristo Yesu. (Yugoti 14:1-4) Yekova asia gu bambata wiriko dagba agu awiriko nga ga ngbangbaturũ yo ko da nibangua papara gu tunga i akidohe tipaha Edene yo, ono ndu gupai ko asiaka abadiangba Kristo ti ni dagba ngbatunga aboro nangia gine? Gu mokedi nangia Pauro asakirogoyo ya gi ringbisiringbisi bange aboro re, i “ayambu yo ku sangba berã Mbori yo,” si “ku sangba gu berã yo nga ga [a]gu apai ko akpi nyemu he.”—ARomo 8:17, 28-30; AEfeso 1:5, 11; 2 Timoteo 1:9.

¹⁶ Ga Yekova ringbisapai nga ka ziasi gu ziazia rimoko duna kikipaha na ka rugusapa gako bakerepa gbia. Nigako ruru “ngerakurii pasunge” nitatamana, watadu gene nga ga mbakada apai, Yekova akedi bambata Wiriko ku sende no i aʹasadi ko rogo apai dũ dati kpio. Kurii gure, Yekova adiberã ya gu zogarago nga ga ga Masiya Kindo, nga ga Wiriko, akoda agu aboro nika nye niruru yo kutii gako bakere pagbia dati kpio.—AEfeso 1:8-12; Yugoti 2:10, 11.

17. Tipagine rengbe ani ti ni kadu na ngbarago nga Kristo na agu abadiangbako ko azogarago naayo araki mbata ni aboro wa kina rani?

¹⁷ Yekova ayugu gako bakere nyemuse tipa atita Adamu ni keda ko Wiriko ku auru kpotosende no na nisia ko agu aboro dagba ngbatunga aboro nika kodatiyo na Wiriko kadu ni adikumbo gu zogarago nga ga Kindo. Wai ka gupai re arengbe ka fu undo fu gu kura aboro naima yugo gupai nga i adu niruru yo fu Yekova, natona ti Ebere kaa ndu kumbatayo? Wa duhe nga i avungu aboro ni akanga fu ingapai na kpio, si aidi i husi yo ti boroyo na rogo toroyo na i ki da nirengberengbe yo, ringbisihe kuti ga Mbori bambata ringbisapai. (ARomo 5:12) Nairiwo wai si afu wasa fu agu aboro dunduko duna maabangirise kumbatayo tipa nyenye unga auru kpotosende ka ino gupai nga gayo Bakindo nika yugo nyemuse gbiati giarogopaiyo nga ga weneringise fuyo teketeke a wa ko amangihe fu gako abawiriki ti regbo gako sunge tungusapai auru kpotosende! (Matayo 11:28, 29; AEbere 2:17, 18; 4:15; 7:25, 26) Nairiwo wai si afu kido fuyo ka rugatiyo na gupai nga, agu abadiangba Kristo nga abakindo ni aboromotumo nikadu ngbangbaturũ yo adumbata ni agu akumba na adee nadu na idapase, naima sovura tigayo kuti arungbura nitiyo na ki gbiatiyo na agu aʹaasada nga ga raka wa kina rani!—ARomo 7:21-25.

Ka ga Yekova Ringbisapai Zanganga Mangaha Te

18, 19. Tipagine du agu afugo Pauro du rogo AEfeso 1:8-11 niziaziaha ti ni gbe fu rani, na ginipai ani ka wisigoho rogo gu papara kekepai naye fuo gere?

¹⁸ Ani rengbe awere tie ka rugatirani na rogo ga Pauro afugoyo fu mbedimbedi aKristano, wa duhe rogo AEfeso 1:8-11. Ko agumba gupai nga, Yekova aima yugo gupai fuyo nga ‘gu ziazia okõokõpai ko akpinyemuhe,’ nga i ‘asia yo ni adikumbo’ na Kristo, na gupai nga i ‘aima maa yo kuti gu ringbisapai nga ga gu ko namangaapai dunduko kina ku sangba gu berã yo nga ga gupai ko akpinyemuhe.’ Ani nabihe ya gipai re gu daada nibipa ga Yekova iiriwo “ngerakurii pasunge” nibipa agu apai du tipa digiso gako ringbisapai. Gipai re naundo rani a ani girogo ndu gupai yo kina bete agu aKristano gbua nidu pati Ga Gbia Riahe Nga ga Nyemu naambira imekakue ti ni na kini ri kpakuto.

¹⁹ Rogo gu papara kekepai naye fuo gere, ani nika giarogo gupai yo nga ga Tingidapa Kpio Kristo tipa agu aKristano du gayo maabangirise tipa raka ngbangbaturũ yo. Ani nika wirikapai a tipa ndu gupai si aida ti ni agu amirioni aboro duna maabangirise tipa raka auru kpotosende nyeanye kindi, i duna bakere nyemu gupai gbe gu kpakuto na imekakue du tipa Tingidapa Kpio Yesu arukubaha.

[Gu rukutu kekeapai du bandu kpewaraga yo]

Fugöpai

• Tipagine Yekova akusi kpotosende ti ni na ki mangi aboro i raki auruhe?

• Tipagine si adaada ti ni tipa i asadi bangisa Wiri Yekova auru kpotosende?

• Tipagine Yekova asia agu abadiangba Kristo ti ni du naako ti zogarago dagba ngbatunga aboro yo?