Asanahe be Agedihe

Ginihe nasa “agu ahe ngba bangiri arikaaboro” si rimi kurogo gu “bambu” nga ga ndikidi irisombori?—Agai 2:7.

Yekova aima fura tipaha kumbatayo rogo gu nebi nangia Agai ki yaa: “Mi ki zigizo arikaaboro dunduko, si du agu ahe ngba bangiri arikaaboro dunduko aye kono, mi ki hisi gi bambu re na baweneahe.” (Agai 2:7) Ya mo pa zigizo “arikaaboro” nasa gupai nga “agu ahe ngba” bangiri arikaaboro, nga agu aboro nibasasa duna ruru ngbaduyo yo di ndikidi irisombori kugume? Wagusa te.

Oni makianga pa guhe nazigizo arikaaboro na guhe nga sangbanaha. Ziazia Kekeapai nayawee “arikaaboro nazinga . . , aboro ki niberẽ gu pai du ni kungba ha?” (Atambuahe 2:1) “Gu pai du ni kungba ha” nye yo kuti ‘berãha’ kindi, si nga pandu kina gayo bakere pagbia kindi kumbatayo. Anga pai ho nazigizo yo susi gu nga pa serekpo gayo pa zogarago te.

Gu tungusapa gu ga Mbori Kindo i naima sigiraha aDezire Yekova amangaha, si wakina serekpohe fu arikaaboro. Nirengo, gu Kindo nga ga Masiya, “si akúadi agi angbi [nga ga awiri aboro] re rukutu ki digisi he dunduko.” (Daniere 2:44) Gu pangbangaa sapangbangaa nga ga Mbori nga gu ani akodaha kurogo gaani sunge tungusapai, si nazigizo arikaaboro azigizo. (Yesaya 61:2) Na gu zigizo he re naigira kina kumbatayo a wa sunge tungusapai asona kina kumbatayo na kidu na sangbanaha nibakerehe. Ginihe gu zigizo he i aima gumbapaha rogo Agai 2:7 aayugo kpiaha kumbatayo?

Rogo Agai 2:6, ani nageda gupai nga: “Ya Yekova nga ga arimbasa ko wẽ: Mi azígizo angbangbaturũ na kpotosende na baime, na ugu sende bara sa berewe ti rago ngbutuko.” Gu mokedi nangia Pauro adipai rogo gi veresi re ki kehe ki yaa: “Ko akido he, niya, ‘Bara sa berewe mi amanga nga kina kpotosende sa si zigizo te, ono ngbangbaturũ a.’ Na gi pai re nga, ‘bara sa berewe,’ si nayugo dia agu ahe ku sa yo i ka zigizo ho, wa du mangimangi ahe, ya agu ahe [nga Kindo] i azigizo nga ha ya si ki nye.” (AEbere 12:26, 27) Ii, i nika zigizo gi zegino nga ga gi sino raka du awere re na ki dihe kusayo, tipa ka mbu ba tipa gu vovo zegino Mbori nika mangaha.

Agu aboro duna ruru ngbaduyo yo naye kurogo ndikidi irisombori angianga mbiko gupai nga i nazigizo arikaaboro azigizo ya. Gupai naye naayo koyo du Yekova ni na kurogo gu irisombori aboro amangaha fuko, si nga kina gu bangisapai nazigizo arikaaboro a, nga tungusapa gu ga Mbori Kindo i naima sigiraha nga gu i atungusapaha rogo zegino dunduko. Gu ‘nyenye wene pangbangaa’ awirina atakapandehe, si naye na agu aboro duna nyemu nyenye unga sa iriso ndikidi Mbori.—Yugoti 14:6, 7.

Gu pangbangaa nga ga Kindo, si nga pangbangaa sapangbangaa na pangbangaa bata a. (Yesaya 61:1, 2) Tungusa gu wene pangbangaa re rogo zegino dunduko na apaparaha ue: nga pa zigizo arikaaboro gbiati paye agu ahe ngba bangiri arikaaboro kaa fu taarimo fu Yekova.