Eyobo Angia Bahipai Na Nigu Kumba Nakakuti Ruru Mangaapai

“Mo berẽ pa gi moyambu nga Eyobo? bambiko a nga boro ho du wa ko auru kpotosende yo te, nga ziazia kumba ni ruru ko, nga gu ko nagunde ti Mbori, ki nine gbigbitapai.”—EYOBO 1:8.

1, 2. (a) Gini gberango Eyobo agbia tiko nani nangia gu ko ainonga nga si nika gbia ko ya? (b) Oni ringbisinga pa ga Eyobo raka mbata fu gberango ti kuriiko.

KUMBA araki bakuru kusayo si awiri wa ahe dunduko nadu beko, nga aũkumuko, kiopase, wasawasa kpotose, na gu ramukporo nangia ga ngbarago. Fuo gure, agberango ati kuriiko bara biata, gu timburu kuraha. Rogo kina wiri guru regbo gbua, pa gako ahe dunduko agbere. Fuo gure, bavugumo aye ki imi awiriko dunduko. Fuo gupai re ngbutuko, kaza azi ko ki gberesi kpotoko dunduko na kere iigirã pikipiki ahe. Si nawira oni ima inoho ya Eyobo du nangia gi kumba re, nga nyanyakipa boro rogo gu buku nga ga Ziazia kekeapai du rimoko riihe.—Eyobo, gu bambata kapita na gu 2 he.

² Eyobo agumbapa gu gberarago nadu tiko ki yaa: “Ako, ka mi nidu wa gu mi adu rogo agu adiwi naasusi.” (Eyobo 3:3; 29:2) Ho gberangbii nati ni kurii boro, da arengbanga ka berã tipa gu wene aregbo nadumbata ya? Tipa Eyobo, ko adu niruru kumba, kidu nibandabanda ko be kereapai. Nyanyakipa aboro anaafu irisa fuko kini gbata arugute beko. (Eyobo 29:5-11) Ko angia irakumuko, ono ko anaamangasunge na marã ngba wene gene. (Eyobo 31:24, 25, 28) Ho ko anibi adekurugbo ni watadu awirinyaure rogo rungo, ko anaaundoyo aundo. (Eyobo 29:12-16) Na ko anye niruru ko kindi koyo du diako ni.—Eyobo 31:1, 9, 11.

3. Wai Yekova abi Eyobo?

³ Eyobo angia ruru kumba bambiko ko anaairiso ndikidi Mbori. Yekova aya tipa ko wee: “A nga boro ho du wa ko auru kpotosende yo te, nga ziazia kumba niruru ko, nga gu ko nagunde ti Mbori, ki nine gbigbitapai.” (Eyobo 1:1, 8) Ono wa Eyobo avura kakuti ruru mangaapai, gberango agberesipa gako wene raka ko anaarakaha. Pa gako ahe agbere dunduko nga gu ko amangi sungehe, gako sino raka kidu ngba asada be aimaa na bakere gberarago.

4. Tipagine si nikadu ti ni niwenepai ani makia gupai namangi Eyobo?

⁴ Rengo ngaha nga, Eyobo angianga gu bangisa ga Mbori moyambu gberango ati kuriiko te. Dungu aKristano areme apai namangi yo wakina gu namangi Eyobo re. Mbiko gipai re, asanahe ho ue si aida ani berẽ kuriihe: Wai rengbe pa wisigo ani gupai namangi Eyobo ka undo rani baraho gberango nati ni kurirani? Na wai rengbehe ka yugopai furani tipa ani duna nunga agu aboro du rogo arungosi?

Asada Nga ga Kakuti Ruru Mangaapai

5. Kuti gupai Satana agumbaha, gine ko agumbaha ya si nangia ndu ga Eyobo mangasunge fu Mbori?

⁵ Gupai nadu tipa Eyobo, si adu tigaha kia. Zanga Eyobo rugutiko nani, Bakitingbanga akusi sakapai tipa ga Eyobo ndu mangasunge fu Mbori. Ti gu regbo Yekova adungura amaraika ngbangbaturũ yo ku barabangiriko, ko agbeberã yo kuti ga Eyobo wene asino, na Satana ki karagapai ki yaa: “A nga kina ro naadua gbata pati ko kirikiri na gako kporo, na pati gako ahe dunduko, te?” Rogo gi gene re, Satana aya tipa Eyobo wee ko anaairiso Mbori mbiko gbangbati, na si kini kodi ga Mbori amoyambu dunduko. Satana aya fu Yekova wee: “Mo táĩ nga bero awere, ki zadi nga agu ahe du be ko dunduko, ko agbérã ngbako yo foro kina ku bangiro.”—Eyobo 1:8-11.

6. Gini nyanyaki sakapai Satana akusihe?

⁶ Gu sakapai re angia nyanyakipa pai. Satana akitingbaanga Mbori nibi gu gene Yekova amanga gako bakere pagbia ngbaha. Ya mo Mbori rengbe ka zoga gi zegino re nirengo rogo nyemuse yo? Kuti tiiworo fugo Satana, ya mo kina gbangbati nika nyeanye kindi? Yekova ambu Bakitingbanga ko asadi Eyobo si du nikpiapai, mbiko Ko aima du naa kido kuti pa ka Eyobo kuti ruru mangaapai naapa gako ra nigose. Si ki ta du were, Satana kini mo ka ye na agu agberangbii nati kurii Eyobo gu ti mburu kuraha. Ho Satana adunga ni na diabese rogo gako bambata vura kuti Eyobo ya, ko aye na kere kaza kuriiko. Satana ayaa: “Kpoto tipa kpoto! Agu ahe dunduko du be boro ni afu kina ha tipa ungani.”—Eyobo 2:4.

7. Ngba gini agene du ga Mbori amoyambu areme ngba asada wakina gu nadu tipa Eyobo?

⁷ Wa vura duhe nga, dungu aKristano areme arungonga ki dakuti gu rungo Eyobo arungo ho re te, ngbatunga agberangbii kina ti ni nibasasa namanga yo amanga. Dungu aguyo nagbia arungosi agbia watadu agu akpakarapai nga ga ramukporo. Zingo mosoro watadu kaza rengbe ka gbarasapa boro nikerehe. Kura aboro akpidipa gayo idapase. Rengo ngaha nga, anga Satana du nitiko naye na agu agberango dunduko ani agbiatirani nani re te. Nirengo, kura bete apai kinaho ani agbiatirani nani rengbe ka ye kina be gaani irairapai nitirani watadu mbiko gu ingapai ani adihe be atitarani. (AGaratio 6:7) Ani dunduko agu asigaro nga ga gbinza narengbe arengba ka manga rani gbiati gu gberango naye be gu mangaapai nga ga ome zegino. Ziazia Kekeapai nagumbaha ziazia ya, Yekova abandanga gako amoyambu ngba iiriwo gene be agberango wa du rago re te.—Batungusipai 9:11.

8. Wai Satana narengbe ka mangasunge na gu gberangbii ani agbiatirani nani?

⁸ Wa vura duhe wo, Satana rengbe arengba ka mangasunge na agu agberangbii namanga rani tipa ka gberẽsapa gaani idapase. Gu mokedi nangia Pauro atingidipai tipa wai ko agbia mbugo be ‘kiwe tiikpotoko yo nga Satana,’ gako sunge adu nga kaa ‘tura gu kiwe re’ tiikpotoko yo. (2 AKorindo 12:7) Singia kaza du nangia gipai re wa gu nga vurari watadu kurapai kia, gu Pauro aima rugatiko nani nga, Satana arengbe arengba ka mangasunge na agi apai re tipa ka ba gberarago tiko na ki sa ko ko mbu kakuti ruru mangaapai. (Asanza 24:10) Areme, Satana rengbe arengba ka sa gu zogarago nazoga aboro ngbaome, gaani aborokporo, watadu akuarani sukuru yo i rungosi rani nga ga Mbori amoyambu ngba kura agene.

9. Tipagine si aidanga ti ni rungosi watadu asada iriwo tirani ya?

⁹ Wai rengbe ani ka mangapai kuti agi akpakarapai re na diabese? Nibi ani agi akpakarapai re wa mamu tipa ka yugo gaani nyemuse koyo du Yekova ni naapa gaani ra na gose ni agu apai nye ani kuti ni zanga wo. (Yakoba 1:2-4) Ka ndu gupai naye na gberango furani vura du nga kina gine, pa ruga ani tirani na nyakapa kakuti manga rurupai fu Mbori nika undo rani ani ru nyanyakii rogo toroyo. Gu mokedi nangia Petero akepai fu aKristano ki yaa: “Abadiangba, ka si iriwo nga ti roni ya asada naye fuo roni wa we, nga gu naye ka asada gaoni apai, ya vovo pai du mangi roni, ya.” (1 Petero 4:12) Pauro ayaa: “Ii, i arúngosi agu . . . [aboro arungosi] dunduko ka kpi nyemu ka ka kuti sino Mbori wa du yo ni ungayo rogo Kristo Yesu yo a.” (2 Timoteo 3:12) Satana nakusa sakapai tipa gu kakuti ruru mangaapai nga ga aDezire Yekova kindi, a wa ko amangihe tipa Eyobo. Nirengo, Ziazia Kekeapai nayugoho ya Satana ima kiiso gako vura kuti ga Mbori aboro rogo gi yangara arame re.—Yugoti 12:9, 17.

Zanga Giarogopaiyo Gbiati Gbegberẽ Arugute

10. Ginipai Eyobo arungo behe?

¹⁰ Eyobo ambu be gu kpakarapai si aidanga si mangi rani ya. Ko ainonga ndu gupai agu agberango re aye ti ni kuriiko te. Mbiko zanga giarogopaiyo, Eyobo adigisipai ki yawee “Yekova nafu he, Yekova rogo ho.” (Eyobo 1:21) Si nawira gupai gbe nga, Satana ataino aino kini asadi ka sa Eyobo ko duna gu berã nga Mbori du naye na gu rungosi re kuriiko.

11. Oni sakinga rogo pa ga Eyobo mangapai nibi gu gberangbii namangi ko.

¹¹ Eyobo aduna gberarago tiko bakere gbe, ono ko aidanga ka gbera ngbakoyo fu Mbori wa gu diako angarasiko ko mangihe te. (Eyobo 2:9, 10) Eyobo ayaa: ‘Apai nangba ku bara gbegbere aboro yo susi re.’ (Eyobo 21:7-9) Ko avura sana tiko ki yaa: ‘Tipagine Mbori afu mbusa ti ni fere?’ Aregbo adu kinaho ko anikpinyemu ka kpi. Ko apoi kuari ki yaa: “Ako, ka mo oko re ku Baatoro kpikpi aboro yo, ki banda re ni okooko re, daho ga zinga ka susa ni.”—Eyobo 14:13.

12, 13. Gine agu afugo nangia ga agu abadiangba Eyobo nadu biata re amangiko nani?

¹² Eyobo aduna abadiangbako biata nangia aguyo nayawee i aye ka “rungo na ko na ka ngarasa ko.” (Eyobo 2:11) Wa si avura duwo, i angia “gbegbere abangarasi boro dunduko.” (Eyobo 16:2) Eyobo arengbe arengba ka gbia wasa be agu abadiangbako ka ko arengbe ka fura naayo, ono agiyo biata re atigi kina we ti gupai naamanga ko na ki kiisi gako gberarago.—Eyobo 19:2; 26:2.

¹³ A wa du sino aboro, Eyobo avura sana tiko ki yaa: ‘Tipagine kina re ambu ti ni? Ginipai mangi mi he agi agberangbii re amanga re ti ni?’ Abadiangbako agumba kina iraira apai fuko ya si nangia nduhe. I ayawee kina Eyobo nitiko naye na arungosi kuriiko nimangako kere ingapai. Erifaza asanahe ki yaa: ‘Gini boro-wenesa nakpinga?’ Na ko ki ya berewe wee: ‘Wa bi mi he tigimi, agu aboro nasopabino irairapai, na kini rũ fudifudiapai, i nake kinaha.’—Eyobo 4:7, 8.

14. Tipagine si aidanga ti ni ani yawee arungosi nga ima manga gbegberẽpai ya?

¹⁴ Nirengo, kpakaraapai rengbe arengba ka ye ka si du nga ani arũhe rogo borose yo kuba gupai nga ani rũhe rogo toroyo. (AGaratio 6:7, 8) Ono, wa vura duhe wo, rogo gi zegino du ani rogoho re, kpakaraapai rengbe arengba ka ye zanga bipa gaani sino mangaapai. Kurii gure, anga rengo ngaha nga pai naamanganga aboro-wenesa ya te. Ani dinga kpiapai, Yesu Kristo nangia gu kumba naangianga ‘gbegberẽ boro ya, nikparakpara ko ti aboro ingapai,’ ko arungo be eegerã kpio ti ngbunduru ngua-rungosi, na gu mokedi nangia Yakoba akpidipa gako idapase. (AEbere 7:26; Amokedi 12:1, 2) Gu iraira bipai nangia ga Erifaza na ga agu abakureako nadu ue re asa Eyobo ko nyakasipai tipa wene rimoko naapa du ko nigu boro naamanganga gbegberẽpai ya. Wa si avura duwo, gupai abadiangba Eyobo agumbaha re nga si adaada tipa Eyobo gbia arungosi wa gure, si arengbe arengba ka aria gako bipai tipa ga Mbori ruru sarangbangaa.—Eyobo 34:5; 35:2.

Gbia Undo Baraho Ani Agbia Arungosi Ni

15. Gini aberã rengbe ka undo rani baraho ani agbiatirani ni na kpakaraapai?

¹⁵ Ya mo ani rengbe ka wirikapai ti gu kpiapai nangia ga Eyobo re? Gberango, kaza watadu rungosi, si rengbe kadu ni agu apai angbanga ya. Si nawira dungu aboro agbianga tiyo na ngbatunga gu kpakaraapai re te. (Atambuahe 73:3-12) Ti kura aregbo, si rengbe arengba ani sana tirani na gu bangua asanahe duwa gere: ‘Ya mo gimi nyemuse tipa Mbori nafõngbadureyo mi naamangasunge fuko ka kina ginipai vura manga vurũ? Ya mo mi nakpinyemu ka sa Yekova ko “karagapai fu gu boro nasoapai kutiko”’? (Asanza 27:11; Matayo 22:37) Si aidanga ani mbu agu apai aboro agumbaha adanga ya si sa rani ani duna kapa kuti gu Barani du ngbangbaturũ yo te. Ruru Kristano sa nidee narungo be bangabanga kaza tipa dungu agarã aya ti kura regbo wee: “Mi ima ino gupai nga, agu apai dunduko Yekova ambugene fuhe si naamanga, mi rengbe arengba ka hihe. Mi ima ino gupai nga ko afu gu ome afu fere rengbe ka undo re mi hihe. Si nga gupai ko naamangaha ti aregbo dunduko.”

16. Wai Fugo Mbori aundo agu aboro nagbiatiyo na arungosi?

¹⁶ Nibipa agu abirĩ nga ga Satana, ani na gu inohe naadunga be Eyobo ya. Ziazia Kekeapai nayawee anga ‘zingo ino ani gako bawagi ti rani te,’ watadu gako aburõ. (2 AKorindo 2:11) Kurii gure, ani na dungu agu arugute nga ga tatamana rengbe ani ka mangasunge nani. Rogo Ziazia Kekeapai, ani nabi apangbangaa nga ga gu ruru aboro nahi dungu angbatunga arungosi. Gu mokedi nangia Pauro, nga guko narungo bakere gbe kisusi kura aboro, akepai ki yaa: “Agu apai i ake mbata rogo Ziazia Kekeapai i ake he tipa gaani wirikapai, ani moi bangirani mbiko gu zera nga ga kekeapai na wasa.” (ARomo 15:4) Wirina sa ni Dezire Putu yo nga guko i aba ko ku kamba yo tipa gako idapase ti regbo gu ue vura nangia ga zegino, aundo gako riahe na Ziazia Kekeapai tipa arame biata. Ko ayawee: ‘Nangbaa wai sangbana gu undohe na kuraha re adu! Wa mi avura duna gu gomoro nga ga borose, mi agbia gu riahe nga ga toro nga gu naundo re ki banda re gbiati kura aboro ti regbo gu fudifudiapai re. Gu Ziazia Kekeapai re kinaho areme bere nibandabandaha.’

17. Gini undo rengbe ani ka gbiaha be Mbori nga gu rengbe ka undo rani ani hipai?

¹⁷ Kupati gu wasa ani agbiaha rogo Ziazia Kekeapai, ani na dungu agu abuku naundo rani rogo giarogo sangba Ziazia Kekeapai nga gu nayugo wene arugute tipa mangapai sa gu kpakaraapai du ani rogoho. Ka oni wisigi agu abuku nayugobaraapai (Watch Tower Publications Index), si nawira oni agbia gu pangbangaa agbia tipa gu Kristano apai adu tipa ni wakina gaoni. (1 Petero 5:9) Si rengbe kadu a niwenepai oni sakipai tipa gupai nafuda roni na gu bakumba duna nunga aboro tiko watadu agu aKristano naima nyaka rogo toroyo. Gu kura gene rengbe oni ngbaha ka gbia undo be Yekova na be gako ziazia toro, si nga ka fu kpee fuko. Wai Pauro asovura kuti agu ‘ayawa he’ nangia ga Satana? Nikido ko kuti gu ome nga ga Mbori. (2 AKorindo 12:9, 10) Ko akepai ki yaa: “Mi rengbe na manga apai dunduko rogo gu ko nanyakasa re.”—AFiripoio 4:13.

18. Wai rengbe akuarani aKristano ka ngarasa rani wenengai?

¹⁸ Nirengo, undo kinaho be Mbori, ka oni dunga dindikodindiko ka sanahe tipaha ya. Asanza nayaa: “Ka he amaka ro ti uru gberãngbi, omero adu toni gbua.” (Asanza 24:10) Wakina gu angbari niri angua bambu si ki ti, kinawo a duhe tipa bakere gberarago, si nagberẽsapa Kristano ka ni akanga kuti gani ruru mangaapai ya. Tipa ka ne gi kerepai re, Yekova nasongoda rani rogo gu undo akuarani airisimbori afuhe furani. Rogo gu yuru i azi Yesu, maraika akuru fuko na ki nyakasi ko. (Ruka 22:43) I azi Pauro ki ndu naako ku Roma yo. Ho ko agbia awirina ni gene Apio yo Bangbeahe yo na rogo gu ba nangia Asinziri Biata, ‘ko atambua Mbori ki ngarã.’ (Amokedi 28:15) Dezire niboro Germani nigu degude naagunde agunde natingidapa gu undo kindi ri agbiaha ho ri adani rogo gu bataya zizi aboro i aayambaha nga Ravensbrück. Ri nayaa: ‘Kuare ni Kristano aye fuo re nibasa na ki di re kugume. Na gu kura wirina adi re tipa kaa ngerafuo re, ri kidu fere wakina navungu re, kini ngerefuo re rogo toroyo.’

“Mo Ngárã Angarã ki Da ti Kpio”

19. Ginipai naundo Eyobo ko sovura kuti gu bakere asadatise nangia ga Satana?

¹⁹ Yekova aringbisipa Eyobo ya ko “[a]ka kuti pa gako du ni irarengo kindi.” (Eyobo 2:3) Wa si avura du nga Eyobo aduna gberarago tiko na ki zanga ino ndu gupai ko agbia rungosi ti ni, ko ambunga kakuti ruru mangaapai te. Eyobo aru nyanyakii rogo agu apai ko agbiatiko nani. Ko ayaa: “Daho mi ka kpi ni mi ambu nga pa gi du ni irarengo te!”—Eyobo 27:5.

20. Tipagine du hipai ti ni ninyanyakipa pai?

²⁰ Ka ani duna kina gu bangisa nyanyaki kakutipai re, si nika undo rani ani kakuti manga rurupai kina giniapai ki vura nimangi rani vurũ, singia si nga aʹasada, asokote, watadu agberango. Yesu angarasi gu dungurati nadu Semuruna yo ki yaa: “Ka mo gúnde nga be agu apai mo ka hi he ya. Mo ngére, bakitingbanga nikaba agu roni ku bambukisa yo, i asadi roni; oni ahi gberãngbi uru ki du bawe. Mo ngárã angarã ki da ti kpio, mi ki fu kpakpari unga foro.”—Yugoti 2:10.

21, 22. Ho ani kaa hi agberangbii ni, ginipai rengbe ka fu wasa furani?

²¹ Rogo gi zegino Satana azogaha re, gaani hipai gbiati gaani kakuti ruru mangaapai nikadu adu niʹasadiʹasadihe. Wa vura duhe wo, Yesu nakido rani kini yawee wa ani angera kumbatayo, ndupai ho tipa ani duna gunde te. Gupai si aidaha berani nga ka ru nyanyakii. Pauro ayaa: “Gberãngbi . . . nanye ngbutuko,” ono taarimo watadu gu mosoro Yekova nakidopaha tipa rani, ‘si kiipaha na si nyeanye’ kindi. (2 AKorindo 4:17, 18) Zavura gu gberangbii nangia ga Eyobo, si adu tipa kina guru regbo ka i ringbisihe kuti gu dungu agarã ko aduna ngbarago rogoho mbata na tingbafuo gu gberangbii nati kuriiko re.—Eyobo 42:16.

²² Wa vura duhe wo, kura aregbo kinaho gaani kpakarapai nika wira wa gupai ka nyasanga ya na si kidu wa gupai ka ani arengbanga ka hihe ya. Rogo gu papara kekepai naye fuo gere, ani nika wisigo wai gu pangbangaa du tipa Eyobo narengbe ka yugo kura apai furani tipa hipai. Ani nika bi bete agene a nga gu rengbe ani ngbaha ka nyakasa kura aboro nga aguyo nagbia arungosi.

Gaoni Karagapai Nga Gine?

• Gini bangua sakapai Satana akusihe nibipa gu kakuti ruru mangaapai nangia ga Eyobo?

• Tipagine si aidanga ti ni ani bi rungosi niʹiiriwopai ya?

• Wai Yekova aundo rani ani hipai?

[Gu kpiahe du ti kpewaraga 15]

Pa weteka ani apai, fura na agu aKristano naima nyaka rogo toroyo, na kparakpee fu Yekova rengbe arengba ka undo rani ani hipai