Oni Sungudi Yekova, Na Kidu Nyanyakii
“Mo súngudi Yekova; mo dú nyanyaki, kpotoro yo ki ngarã; ii, mo súngudi Yekova!”—ATAMBUAHE 27:14.
1. Wai nyakipa maabangirise, na wai mangiyo sunge na gu fugo re rogo Ziazia Kekeapai yo?
NDIKIDI maabangirise wakina imarago. Si naundo rani ani ngere kugii agu aʹasada du awere na kini moibangirani tipa raka kumbatayo na ngara gbiati ngbarago. Kina Yekova sa rengbe ka fu ndikidi maabangirise furani, na ko namangaha wo rogo Fugoko gako toro adu kugiipa kehe. (2 Timoteo 3:16) Nirengo, agu afugo nga ‘sungudo,’ “asungudi,” ‘nasungudo,’ “maabangirise,” ‘namaabangirise,’ gbiati ‘amoibangirise,’ si rogo Ziazia Kekeapai nidunguhe na kini yugu padu boro na ndikidi maabangirise tipa wenepai gbiati ndu gupai du gu maabangirise re ti ni.a Ngbatunga gu maabangirise re susi gu kungboapai gbua boro akpinyemu si mangi funi, nga gu kungboapai adunga mburuhe ti ni ya, watadu gupai kaa manganga a ya.
2. Ginipai maabangirise amangihe na ga Yesu raka?
2 Ho Yesu aduni ngba asada gbiati fudifudiapai, ko aamaabangiriko tipa kina gupai nika manga kumbatayo na kini kido kina kube Yekova. “Ko [ahi] pa wagiwagi ngua mbiko gu ngbarago nadu fu ko ku mbata yo, ki basa pa gaha zee, ki ima sunga pati kumbabe gu mbata nga ga Mbori.” (AEbere 12:2) Mbiko wa Yesu amoiberãko gbe tipa pa dia gbarasarimo kusayo ti ga Yekova bakere pagbia na tipa ka ziasi rimo Yekova, ko aagunga kusayo ti giasangba Mbori te, ka i avura kaa rungosi ko kina wai vurũ.
3. Ginipai maabangirise amangaha rogo gu raka nga ga ga Mbori amoyambu?
3 Bakindo Davide agumbapa gu kodatise du dagba maabangirise na ngara, ki yaa: “Mo súngudi Yekova; mo dú nyanyaki, kpotoro yo ki ngarã; ii, mo súngudi Yekova!” (Atambuahe 27:14) Ka ani aida kpotoraniyo du nyanyakii, si aidanga ani mbu gaani maabangirise si du rufuduró te, ono si naida si du ziazia na paha kidu kina berã rani yo ti aregbo dũ. Pa manga ani he wo nika undo rani ani pekefuo Yesu rogo yugo ngara gbiati kakaka nyemuse rogo gu sunge ko afuhe fu gako abawiriki. (Matayo 24:14; 28:19, 20) Nirengo, rogo Ziazia Kekeapai, i fura tipa maabangirise, idapase, gbiati nyemuse nigu nyanyakipa apai si aidanga ga Mbori moyambu zangaha wagu tooni rogo gani raka yo ya.—1 AKorindo 13:13.
Ya Mo “Gaoni Maabangirise Moi Pai”?
4. Ginihe mbedimbedi aKristano gbiati agu abadiangbayo nga “kura akandoro” angera tipaha kumbatayo na nyemuhe?
4 Ga Mbori aboro na iiriwo maabangirise beyo tipa raka kumbatayo. Mbedimbedi aKristano nasungudo gu regbo na nyemuhe i ka tona mangasunge na Yesu ngbangbaturũ yo, baraho “kura akandoro” asungudo gu regbo ni i nika ‘batasa yo be ga zirã kanga i ye naayo sa kura gu taarimo nga ga awiri Mbori.’ (Yoane 10:16; ARomo 8:19-21; AFiripoio 3:20) “Gu taarimo nga ga awiri Mbori” re nakodapa batasa aboro be ingapai na asangbanaha du nikerehe. Nirengo, Yekova, nga guko nga Bafu ‘wene agamahe dunduko,’ ko rengbe ka fu kina bawene agamahe fu gako ruru aboro.—Yakoba 1:17; Yesaya 25:8.
5. Wai ani asa gaani ‘maabangirise si moipai’?
5 Bakio wai si aida gu maabangirise nga ga aKristano mangipai na gaani raka? Rogo ARomo 15:13, ani nageda gupai nga: “Gu Mbori nga ga maabangirise ko ko hisi roni na ngbarago na zereda rogo idapase yo, gaoni maabangirise moi pai, mbiko tandu Ziazia Toro.” (ARomo 15:13; gu kekeapai du nibibirihe na nikikindigihe re, ani du kehe wo.) Ii, ani arengbanga ka ringbisapa maabangirise kuti ramba rogo bitimo yo te, ono ani rengbe ka ringbisaha kuti kurẽkurẽ pisi nzere uru, nga gu nahiiso ga boro raka na zereda, ngbarago, ndupai tipa raka, gbiati ngara. Oni kparia gupai nga gaani ‘maabangirise namaapai’ ho ani aida ni kuti Fugo Mbori, na ki gbia gako ziazia toro. ARomo 15:4 nayaa: “Agu apai i ake mbata rogo Ziazia Kekeapai i ake he tipa gaani wirikapai, ani moi bangirani mbiko gu zera nga ga kekeapai na wasa.” Sidu, oni sananga tironi ki yaa: ‘Ya mo mi nasa gimi maabangirise si du niziaziaha nidu mi niwene bawisigi Ziazia Kekeapai, kini gedihe na aʹuru dunduko? Ya mo mi naakparakpee dedede tipa ga Mbori ziazia toro?’—Ruka 11:13.
6. Tipa ka sa gaani maabangirise si naakí akí kindi, gine si aida ani bandatirani ti ni?
6 Fugo Mbori anyakasi Yesu, nga gaani kpiapai. Ho ani amakia pako ni wenengai, si nasa rani ‘ka ani dunga na mbugo ya, na ki zanga rungbura rogo gaani aberã.’ (AEbere 12:3) Kuti ndikidi rengo, ka gu maabangirise Mbori afuhe furani tona kadu tätäitä berã rani yo na ngbaduraniyo, watadu ka kurapai zomia rani, isoke nga aũzegino watadu agu asásá nga ga zegino, ani zere azera rogo toroyo niipo, na niyangaraha, si ki sa rani ani zanga ome gbiati ngara tipa kaa manga rurupai. Ngbatunga gu berã re rengbe arengba a ka ‘rindosi gaani idapase.’ (1 Timoteo 1:19) Ngba kura gene, ndikidi maabangirise nanyakasa gaani idapase.
Maabangirise Nandu Sa na Idapase
7. Ngba gini gene du maabangirise ninyanyakipa pai tipa kadu na idapase?
7 Ziazia Kekeapai nayaa: “Idapase nga ndikidi he, du aboro na maabangirise mbiko ho, nga wisiga pa agu ahe i abi nga ni bangirise ya.” (AEbere 11:1) Sidu, anga maabangirise gbua nga guhe gbiayó ho kuti idapase te; si nga nyanyakipa papara idapase. Oni bingo gupai nadu tipa Abarayama. Kuti gu bipai nga ga aboro, ko na diako, nangia Sara, i aima susa ba vungu ti gu regbo Yekova akido pa dikumbo fuyó. (Bambata Pai 17:15-17) Wai Abarayama akaragapai? “Ti gu rago ndu maabangirise adu nga [ya], Abarayama amoi bangiriko ti kidohe, ki idi pa ha aida, si du du ko ti ni ni ba fu dungu rika aboro.” (ARomo 4:18; gu kekeapai du nibibirihe na nikikindigihe re, ani du kehe wo.) Ii, gu maabangirise Abarayama adu nani naye be Mbori re, si asako ko idi kuti gupai nga ko nika vunga gude avunga nikangia nyanyakipa tunga. Nisangbanaha, gako idapase anyakasi gako maabangirise. Oni ngere, mbiko gayó idapase, Abarayama na Sara aima ida ka mbu kpuyo na agumeyo tipa ka raka tii abamburokoo rogo kura ringara!
8. Wai hipai anyakasa maabangirise?
8 Abarayama akido kuti Yekova rogo apai yo dunduko, zavura ho pa manga ko ho wo aduni nikpakarapai vurũ. (Bambata Pai 22:2, 12) Teketeke a, nidu ani na giasangbaa na kini hipai rogo ga Yekova sunge yo, ani rengbe arengba kadu naa kido tipa gaani mosoro. Pauro akepai ki yawee “hipai” nasa gupai nga “Mbori idi na ga boro pai,” nga gu tigaha naye na maabangirise, na “maabangirise afu nga rani sa zee te.” (ARomo 5:4, 5, oni ringbisinga ha na NW.) Si du Pauro akepai a berewe ti ni ki yaa: “Ani ki nikpi nyemu oni yugu ngbatunga gu ngarã re ni ba sa sa dati hika oni be maabangirise, dati kina digida rame.” (AEbere 6:11; gu kekeapai du nibibirihe na nikikindigihe re, ani du kehe wo.) Ngbatunga gu maabangirise daada re, nga gu du mburuhe rii dawedawe pagume na Yekova, si rengbe ka undo rani ani hi fudifudiapai dunduko na ngara, gbiati ngbarago a.
“Rago Angba ti Roni na Maabangirise”
9. Pa manga ani gine dedede rengbe ka sa rani ‘rago ngba tirani na maabangirise’?
9 Gu maabangirise Mbori afuhe furani re, paha ima kio kisusi agu ahe dunduko rengbe gi zegino re ka fuhe fu boro. Atambuahe 37:34 nayaa: “Mo súngudi Yekova, ki ka kuti gako pai, ko akíisa pa ro mo di kumbo ringara; ho i ka gbarasa gbegberẽ aboro ni, mo abí he.” Ii, ani na nduapai berani dunduko tipa ka ‘gbia ngbarago mbiko maabangirise.’ (ARomo 12:12) Sidu tie, tipa ka mangaha wo, si naida ani naaberãpa gaani maabangirise ti aregbo dunduko. Ya mo oni naaberã dedede kurii gu maabangirise Mbori nafuhe furoni? Ya mo oni nabi tironi oni niraki Paradizo yo na wene kpotoroni zanga kaza, zanga bakabangirise, kini raki dagba agu aboro dunduko oni akpinyemuyo, na kini mangi agu asunge nzunzu nika undo roni aundo? Ya mo oni naaberãkurii gu kpia Paradizo du rogo gaani abuku? Ani rengbe ka ringbisa ngbatunga gu berãkuriipai dedede re kuti giriso gu bitirobi nakusa kpia boro wenengai. Ka ani agirisongo gu bitirobi re ya, fuo bete regbo tooni, kpakpuhe yo rengbe ka biriko ka ani arengbanga ka bi tirani rogoho wenengai ya. Kura apai rengbe arengba a ka gbeberã rani. Ka ani mbunga ngbatunga agu apai re si mangi wagu tooni ya!
10. Tipagine du pa ngera ani ti ni tipa mosoro ayugopa gaani ngbanyaa na Yekova?
10 Rengo ngaha nga, gaani nyemuse tipa Yekova nga gu banguapai nasa rani ani mangisunge fuko. (Marako 12:30) Wa vura duhe wo, si naida aida ani naangera kumbatayo na nyemuhe tipa mosoro gaani sunge. Nirengo, Yekova naida aida ani mangihe wo! AEbere 11:6 nayaa: “Zanga idapase ga boro pai arengba nga na ngba bangiri Mbori te, bambiko gu ni naye koyo du Mbori ni gani pai nga ida ya Mbori kina ho, ko nafu mosoro [afu] fu agu yo nagbata ko.” Tipagine Yekova aida ti ni ani naabiko ni Bafu-Mosoro? Ko naidaha wo bambiko ho ani amangaha ni wo, gure nga ani nayugo gupai nga ani ima ino gu Barani du ngbangbaturũ yo wenengai. Ko nga bagamu ahe, na ko nakpinyemu awiriko akpi. Oni berẽnga pa wai rengbe ani kadu na bakere gberarago taata ka si du nga ani na ‘maabangirise tipa apai kumbatayo te.’—Yeremaya 29:11.
11. Wai gu maabangirise Yekova afuhe fu Moize aundo ko ko mangi gu diaberã duna tatamana?
11 Gu bangua kpiapai nga ga gu boro nanye kuti gu gani maabangirise Mbori afuhe funi angia ga Moize. Nidu Moize ‘niwiri gu dee nangia wiri Faro,’ ko aduna ome beko, kidu niʹiriʹiri boro, na ko arengbe ka mangasunge na agu aũkumuko nangia ka Ezipeta wa ko aida nani. Ya mo si aidi ko merefuo agi ahe re, watadu si aidi ko mangisunge fu Yekova? Moize asiapai niwingbaduse ka mangasunge fu Yekova. Tipagine? Ko amangihe wo bambiko ko ‘aangera tipa gu mosoro i ka fuhe fuko.’ (AEbere 11:24-26) Ii, Moize aatiköngo tipa gu maabangirise Yekova afuhe fuko te.
12. Tipagine du ga aKristano maabangirise ti ni wa kpakpari vura?
12 Gu mokedi nangia Pauro aringbisi maabangirise kuti kpakpari vura bambiko si nabanda gaani ome berãpai, kini undo rani ani mangi agu adiaberã duna tatamana, ki peresipa agu apai nyakipaha mbatayo, na ki kakuti ruru mangaapai. (1 ATesaroniko 5:8) Ka pepai nimasaku, ya mo oni navo gaoni kpakpari vura ti aregbo dunduko? Ka si duwo, oni wakina aMoize na Pauro, nga aguyó ‘naamaanga bangiriyo ti ũkumuko wa si nago niipo ya, ono koyo du Mbori ni nafu ahe furani u au ani ngi mbikoho.’ Nirengo, pa ká boro ka merafuo gu vovo ahe nga ga zegino naida ní du na ngara, ono si daada ní mangihe wo! Nirengo, tipagine tigu ka oni fu tironi ti ni sa agu ahe du paha kusende ti “ndikidi unga,” nga gu napido agu aboro nakido kuti Yekova na kini kpinyemu ko?—1 Timoteo 6:17, 19.
“Mi Ahe nga Unda Ro Wa Sa Te”
13. Gini kidohe Yekova afuhe fu gako ruru amoyambu?
13 Agu aboro namaabangiriyo tipa kina agu apai du rogo gi sino raka du awere re, si naida i niiberẽ nyanyakii tipa gupai napido yó kumbatayo a wa gi zegino re ambu kina kumbatayo kindi be “rungo.” (Matayo 24:8) Ono agu aboro nakido kube Yekova, i abakanga bangiriyo wagu re te. I nikaa ‘ráka nibandabanda yo, kidu zezeredii zanga gunde be gbigbitapai.’ (Asanza 1:33) Mbiko wa i amaanga bangiriyo tipa agu apai du rogo gi sino raka re ya, i nagia sangba gu ga Pauro rugute nayaa: “Ka oni dú nga ni akanga fu nyemu marã ya; agu ahe du be roni si ki rengbe bangironi, bambiko ko aya tigako, ‘Mi ahe nga unda ro wa sa te, mi ambú nga ro a wa sa te.’ ”—AEbere 13:5.
14. Tipagine si aidanga aKristano naabakabangiriyo ti ni gbe tipa agu ahe zingoho amanga yó ya?
14 Agi afugo nunga nga, “wa sa te,” gumbayo ho ane re, si nasa rani zanga kapa ani idi kuti gupai nga Mbori nikaa ngera angera fuo rani. Yesu akido rani a naapa wai Mbori aberãpa rani kini yaa: “Oni gbáta gako ngbi mbata, na gako rurupai; i ki kpamia agi ahe re dunduko fu roni kuti ni. Ka oni wisigi nga pai tie tipa gu pai nikadu gba ya; bambiko kina gba nikawisiga pai tipa ha ni saha.” (Matayo 6:33, 34) Yekova ima ino gupai nga si nikpakarapai furani ani ta tungusapa gako Kindo zaaza na ti kina gu bangisa regbo re, ani kini gbata gene tipa ka gbia agu ahe zingoho amanga rani. Sidu, ani kido kutiko rogo apai yo dũ nibi wai rengbe ko ka ngerafuo rani, na ko rengbe arengba ka mangaha wo.—Matayo 6:25-32; 11:28-30.
15. Wai aKristano asa ‘bangiriyo si du niruruhe’?
15 Ani nayugo gupai nga ani nakido kuti Yekova ho ani asa ‘bangirani ni si du niruruhe.’ (Matayo 6:22, 23) Gu bangirise du niruruhe, si angeranga na biriki te, kidu niziaziaha, na ka si adunga na ngbaduse watadu nyemuahe ya. Padu boro na ruru bangirini ayugongo gupai nga si naida boro du nikere irarungo te, watadu boro zanga manga agu asunge si aida aKristano naamangaha tipa ka undo tiyó te. Kuba gure, rogoyo nga kadu na “rugatinapai” wa ani aperesapa ga Yekova sunge mbatayo.—2 Timoteo 1:7.
16. Tipagine si aida boro du ti ni na idapase gbiati ngara tipa ka sa bangirini si du niruruhe?
16 Tipa kadu na ruru bangirise, si naida boro duna idapase gbiati ngara. Nikpiapai, ka si du nga gaoni bairasunge naida gupai nga oni naamangasunge amanga ti aregbo agu adunguratise nga ga aKristano dunduko, ya mo oni moipa agu apai nga ga aKristano mbatayo ningara? Ka boro duna tikö ya Yekova angeranga fuo gako amoyambu te, Satana rengbe arengba ka mangasunge na gu mamu re tipa kaa sosoda gu boro re kindi na si ki sa gupai nga ní mbu nduge kupati adunguratise yo. Ii, ka ani adunga na idapase ya, si nika sa Satana ko zi rani kpitori, kina ko kini sia agu apai si aida ani peresipaha mbatayo, angianga Yekova ya. Nairiwo gu gberango kangiaha!—2 AKorindo 13:5.
“Mo Súngudi Yekova”
17. Wai agu aboro nakido kuti Yekova agbia maku kina boro awere?
17 Ziazia Kekeapai nayugo gupai dedede nga, agu aboro nakido kuti Yekova, i atinga budungu te. (Asanza 3:5, 6; Yeremaya 17:7) Nirengo, ti kura aregbo, si rengbe ka ida i rengbe be kina gu tooni hee du beyo, ono i nabihe nga kiinga guhe mbuyó ho tipa gu toonihe diyó ho re te ka i ringbisihe kuti agu amaku nasungudo yó kumbatayo. Rogo gi gene re, i kini yugu gupai nani nga i ‘nasungudo Yekova’ na kidu naa kido nga ko nika nyasa anyasa na gu ruru nyemuhe nga ga gako ruru aboro. (Atambuahe 37:4, 34) Sidu, i na ngbarago nirengo kina boro awere. “Gu maabangirise nga ga ruru aboro adá na ngbarago, ono gu sogima nga ga gbegberẽ boro adá nga te.”—Asanza 10:28.
18, 19. (a) Gini kidohe nga ga nyemuse Yekova nafuhe furani? (b) Wai ani amaa Yekova ku ‘kumbaberani yo’?
18 Ho bagude nizi beru ni i naandu gene, gu gude re nabi tiní nga ní nibandabanda ní. Kina gu bangisapai re du tipa rani a wa ani ata na gu Barani du ngbangbaturũ yo. Yekova aya fu Yisaraere wee: “Ka mo gúnde nga ya, mbiko mi du na mo, . . . mi aúnda ro. . . . Bambiko mi nga Yekova nga ga Mbori, nazada kumba bero; mi du naya foro, ‘Ka mo gúnde nga ya, mi aúnda ro [aundo].’ ”—Yesaya 41:10, 13.
19 Nairiwo gu wene kpiapai naye ku berã rani yo ho i ayani wee Yekova nazio boro ti beni! Davide akepai ki yaa: “Mi namaa Yekova ku mbata yo . . . fere dedede; bambiko ko du ku kumbabere, mi awõ nga te.” (Atambuahe 16:8) Wai ani amaa Yekova ku ‘kumbaberani yo’? Ani namangaha wo kandara ngba agene ue. Bambataha nga, ani nambu Fugoko si naanungusa rani rogo abangiriba dunduko nga ga raka; na uehe nga, ani nangera tipa gu iriiri mosoro Yekova namoihe barabangirani. Gu bake apapara atambuahe nangia Asafa abibia ki yaa: “Mi du na mo kindi; mo nazada kumbabere. Mo nagasa re na sangbaro, ku mbata yo mo adia re sa taarimo.” (Atambuahe 73:23, 24) Nidu ani na gu kido re, ani rengbe arengba nirengo kaa maabangirani naa kido tipa raka kumbatayo.
“Rago Tumo Roni Nambeda”
20, 21. Ginipai napido agu aboro dunduko na maabangiriyo koyo du Yekova ni?
20 Rogo agu aʹuru nasusa nibasasa dunduko, si ninyanyakipa pai ani moi Yekova ku kumbaberani yo. Barambeda, ga Satana zegino nika rimo kurogo gu gberangbii ngbatungaha amanganga mbata ya, na si nika tona ti gbarasa zire pambori. (Matayo 24:21) Gunde nika zio agu aboro dunduko adunga na idapase ya. Wa si ka vura duwo, ti gu regbo vunduvunduapai re, ga Yekova aboro duna ngara nikaa gbia ngbarago agbia na gayo maabangirise! Yesu ayaa: “Ho agi apai ka tona ye ni re, oni ngére ku ari yo, ki tumba rironi; bambiko rago tumo roni nambeda.”—Ruka 21:28.
21 Sidu tie, ani nginga angi rogo gu maabangirise Mbori nafuhe furani, na ka Satana ananganga rirani yo rogo gako abirĩ ya. Ti kina gu bangisa regbo re, ani asadingo tirani kadu na idapase, nyemuse, gbiati gunde ti Mbori. Nimanga ani he wo, ani aduna ngara tipa ka giasangba Yekova ti aregbo dunduko, na ki sogo Satana. (Yakoba 4:7, 8) Ii, “oni nyáki, kpotoroni yo ki ngarã, agu roni dunduko namaa bangironi kuti Yekova!”—Atambuahe 31:24.
[Gu rukutu kekeapai du bandu kpewaraga yo]
a Wa vura duhe nga i mangisunge na gu fugo nga ‘maabangirise’ rogo gu Papara Ziazia Kekeapai Nga ga AKristano I Ake Bambata Fugoho Rogo Pa-Giriki nigu mosoro du fu mbedimbedi aKristano naga ku ngbangbaturũ yo, rogo gi papara kekeapai re, ani nika fura tipa maabangirise nabaha dunduko.
[Gu kpiahe du ti kpewaraga 26]
Ka oni vura ngia sosono boro watadu paranga boro, ya mo oni rengbe ka bi tironi Paradizo yo?
Oni Rengbe ka Karagapai Sa Agi Asanahe Re?
• Ngba gini gene ga Yesu maabangirise asako ko duna ngara?
• Gini ngbanyaa du dagba idapase na maabangirise?
• Wai rengbe maabangirise na idapase ka sa Kristano ní peresi agu apai nyakipaha mbatayo rogo gani raka?
• Tipagine rengbe agu aboro ti ni ‘nasungudo Yekova’ ka ngera kumbatayo naa kido?