Ani Sungudi Ga Yekova Uru Na Hipai
“Rogo gaoni idapase oni kúsi . . . hipai.”—2 PETERO 1:5, 6.
1, 2. Gine nga hipai, na tipagine si aida aKristano du ti ni nani?
GA YEKOVA bakere uru ima mbeda. (Yoere 1:15; Zefania 1:14) Nidu ani ni agu aKristano naima diaberã ka nye niruru rani fu Mbori, ani nasungudo gu regbo na nyemuhe ko nika dia gbarasarimo kusayo ti gako bakere pagbia. Ono wa du rago re, ani nagbia tirani agbia na sogote, gbarasarimo, rungosiro, gbiati kpio mbiko gaani idapase. (Matayo 5:10-12; 10:22; Yugoti 2:10) Agi apai re naida hipai, nga ka ru nyanyakii fu fudifudiapai. Fugo gu mokedi nangia Petero naya furani wee: “Rogo gaoni idapase oni kúsi . . . hipai.” (2 Petero 1:5, 6) Si naida ani duna hipai bambiko Yesu ayaa: “Gu ni nikaru ki da ho ragoho ka diga ni, ni abáta abata.”—Matayo 24:13.
2 Ani nambu ambu a be akaza, rungo tipa gu gaani aboro nakpiko, gbiati gu kura aʹasada. Nairiwo wai ka rago ngba ti Satana ka gaani idapase kpi! (Ruka 22:31, 32) Mbiko gu undahe nga ga Yekova, ani rengbe arengba ka hi aʹasada. (1 Petero 5:6-11) Ani wisigingo agu apai namangi nga gu nayugo gupai nga ani rengbe arengba ka sungudo ga Yekova uru na hipai, na gaani idapase kidu niungaha.
Wokote Aarugusanga Yó Te
3, 4. Oni funga kpiapai nayugoho nga ani rengbe arengba ka mangasunge fu Mbori nibeedihe ani ki vura niwoki vurũ.
3 Mbori ahusanga aboro areme ngba iiriwo gene te, ono ko nafu kina ome fuyó i hipai. (Atambuahe 41:1-3) Wirinarani nga Sharon nayaa: ‘Tona ti kina gu regbo mi aasona, ngbagida gbarigbari aboro ningia bakureami. Mi aima ngburukani tona ti kina gu regbo i avungure, na ka mi agbianga gu ngbarago boro naagbiaha ho du ní ni nigude ya, bambiko gude nangi mbaro na akurai u kini gbia ngbarago.’ Pa wirika ri pai tipa Yekova na tipa gu gako akidohe du tipa raka kumbatayo, si nasa ngbarago tiri, na ki fu maabangirise furi a. Wa vura duhe nga ri nata na kini fura kina ngbapai, ri nagbia ngbarago mbiko manga ri gu sunge tungusapai nga ga aKristano. Rogo gu garã nangia 1993, ri ayaa: “Kpotore nikaa gberã kina kumbatayo kindi, ono gu kido du mi nani kuti Mbori, gbiati gimi pagume naako, si nga ungare. Mi na bakere ngbarago kadu dagba ga Yekova aboro na tipa wa ko asongoda re kindi.”
4 Gu mokedi nangia Pauro angarasi agu aKristano nadu Tesaronike yo i “nyákasi agu yo nawo [“aguyo duna bakere gberarago tiyó,” NW].” (1 ATesaroniko 5:14) Ho du boro ni na bakere gberarago, si nafu kina kaza funi. Rogo 1993, Sharon akepai a ki yaa: “Fuo bi mi tire nga wiri undo aadunga berewe tire te, mi . . . aduna bakere gberarago tipa garã biata, si kini fu kina kaza fere. . . . Mi aagbia wasa gbiati arugute be abaakumba. . . . Yekova naundo rani ani inipai wenengai tipa bakere gberarago vurube Ngbaõbambu Sinziri. Nirengo, ko namaa berãko amaa fuo gako aboro na kini rugutiko naapa gayo arungo.” (1 Petero 5:6, 7) Sharon namangasunge kindi fu Mbori nibeedihe wa ri asungudo ga Yekova bakere uru.
5. Gini gopai duho nayugo gupai nga ka aKristano vura du nifudifudi yó berãyo yo, i rengbe arengba ka hihe?
5 Kura aKristano kinaho du berãyo nifudifudihe mbiko agu apai namangi kusayo i ki bihe. Nikpiapai, Harley abi gu kere imo aboro namangi ti regbo Ue Vura Nga ga Zegino. Ho ko anaara ni, ko anaarara kina kere avura rogo mosumo. Ko aanigu rameyo kini ta ngbako kini yaa: “Oni du na rugatise! Oni bandatironi!” Ho ko aniguari ni rii barame, ko anibi kpotoko nga kina ime dunduko be randimo. Ono wa gipai re avura nifudi ko vurũ, ko arengbe arengba ka raka ringbisihe kuti ga Mbori gene. Fuo gbanga regbo, ko aararanga gbegberẽ amosumo berewe dedede wa gu ko anaararaha te.
6. Wai Kristano sa asovura kuti gu kaza naamanga ko?
6 Kura Kristano sa aawoka be gu kaza nga ga berã (bipolar), nga gu kaza nasa boro ní zi fugo nigbangaha, kini gumba agu apai adunga rogoyo ti ni ya, na ti kura aregbo, ní kidu na bakere gberarago tiní, ka ní afuranga wa gu tooni ya. Si adu fuko nikpakarapai tipa ko tungusipai kporo na kporo. Ono tie, ko akakuti gi sunge re kindi bambiko ko abihe nga si rengbe ka fu unga fuko na fu agu aboro a rengbe ka ida nani wa ko agumbaha fuyó. (1 Timoteo 4:16) Ti kura aregbo, ko anaarengbanga ka nara gu nzoro nga ga ngbadimo ru tipa irakporo ye ka za ngbadimo te. Ono ko ayaa: “Fuo bete regbo, mi arengbe arengba ka hi gimi kaza, ki gbisi kuti kura ngbadimo, ki asadi berewe ka nara nzoro. Fuo mi niitungusipai kindi, mi abi gupai nga mi aduadu rogo toroyo wenengai.” Si adu a fu gi wirina re nikpakarapai tipa ko niindu kupati adunguratise, ono ko aima bipa nyakapa kodatise na awirina. Sidu, ko kini mangi ome tipa kaa ndu koyo.—AEbere 10:24, 25.
7. Wa vura duhe nga kura aboro kinaho duna bakere gunde ka fura dagba dungu aboro watadu tipa ka ndu kupati adunguratise yo, wai i ayugo gupai nga i nahipai ahi?
7 Kura aKristano kinaho duna bakere gunde tiyó (phobias). Nikpiapai, i rengbe kaa gunde agunde ka fura dagba dungu aboro, watadu ka ndu kupati dunguratise yo. Si nikpakarapai fuyó tipa i tumba beyo kuari ka fura ba agu adunguratise yo nga ga aKristano, na ka manga gumbapai ti regbo gu Sukuru Nga ga Siokrasia. Ono wa vura duhe wo, i nahipai ahi. Ani nagbia ngarasaro mbiko padu yó na ani kindi na tipa pa do yó gunde kusayo tiyó.
8. Ginipai rengbe ka undo gbe ho du boro ni nifudifudi ní kpotoniyo?
8 Ho du boro ni nifudifudi ní kpotoniyo, si naida ní niiongodi aongoda bakere gbe, na kini ra rame wenengai. Ní rengbe arengba a ka ndu fuo amunganga. Na gupai rengbe ka undo ní gbe nga kparakpee fu Mbori na kini kido kutiko. Atambuahe 55:22 nayaa: “Mo bá ga tindiro ku auru Yekova, ko asóngoda ro; ko aída nga i gbisi ruru boro wa sa te.” Sidu tie, ka kina ginipai vura kaa manga amanga vurũ, si naida “mo kída kuti Yekova na kpotoro yo dunduko.”—Asanza 3:5, 6.
Kpio Boro
9-11. (a) Gine rengbe ka undo rani ani hi bakere rungo gbiati gberarago ho gaani boro nakpi ni? (b) Wai rengbe gu kpiapai du tipa Ana ka undo rani ani hi rungo tipa pakpio gaani boro?
9 Ho boro akpi ni, si naye na bakere rungo fu gani aborokporo gbiati gu kura agume ní. Ho dia gu bakumba nangia Abarayama akpi ni, ko akpari tipa ri nibakerehe gbe. (Bambata Pai 23:2) Zavura gu rengberengbe boro nangia Yesu, ko ‘akpari ni aume’ ho bakureako akpi ni nangia Razaro. (Yoane 11:35) Aboro dunduko rengbe kadu na gberarago ho gani boro akpi ni. Ono tie, aKristano ima ino gupai nga zingabekpio nikadu adu. (Amokedi 24:15) Si kita duwo, i ‘arungonga [tipa pakpio boro] wa kura aboro, adunga na maabangirise tiyó ya te.’—1 ATesaroniko 4:13.
10 Wai rengbe ani ka sovura kuti rungo tipa pakpio boro? Kpiapai rengbe ka undo rani rogo gi bangiriba re. Ho bakurearani nindu nunguro ni kurogo kura rago, ani naadunga na bakere gberarago tipa gbanga regbo te, bambiko ani namaabangirani nga ani abi ní abi berewe ho ní nika yego ni. Ka ani duna kina gu bangisa bipai re ho ruru Kristano akpi ni, si rengbe ka zogosa bete gu bakere gberarago du ani nani, bambiko si nawira gupai gbe nga Mbori azingisa ní azingisa.—Batungusipai 7:1.
11 Pa kido ani kuti “Mbori wasa” rogo apai yo dũ nika undo rani ani hi gu bakere gberarago du ani nani. (2 AKorindo 1:3, 4) Na ka ani berẽ a kurii gupai gu dekurugbo nangia Ana amangihe rogo bambata sa kama agarã, si rengbe arengba ka undo rani. Kumbaari akpi fuo agarã saba tingbafuo roga yó tiyó. Ono zavura ho garãri aduni 84, ri anaamanga ziazia sunge kindi fu Yekova yekaru yo. (Ruka 2:36-38) Pa furi tiri sa sunge wa gure naaundo ri tipa ri sovura kuti bakere rungo kpotoseyo gbiati gu gberarago naye mbiko sungo nisase. Ka ani amanga agu asunge nga ga aKristano dedede, kodihe na sunge tungusapa ga Mbori Kindo, si rengbe ka undo rani ani hi gu bakere rungo gbiati gberarago du ani nani.
Sovura Kuti gu Kura Aʹasada
12. Gini aʹasada duho kura aKristano agbiatiyo nani nibipa gu raka nga ga aborokporo?
12 Kura aKristano nambu be agu aʹasada nabipa gayó ramukporo. Nikpiapai, ka diakumba watadu kumbakudee mangi bäri, si rengbe ka ye na bakere rungo ku kporo. Gu gani badiarogatise ní ambu ní kina kporoyo ka ndu ka manga bäri re, si rengbe kadu nikpakarapai funi tipa ní ra, na ri rengbe kaa kpara akpara kindi, na kidu na bakere gberarago. Zavura manga wiri taata asunge, si rengbe kadu nikina kpakarapai funi. Na kandara agu asunge duwa sega abangbe, ní rengbe ka yera beni ayera pati ni na sape. Ní rengbe ka sungo na gomoro uru ki ti. Ní ki ugudi a be gu bakere gberarago du ní nani, na wai du ní nifudifudi ní kpotoniyo. Si rengbe kadu a funi nikpakarapai tipa ní mangi agu asunge nga ga aKristano. Gupai re rengbe arengba a ka fuda agude nikerehe, ka si du nga agude beyo.
13, 14. (a) Gini ngarasaro ani agbiaha be gu kpee Soromo afuhe ti regbo kpara yekaru na pumbo fu Yekova? (b) Tipagine si aida ti ni ani kpari tipa ziazia toro?
13 Ho ani ambu ni be ngbatunga aʹasada wa gure, Yekova rengbe ka fu wasa furani. (Atambuahe 94:19) Gu kpee Bakindo Soromo afuhe ti regbo kpara yekaru na pumbo fu Yekova, si nayugo gupai nga Mbori nagia gu kpee agia nga ga gako aboro. Soromo akpari fu Mbori ki yaa: “Gu kpetambuahe na gu kpesarawati gu boro ka kpara, watadu gamo aboro aYisaraere dunduko, nga agu yo ka ini pa gayo gberãngbi ni ba sa sa du kpotoyo yo, i ki zara beyo kono du gi bambu re ni; Mo gí he ngbangbaturũ yo nga ga banye, ki vu yo, ki mangi pai ki nifu he fu aboro dunduko rengbe na gayo pai, nga agu yo ini mo pa kpotoyo yo, bambiko mo, kina ro, ini gu pai du kpoto wiri aboro yo dunduko; ya i gúnde ti ro wa du yo ni unga yo rogo gu ringara mo afu he fu atitarani.”—1 Abakindo 8:38-40.
14 Ka ani akpara kindi tipa ziazia toro, si rengbe ka undo rani bakere gbe. (Matayo 7:7-11) Bete apapara zuzu toro nga ngbarago gbiati zereda. (AGaratio 5:22, 23) Nairiwo gu undo ani agbiaha ho gu Barani du ngbangbaturũ yo agia gaani akpee ni, ngbarago kidu kuba rungo, zereda kidu kuba kere egerã!
15. Gini averesi ka ani gedihe si ki zeresi gu bakabangirise du ani nani?
15 Ho duhe ni nga gene berani wa ka ani ne fudifudiapai te, ani rengbe ka maabangirani amaa tipa ka mbu be bete bakabangirise. Ono bete gi bakabangirise re rengbe ka zora kusende ka ani tingidi gupai Yesu agumbaha ki yaa: “Ka oni wisigi nga pai tipa ungaroni ya, gine oni ka ri he, na gine oni ka mbira ha ya; na tipa kpotoroni ya, gine oni ka ukadi he ya. ... Ono oni gbáta gako ngbi mbata, na gako rurupai; i ki kpamia agi ahe re dunduko fu roni kuti ni.” (Matayo 6:25, 33, 34) Fugo gu mokedi nangia Petero nangarasa rani kini yawee ‘ani ba agu apai nafuda rani ku auru Yekova; mbiko ko naberã parani aberã.’ (1 Petero 5:6, 7) Si daada boro mangi ome tipa ka diabe fudifudipai. Ani arengbanga ka diabepai mbiko bakabangirise te, ono kpee fu Mbori rengbe ka undo rani. Bake apapara Atambuahe abibia ki yaa: “Mo fú ga pai ku be Yekova; ki kida kuti ko a, ko amánga pai tipa ha.”—Atambuahe 37:5.
16, 17. (a) Tipagine ka ani ahenga zanga wiri bakabangirise ti ni ya? (b) Ka ani mangisunge na AFiripoio 4:6, 7, gine ka ani gbiaha?
16 Pauro akepai ki yaa: “Ka oni ídi nga fu pai si fudi roni wa sa ya; ono oni yúgu gaoni sanahe fu Mbori dunduko rogo kpe na zungaditise ni tambuahe. Na gu zereda nga ga Mbori nagasi rugatinapai dunduko, si abánda kpotoroni yo na gaoni berã rogo Kristo Yesu yo.” (AFiripoio 4:6, 7) Nirengo, kpakpa aboro naenge ti Adamu, i arengbanga ka raka zanga bakabangirise wa gu tooni te te. (ARomo 5:12) Rago ‘agberẽ ti’ aYisaka na Rebeka nangia avuru Mbori mbiko agu adia Esau nangia aboro Eto. (Bambata Pai 26:34, 35) Si nawira gupai nga kaza aima fu bakabangirise fu agu aKristano nangia Timoteo na Turofimo. (1 Timoteo 5:23; 2 Timoteo 4:20) Pauro anaabakabangiriko tipa akurako aidipase. (2 AKorindo 11:28) Ono si naida ani tingidi gupai nga, “gu ko ninagia kpetambuahe,” ko kinaho ti aregbo dunduko ka fu undo fu agu aboro nakpinyemuko.—Atambuahe 65:2.
17 Wa ani asungudo ga Yekova uru, ani nagbia wasa be “Mbori zereda.” (AFiripoio 4:9) Yekova, nga “Mbori du adu na nunga aboro na undahe ti ko,” kidu ‘ni wene ko, ki du zaza tipa vu aboro,’ na “ko natingida pa rani ya nvutu sende nga ani.” (Gate 34:6; Atambuahe 86:5; 103:13, 14) Sidu, ani ‘yúgu gaani sanahe fu Mbori,’ bambiko si nika sa rani ani gbia “gu zereda nga ga Mbori” nagasi ga aboro rugatinapai dunduko.
18. A wa duhe rogo Eyobo 42:5, wai rengbe ani ka ‘bi’ Mbori?
18 Ho Mbori akaragapai ni sa gaani akpee, ani naino gupai nga ko na kina rani. Fuo gu bakumba nangia Eyobo hi agu aʹasada ko adu rogoho, ko aya fu Yekova wee: “Mi agi pa ro be kina gu giapai nga ga tue; ono awere bangire nabi ro.” (Eyobo 42:5) Nigu bangirani nga ga idapase, ani rengbe ka bi wai Mbori amangapai na ani. Na ho ani asona ni rogo gaani giarogopaiyo gbiati gaani tambuahe, ani ki rengbe ka ‘bi’ ko susi wai ani naabiko mbata. Nairiwo wai ngbatunga gu ngbanyaa na Mbori re afu zereda furani nga ga kpotoseyo gbiati berã!
19. Ginipai ka mangi ka ani ‘ba agu apai dunduko nafuda rani ku auru Yekova’?
19 Ka ani ‘ba agu apai dunduko nafuda rani ku auru Yekova,’ ani rengbe arengba ka hi aʹasada, bambiko ani gbia gu zereda nika banda kpotoraniyo na gaani aberã dũ. Ani duadu na zereda ngbaduraniyo, ka ani agundenga watadu ka bakabangirani ya. Berãrani dunga nifudifudihe be abakabangirise te.
20, 21. (a) Gupai namangi tipa Setefano nayugo ginipai furani tipa zereda ho du ani ni rogo rungosi? (b) Oni gumbanga agu apangbangaa namangi ti gi gaani regbo re nayugo padu ani na pazereda ti regbo rungosiro.
20 Gu bawiriki nangia Setefano aduna zera ho ko aahi asada gako idapase ni. Mbata fu ko mangi yangara dezirepai, ga aYuda abororondo ‘abi kpakpuko wa si aduwa kina kpakpu maraika.’ (Amokedi 6:15) Kpakpuko adu na kina pazereda, wakina ga maraika, nga ga Mbori bamokedi. Fuo Setefano kusi gu gbegberẽpai kuyangura i amangihe nga ga taburõ ka imo Yesu, ‘ngbaduyó aimi aima i ki niri ngba rindiyo fu Setefano.’ Fuo Setefano ‘hi be Ziazia Toro,’ ko ‘angere ku ngbangbaturũ yo, ki bi ga Mbori taarimo na Yesu, ko ru pati kumbabe Mbori.’ Fuo ko gbia ome be gu yuguyugupai ko abihe re, ko akakuti gako idapase dati kpio. (Amokedi 7:52-60) Wa vura duhe nga ani abingo yuguyuguapai areme te, Mbori nafu zereda afu furani ho i arungosi rani ni.
21 Oni bingo agu apai agu aKristano agumbaha nadu ngba kpio yo be aNazi ti regbo Ue Vura Nga ga Zegino. Ho guni sa dagbayo agumba gu pangbangaa ni namangi ní ngbangayo, ní ayaa: “I asari ngbanga re sa kpio. Fuo mi gumba gu fugo nga ‘Mo du niruru ro ki dati kpio,’ gbiati gu kura afugo nga ga Bairarani Yesu, i asari ngbangaa niyangaraha.” Ko ake waraga fu avunguko ki yaa: “Ka si iriwongo tironi ya. Bambiko mi awere na gu zereda oni ainongo paha ya!” Paranga Kristano si adu nga i nika kata riko ake waraga fu avunguko ki yaa: “Bebere yuru ima susa awere. Mi rengbe arengba ka mbu gimi idapase awere, bambiko regbo koyo kindi tooni. Aha! Ya mo mi rengbe ka raka na ngbarago rogo gi zegino re ka mi ororimo Bairarani? Wagusa te! Ono awere, oni na gu kido nga, mi nambu gi zegino re na ngbarago gbiati pazereda.” Nirengo, kango ho ti gupai nga Yekova nasongoda gako amoyambu asongoda i ru nyanyakii te.
Oni Rengbe Arengba ka Hipai!
22, 23. Gine rengbe oni kadu naa kido tipaha wa oni asungudo ga Yekova uru na hipai?
22 Si rengbe kadu nga ngbatunga agi apai ani nafura tipaha re, si amanganga roni te. Ono gu ruru kumba nangia Eyobo agumba kina rengo, ho ko ayani wee: “Gu boro de avungu ni gani arame ni kina guru he gbua, ki hi ahi be fudifudipai.” (Eyobo 14:1) Si rengbe kadu nga oni nga gu vunguagude namangasunge nyanyakii tipa ka ruga awironi kuti agu agene nga ga Mbori. Awironi nahi aʹasada ahi ho du yó ni sukuru yo, ono nairiwo wai oni nidu na bakere ngbarago ho i aru ni nyanyakii tipa ka songoda gu bangua arugute nga ga Yekova! Si rengbe kadu a nga aʹasada kinaho nagbia roni ba gaoni sunge yo. Agi apai re dunduko, na agu akuraha, ani rengbe arengba ka hihe, bambiko Yekova “natinda gaani tindiro na auru.”—Atambuahe 68:19.
23 Oni rengbe kaa bi tironi nga oni nga kungbo boro gbua adunga sunge ti ni ya, ono si naida oni tingidi gupai nga, bangiri Yekova agonga ti gaoni sunge gbiati gu nyemuse oni ayugoho tipa ziazia rimoko te. (AEbere 6:10) Mbiko gako undahe, oni rengbe arengba ka hi aʹasada. Sidu tie, oni moi pa manga ga Mbori pai kurogo kpee yo gbiati ku berãroni yo. Oni ki rengbe kadu naa kido tie nga, Mbori nika fu maku afu furoni na kini songodi roni, wa oni asungudo gako uru na hipai.
Gaoni Karagapai Nga Gine?
• Tipagine si aida aKristano du ti ni na hipai?
• Gine rengbe ka undo rani ani hi kaza gbiati gu rungo du ani nani tipa pakpio gaani boro?
• Wai kparakpee aundo rani ani hi aʹasada?
• Tipagine rengbe ani arengba ti ni ka sungudo ga Yekova uru na hipai?
[Gu kpiahe du ti kpewaraga 17]
Pa kido ani kuti Yekova naundo rani ani hi gu rungo du ani nani tipa gu gaani boro kpii