Weteka “Gu Dudungura Apai Nga Ga Mbori”

“Toro nabi apai dunduko, ii, gu dudungura apai nga ga Mbori.” —1 AKORINDO 2:10.

1. Gini bete arengo nga ga Ziazia Kekeapai rengbe ka sa gu boro nawirika Ziazia Kekeapai ní du na ngbarago?

BADUNGU rani rogo gu dungurati nga ga aKristano ninaatingidapa gu ngbarago ani adu nani ti gu regbo ani atona ka wirika rengo. Ani aima rugatirani naapa nyakapa rimo Yekova, ndu gupai ko ambu arungo ti ni si niimangi aboro, ndu gupai gu kura aboro andu ti ni ku ngbangbaturũ yo, na gini maabangirise du tipa ruru ngbatunga aboro naabayo dunduko. Si rengbe kadu nga ani anaawisigo Ziazia Kekeapai awisigo mbata fu gu regbo re, ono agi apai re adu niigiigihe berani, kinawo a duhe tipa dungu aboro areme. Ani adu wagu boro nitona gani nunguro kina boro ngbatutu wiso. Ti tonatonaha ka ní arengbanga ka ngera wenengai ya mbiko rago na kina bitimo. Ono fuo tona kura uru sendeyo, ní ki tona ka ngera wenengai. Niyangaraha, fuo kura uru wenengai kuari, ní ki tona kaa bi agu ahe du pati ní kirikiri kodihe na agu du tuturũu. Teketeke a, ho boro atona ka undo rani ni tipa ani girogo Ziazia Kekeapai yo, ani anaabi kina kpia gu “dudungura apai nga ga Mbori” gbua.—1 AKorindo 2:8-10.

2. Tipagine si aida gupai ti ni nga gu ngbarago naye mbiko Fugo Mbori, si nyeanye kindi rogoraniyo?

² Ya mo si naida ani mbi be kina gu bete inohe nga ga Ziazia Kekeapai gbia ani he? Gu fugo nga “gu dudungura apai nga ga Mbori,” si nakoda giarogo ga Mbori tatamana nga gu ko ayugoho fu aKristano vurube ziazia toro, ono si kidu niʹigiʹigihe be kura aboro. (1 AKorindo 2:7) Gu tatamana nga ga Yekova, digidoho ti ni te, na ani rengbe ka gbia bakere ngbarago ti wisigo ani gako agene. Ani ainongo apai dunduko tipa gu tatamana du ti ga Mbori agene te. Gu ngbarago ani agbiaha ti gu regbo ani atona wirika gu bangua yugopai nga ga Ziazia Kekeapai, si rengbe arengba ka nye rogoraniyo ka ani andu kindi kumbatayo na weteka “gu dudungura apai nga ga Mbori” zanga nyomoro.

3. Tipagine si aida ti ni ani rugutirani sirisiri na mburu gaani idapase?

³ Tipagine si aida ani girogo gu “dudungura apai” re ti ni? Si aidanga ani girogo kina agu apai idi ani kuti ni te, ono si naida ani ini gupai a sa rani ani idi kuti ni, bambiko si nika nyakasa gaani idapase na ki sa rani ani kido kuti ni. Ziazia Kekeapai nape gupai furani nga ani mangisunge na gaani ‘ome makiapai’ tipa ka “kpária pa gu he nga ga Mbori nyemu he du ni wene he, nzunzu, ni ziazia ha.” (ARomo 12:1, 2, oni ringbisinga ha na NW) Pa gia ani rogo gupai yo Yekova aida ti ni ani naaraka ngba gu gene ko akpinyemuhe nanyakasa rani ani gi sangbako. Sidu tie, gu inohe nga ga “dudungura apai,” si nika nyakasa rani tipa ani sovura kuti agu aʹasada rengbe ka sa rani ani rimisi tirani kurogo gbegberẽ mangapai, na si ki fõngbaduraniyo ani du “ngangarã tipa manga agu apai ngba angba.”—Tito 2:14.

4. Ginipai wisigo Ziazia Kekeapai akodaha?

⁴ Tipa ka rugatise na gu dudungura apai re, si naida wisigopai. Ono tie, anga wisigopai nga kina kungbo gedapai gbua te. Si nakoda wisigopai tipa pai sirisiri tipa ka bi wai si andu sa na gu ani aima inoho mbata. (2 Timoteo 1:13) Si nakodapa kparia ndu gupai furayo ti ni tipa gupai re. Wisigo Ziazia Kekeapai nakoda berãkuriipa wai ka mangasunge na gupai wiriki ani he tipa ka manga agu adiaberã du nitatamana na tipa ka undo gu kura aboro nani. Wa duhe nga “Ziazia Kekeapai dunduko si aye be ga Mbori Toro,” gure nayugo gupai nga, si naida gaani wisigopai kodi “agu apai dunduko naye ngba Mbori yo.” (2 Timoteo 3:16, 17; Matayo 4:4) Wisigo Ziazia Kekeapai nga taatapai te, si naida bakere asadatise! Ono si ima rengba kadu a nipa ngbarago mbiko kpakaranga giarogo “gu dudungura apai nga ga Mbori” te.

Yekova Naundo Aboro Umbasitise I Girogopaiyo

5. Ada rengbe ka giarogo “gu dudungura apai nga ga Mbori”?

⁵ Ka si vura du nga oni aturongo na wirikapai te na oni ainidonga wisigopai te, oni rengbe arengba kindi ka giarogo “gu dudungura apai nga ga Mbori.” Ti regbo ga Yesu tungusapai auru kpotosende ane, Yekova aayugongo gu inohe nadu tipa gako ringbisapai fu airatatamana watadu arugutinapai te, ono ko ayuguhe fu kina agu aboro nangia azanga inohe nga aguyo naadu na umbasitise na ki idi gupai nga ga Mbori amoyambu yugupai fuyó. I adu wakina agude ka ani ringbisi yó na agu aboro nawirikipai sukuru yo. (Matayo 11:25; Amokedi 4:13) Gu mokedi nangia Pauro akepai fu akurako aidipase nibipa “agu apai dunduko Mbori ambakadi tipa agu yo nakpi nyemuko,” ki yaa: “Mbori ayugu he fu rani rogo Toro yo. Bambiko Toro nabi apai dunduko, ii, gu dudungura apai nga ga Mbori.”—1 AKorindo 2:9, 10.

6. Gupai du rogo 1 AKorindo 2:10, rogoyo nga gine?

⁶ Wai ga Mbori toro aweteka ‘apai dunduko, zavura gu dudungura apai nga ga Mbori?’ Kuba gupai nga aKristano naagbia yugoti nibakiakia be Yekova, Yekova namangasunge na gako toro tipa si niirugu gako riigbu, nga gu naundo ga Mbori aboro i du nikodikodiyo na kini girogo Ziazia Kekeapai yo wenengai. (Amokedi 20:28; AEfeso 4:3-6) Rogo zegino dunduko, adungurati naabaha nagbia ngbarago rogo gu bangisa mbakadapai nga ga wisigo Ziazia Kekeapai re. Vuru bete agarã, dungurati nanyasa na agu ayugopai nga ga Ziazia Kekeapai naabaha. Ziazia toro namangasunge rogo dungurati tipa ka undo aboro i gbia gu sino si aida boro du nani tipa ka giarogo “gu dudungura apai nga ga Mbori.”—Amokedi 5:32.

Agu Apai “gu Dudungura Apai Nga ga Mbori” Akodaha

7. Tipagine dungu aboro agianga rogo “gu dudungura apai nga ga Mbori” ti ni ya?

⁷ Si aidanga ani berẽ gupai nga “gu dudungura apai” re nga kina boro agu apai kpakara giarogoyo akpakara te. Gu inohe du tipa “gu dudungura apai nga ga Mbori,” anga si niʹigiʹigihe be dungu aboro mbiko gupai nga gu tatamana nga ga Mbori nikpakarakpakaraha tipa ka inoho te, ono si wo mbiko Satana nananga aboro tipa i sogo gu undo Yekova afuhe rogo gako riigbu.—2 AKorindo 4:3, 4.

8. Gini dudungura apai Pauro afura tipaha rogo kapita biata nga ga gu waraga ko akehe fu aEfeso?

⁸ Gu biata kapita nga ga gu waraga Pauro akehe fu aEfeso, si nayugo gupai nga, “gu dudungura apai nga ga Mbori” si nakoda dungu arengo ga Mbori aboro naima girogoyo wenengai, ngbatunga gu duwa pa ino gu tunga i akidohe tipaha, pa dungura aboro auru kpotosende ane i ga ku ngbangbaturũ yo, na gu Kindo nga ga Masiya. Pauro akepai ki yaa: “Gu i ayugo nga ha fu wiri aboro ni kura arago, wa du he ni yuguyugu he awere fu gako ziazia amokedi na anebi rogo Toro yo ya. Si nga aGendiria nga adikumbo a, na apa boroko, na adikidohe rogo Kristo Yesu yo.” Pauro ape gupai nga i afu gu sunge fuko nga ko sa “aboro [i] bi gu he nga manga gu gbugbu pai i naaoka aoka rogo Mbori yo kina yo rago aenge ni, gu ko nafu ahe dũ.”—AEfeso 3:5-9.

9. Tipagine duhe ti ni nimomu tipa ka giarogo “gu dudungura apai nga ga Mbori”?

⁹ Pauro asakirogo gupai Mbori akpinyemuhe nga i ‘yugu gu banaru tatamana nga ga Mbori awere mbiko kanisa fu azogoaboro na asiapapai rogo agu arago du ngbangbaturũ yo.’ (AEfeso 3:10) Amaraika nawirikapai na kini girogo ga Mbori tatamana ho i abi Yekova ni ko nimangisunge na gu dungurati nga ga aKristano. Nairiwo gu momu du ani nani nga ka giarogo agu apai amaraika akpinyemuhe akpi a! (1 Petero 1:10-12) Fuo gure, Pauro ape gupai nga si naida ani asaditirani tipa ka ‘ruga tirani na guhe nga [ga aKristano idapase], patihe na bagizaha, na basonaha na badunguraha.’ (AEfeso 3:11, 18) Awere tie, ani wisigingo bete gu kpiaapai nga ga dudungura apai nga gu rengbe kadu nga ani aawisigongo ho mbata te.

Bete Dudungura Apai

10, 11. Ringbisihe kuti Ziazia Kekeapai, gini regbo Yesu ada nibambata ‘tita’ gu ga Mbori ‘dee’ du ngbangbaturũ yo?

¹⁰ Ani ima rugatirani nani nga Yesu nga gu bambata ‘tita’ ga Mbori ‘dee’ du ngbangbaturũ yo nga guri Bambatapai 3:15 afura tipa ri. Tipa ka kiiso gaani giarogopaiyo, si naida ani sanahe nga: ‘Gini regbo du Yesu ada nigu ‘tita’ dee i akidohe tipa ko? Ya mo si rengbe kadu nga mbata fu ye ko niboro ku auru kpotosende ane, ti regbo batika yó ko niboro, ti regbo gako bapatiza, watadu tingbafuo zinga ko bekpio du?’

¹¹ Mbori aima kidohe nga gu papara gako riigbu du ngbangbaturũ yo, nga gu ko afura tipaha rogo sangbaanebi ya si nga gako ‘dee,’ si avunga gu gude nika mbura rii wo. Ono fuo gupai re, akutu agarã asusi zanga gu ga Mbori dee re batika gu gude narengbe ka gbarasa Satana na gako sunge. Si ki tadu were, gu nebi nangia Yesaya agumba sangbanebi tipa gi dee re ki yambu ri nga “irazangada,” na nigu dee “narungo arungo torori yo.” (Yesaya 54:1, 5, 6) Niyangaraha tie, i kini batika Yesu Betereme yo. Ono kinaho ko adani niwiri Mbori nga ga toro fuo zioko bapatiza na i ki mbedi ko niziazia toro, Mbori ayawee: “Wire du re.” (Matayo 3:17; Yoane 3:3) Gu regbo re gu bambata papara gu ‘tita’ dee re ayugu tiko. Kusa, i ambedi apefuo Yesu niziazia toro i ki da a tigayó ni awiri Mbori. Niyangaraha, gu ga Yekova ‘dee’ nasungu tipa gbanga regbo wa gu dee “avunga nga ya,” ri ‘abí bia’ ningbarago.—Yesaya 54:1; AGaratio 3:29.

12, 13. Gini averesi rogo Ziazia Kekeapai nayugo gupai nga mbedimbedi aKristano auru kpotosende dunduko nga ‘ruru kangara moyambu’?

¹² Gu kura ue kpiapai nga ga dudungura apai nga gu yuguyo ho furani, si nabipa gu ga Mbori ringbisapai du tipa ka sia aboro nga 144,000, dagba ngbatunga rikaaboro. (Yugoti 14:1, 4) Ani ima giarogo gupai re na ki idi kuti ni nga, gu mbedimbedi aKristano naabayo du auru kpotosende ane naraka ti bangisa regbo, i dunduko nga ‘gu kangara moyambu duna tatamana’ nga guni Yesu afura tipa ní ya ní nikaa fu “riahe” fu gako aborokporo ti regboho. (Matayo 24:45) Gini averesi du rogo Ziazia Kekeapai nayugo nani nga gu giarogopaiyo re, ruhe aru? Ya mo si rengbe kadu nga Yesu aafura tipa gu Kristano nanyakasa akurani na gu rigo nga ga toro?

¹³ Yekova aya fu gu rikaaboro nangia aYisaraere wee: “Oni nga gimi adezire . . . na gi moyambu mi asia ko.” (Yesaya 43:10) Ono rogo Nisana ti rame ru 11 rogo gu garã nangia 33 F.B.K., Yesu aya fu agu abarumbatayo nga ga aYisaraere yó wee Mbori ima gindigo ngbatungayo ka i adunga berewe nigako amoyambu ya. Ko ayaa: ‘Gu ngbii nga ga Mbori, i adíaha adia beroni, i ki fuhe fu gu rikaaboro nikazu zuzuhe.’ Yesu aya fu rimbasa aboro wee: “Oni ngére, i he gaoni kporo fu roni ni bate.” (Matayo 21:43; 23:38) Nidu aYisaraere niga Yekova amoyambu, gu rikaaboro nangia yó re aadunga berewe niruru yó watadu ni airatatamana te. (Yesaya 29:13, 14) Kusa, rogo kina gu bangisa uru re, ho Yesu asanahe ni ki yaa: “Da nga gu kangara moyambu tie du na tatamana?” gu sanahe ko aasanaha nzunzu nga, ‘Gini ngbatunga rikaaboro nga aguyo duna tatamana nika diaba aYisaraere tipa kadu niga Mbori ruru moyambu?’ Gu mokedi nangia Petero akaragapai sa gu sanahe re ho ko afura ni fu gu dungurati nga ga mbedimbedi aKristano kini yaa: ‘Oni nga ziazia rikaaboro, nga ga Mbori aboro.’ (1 Petero 1:4; 2:9) Gu rikaaboro nga ga toro yó re, nga “ga Mbori Yisaraere,” i nada nivovo moyambu. (AGaratio 6:16) A wa duhe nga agu aYisaraere nadumbata adu nibangisa “moyambu,” kinawo a du mbedimbedi aKristano auru kpotosende ti aregbo dunduko nibangisa ‘ruru kangara moyambu.’ Nairiwo gu momu du berani nga kaa gbia “riahe” vurube gu ga Mbori moyambu re!

Wisigopai Nisase Nafu Ngbarago

14. Tipagine wisigo Ziazia Kekeapai aye na bakere ngbarago ti ni ki susi kungbo gedaha?

¹⁴ Ho i asaka vovo rogo Ziazia Kekeapai yo ni furani, ya mo ani nidu na ngbarago mbiko gu gene si anyakasa gaani idapase rogoho? Si du nga ndu gupai nyakipa wisigo Ziazia Kekeapai ti ni nisase ti kungbo gedaha. Gi wisigo Ziazia Kekeapai re, si tigaha nafu ngbarago furani. Sidu tie, ho oni ageda agu abuku nga ga aKristano ni, si naida oni sana tironi na gu sanahe nga: ‘Gini vovo sakarogopai du rogo gupai mi agedaha re nibi gupai mi aima rugatire nani mbata kusayo? Gini kura averesi watadu sakapai gbiayo ho kuti gipai re nga gu rengbe ka fu bakere undo rogo gupai da yó kuti ni rogo gi papara kekeapai re?’ Ka si du nga si naida oni mangi wetekapai riipaha, ngbaha angba nga oni ke gu sanahe oni aida ka gbia karapai kuti ni sande na si kidu nigupai oni ka wisigopai tipaha kumbatayo.

15. Ginihe duho rengbe ka undo rani rogo wisigopai, na wai rengbe sangbanaha ka fu undo tipa gbanga regbo?

¹⁵ Ginihe rengbe ka undo rani ani gbia ngbarago rogo gaani vovo giarogopaiyo? Nikpiapai, ani rengbe ka kiiso gaani giarogopaiyo niwisigo ani agu amokido sirisiri Mbori namangihe na aboro tipa si undoyo. Oni rengbe ka nyakasa gaoni idapase niwisigo oni gu sangbaanebi nafura tipa Yesu Kristo watadu ka geda kitabu sa nga ga sangbanebi rogo Ziazia Kekeapai, nga ka geda agu averesi dunduko du rogoho. Gu kurahe berewe rengbe ka nyakasa gaoni idapase nga geda agu apangbangaa du tipa aDezire Yekova ti gi gaani regbo re, nga gu duku nikekehe rogo gu buku nga Jehovah’s Witnesses—Proclaimers of God’s Kingdom, [ADezire Yekova Nga Abatakipande ga Mbori Kindo].a Na ka oni angerarii gu kuru “Asanahe be Agedihe” du rogo aNgbaõbambu Sinziri, si rengbe ka sa roni oni girogo wai saki yó rogo gu kura averesi yo. Oni kparia wai saki yó pai tipa gu veresi re wenengai na gu yangarapai pe yó ho tipaha. Gure nika undo roni oni sonosi gaoni “berã nga ga makiapai” na ki sonosi gaoni rugatinapai. (AEbere 5:14, NW) A wa oni kaa wisigopai, oni keke guruguruapai rogo gaoni Ziazia Kekeapai watadu ti kpe waraga tipa sangbana gaoni wisigopai rengbe ka undo roni tipa gbanga regbo na oni ki rengbe ka undo gu kura boro naida undo.

Oni Undo Agude I Niiwisigipai Nisayo

16. Wai rengbe oni ka undo agude i niiwisigi Ziazia Kekeapai nisayo?

¹⁶ Avunguagude ima rengba ka zambuasi nyemu agu apai nga ga toro du kpoto awiriyo yo. Ka oni berẽnga ha nga si nikpakarakpakaraha fu agude ka gia rogo dudungura apai yo ya. Ho oni afu sunge ni fu agude tipa gupai nga i wetekeapai tipa ka mbakadatiyó sa gu wisigo Ziazia Kekeapai nga ga aborokporo, si naida oni sana yó fuo nyasaha nga ginipai wiriki yó ho rogo gu wisigopai re. Manga gu wisigopai nga ga aborokporo rogo kpiapai yo ima rengba ka undo paranga aboro tipa i wiriki wai rengbe yó ka songoda gayó idapase na ka yugo nani nga gupai i ayuguhe fuyó kina boro rengo du ngaha. Kurigure, oni rengbe ka mangasunge na gu burosua nga “See the Good Land”b (Oni Bi Wene Ringara) tipa ka yugo agu aringara fuyó du paha rogo Ziazia Kekeapai na ka yugo wari da oni ni na gaoni geda Ziazia Kekeapai na aposo dunduko.

17. Tipagine si aidanga ti ni ani di regbo dunduko kina kuti wisigo Ziazia Kekeapai nisase ya?

¹⁷ Wisigo Ziazia Kekeapai nisase nga bawenepai na si nanyakasa ga boro idapase, ono si naida oni bandatironi ka si kanga na oni ti mbakadatironi tipa agu adunguratise nga ga dungurati ya. Adunguratise nga gu kura gene dagba agene yo Yekova aruga rani ngbaha vurube ‘ruru kangara moyambu.’ Ono tie, wetekapai rengbe a ka undo roni oni fu wene akaragapai ba dunguratise yo. Nikpiapai, si ima rengba ka undo roni pati gu wisigo buku nga ga dungurati watadu pati gu saka Ziazia Kekeapai nga ga poso rogo gu Sukuru Nga ga Siokrasia.

18. Tipagine daha ada ti ni oni mangi asadatise ka wisigo “gu dudungura apai nga ga Mbori”?

¹⁸ Dudunguro wisigopai nisase rogo Fogo Mbori rengbe ka undo roni oni du mbembedii na Yekova. Ziazia Kekeapai nafura tipa wai nyakipa ngbatunga gu wisigopai re niyaa: “Tatamana nabanda boro a wa marã nabanda boro; ono gu pai ngba inahe ti ni susi si nga tatamana nabanda unga gu ni du na inahe.” (Batungusipai 7:12) Sidu, si daada oni mangi asadatise tipa ka dungurosi gaoni giarogo agu apai nga ga Mbori. Ziazia Kekeapai nakido agu aboro nawetekapai kindi niyaa: ‘I abi gu inahe abi nga ga Mbori.’—Asanza 2:4, 5.

[Gu rukutu kekeapai du bandu kpewaraga yo]

Oni Rengbe ka Sakarogoyo?

• Gine nga “gu dudungura apai nga ga Mbori”?

• Tipagine si aidanga ti ni ani mbu gu gaani wisigopai du tipa dudungura apai ya?

• Tipagine rengbe ani ti ni ka yawee aKristano dunduko rengbe arengba ka giarogo “gu dudungura apai nga ga Mbori”?

• Wai rengbe oni ka gbia undo bakere gbe be “gu dudungura apai nga ga Mbori”?

[Gu kpiahe du ti kpewaraga 28]

Ti gini regbo Yesu ada nigu tita dee i akido pako?

[Gu kpiahe du ti kpewaraga 31]

Si naida avunguagude fu sunge fu awiriyo tipa i wetekeapai ka gumbaha ti regbo gayó wisigo Ziazia Kekeapai kporo