Ya Mo Oni Nambakadatironi Tipa Ga Yekova Uru?
“Gu bakere rago nga ga Yekova du mbembedi, si mbembedi ki niipisi tihe gbe.”—ZEFANIA 1:14.
1-3. (a) Ginipai Ziazia Kekeapai agumbaha tipa gu uru nga ga Yekova? (b) Gini ga ‘Yekova uru’ napido rani?
ANGA ga Yekova uru nga asaa 24 te. Si nga gu ngbanga regbo Yekova nika sapangbangaa amangi gbegberẽ apai rogoho. Gu rago re nga rago nduunduu bitimo, rago dingidingi ngbaduse, rago ngariangaria zinga, rago fudifudiapai, na rago gbarasa ahe, sidu, agu aboro airisongo Mbori ya, daha ada i naagunde behe. (Yesaya 13:9; Amosa 5:18-20; Zefania 1:15) Gu nebi nangia Yoere ayaa: “Ako rungo du tipa gu rago re! Bambiko rago Yekova nambeda, si naye wa gu gbarasahe du be gu Ko du na tandu apai dũ.” (Yoere 1:15) Ono tie, ti regbo gu bakere uru re, Mbori abatasa agu aboro abatasa du “kpotoyo yo ni ruru he.”—Atambuahe 7:10.
2 Gu fugo nga gu “rago nga ga Yekova,” si nafura tipa ga Yekova sapangbangaa ti agu aregbo du nibakiakia. Nikpiapai, gu “rago nga ga Yekova” aye kurii Yerusarema ti gu regbo Yekova amangisunge na aBabero i ye ka gbarasaha na agu aboro naaraka yo rogo 607 M.B.K. (Zefania 1:4-7) Gu kura ga Mbori sarangbangaa amangi wakina gure rogo gu garã nangia 70 F.B.K. ho ko amangisunge ni na aRomo tipa i gbarasi gu rikaaboro nangia aYuda naaidanga na Wiriko ya. (Daniere 9:24-27; Yoane 19:15) Ziazia Kekeapai aima fura kumbatayo a tipa gu “rago nga ga Yekova” nikadu ho ko nika ‘sovura ni kuti arikaaboro dunduko.’ (Zekaraya 14:1-3) Mbiko gu tingidapai naye be ga Mbori toro, gu mokedi nangia Pauro aringbisipa gu uru re kuti padu Kristo ho na ome Kindo beko, nga gu natona ho i amoi ko ni ni Bakindo ngbangbaturũ yo rogo gu garã nangia 1914. (2 ATesaroniko 2:1, 2) Nibi agu agopai nayugo nani nga gu uru nga ga Yekova ima mbeda, si du aDezire Yekova asiaha gu veresi ti ni du rogo Zefania 1:14 (NW ) tipa gu garã nga 2007. Gu veresi re nayaa: “Gu bakere uru nga ga Yekova ima mbeda kada.”
3 Wa duhe nga ga Yekova uru ima mbeda, gere nga regbo tipa oni mbakaditironi tipaha. Wai rengbe oni ka mbakadatironi tipa gu uru re? Ya mo gu kura apai ho si aida oni mangihe tipa ka mbakadatironi tipa gu uru nga ga Yekova?
Oni Mbakaditironi
4. Gini kere asada Yesu ambakaditiko tipaha?
4 Rogo gu ga Yesu sangbaanebi du tipa digido rago, ko aya fu gako abawiriki wee: “Oni mbákadi tironi.” (Matayo 24:44) Ho Yesu ape gupai re ni, ko nitiko aima mbakadatiko tipa gu kere asada nga ka kpi nimotumo tumorii. (Matayo 20:28) Ginipai rengbe ani ka wirikaha ti vuro ga Yesu mbakadatise?
5, 6. (a) Wai gaani nyemuse tipa Mbori na tipa akuarani aundo rani rogo mbakada ani tirani tipa gu uru nga ga Yekova? (b) Gini kpiapai Yesu amoihe nibipa nyemu aboro?
5 Yesu adu na bakere nyemu ga Yekova ruru andiko. AEbere 1:9 nafura tipa Yesu kini yaa: “Mo akpi nyemu rurupai, ki nisogo irairapai; si du Mbori nga gamo Mbori ambedi ro ti ni ni gu nzeme nga ga wasa susi akuaro.” Mbiko gu nyemuse Yesu adu nani tipa gu Bako du ngbangbaturũ yo, si nasako ko kakuti ruru mangapai. Ka si du nga ani na kina gu bangisa nyemuse re tipa Mbori na kini raki ringbisihe kuti gako arugute, si nika sa gupai nga ko banda rani. (Atambuahe 31:23) Ka si du nga ani na kina gu bangisa ngbatunga nyemuse re gbiati iriso, si nika undo rani ani mbakaditirani tipa gu bakere uru nga ga Yekova.
6 Nyemuse tipa aboro nangia gu bangua sino nadu ti Yesu. Nirengo, ‘nungayo aamanga ko amanga, bambiko i aarungo, kini gbandaka, wakina agu akandoro adunga na babandara tira ya.’ (Matayo 9:36) Si kini mo ka sa Yesu ko naatungusa wene pangbangaa fu aboro. kinawo a nyemuse asa rani ani takipande gu pangbangaa nga ga Kindo fu akuarani. Gu nyemuse du ani nani tipa Mbori na tipa akuarani, si nasa rani ani du zaaza ni agu aKristano nga abatungusipai na kini mbakadatirani tipa gu bakere uru nga ga Yekova.—Matayo 22:37-39.
7. Tipagine rengbe ani ti ni kadu na ngbarago wa ani apido ga Yekova uru?
7 Yesu adu na ngbarago tipa ka manga gupai Yekova akpinyemuhe. (Atambuahe 40:8) Ka si du nga ani na kina gu bangisa sino re tirani, ani rengbe arengba kadu na ngbarago rogo manga ani gu ziazia sunge nga ga Mbori. Wakina Yesu, si aidanga ani du ni agu aboro nagamahe tipa ka gbia kina weneapai tipa tiyó te, ono si naida ani du ni agu aboro nagamahe mbiko wene sino. Si nika sa rani ani duna ndikidi ngbarago. (Amokedi 20:35) Ii, “ga Yekova ngbarago nga gaoni ome.” Ka ani du na gu ngbarago re tirani, si nika undo rani ani mbakaditirani wenengai tipa ga Yekova uru.—Nemaya 8:10.
8. Tipagine si aida ti ni ani mbedi na Yekova rogo kparakpee yo?
8 Kakaka kparakpee naundo Yesu ko mbakaditiko tipa aʹasada. Ko akparikpee ti gu regbo Yoane abapatiza ko. Ko akparikpee yuru sasasa mbata fu ko sia gako amokedi. (Ruka 6:12-16) Na gini boro duho nageda Ziazia Kekeapai nunga aziongo ní ti agu akpee Yesu afuhe fu Bako rogo gu yangara yuru ko adu auru kpotosende ane ya? (Marako 14:32-42; Yoane 17:1-26) Ya mo oni nga gu boro nakparakpee dedede wakina Yesu? Si naida oni nikpari fu Yekova dedede, ka oni naaoronga aoro gbua nani ya, oni gbata gu rugapai nga ga ziazia toro, na kidu barambeda tipa ka dia gu rugapai re kugume ho ini oni ni nga gupai oni asanahe tipaha si du re. Padu ani na nyanyaki pagume na gu Barani du ngbangbaturũ yo ninyanyakipa pai ti gi kere regbo nga gu ga Mbori uru ambeda rogoho wa pai re. Ka kina ginipai vura manga amanga vurũ, si naida oni naambeda na Yekova rogo kparakpee yo ti aregbo dunduko.—Yakoba 4:8.
9. Wai nyakipa berãpa ziasi rimo Yekova?
9 Pa baka Yesu bangiriko tipa pa ziasi rimo Yekova angia gupai a naundo ko tipa ko mbakaditiko tipa agu aʹasada ko agbia tiko nani. Nirengo, ko ayugupai fu apefuoko nga, rogo gayó kpee fu Mbori, i duwa ka i kodi pa ‘iriso rimoko’ kurogoho. (Matayo 6:9) Ka si du nirengo nga ani naida rimo Yekova du nitaasitaasihe watadu niziaziaha, si naida ani mangi asadatise tipa ka mbu manga agu apai rengbe ka ye na wasiro kuti ni. Nisangbana gipai re, ani nika mbakadatirani wenengai tipa gu bakere uru nga ga Yekova.
Gini Aʹariapai Si Aida Oni Mangihe?
10. Tipagine duhe ti ni niwenepai ani wisigi gaani raka?
10 Ya mo ka ga Yekova uru da rogo gu uru du gba, si agbia roni oni naima mbakadatironi? Ani dunduko nibasasa si aida ani wisigi tirani singia gu kurapai ho rogo gaani raka yo si aida ani mbakadihe. Pa maa ani gupai ku berã rani yo nga ga aboro raka nikina guruhe, na zegino wa goro ge, si naaida ani naangera angera tipa ka mbakada gaani pagume na Yekova. (Batungusipai 9:11, 12; Yakoba 4:13-15) Ani wisigingo gu kurapai nga gu si aida ani inipai tipaha rogo gaani raka yo.
11. Gaoni sásá nga gine tipa geda Ziazia Kekeapai?
11 Gupai nyakipaha nga gu rugute ‘ruru kangara moyambu’ afuhe furani nga ani naageda Ziazia Kekeapai na aʹuru dunduko. (Matayo 24:45) Oni rengbe ka maaha nigaoni sásá ka geda Ziazia Kekeapai tona ti Bambata Pai ki dati Yugoti vurũ garã sa na kini berẽkurii agu apai oni agedaha. Ka oni ageda akapita biama rogo uru sa, si rengbe ka sa roni oni gedi agu akapita du rogo Ziazia Kekeapai nga 1,189 vurũ garã sa. Si adu nga, gu boro i nambedi ní ní du nibakindo aYisaraere, ní duwa ka ní aageda ga Yekova aNdiko “dedede wa du ni ni ungani.” Si nirengo nga Yosua amangi kina gu bangisapai re. (Pa Fu Rugute ni Ue he 17:14-20; Yosua 1:7, 8) Nairiwo wai duhe ninyanyakipa pai nga agu abaakumba du rogo dungurati, si naida i niigedi Fugo Mbori dedede, mbiko gure naundo yo i niiyugu “ruru yugopai”!—Tito 2:1.
12. Si naida pa mbeda ga Yekova uru fõngbaduroniyo oni mangi ginipai?
12 Pa mbeda gu uru nga ga Yekova rengbe ka fõngbaduroniyo oni naandu dedede kupati agu adunguratise nga ga aKristano na kini koditironi kurogo gu mangaapai du yo a wa rengbe omeroni nani. (AEbere 10:24, 25) Pa manga oni he wo nika undo roni oni mbakadi gaoni birĩ-sunge wangia oni abatakipande Kindo nga aguyo nagbata gene ka undo agu aboro duna nyemu gbia nyenye unga. (Amokedi 13:48, NW ) Oni rengbe arengba a kadu zaaza rogo dungurati nimanga oni gu kura apai, wa ngbatunga gu nga undo sosono aboro na ka ngarasa paranga aboro. Nairiwo wai rengbe gu mangapai re ka ye na ngbarago!
Gu Pagume Du Dagbaroni na Akuaroni
13. Gini asanahe si aida ani sasana tirani nani nibipa ukadi vovo borose?
13 Wa duhe nga ga Yekova uru ima mbeda kada, ya mo si naida oni ‘ukadi gu vovo boro i afu ní ku sangba Mbori yo na rurupai na ziaziapai nga ga rengo’? (AEfeso 4:20-24) A wa oni kaa zugasi agu asino duwa ga Mbori, si nika sa gupai nga gu kura aboro bi gupai nga oni ‘napekafuo ga Mbori toro’ na azuzuhe kidu tironi. (AGaratio 5:16, 22-25) Ya mo oni rengbe ka tingida bete agu apai oni namangihe na gaoni aborokporo tipa ka yugo nani nga oni ima ukadi tironi na vovo borose? (AKorosaio 3:9, 10) Nikpiapai, ya mo aboro ini roni nigu boro ninaaundo akurani aidipase gbiati gu kura aboro? (AGaratio 6:10) Pa sonosa oni ngbatunga agu sino duwa ga Mbori re rengbe ka mbakada roni tipa gu uru nga ga Yekova.
14. Tipagine si aida boro kpari tipa ziazia toro ti ni ho ní aʹasada tiní ni ka zatini ti zinga niipo?
14 Na ginipai rengbe ka manga ka si du nga oni bi tironi nga oni nga gu boro ninaazizinga azizinga niipo na oni ki bi gupai nga si naida oni du na zatise rogo gu bangiriba re? Ngbatunga gu sino nga ga zatise re, si nga gu sino rengbe ga Mbori toro ka sa roni oni du nani. Sidu tie, si naida oni kpari tipa ziazia toro a wa Yesu agumbaha ki yaa: “Oni sána he tipa he, i ki fu he fu roni; oni gbáta he, oni ki bi he; oni ngóka ngbadimo, i ki uru he fu roni. . . . Wa du oni tigaoni nga gbegberẽ aboro ki ini pa gama wene ahe fu awironi, Baroni du ngbangbaturũ yo ko susi na gama Ziazia Toro fu agu yo nasana ko, te?”—Ruka 11:9-13.
15. Ginipai si aida oni mangihe ka si du nga tagbagapai kuru bangbanda roni na wirinaroni idipase?
15 Ani ya tagbagapai kuru bangbanda roni na wirinaroni idipase. Ka pai duwa gure, si naida oni mangi bakere asadatise ka mbakada gaoni pagume kubaha, tipa zereda gbiati kodatise nye rogo dungurati. (Atambuahe 133:1-3) Oni mangisunge na gu ga Yesu rugute du rogo Matayo 5:23, 24 watadu gudu rogo Matayo 18:15-17. Kangia sino roni du nga uru naati roni na zinga, oni ipisi tironi niipo ka mbakada gupai re. Gupai si naaidaha dedede nga boro du zaaza ka mbupai fu kurani. Pauro akepai ki yaa: “Ringironi ngbá angba fu akuaroni, yee kpotoroni yo, oni nivú akuaroni avu, a wa Mbori avu roni rogo Kristo yo a.”—AEfeso 4:25, 26, 32.
16. Rogo gini gene si aida nunga duadu dagba arogotise?
16 Si naida arogotise du ni agu aboro duna nunga, na kidu ni agu aboro nambupai ambu fu akurayo. Ka si du nga oni akpinga nyemu gaoni badiarogatise nibakerehe gbe te, na nunga ní tironi gbe te, si naida oni asaditironi nyanyakii ka manga agi apai re mbiko gu undohe nga ga Mbori gbiati Fugoko. Ya mo pai ho kpa beroni si aida oni mangihe tipa ka irisa agu arugute du rogo 1 AKorindo 7:1-5 tipa ka mbakada gaoni ramukporo tipa ka guni manginga bäri ya? Nirengo, gere nga gu bangiriba si aida kumbakudee watadu diakumba du na “nunga” rogoho.
17. Ginipai si aida boro mangihe ka si du nga ní ima manga kere ingapai?
17 Na ginipai rengbe ka manga ka si du nga oni ima ingapai nikerehe? Si naida oni asaditironi ka mbakada gupai re nikina boro ipo. Ka kina ginipai vura manga amanga vurũ, si naida oni gbata undo be agu aKristano nga abaakumba rogo dungurati. Gayó akpee gbiati gayó arugute nika undo roni oni du wenengai berewe rogo toroyo. (Yakoba 5:13-16) Oni kpari fu Yekova na ki saberã roni. Ka oni amanganga ha wa gure ya, si nika sa gupai nga sangbakpotoroniyo du nifudifudihe. Ngbatunga gupai re aima manga Davide, ono ko adu na ngbarago fuo kusa ko gako ingapai fu Yekova. Ko akepai ki yaa: “Boro maku nga gu ni vu yo ni ti gani samungu, nga gu ni dadi yo gani ingapai. Boro maku nga gu ni Yekova ageda nga irairapai kuti ni ya, nga gu ni adu nga na biriki ti toroni a ya.” (Atambuahe 32:1-5) Yekova nambupai ambu fu agu aboro mangi ingapai, ono kina aguyo nasa berãyo nzunzu.—Atambuahe 103:8-14; Asanza 28:13.
Ka Oni Dunga ni Aboro Zegino Ya
18. Gini bipai si aida ani du nani tipa zegino?
18 Zanga kapa, oni nangera tipa gu baiiriwo vovo zegino gu Barani du ngbangbaturũ yo nakido rani tipaha. Ono gaoni bipai nga gine tipa gu zegino nga ga iraira rikaaboro nga aguyo naima kparatiyo kusayo ti Mbori? Satana nga “gbia gi zegino re,” tandu aadunga beko kurii Yesu te. (Yoane 12:31; 14:30) Nirengo, oni aidanga gu tandu nga ga Bakitingbanga na gako zegino du kurii roni a te. Sidu tie, si naida oni mangisunge na agu afugo gu mokedi nangia Yoane agumbaha ki yaa: “Ka nyemu zegino du nga ti roni ya, na agu ahe du zegino.” Wene arugute du ngaha bambiko “zegino napaya apaya, na gaha nyemuhe: ono gu ni ka amanga gu pai Mbori akpi nyemu he ni nye anye kindi.”—1 Yoane 2:15-17.
19. Gini asásá si aida awiri aKristano moihe?
19 Ya mo oni naundo awironi i ‘niibandatiyo be zegino ka birikoho adunga tiyó ya’? (Yakoba 1:27) Satana naida ka zio awironi kina wai boro nazio atĩo na kombe. Badungu ba ambaro na gu kura ariigbu naʹasada ka sa paranga aboro i rimisi tiyó kurogo ga Satana zegino. Ono ga Yekova amoyambu tigayo kina rogo bangisa riigbu sa nga gu nika bata ti digido gi zegino re. Sidu, oni ngarasi agu aKristano nga aparanga i “nimángi ga Gbia sunge zaza dedede.” (1 AKorindo 15:58) Agu avunguagude nga aKristano, si naida i undo awiriyo i moi agu asásá rengbe ka fu ngbarago fuyó na ki rengbe ka sayo i raki gu wene raka rengbe ka fu taarimo fu Mbori na ki undoyo i mbakaditiyó tipa gako uru.
Oni Ngere Kumbatayo Tipa Nyenye Unga
20. Tipagine si aida ti ni ani moipa nyenye unga ku berã rani yo?
20 Oni rengbe ka pido ga Yekova uru nizera ka si du nga oni namaa pa nyenye unga ku berã roni yo. (Yuda 20, 21) Si naida oni ngere kumbatayo tipa nyenye unga Paradizo yo, rogo gi gene re, oni kidu na maabangirise tipa ka zambuasi gu ome roni oni adu nani ni aparanga na kidu na bakere regbo beroni tipa ka manga gu wene asunge oni akpinyemuhe na kini wiriki dungu apai tipa Yekova. Nirengo, oni nikaa wirikapai awirika tipa Mbori nyenye kindi, bambiko awere, aboro ini “kina bete gako apai” gbua. (Eyobo 26:14) Nairiwo gu bawene maabangirise re!
21, 22. Gini ngbatunga sakapai nikadu dagbarani na agu aboro i nika zingisa yó?
21 Rogo paradizo, agu aboro i nika zingisa yó, i nika sa rani ani ini agu apai naima manga bakuru kusayo. Enoka nika du kina yo tipa ka gumba wai ko adu na wingbaduse tipa ka takapande ga Yekova pangbangaa fu agu azangasinombori nadu ti ragoko. (Yuda 14, 15) Zanga kapa, Noa nika gumba wai furani ko ambakadi bakurungba. Abarayama gbiati Sara nika yugo wai i adu ti gu regbo i ambu gu bawene kpuyo nadu Ura yo ka ndu kaa raka kina tii abamburokoo. Oni berẽnga tipa Esetere wai ri aru ka songodapai kubara gari aboro yo nibi gu burõ nangia ga Amana kutiyo. (Esetere 7:1-6) Oni berẽnga pa Yona wai ko nika takapande gu rame biata ko amangihe ku vuru batĩo yo, na wai Yoane Bafu Bapatiza nika ringbisapai furani tipa wai ko adu ti gu regbo ko abapatiza Yesu. (Ruka 3:21, 22; 7:28) Nairiwo gu badungu apai ani ka wirikaha yo re!
22 Ti regbo ga Yesu Zogarago Tipa Agarã Kutu, oni aduadu na momu beroni tipa ka undo agu aboro i nika zingisa yó bekpio i gbia “gu inahe nga ga Mbori.” (Asanza 2:1-6) Nairiwo gu ngbarago du ani nani ka bi gupai areme nga, aboro nagbia gu inohe nga ga Yekova Mbori na kini mangipai ringbisihe kuti ni! Oni berẽnga pa gu ngbarago oni kadu nani kumbatayo ti gu regbo Yekova nika fu maku kurii gaoni bakere asadatise tipa ka yugopai fu agu aboro naraki bakuru kusayo na i kidu na ngbarago tipa ka gia agu arugute oni afuhe fuyó!
23. Ginipai si aida ani diberã tipa kaa mangaha?
23 Agu aundo ani agbiaha awere wangia ani ga Yekova aboro, si ima nge kisusi wai gu berãrani nga ga zangarengba narengbe ka gedaha. (Atambuahe 40:5) Ani na bakere ngbarago tipa agu agamunihe nga ga toro ani agbiaha! (Yesaya 48:17, 18) Ka apai vura kaa fuda rani vurũ, si naida ani naamanga ziazia sunge fu Mbori na ngbaduraniyo dunduko wa ani apido gu bakere uru nga ga Yekova.
Gaoni Karagapai Nga Gine?
• Gine nga “gu rago nga ga Yekova”?
• Wai rengbe oni ka mbakadatironi tipa ga Yekova uru?
• Wa duhe nga ga Yekova uru nambeda wa pai, gini ariapai si aida ani mangihe?
• Ginipai oni angera tipaha kumbatayo ho ga Yekova uru ka da ni?
[Gu sura du ti kpewaraga 14]
Yesu aima mbakada tiko tipa aʹasada
[Gu sura du ti kpewaraga 17]
Nairiwo gu bawene momu nikangiaha ka undo agu aboro nika zingabekpio i gbia gu inohe nga ga Yekova!