Oni Duna “Gu Gire Udi Yo Ho Biata” Rogo Gaoni Rogatise
“Gu gire udi yo ho biata ka si kati nga ni ipo te.”—Batu. 4:12.
1. Da nakodi bambata aboro ue i du ni arogotise?
FUO Yekova Mbori mangi kurukuru ahe na anyaa, ko amangi bambata boro nangia Adamu. Kusa, Mbori afu bakere rame fu Adamu na ki di nganzirako sa ki mangihe nirengberengbe dee ri du nimoundo fuko. Ho Adamu aza bangiriko ni ka bi ri, ko ayaa: “Gere nga . . . meme dagba amemere yo nga pasio rogo pasiore yo.” (Bam. P. 1:27; 2:18, 21-23) Yekova ayugu gupai nga, gipai ko amangihe re, si aima ngba, ko kini kodi gu bambata aboro re i du sa rogo rogatise na kini fu maku fuyo.—Bam. P. 1:28; 2:24.
2. Wai Satana akparaka dagba Adamu na Eva?
2 Si nafu kina gberarago nga, gu ramukporo nga ga arogotise Mbori ambakadipai tipaha re, si aimanga te paha ki gberẽ. Ginipai namangi? Gbegbere boro nitoro i aye ka inoko kusa ni Satana, anangi Eva ri ri gu bangisa ngua i aima za yó ti rihe. Tingbafuo gupai re, Adamu angbe na diako rogo gipai re, nangia samungu kuti ga Mbori ruru zogarago nadu niwenehe. (Bam. P. 3:1-7) Ho Yekova asana agu arogotise ni re tipa gupai i amangihe, si adu ziazia nga i aima gbarasapa gayó pagume na bakusiyo. Adamu abira diako kini yawee: “Gu de mo afu ri fere ani du na ri, kina ri nifu zuzuhe fere, mi ki ri he.”—Bam. P. 3:11-13.
3. Gini iraira bipai nadu ti kura aYuda?
3 Vuru gu kama agarã ye tingbafuo gu regbo re, Satana aima digo nimangisunge na badungu abiriki nibakiakia tipa ka ye na a zanga giatise dagba arogotise. Nikpiapai, ko namangasunge na abarumbatayo rogo pambori ti kura aregbo i naaurugo agu apai tipa rogatise adunga mburuhe rii Ziazia Kekeapai ya. Kura ga aYuda abarumbatayo aumbasipa ga Mbori arugute aumbasi, kini idihe fu akumba i naambu adiayo tipa gu rukutu apai duwa ba tikpo kurogo pasio si ki kuto. Ono Yesu aya fuyó wee: “Gu ni ka he diani tipa kura pai angia nga pa bari ya, ki di kura ri, ni namanga bari.”—Mt. 19:9.
4. Gini apai duho areme nafuda gu mbakadapai nga ga arogotise?
4 Satana namanga asadatise kindi ka gbarasapa gu nyemuse nakpamia arogotise. Akumba naroga akurayó akumba, aguyo naroga adee zanga fu marã fuo yó, na gu mbutise ambunga pa gbiaha be agbia ngbangaa ya, si nga agu apai nayugo nani nga ko na diabese rogo gi bangiriba re. (Oni gedi AEbere 13:4.) Wadu ani ni aKristano, ginipai rengbe ani ka mangaha ka ne agi apai re si ka mera fuo rani ki aria gaani bipai tipa rogatise? Ani wisigingo gu bete apai nasa ramukporo nga ga rogatise si du na ngbarago.
Oni Kodi Yekova Kurogo Gaoni Rogatise
5. Gu fugo nga “gu gire udi yo ho biata,” rogoyo nga gine?
5 Tipa arogotise du na diabese rogo gayó rogatise a wa Yekova aidaha, si naida i kodi ko kurogoho. Fugoko nayaa: “Gu gire udi yo ho biata ka si kati nga ni ipo te.” (Batu. 4:12) “Gu gire udi yo ho biata” nga fugo masaku. Ho aboro amanga fugo gi masaku re ni rogo gayó rogatise, si nakoda kumba na diako, nga gu zau gire ue i nika udoho na Yekova Mbori si du biata. Ho arogotise akoda tiyó ni na Mbori rogo gayó rogatise, i na gu ome nga ga toro beyo tipa ka sovura kuti kpakaraapai na ki dibehe, na si a nga gu banguapai naye na bakere ngbarago kisusi rogo rogatise.
6, 7. (a) Ginipai rengbe aKristano ka mangaha tipa Mbori du rogo gayó rogatise? (b) Ginipai wirinarani nidee agumbaha tipa kumbaari?
6 Ono ginipai rengbe arogotise ka mangaha tipa gayó rogatise du wa gu gire udi yó ho biata? Davide abibia ki yaa: “Ako gi Mbori, rago ngba ti re ka amanga gu pai ngba angba ti ro; ii, ga rugute du kpotore yo.” (Tam. 40:8) Gu nyemuse du ani nani tipa Mbori, si nafõngbaduraniyo ani mangisunge fuko na ngbaduraniyo dunduko. Sidu, si naida arogotise tibarayo dunduko ue sonosi gayó pagume na Yekova na kini gbia ngbarago rogo manga gupai ko akpinyemuhe. Si naida arogotise mangi asadatise ka nyakasa gu nyemuse du gayó badiarogatise nani tipa Mbori.—Snz. 27:17.
7 Ka si du nga ga Mbori andiko rogo rani yo nirengo, ngbatunga agu asino duwa idapase, maabangirise, na nyemuse, si aduadu niyuguyuguhe rogo gayó ramukporo na kini undo rani ani nyakasi gaani ramukporo. (1 Kor. 13:13) Kristano du rimori nga Sandra, ima kurogo rogatise nga agarã 50, ri nayaa: “Gupai ngba tire gbe fu kumbaami, si nga agu arugute ko afuhe fere du mburuhe rii Ziazia Kekeapai gbiati gako nyemuse tipa Yekova, nga gu nyemuse nyaki kisusi gu du ko nani tipa re.” Oni akumbakuadee, ya mo adiaroni rengbe ka gumbapai wa ngbatunga gure tipa roni?
8. Ginipai si aida arogotise mangihe tipa ka gbia “wene mosoro” rogo gayó rogatise?
8 Wangia oni arogotise, ya mo oni namaa agu apai nga ga toro gbiati gu nga ga Kindo mbatayo rogo gaoni raka? Kurigure, ya mo oni nabi gaoni badiarogatise nigu kuaroni oni amangasunge fu Yekova na ní? (Bam. P. 2:24) Bakindo Soromo akepai ki yaa: “Du aboro ue ngba ti du boro sa, bambiko i du na wene mosoro tipa gayo sunge.” (Batu. 4:9) Nirengo, si naida kumba na diako mangi asadatise ka gbia “wene mosoro” nga nyemuse gbiati nyenye kodatise duna ga Mbori maku.
9. (a) Gini asunge dube akumbakuadee? (b) Ringbisihe kuti AKorosaio 3:19, wai si aida kumba mangi fu diako?
9 Gupai nayugo singia Mbori rogo gu rogatise nga ga kumba na diako nga, gu asadatise ko gbiati diako amangaha rogo manga ga Mbori arugute. Akumba si aida i ngerefuo adiayo na aũzegino gbiati agu apai nga ga toro. (1 Tim. 5:8) I nangarasa yó a i naamanga adiayo ninunga. Ani nagedapai rogo AKorosaio 3:19 nga: “Akumba, oni nikpí nyemu adiaroni ka ngbaduroni ími nga fu yo ya.” Wene bawiriki Ziazia Kekeapai sa asakirogo gupai yo nga, ‘íma ngbadu kumba fu diako’ ya rogoyo ngawee “ka gumba gbegberẽ afugo furi watadu ka taka ri, na ka zanga kpinyemu ngerafuo ri, ka zanga fuka ahe furi, ka zanga banda ri, na ka zanga undo ri.” Ziazia tie, ngbatunga agu asino re adanga tipa si du rogo gu kporo nga ga Kristano te. Gu kumbakudee nangera kurii gako kporo rogo nyemuse, ko nazingisa gu nyemu ra fuko du kpotoriyo yo.
10. Gini ngbatunga sino si aida gu dereakumba nga aKristano yuguhe?
10 Agu aKristano nga dereakumba nakpinyemu Yekova du rogo gayó rogatise, i duwa ka i airisa ga Mbori arugute. Gu mokedi nangia Pauro akepai ki yaa: “Dere akumba, oni nirá ara fu akumbaroni, wa fu Gbia. Bambiko kumbani nga rini, a wa du Kristo ni ri kanisa, du ni tiko ni batasi kanisa nga boroko.” (Ef. 5:22, 23) Satana anangi Eva, kini gumba gu ziree ngawee raka zanga Mbori nika ye na nyenye ngbarago fuyó. Gu sino nga ka raka zanga Mbori, ani nabihe awere ziazia rogo gu ramukporo nga ga dungu aboro. Ono tie, tipa agu adee nga avurumbori, pa ra yó fu akumbaayo nga gbegberẽpai te. I natingida gupai ngawee Yekova afu Eva ri du “[ni]mounda” fu kumbaari, nga gupai Mbori abihe nga si angia iriiri mbakadapai. (Bam. P. 2:18) Gu dee nga Kristano du nidiakumba namangapai na ngbanya kuti gu mbakadapai re, ri nga “ũirisa fu kumbari.”—Snz. 12:4.
11. Gine wirina sa agumbapaha ya si naundo ko rogo gako rogatise?
11 Gu kurapai nafu undo fu arogotise i moi Mbori rogo gayó rogatise, si nga kodatise ka wisigo Fugo Mbori. Gerald, nga gu kumba naima digo nigbia ngbarago be gako ramukporo nga ga rogatise tipa agarã 55 ayaa, “Gupai nakpura ramukporo si ngba gbe nga arogotise nageda Ziazia Kekeapai sa na kini wisigihe.” Ko agbia gupai kuti ni nga, “Pa koda arogotise beyo kuti apai kaa mangaha, gbe, agu apai nga ga toro nasa yó i duna wene ramukporo na kini mangisunge fu Yekova.” Pa koda aborokporo tiyó kaa wisigo Ziazia Kekeapai naundo yó i moi ga Yekova andiko ku berãyo yo, na si kini sa gupai nga i naanyaka rogo toro yo na kini sono kumbatayo.
12, 13. (a) Tipagine du kparakpee sa ti ni ninyanyakipa pai fu arogotise? (b) Gini kura apai nga ga toro nanyakasa rogatise?
12 Agu arogotise duna ngbarago, i nakparakpee sa. Ho kumba ‘aúka kpotokoyo’ ni naapa agu apai du rogo gayó ramukporo, si nanyakasa gayó rogatise. (Tam. 62:8) Nikpiapai, nairiwo wai ka si du taata fu arogotise i mbu gu zanga giatise kuru dagbayó fuo sana yó Mbori tipa arugute! (Mt. 6:14, 15) Ringbisihe kuti gu kpee arogotise nafuhe, si adu niwenepai ka i diberã tipa ka undo tiyó dagbayó na i kini ‘hipai dagbayo, nivu tiyó dagbayo, ka pai du bangiri gu boro kuti kura ni; wa Gbia avu yó, kinawo a si aida i naamangaha.’ (Koro. 3:13) Oni moi gupai ku berã roni yo nga, kparakpee nga kido kuti Mbori. Bakindo Davide ayaa: “Bangiri aboro dunduko du koyo du mo ni.” (Tam. 145:15) Ho ani akido ni kube Mbori rogo kparakpee yo, si nasa gupai nga ka ani dunga na dungu abakabangirise ya mbiko ‘ko naberã pa rani aberã.’—1 Pet. 5:7.
13 Gu kura gene rengbe ani ngbaha ka maa Yekova rogo rogatise, si nga ndu kupati agu adunguratise nga ga dungurati sa na kini tungusipai sa. Ti regbo adunguratise, arogotise nawirika wai ka sovura kuti ga bakitingbanga “birĩ” ko amangasunge nani ka kparaka rogo arogotise. (Ef. 6:11) Agu arogotise natungusapai dedede sa, i nawirika ‘kadú nyanyakii, zanga wo.’—1 Kor. 15:58.
Ho Akpakarapai Akura Ni
14. Gini apai rengbe ka ye na fudifudiapai kurogo rogatise?
14 Nirengo, anga agu apai fura ani tipa kuari re, si nivovopai furoni te, ono tipagine ka oni asakanga pai ti ni tipaha na gaoni badiarogatise ya? Oni bihe singia si naida oni mangi bete ariapai rogo gaoni ramukporo ringbisihe kuti agu aberã fuku ani he re. Wa vura duhe were, Ziazia Kekeapai nagumbaha agumba zukazuka ya zavura agu aboro duna Mbori rogo gayó rogatise, ‘apai afúda boroyo afuda.’ (1 Kor. 7:28) Mbiko gu zangarengba du aboro nani, gu gbegberẽ mangaapai du rogo zegino, na agu agbina nga ga Bakitingbanga, zavura gu rogatise nga ga ga Mbori ruru amoyambu, kere akpakarapai nakura akura rogoho. (2 Kor. 2:11) Yekova naundo rani ani sovura na diabese kuti gu fudifudiapai re. Ii, ani rengbe arengba ka mangaha. Gu rimbasa anyaa nangia ga gu ruru kumba nangia Eyobo akpiki, na gako amoyambu, gbiati awiriko a. Wa agi apai re avura mangako, Ziazia Kekeapai nayaa: “Rogo agi apai re dunduko Eyobo amanga nga ingapai te, ko agumba nga gbegberẽpai kuti Mbori a te.”—Eyo. 1:13-22.
15. Wai fudifudiapai narengbe ka sa boro ní mangipai, na wai si aida arogotise mangipai sani?
15 Ono tipa dia Eyobo tigari, ri aya fuko: “Mo ka kuti pa ga du ni irarengo kindi? mo gbérẽ ngbaro yo fu Mbori, ki kpi.” (Eyo. 2:9) Nirengo, ho agberango watadu kura fudifudiapai ayeni sa boro, gu fuda du ní nani kpotoniyo yo, si nasa ní ka ní manginga rurupai ya. Iratatamana sa ayaa: “Rungosi boro nasa iratatamana wa mumungo boro ni rengo.” (Batu. 7:7) Ka gaoni badiarogatise gumba gbegberẽ afugo nga gu naimisa roni mbiko gu “rungosi” du oni rogoho, ka oni zinginga ya. Pa karaga oni gbegberẽpai kuba gbegberẽpai nika sa gupai nga gu kura boro, watadu oni dunduko ue gumba gupai nika gbarasa apai kina kumbatayo. (Oni gedi Atambuahe 37:8.) Sidu, oni basa gu fugo abasa gumbayó ho ‘niʹaura’ nga gu rengbe ka ye na kina gberarago furoni.—Eyo. 6:3.
16. (a) Wai rengbe ani ka manga agu afugo Yesu du rogo Matayo 7:1-5 rogo gaani rogatise? (b) Tipagine si aidanga ti ni ani rõi kina kubani kisusi ya?
16 Si naida arogotise du na ruru bipai tipa rogatise. Si rengbe kadu nga, boro bi agu asino ti gani badiarogatise angbanga ya, na ki ya ku kpotoniyo wee, ‘Mi aʹaria sinoko (watadu sinori) aʹaria.’ Mbiko nyemuse gbiati hipai, oni rengbe arengba ka undo gaoni badiarogatise ní mbakadi asinoni. Ono tie, ka bangironi gonga ti gupai Yesu agumbaha ya. Ko aringbisi gu boro nabisirapa gu rukutu apai du ti akurani kuti gu boro nabi ‘gu tooni he’ du rogo bangiri wirinani ka ni abingo gu “bakere he” du bangirini yo ya. Yesu angarasi rani ki yaa: “Ka oni sápu nga ngbanga boro ya, i ka sapa ngbanga roni a.” (Oni gedi Matayo 7:1-5.) Anga si nayawee si naida ani basapa kere ingapai te. Robert, nga gu kumba di agarã awere wa 40 kurogo gako rogatise ayaa: “Si naida arogotise naafura dagbayó zanga bakpe ti apai na kidu na nyemu ka mbakada gupai gayó badiarogatise nagumbaha ya runga ha te.” Sidu, ka oni rõinga kina kubani kisusi ya. Kuba gupai nga rago gberẽ tironi naapa agu asino gaoni badiarogatise adunga nani ya, oni wiriki wai ka gbia ngbarago awere be agu asino ní ngbaa.—Batu. 9:9.
17, 18. Ho fudifudiapai naye ni sa rani, wari rengbe ani ni ka gbia undo?
17 Aʹasada rengbe arengba ka ye ho apai naariatihe ni rogo raka. Arogotise rengbe kadu na kpakarapai ho du yó ni na agude beyo. Si rengbe kadu nga gaoni badiarogatise watadu gude nawoka awoka. Kangia avunguroni ima gbinza, si naida oni ngerefuo yó. Si rengbe kadu nga, agude sono ki guari kusayo kporo. Ngerafuo agu apai nga ga dungurati rengbe arengba ka ye na kura asunge. Agi aʹariapai re dunduko rengbe arengba ka ye na fudifudiapai gbiati abakabangirise kurogo gaoni ramukporo.
18 Ka oni bi gupai nga ome fudifudiapai ima mbeda ka fu rii omeroni, ginipai ka oni mangihe? (Snz. 24:10) Ka oni zerenga fuhe ya! Anga pai ho ngbaa ti Satana susi gu nga ka bi ga Mbori amoyambu i nambu ziazia irisombori te. Ko adu na ngbarago bakere, ka arogotise mbuhe. Sidu, oni mangi agu apai dunduko rengbe oni ka mangaha tipa gaoni rogatise nye kindi nigu gire udi yó ho biata. Ziazia Kekeapai na apangbangaa rogoho tipa agu aboro nanye niruru yó fudifudiapai ki vura nimangi yó vurũ. Nikpiapai, Davide akparikpee fu Yekova ti kura regbo sa ki yaa: “Ako Mbori, mo ini pai fere, bambiko aboro nakpi nyemu ka . . . [rungosi re].” (Tam. 56:1) “Aboro” arungosinga roni? Ka si du nga gu fudifudiapai namanga roni ye he be kungbo boro watadu be abadiangbaroni, oni tingidi gupai nga, Davide aima gbia ome ka hipai, sidu, oni rengbe arengba ka gbiaha a tigaoni. Davide ayaa: “Mi agbata Yekova, ko ki karaga pai fere, ki batasi re be gimi agunde dunduko.”—Tam. 34:4.
Kura Amaku
19. Wai rengbe ani ka sovura kuti ga Satana azubohe?
19 Rogo gi yangara arame re, si naida arogotise ‘naazúngadi tiyó dagbayó, na kini nyakasi tiyó dagbayó.’ (1 Tesa. 5:11) Ka bangironi gonga ti gupai ngawee Satana nayawee ani naka kuti Yekova mbiko agu apai Yekova amangaha furani ya. Ko nika mangasunge na agu apai dunduko rengbe ko ka mangaha, tipa ka gbarasapa gu ramukporo nga ga rogatise, na ka sa rani ka ani kanga kuti gaani ruru mangaapai ya. Tipa ani rengbe ka sovura kuti ga Satana azubohe, si naida ani kido kuti Yekova. (Snz. 3:5, 6) Pauro akepai ki yaa: “Mi rengbe na manga apai dunduko rogo gu ko nanyakasa re.”—Frp. 4:13.
20. Gini amaku naye fu boro tipa maa ní Mbori rogo gani rogatise?
20 Agu amaku naye fu boro tipa maa ní Mbori rogo gani rogatise, si ima nge. Si nga gupai namangi tipa kumba nga Joel gbiati diako nga agu arogotise mangi agarã awere 51 kurogo gayó rogatise. Ko nayaa: “Mi naatambua Yekova ti aregbo dunduko tipa diare, na tipa gaani wene ramukporo. Ri nidu nirengo nga bawene sino kuare.” Gine naundo yó? Ko nayaa: “Ani naamanga asadatise kadu na weneringise, hipai, na nyemuse dagbarani.” Anga boro ho dagbarani rengbe ka manga gupai re ngba rengberengbe gene rogo gi zegino re te. Ono, wa vura duhe wo, si naida ani mangi asadatise ka manga bangua arugute nga ga Ziazia Kekeapai na ki kakuti Yekova rogo gaani rogatise. Ka ani mangihe wo, gaani rogatise kini mo kadu ‘nigu gire udiyo ho biata ka katanga niʹipo ya.’—Batu. 4:12.
Oni Natingidaha?
• Pa maa arogotise Yekova rogo kparakpee nakoda gine?
• Gine si aida arogotise mangihe ho kpakarapai akura ni rogo rogatise?
• Wai ani aino gupai ngawee aboro moi Mbori rogo gayó rogatise?
[Gu kpiahe du ti kpewaraga 23]
Ka arogotise akparakpee sa, si nika undo yó i sovura na diabese kuti agu akpakarapai ka ye sa yó