Oni Di Hee na Tambuahe, Kini Gamu Hee na Ngbaduroniyo Pusiapusia
YEKOVA, nga gu Barani nga boro nyemuse du ngbangbaturũ yo, ko naberã parani aberã wenengai. Fugoko nga Ziazia Kekeapai naya furani wee, ko naberãpa gako amoyambu aberã gbe wadu yó dunduko. (1 Pet. 5:7) Gene sa dagba agu akuraha Yekova ayugo gupai ngbaha nga ko naberã parani aberã nga, ko naundo rani rogo dungu agene tipa ani irisiko niruru rani. (Yes. 48:17) Ho ani agbiatirani ni na fudifudiapai, Yekova naida ani mangisunge na gu undo ko afuhe furani. Ga Moize aNdiko nayugo gupai nga Yekova naberã parani aberã.
Rogo ga Moize aNdiko, Yekova amangi mbakadapai tipa undo “rungorungo aboro,” wa awirinyaure, adekurugbo, na kungbo aboro. (Pa Mot. 19:9, 10; Pa Rug. 14:29) Yekova ima ino gupai nga gu kura gako amoyambu kinaho si aida akurayo naaundo yó aundo. (Yak. 1:27) Si aidanga ga Yekova amoyambu du dindikodindiko ka dia gu undo Yekova afuhe fuyó vurube akurayó te. Ono tie, ho ani agbia undo ni, si naida ani dihe na tambuahe.
Fugo Mbori nanyakasa gupai a nga, ga Mbori aboro na momu beyo tipa ka gamahe. Oni tingidinga pa gu “rungorungo dekurugbo” Yesu abi ri yekaru yo Yerusarema yo. (Ruka 21:1-4) Si nawira gupai nga ri aima gbia undo be gu ga Yekova mbakadapai nadu tipa ngerafuo adekurugbo. Ono tie, wa gu dekurugbo re avura du nirungorungo ri, ani natingida pari ti gupai nga ri afu gamahe, angianga i agamuhe furi ya. Gi gari wene sino re aima fu ngbarago furi nirengo, mbiko Yesu ayaa: “Gu ngbarago boro agbiaha ho ní agamahe ni, si kii kisusi gu ní agbiaha ho boro afu he ni funi.” (Amo. 20:35, NW) Fuo ino ani agu apai tie du tipa gamahe, ani bingo bete agu agene rengbe ani ka “fu he” ngbaha na ki gbia ngbarago nisangbanaha.—Ruka 6:38.
“Gini He Mi ka Fu fu Yekova?”
Bake apapara Atambuahe asanatiko ki yaa: “Gini he mi ka fu fu Yekova tipa gu gako weneapai dunduko fu ko fere?” (Tam. 116:12) Gini amaku ko agbiaha? Yekova aafu undo kindi ti agu aregbo dũ ko anaagbiatiko na “fudifudipai na rungo.” Kurigure, Yekova “abatasi [mbisimoko] bekpio.” Ono tie, ko aaida “ka fu he” fu Yekova. Ginipai ko arengbe ka mangaha? Ko ayaa: “Mi amánga pa gimi azungahe fu Yekova.” (Tam. 116:3, 4, 8, 10-14) Ko adiberã tipa ka banda gako akidohe nga gu ko amangihe na Yekova, na ki ringbisi gako akidohe fuko.
Oni rengbe ka manga kina gu bangisapai re a. Ngba gini gene? Nipeka oni fuo gu raka ti aregbo dũ duna ngbanya kuti ga Mbori andiko watadu gako arugute. Sidu, si naida oni bipa irisombori ninyanyakipa pai rogo gaoni raka, na ki mbu ga Mbori toro si naangbe furoni rogo apai yo dũ. (Batu. 12:13; Gara. 5:16-18) Ka pe rengo nzunzu, oni arengbanga ka fu he fu Yekova si ki rengbe na agu apai ko namangihe furoni te. Wa vura duhe wo, oni nafu ngbarago afu fu Yekova ho oni afu tironi ni na ngbaduroniyo dũ tipa ka mangasunge fuko. (Snz. 27:11) Nangbaa gu bawene gene oni afu ngbarago ngbaha fu Yekova re!
Oni Sa Dungurati Si Du Niwenehe
Zanga tiko, oni nagbia undo agbia be agu adungurati nga ga aKristano rogo dungu agene yo. Yekova nafuka agu ariahe nga ga toro furani vurube dungurati. Oni agbia gu rengo nasaroni oni ra nirironi na ki kuru rogo gu bitimo nga ga toro. (Yo. 8:32) ‘Ruru kangara moyambu’ ninaambakada apai tipa agu adunguratise nga ga dungurati, na kikindigi adunguratise tipa oni gbia gu inohe rengbe ka ndu na oni sa nyenye unga kurogo paradizo kpotosende, yo aima na arungo nika dunga ni ya. (Mt. 24:45-47) Ya mo oni rengbe ka geda agu aundo oni nagbiaha rogo ga Mbori dungurati na agu oni kaa gbiaha a kindi? Ginihe rengbe oni ka fuhe fu dungurati tipa gu weneapai si amangaha furoni?
Gu mokedi nangia Pauro akepai ki yaa: “[Ga Kristo] borose azunguda tihe dunduko nzunzu ki du ngungungu ti ko be gu pai ngbazungaha afu ku sangba gu mangapai yo nga ga rikaha dũ, ni ringbisi he aringbisa, si nakiisa borose sa sonosa tihe rogo nyemuse yo.” (Ef. 4:15, 16) Wa vura duhe nga gupai re tipa mbedimbedi aKristano, agu arugute re tipa aKristano dunduko areme. Nirengo, aboro dunduko rogo dungurati rengbe ka saha si du wenengai na kini sonosihe. Rogo gini agene?
Ani rengbe ka mangaha wo nimanga ani asadatise ka fu wasa fu akuarani na ka nyakasa yó kutingba ga Mbori sunge. (Rom. 14:19) Ani rengbe ka sa dungurati a si sono kumbatayo niyugo ani zuzu ga Mbori toro rogo gaani mangaapai yo na akuarani aidipase. (Gara. 5:22, 23) Kurigure, si naida ani naagbata amomu agbata tipa ka ‘manga gupai ngbaangba fu aboro dunduko, gbe fu aguyo du ku idapase yo na ani.’ (Gara. 6:10; Eb. 13:16) Agu aboro dunduko du rogo dungurati, nga akumba na adee, paranga aboro na sosonoyo, i rengbe ka kodabeyo tipa ka ‘sonosa gu borose re rogo nyemuse.’
Kupati gure, ani rengbe ka mangasunge na gaani abirĩ-sunge, omerani, gbiati agu ahe du berani tipa ka undo gu sunge batasa aboro dungurati amangaha. Yesu Kristo ayaa: “Wa i nafuku ahe fu roni gbe, oni fúku he tigaoni kina wo.” (Mt. 10:8) Sidu tie, oni naamanga sunge tungusapa Kindo na sunge sa aboro ni abawiriki wenengai gbe. (Mt. 24:14; 28:19, 20) Ka si du nga apai kinaho naká na oni ti manga gi sunge re wenengai gbe, oni tingidipa gu dekurugbo Yesu agumba pari. Guhe ri afuhe, si adu niwiri toonihe gbua. Ono wa si avura duwo, Yesu ayawee ri nafuhe kisusi gu kura aboro dũ. Ri afu guhe nadu beri ringbisihe kuti omeri.—2 Kor. 8:1-5, 12.
Oni Di Hee na Tambuahe
Kura aregbo kinaho rengbehe ka ida dungurati undo roni. Ka si mangi wo, si aidanga oni du dindikodindiko tipa ka dia gu undo dungurati aida ka fuhe tipa si undo roni rogo gu kpakaraapai nga ga gi sino raka re te. Yekova aima maa akumba i ‘nirigi gako kanisa,’ kini undo roni ho du oni ni rogo fudifudiapai. (Amo. 20:28) Abaakumba gbiati gu kura aboro du rogo dungurati, i naida aida ka fu wasa furoni, ki undo roni, na ki banda roni ti regbo fudifudiapai.—Gara. 6:2; 1 Tesa. 5:14.
Ono tie, ho oni agbia undo ni, oni dihe na tambuahe. Gu undo oni agbiaha be akuaroni aidipase, oni bihe niga Mbori weneringise. (1 Pet. 4:10) Gipai re nga nyanyakipa pai mbiko gupai nga, ani aidanga ka dia he wagu badungu aboro rogo zegino naadiaha te, nga ka diaha zanga tambuahe.
Oni Duna Ruru Berã
Rogo gu waraga Pauro akehe fu gu dungurati nadu Firipoi yo, ko aya tipa Timoteo wee: “Kura boro adu nga ho na berãpase wa ko, ka banda pa roni sirisiri te.” Ono Pauro aya berewe wee: ‘Kura aboro nagbata kina gayó apai dunduko, ga Yesu Kristo apai te.’ (Frp. 2:20, 21) Nibi gupai Pauro agumbaha re, wai rengbe ani areme ka he ‘gbata kina gaani apai’?
Ho ani aida ni kura aboro rogo dungurati di gayó regbo ka undo rani, si aidanga ani ho gupai nika dia bakere regbo beyo na ome te. Tipagine duhe ti ni wo? Oni berẽnga kurii gipai re: Ka wirina fu hee furani si undo rani ti regbo tunguotunguopai, ani duadu na bakere tambuahe tipaha. Ono ya mo si naida ani moihe nidingisoro funi ní fu hee rani? Wagusa te. Wakina gure a, wa vura duhe nga awirinarani na ngbarago ka undo rani, si naida ani duna ruru berã nibipa gu regbo ani aida i dihe ka undo rani. Berewe a, agu apai akuarani amangaha tipa ka undo rani ho du ani ni rogo kpakarapai, ani naida i mangihe na ngbaduyó yo dũ wa i akpinyemuhe.
Zanga kapa, awirinaroni nikaa duadu na nyemu ka undo roni ti aregbo dũ. Ono tie, kura aregbo kinaho gene nikaa dunga beyo tipa ka undo roni ya. Ka pai mangi wa gure, oni ini gupai nga, Yekova nika songoda roni asongoda, a wa ko asongodi bake atambuahe ti regbo fudifudiapai.—Tam. 116:1, 2; Frp. 4:10-13.
Sidu tie, ka oni dunga dindikodindiko ka dia gu undo Yekova afuhe furoni na tambuahe ya, gbe, ti regbo fudifudipai. (Tam. 55:22) Ko naida oni di gu undo adia ko afuhe furoni. Ko naida oni du a ni “gu boro nagama he esuesu.” Sidu, oni ‘kpinyemu gamahe kpotoroniyo,’ kini gamu agu ahe rengbe ome roni nani tipa si songodi ndikidi irisombori. (2 Kor. 9:6, 7) Ka oni amangaha wo, gure nga oni nadia hee na tambuahe, kini gamu hee na ngbaduroniyo pusiapusia.
[Gu kpiahe du ti kpewaraga 32]
“Gini he mi ka fu fu Yekova tipa gu gako weneapai dunduko fu ko fere?”—Tam. 116:12
[Gu kpiahe du ti kpewaraga 32]
▪ Si naida oni naagbata amomu agbata tipa ka ‘manga gupai ngbaangba fu aboro dunduko’
▪ Oni fu wasa fu akuaroni na kini nyakasiyo kutingba ga Mbori sunge
▪ Oni naamanga sunge tungusapa Kindo na sunge sa aboro ni abawiriki wenengai gbe ringbisihe kuti omeroni