‘Oni Bándatironi Kurogo Ga Mbori Nyemuse Yo’
“Oni bánda tironi [ku]rogo ga Mbori nyemuse yo, ki ningere fuo ga gaani Gbia Yesu Kristo inapai sa nyenye unga.”—YUDA 21.
1, 2. Wai Yekova nayugu gako nyemuse tipa rani, na wai ani aino ya ko aziongo rani azio kurogo gako nyemuse yo te?
YEKOVA MBORI yugu gako nyemuse tipa rani rogo badungu agene. Zanga kapa, gu bakere gopai duho nayugo gupai nga Yekova nakpinyemu rani akpi, si nga gu motumo tumorii ko afuhe tipa rani. Ga Yekova nyemuse tipa aboro aima kio gbe si ki sako ko kedi gu Wiriko ko akpinyemuko gbe ko ye ku sende no ka kpi tipa rani. (Yo. 3:16) Yekova amangi gipai re mbiko gupai nga, ko naida ani raki nyeanye kindi!
2 Ya mo ruhe aru ani berẽ gupai nga Yekova rengbe arengba ka zio rani kurogo gako nyemuse yo ka ani vura kaa manga kina ginipai vurũ? Wagusa te. Gumba ani he wo mbiko gupai nga, Yuda veresi 21 naya furani wee: “Oni bánda tironi [ku]rogo ga Mbori nyemuse yo, ki ningere fuo ga gaani Gbia Yesu Kristo inapai sa nyenye unga.” Gu fugo nga ‘oni bándatironi kurogo ga Mbori nyemuse yo,’ si nayugo gupai nga, si naida ani mangipai amanga tipa ka nye kurogo ga Mbori nyemuse yo. Ono ginipai si aida ani mangihe tipa ka bandatirani kurogo ga Mbori nyemuse yo?
Wai Rengbe Ani ka Bandatirani Kurogo ga Mbori Nyemuse?
3. Ginipai Yesu agumbaha ya si rengbe ka undo rani ani nye kurogo ga Bako nyemuse?
3 Gu karagapai du sa gi sanahe re, si rogo gupai Yesu agumbaha ningbako rogo gu yuru nadumbata fu kpiko. Ko ayaa: “Ka oni ka kuti gi rugute, oni nye anye rogo gi nyemuse; wa ka mi kuti ga Buba rugute, ki nye rogo gako nyemuse.” (Yo. 15:10) A wa fugo Yesu ayugoho, ko aima ino gupai nga, ka boro kakuti agu arugute nga ga Bako, si rengbe ka sa gupai nga ní du na wene ngbanya naako. Ono ka si du tie nga Yesu nangia rengberengbe Wiri Mbori akakuti agu arugute nga ga Bako, ginipai tigaha du tipa rani?
4, 5. (a) Gini bambata gene rengbe ani ka yugo gupai ngbaha nga, ani nakpinyemu Yekova? (b) Tipagine duhe ti ni nga, ndupai ho berani ani deke ti manga agu arugute nga ga Yekova te?
4 Nibambatapai, ani nayugo gaani nyemuse tipa Mbori nigia ani sangbako. Yoane akepai tipa nyemu Mbori ki yaa: “Gi nga du [ani] na nyemu Mbori re, nga ka ani kuti gako rugute. Gako rugute asusa nga omerani te.” (1 Yo. 5:3) Si nirengo nga, ngenga agu aboro naberãpa giasangbaa rogo gi zegino ani araka rogoho re te. Ono oni kparianga gupai gu veresi re agumbaha kini yaa: “Gako rugute asusa nga omerani te.” Yekova asananga rani ani mangi gupai nyaki anyaka gbe furani te.
5 Ya mo oni rengbe ka ya fu bakurearoni wee ní tindi guhe oni naima ino ya si ima rõa ki susi omeni? Wagusa te! Ono Yekova tigako duna weneringise ki susi rani, ko ima inopa agu apai wenengai arẽnga omerani nani ya. Ziazia Kekeapai naya furani wee, Mbori ‘natingida parani ya nvutu sende nga ani.’ (Tam. 103:14) Ko arengbanga ka sana rani ani mangi gupai arẽnga omerani nani ya te. Sidu, ndupai ho berani ani deke ti manga agu arugute nga ga Mbori te. Kuba gure, ani nagiasangba Barani nga Mbori mbiko ani ini gupai nga, giasangbako rengbe ani ka yugo gupai fuko nani nga ani nakpinyemuko.
Gu Gamahe Yekova Afuhe Furani
6, 7. (a) Gine nga sangbakpotoseyo? (b) Oni funga gu kpiapai nayugo wai rengbe sangbakpotoraniyo ka undo rani ani nye rogo ga Mbori nyemuse?
6 Rogo gi zegino re, badungu apai duho si naaida ani naadiaberã tipaha. Ono wai rengbe ani ka ino singia gaani diaberã nandu kuti gupai Mbori akpinyemuhe? Mbori aima fu gu gamahe furani rengbe ka undo rani ani duna giasangbaa. Gu gamahe re nga sangbakpotoseyo. Gine nga sangbakpotoseyo? Sangbakpotoseyo nga gu hee du rogo rani yo naundo rani ani wisigi tirani wenengai. Si namangasunge wa basapungbanga, kini sa rani ani wisigi agu apai ani aida ka mangaha, watadu ani berẽkurii gupai ani naima mangaha ka bihe singia wenepai du watadu gbegberẽpai du, rurupai du watadu irairapai du.—Oni gedi ARomo 2:14, 15.
7 Wai rengbe ani ka sa sangbakpotoraniyo si niundo rani? Oni bingo gi kpiapai re: Kumba naara wene dodoroma rame yuru dimoyo. Gako ango kini gi woro boro u kini tona ka gbokoda. Gu boro u agi woro ní re kini zubo. Gu kumba re ki gu rame yo ki ngere ku zegiyo ka ko abingo boro ya. Gu kumba re ki uka kina omeko. Ka si adu nga gu ango re aara ara ka u ainongo nga boro naye tipa u gbokodi ya, ginipai ka mangi? Ka gu boro re aima ye ki dĩ ahe, singia ki mangi gu kumba re gbegberẽe, watadu ki imiko a. Teketeke a, ka boro adunga na sangbakpotoseyo tiní ya, ní niʹingi ainga ho ní aida ni ka diaberã nibipa wenepai na gbegberẽpai.
8, 9. (a) Ginipai sangbakpotoraniyo arengbanga ka mangaha furani ya? (b) Ginipai rengbe ani ka mangaha tipa ka sa sangbakpotoraniyo si niundo rani?
8 Ka ango ara ara ka u ainongo pa gu kerepai naye ya, gure nga sunge tiru te. Watadu ka u vura kaa gbokoda iraru ki tumba rini ní ki pigihe apigo berewe ka ní aidanga ka guari niipo ya, ono kini ndu kumbatayo na kina gani kporokonyo rame, kerepai rengbe arengba ka manga. Wakina gure a, gu nyemuapai nga ga borose rengbe arengba ka sa gupai nga ka sangbakpotoraniyo mangingo sunge wenengai ya. Ziazia Kekeapai naya furani wee “kpotoboro yo nangi ahe ki susi ahe dunduko, si na kere kaza.” (Yere. 17:9; Snz. 4:23) Ka ani akidongo kuti Fugo Mbori nga Ziazia Kekeapai ya, sangbakpotoraniyo undongo rani wenengai te. (Tam. 119:105) Ono gupai nafu gberarago nga, badungu aboro rogo zegino nandu kina kuti agu apai ngbaduyó yo akpinyemuhe, ka i aberãnga pa agu arugute du rogo Fugo Mbori ya. (Oni gedi AEfeso 4:17-19.) Si du badungu aboro amanga kereapai ti ni, sangbakpotoseyo ki vura du tiyo vurũ.—1 Tim. 4:2.
9 Si naida ani diberã ka he duwa gure! Si naida ani naasa Fugo Mbori si raba sangbakpotoraniyo tipa si niimangisunge wenengai. Na si naida ani naamanga gupai sangbakpotoraniyo agumbaha furani zanga ani mbu gu gbegberẽ nyemuapai nga ga borose omehe furii sangbakpotoraniyo. Na si naida ani naaʹirisa sangbakpoto agu awirinarani du rogo dungurati. Si naida ani naaʹasada tirani na omerani dũ ka he kotosa yó, na ani ki ini gupai nga sangbakpoto wirinarani yo rengbe ka sa ní ní mangi gupai sangbakpotoraniyo aidanga nani ya, watadu ní ká gupai sangbakpotoraniyo akánga ha furani ya.—1 Kor. 8:12; 2 Kor. 4:2; 1 Pet. 3:16.
10. Gini apai biata ani ka wisigoho awere?
10 Fuo ruga ani tirani tie wenengai naapa sangbakpotoseyo, ani wisigingo abangiriba biata rengbe ani ngbaha ka yugo gaani nyemuse tipa Yekova rogo giasangbako. Rogo agi abangiriba re dunduko nibasasa, sangbakpotoraniyo nikaa mangasunge amanga, ono si naida si nimangisunge ringbisihe kuti gu bangua arugute du rogo Ziazia Kekeapai tipa ruru mangaapai. Agu abangiriba du biata ani ayugo gaani nyemuse ngbaha tipa Yekova nigia ani sangbako nga: (1) Ani nakpinyemu agu aboro Yekova akpinyemuyo, (2) ani nairisa agu aboro du kurirani, na (3) ani naʹasada tirani ka nye gigirii bangiri Yekova.
Oni Kpinyemu agu Aboro Yekova Akpinyemuyo
11. Tipagine si aida ti ni ani kpinyemu agu aboro Yekova akpinyemuyo?
11 Bambatapai nga, si naida ani kpinyemu agu aboro Yekova akpinyemuyo. Ani furanga tipa kodatise. A wa abagambu naaziotira kuti rokoo, kinawo a rengbe apai ka ziotihe kuti rani ti agu aboro du ani dagbayó. Bamangirani ima ino wai rengbe kodatise ka gberesa parani na wai rengbehe ka undo rani, si du fuuko gu rugute ti ni furani nga: “Gu boro nata na boro tatamana ni adú ni iratatamana a, ono gu badiata nga ga mumungo aboro, ima [gbegberẽpai] azía yo wa sa.” (Snz. 13:20; 1 Kor. 15:33) Anga boro ho dagbarani naida “ima” gbegberẽpai zi ní te; ani dunduko naida kadu ni airatatamana. Ono tipa Yekova tigako, boro ho rengbe ka sako ko du na tatamana susi gu du ko awere nani te, na boro ho rengbe ka gberesa pako a te. Ono wa vura duhe wo, ko namaa wene kpiapai furani nibipa kodatise na aboro. Oni berẽnga gipai re: Gini ngbatunga aboro Yekova asia yó auru kpotosende ane i du ni abakureako?
12. Gini ngbatunga aboro Yekova azio bakure naayó?
12 Yekova afura tipa Abarayama ya ko angia ‘badiangbako.’ (Yes. 41:8) Gi kumba nangia Abarayama re adu niruruko na niboro giasangbaa. (Yak. 2:21-23) Agu aboro duwa Abarayama Yekova azio bakure naayó. Ka si du nga Yekova nasiaka ngbatunga agu aboro re i du ni abakureako, ginipai si aida ani mangihe tigaani nga kpakpa aboro? Anga si naida ani naata na kina airatatamana tipa kadu na tatamana tee?
13. Ginipai rengbe ka undo rani ani siaka wene abakure?
13 Gine rengbe ka undo rani oni siaka wene abakure? Pa wisigo ani agu akpiapai du rogo Ziazia Kekeapai rengbe arengba ka undo rani. Oni berẽnga pa gu bakure nadu dagba Ruta na nakumbaari nangia Naomi, gu nadu dagba Davide na Yonatana, na gu nadu dagba Timoteo na Pauro. (Ruta 1:16, 17; 1 Sam. 23:16-18; Frp. 2:19-22) Gu banguapai nasa yó i du niwene abakure angia: I dunduko nadu na ndikidi nyemuse tipa Yekova. Ya mo oni rengbe ka gbia agu abakure nakpinyemu Yekova a wa oni akpinyemuko? Oni ini gupai nga, gu dungurati nga ga aKristano, si nga gu ba rengbe boro rogoho ka gbia agu abakure nakpinyemu Yekova. Gbegberẽpai ho nika zio roni tiyó te. Ono kuba gure, i nika undo roni oni sono rogo toro yo, na oni rũ hee fu toro. (Oni gedi AGaratio 6:7, 8.) I nika undo roni oni bandatironi kurogo ga Yekova nyemuse yo.
Oni Irisi agu Aboro Du Kurironi
14. Tipagine si nidu ti ni furani ti kura aregbo nimbumbupai ani irisi agu aboro du kurirani?
14 Gu ue gene ani ayugo gaani nyemuse ngbaha tipa Yekova, si nabipa agu aboro du kurirani. Si naida ani irisi agu aboro du kurirani. Tipagine si nidu ti ni furani ti kura aregbo nimbumbupai ani mangi gipai re? Pai sa dagba agu akuraha nga, agu aboro Mbori amaa yó kurirani, i nga kpakpa aboro. Ani a nga kina kpakpa aboro. Ani nasovura na gupai i avungu rani nani rogoraniyo nga ga samungu.
15, 16. (a) Tipagine nyakipa gupai ti ni nga, ani irisi agu aboro Yekova namoi yó i ningbembatayo furani? (b) Gini nyanyakipa pai ani awirikaha ti wai Yekova abi gu samungu nangia ga agu aYisaraere naagumbarimo Moize?
15 Ono si rengbe ka iriwo airiwo tironi nga, ‘Ka si du tie nimbumbuhe wa gure ka fu irisa fu agu aboro du kurirani, tipagine si aida ti ni ani mangihe?’ Gu karagapai du kuti gu sanahe re, si nabipa bakere pagbia. Da rengbe oni ka sia ní ní du nigaoni gbia, watadu bazogo? Ka ani sia Yekova nigaani Gbia, si naida ani irisi gako pagbia. Ka ani airisanga ko ya, ya mo ani rengbe ka pehe nigaani rengo ya ko nga gaani Gbia? Kurigure, Yekova naamangasunge rogo kpakpa aboro yo tipa ka ngbembatayo furani. Ka ani agianga pai ngba agu aboro re ya, Yekova bi gaani mangaapai wai?—Oni gedi 1 ATesaroniko 5:12, 13.
16 Nikpiapai, ho aYisaraere aagumbarimo Moize ni na ki samungu kutiko, Yekova abihe wakina boro ko du i aagumba rimoko na i asamungu kina kutiko. (Geda 14:26, 27) Yekova aʹarianga sinoko te. Ka ani samungu kuti agu aboro ko namoi yó kurirani, gure nga ani samungu kina kutiko!
17. Gini wene sino berã si aida ani mangi asadatise kadu nani koyo du agu aboro ni nangbembatayo rogo dungurati?
17 Gu mokedi nangia Pauro ayugu gu sino berã si aida ani du nani tipa agu aboro nangbembatayo rogo gu dungurati nga ga aKristano. Ko akehe ki yaa: “Oni gí sangba gaoni abaakumba ki nira fu yo; bambiko i nangera tipa pa mbisimoroni, wa i ka ringbisa pai tipa roni; ya i ka manga gere ni ngbarago, ni rungo te: bambiko ka gi ngba nga fu roni te re.” (Eb. 13:17) Si nirengo nga, si naida ani mangi bakere asadatise amanga tipa kadu na agi asino nga giasangbaa gbiati ranigose re. Ono oni tingidi gupai nga, ani naʹasada ka bandatirani kurogo ga Mbori nyemuse yo. Anga si ninyanyakipa pai ani asadi tirani na omerani dunduko tipa ka bandatirani kurogo ga Mbori nyemuse yo tee?
Oni Nye Gigirii Bangiri Yekova
18. Tipagine Yekova aida gupai ti ni nga ani du gigirii?
18 Gu biata gene ani ayugo gaani nyemuse ngbaha tipa Yekova, si nga ani naʹasada tirani ka nye gigirii bangiriko. Avunguagude naaasadatiyo bakere gbe tipa ka sa gupai nga awiriyo du nigigiriyo. Tipagine i naamangaha ti ni wo? Bambatapai nga, padu gude gigirii rengbe ka sa gupai nga ka kaza zingo ru ya. Kurigure, gu gude du gigirii adunga sekpesekpe ya, si nika yugo gupai nga avunguru nakpinyemu ru akpi na i nangera angera fuoru. Nduapai kinaho nawira kina agure Yekova aida ti ni ani du gigirii. Ko ima ino gupai nga, giro rengbe ka sa gupai nga kpotoboro du wenengai. Ko ini gupai a nga, ka ani du gigirii, si nika yugopa gini ngbatunga boro nga gu Barani du ngbangbaturũ yo. Gipai re nga nyanyakipa pai mbiko si rengbe ka gbe aboro fuo gu Mbori ani airisoko, bambiko i nika bi wai du ani kia ti agu aboro du rogo gi gbegberẽ zegino re.
19. Wai ani aino ya si ninyanyakipa pai boro du gigirii ti kpotoni?
19 Rogo gini agene si aida ani du gigirii? Nirengo, si naida ani du gigirii rogo agu apai yo dunduko nga ga raka. Rogo gu ringara aYisaraere nadumbata, Yekova agumbaha ziazia fu gako aboro ki yawee, si naida i du gigirii ti kpotoyo. (Pa Mot. 15:31) Ga Moize aNdiko afura tipa ngbatunga agu apai nga kpisido gbegberẽ rago, giriso aũriahe, zunda bee, zunda ndue, gbiati zunda arokoo. (Gate 30:17-21; Pa Mot. 11:32; Geda 19:17-20; Pa Rug. 23:13, 14) I agumba gupai fu aYisaraere nga, gayó Mbori adu ziazia nigiangiriko. Si naida gupai nga, agu amoyambu nga ga ziazia Mbori yó, i du a ziazia.—Oni gedi Pa Amotumo 11:44, 45.
20. Rogo gini agene si aida ani du gigirii?
20 Si naida ani du nigigiri rani ti kpotorani na ngbaduraniyo a. Si naida ani naaʹasada tirani kaa berã kina gigiri apai. Wa vura duhe nga zegino ima gberã be wasiwasi kodaba, ani nandu kina kuti gu ga Yekova arugute du tipa ruru mangaapai. Gupai nyakipaha gbe nga, ani nabanda gaani irisombori si du nigigirihe, zanga sa wiri biriko si ye rogo zire pambori ka birikosihe. Ani naatingida gupai ti aregbo dunduko du rogo Yesaya 52:11, nayaa: “Oni gúari, oni gúari, oni kúru erẽ ku sa yo, ka oni zádi nga birikobiriko he wa sa ya; oni kúru yo, oni gírisi tironi.” Areme, ani nabanda tirani gigirii rogo toro yo nizanga rimiso ani tirani wa gu tooni kurogo agu apai nga ga zire pambori. Si a nga ndu gupai ani naairisongo agu aʹuru-ongoda ti ni nga ga aboro zire pambori ya. Rogo gi zegino nabiriko kina kumbatayo rogo gaha sino mangaapai yo re, si nitaatapai fu boro ní nye gigirii te. Ono ga Yekova aboro naʹasada tiyó ka nye gigirii bambiko i ini gupai nga, pa mangayó ho naundo yó i banda tiyó kurogo ga Mbori nyemuse yo.
21. Gini apai ka ani amangaha ani ki ini ya ani nika nyeanye rogo ga Mbori nyemuse yo?
21 Yekova nakpinyemu gupai nga ani kpinyemuko nyeanye kindi. Ani dunduko nibasasa si aida ani mangi asadatise tipa ka nye kurogo gako nyemuse yo. Ani rengbe ka manga gipai re nipeka ani fuo gu kpiapai nga ga Yesu, na kini yugu gaani nyemuse tipa Yekova nigia ani sangbako. Ka ani amangaha wo, si nika sa rani ani dakuti gupai nga, he ho ‘nika kpara rani ti ga Mbori nyemuse du rogo Kristo Yesu yo nga gaani Gbia te.’—Rom. 8:38, 39.
Oni Natingidaha?
• Wai rengbe sangbakpotoraniyo ka undo rani ani nye kurogo ga Mbori nyemuse yo?
• Tipagine si aida ti ni ani kpinyemu agu aboro Yekova akpinyemuyo?
• Tipagine nyakipa gupai ti ni nga, ani irisi agu aboro du kurirani?
• Wai nyakipa gupai nga, si naida ga Mbori aboro du gigirii?
[Gu kpiahe du ti kpewaraga 28]
Gu Buku Nambakada Sino Aboro
Ti regbo gu bakere dunguratise nga ga aʹuru biata namangi rogo 2008, i akusi buku du rimoho nga, “Keep Yourselves in God’s Love! [‘Oni Bándatironi Kurogo ga Mbori Nyemuse Yo’!]” Tipagine i akusi gi vovo buku re ti ni? I akusihe tipa si undo aKristano i ini agu agene nga ga Yekova na kini kpinyemuhe. Gi buku re nafura gbe tipa gu mangaapai nga ga aKristano. Ka ani wisigi gi buku re wenengai, ani nika rugatirani na gupai wenengai gbe nga, raka kuti agu arugute nga ga Yekova, si nga gu bawene gene si aida ani raki ngbaha awere, na si nandu na boro sa nyenye unga.
Kurigure, gi buku re naundo rani ani ini gupai nga, giasangba Yekova abatasanga omerani te. Ono si nga gu gene ani ayugo gupai fu Yekova ngbaha nga, ani nakpinyemuko. Sidu, gi buku re nika fõngbaduraniyo ani sana tirani ki yaa, ‘Tipagine mi agiasangba Yekova ti ni?’
Ho aboro amanga gu kere irairapai ni nga ka mbu Yekova, gupai ninaasa yó i mangihe wo nga gayó sino mangaapai, angianga zingo yugopai ya. Nairiwo wai tie nyakipa gupai nga, ani nyakasi gaani nyemuse tipa ga Yekova andiko na gako abangua arugute nga gu nangbe furani mbatayo rogo gaani raka! Gi buku re undongo ga Yekova akandoro aundo rogo zegino dunduko ami ru nyanyakii ka manga rurupai, ki yugu Satana niʹiraziree, na kurigure dũ, ami ki banda tira kurogo ga Mbori nyemuse yo!—Yuda 21.