Gu Gene Yesu Akiisi Ga Mbori Rurupai Ngbaha

“Mbori amoi [Kristo] ko du ni motumo ga aboro ingaapai, wa i naida pa kureko. Rogo gere, Mbori ayugu waĩ ko nasa aboro ni ruru yo.”​—ROM. 3:25.

1, 2. (a) Ginipai Ziazia Kekeapai ayugoho furani tipa ga aboro raka? (b) Gini asanahe ani ka wisigoho rogo gi kekeapai re?

GU PANGANGA du rogo Ziazia Kekeapai tipa gu samungu namangi ati Edene yo nga gupai aboro naima inoho wenengai. Aboro dunduko du sangbana gu ingapai nga ga Adamu kuriyó a wa pe yó ho ane nga: “Gbegberẽpai akuru ku zegino mbiko boro sa, kpio ki du mbiko gbegberẽpai; si du kpio andu andu ti ni sa aboro dũ, bambiko i aingi ainga dũ.” (Rom. 5:12) Ka ani vura asada tirani kina wai vurũ tipa ka manga rurupai, ani namanga agu apai amanga arunga ya, nga gu si aida Mbori mbupai ambu furani ti ni. Gu mokedi nangia Pauro ayaa: “Gu wene he mi akpi nyemu he mi amanga nga ha te ono gu gbegberẽpai mi akpi nga nyemu he ya si mi amanga. Ako, rungorungo boro nga mi!”​—Rom. 7:19, 24.

² Padu ani ni aboro ingapai dunduko nasa gupai nga ani sana gu nyanyakipa sanahe nga: Yesu boro Nazareta, i awiri pa vunga ko wai zanga ingapai, na tipagine ko azi bapatiza ti ni? Wai ga Yesu raka akiisipa ga Yekova rurupai? Ginipai pa kpi Yesu amangihe?

I Atikango Kuti ga Mbori Rurupai

3. Wai Satana anangi Eva?

³ Bambata avungurani nga Adamu na Eva amangipai nipamungo niká yó ga Mbori pagbia ki idi na gu zogarago nga ga “bakuru wo, nga gu ko i aniya ti ko, Bakitingbanga nga Satana.” (Yugo. 12:9) Oni bingo wai gipai re amangi. Satana ayawee Yekova Mbori azoganga rago ngba ruru gene te. Ko ape gipai re nisanako Eva ki yaa: “Mbori aya, ‘Ka oni rí nga agu angua du ati yo dunduko ya’?” Eva agumba kina gupai fuko Mbori apehe, nga ka i ringa zuzu gu ngua du bebere atiyo ya i andu ka kpi. Satana ki kitingbaanga Mbori ni gumbako ziree. Ko ayaa: “Oni akpí nga wa sa te.” Fuo gure, ko anangi Eva ki yawee Mbori naká aká na wenehe beyo na ka ri ri zuzu gu ngua re, ri nikadu wakina Mbori, kini sia gupai nitiri du niwenehe na gu du nigbegberẽhe.​—Bam. P. 3:1-5.

4. Wai aboro aye kadu tii ga Satana pagbia?

⁴ Gupai Satana agumbaha nzunzu nga, ka aboro ra niriyo zanga Mbori, i nikadu na ngbarago kisusi. Kuba gupai nga Adamu songodi ga Mbori pagbia, ko agisangba diako ki ri zuzu gu ngua Mbori aya ka i ringa ha ya. Si ki tadu were, Adamu kini gbarasipa gu rengberengbe unga Yekova afuhe fuko, na ko kini ye na ingapai na kpio kurii rani nga atitako. Ti kina gu bangisa regbo re, aboro amoi tiyo kutii gu pagbia nga ga Satana, nga “mbori gi zegino re.”​—2 Kor. 4:4; Rom. 7:14.

5. (a) Wai Yekova amangi gupai ko agumbaha? (b) Gini maabangirise Mbori afuhe fu awiri Adamu na Eva?

⁵ Fugo Yekova ada nirengo nga gu ko apehe fu Adamu na Eva ki ya ka i ri gu ngua re i akpi akpi. (Bam. P. 3:16-19) Ono gure ayugongo gupai nga ga Mbori ringbisapai azanga manga te. Na ka pai mangingo wo a te. Ho Yekova asaringbanga Adamu na Eva ni sa kpio, ko aima fu wene maabangirise fu atita Adamu. Ko amangi gipai re niringbisa ko pa gu ‘tita dee’ si adu nga Satana nika mbura gidoko. Si adu nga gu tita dee re nika hu ahu be gu oro gidose re na ki ‘mburu rii Satana.’ (Bam. P. 3:15) Ziazia Kekeapai nafura berewe tipa gipai re nibipa Yesu Kristo kini yaa: “I ayugu Wiri Mbori tipa gi pai re, nga ko gbarasi ga bakitingbanga mangaapai.” (1 Yo. 3:8) Ono wai ga Yesu sino mangapai na kpio akiisi ga Mbori ruru mangaapai?

Gupai ga Yesu Bapatiza Ayugoho

6. Wai ani aino ya Yesu aadianga ingapai ti Adamu te?

⁶ Yesu adu ni rengberengbe ko a wa Adamu adu mbata fu inga ko pai. (Rom. 5:14; 1 Kor. 15:45) I avungu Yesu nirengberengbe boro. Si awiri padu wo wai? Gu maraika nga Gaburere afura ziazia fu na Yesu nangia Maria ki yaa: “Ziazia Toro nikaye sa ro, gu tandu nga ga gu ko zogo aboro dũ nikadada ro; si du i ka ya ti ni ti gu gude mo ka vunga ko, Ziazia ko, nga Wiri Mbori.” (Ruka 1:35) Si nirengo nga, ho Yesu aduni kindi niwiri gude, Maria aima gumba agu apai fuko nadu tipa ko. Sidu, ho Maria na Yosefa agbata Yesu ni ki biko tii ga Mbori yekaru yo, ko asanayo ki yaa: “Tipagine oni agbata re ti ni? Oni aina nga ha ya ka mi mangi ga Buba sunge amanga te?” (Ruka 2:49) Yesu aima ino nga Wiri Mbori nangia ko mbuko kindi nitooni gude. Pa kiiso ko ga Mbori rurupai angia nyanyakipa pai fuko.

7. Gini nyanyakipa ahe nadu be Yesu?

⁷ Yesu ayugu gupai nga ko aduna bakere nyemu agu apai nga ga toro ninduko dedede tipa agu adunguratise nga ga irisombori. Wa berãko adu nirengberengbehe zanga ingapai, ko aima giarogo agu apai dunduko wenengai ko agihe watadu ko agedihe rogo Kuru Ndika. (Ruka 4:16) Gu kura nyanyakipahe adu kina beko a, nga gu rengberengbe boroko ko afuhe nimotumo tipa aboro. Ho i abapatiza Yesu ni, ko aakpara fu Bako, na si nawira gupai nga ko aaberakurii gupai i agumbaha nisangbanebi rogo Atambuahe 40:​6-8.​—Ruka 3:​21; oni gedi AEbere 10:​5-​10.a

8. Tipagine Yoane aidi ka ká aká ti ni ka fu bapatiza fu Yesu?

⁸ Ho Yesu andu ni fuo Yoane Bafu Bapatiza ko bapatiza ko, Yoane aidi ka ká aká. Tipagine? Ko amangihe wo mbiko gupai nga, ko aabapatiza aYuda si yugupa gayó saberã ti agu aingapai i amangihe kuti Ndiko. Wa Yoane angia mbembedi gume Yesu, ko aima ino gupai nga Yesu angia ruru boro, ka ingapai adunga ho tiko si aidi ko saberã ko ti ni ya. Ono Yesu aya fu Yoane wee si naida aida Ko zi bapatiza, “bambiko si ngba ka digisa ruruapai dunduko.”​—Mt. 3:15.

9. Tipagine Yesu azi bapatiza ti ni?

⁹ Wa Yesu angia rengberengbe boro wa Adamu adu, ko aima ino gupai nga, ko rengbe arengba ka vunga agude zanga ingapai tira. Ono tie, Yesu aaidanga ka manga gupai re te bambiko si Yekova akedi ko kono tipaha te. Yekova akedi ko kono ko ye ka manga gupai si adu nga Tita Dee nika mangaha, nga ga Mbori mbedimbedi boro. Gipai re akodi gupai nga ko fu ungako nimotumo. (Oni gedi Yesaya 53:​5, 6, 12.) Yesu aaziongo bapatiza na kina gu ndupai nasa rani ani zi bapatiza te. Gako bapatiza aadunga na kparatise fu Yekova rogoho te, bambiko ko angia papara gu rikaaboro naima kparatiyo fu Yekova, nangia aYisaraere. Ono gako bapatiza ayugu gupai nga ko afutiko ka manga gupai Mbori akpinyemuhe a wa i aima gumbaha tipa ko.

10. Gini asunge nadu kurii Yesu Masiya, na wai ko abi agu asunge re?

¹⁰ Ga Yekova ringbisapai tipa Yesu akodi gupai nga, ko tungusi gu wene pangbanga nga ga ga Mbori Kindo, kini sa aboro ni abawiriki, na ki mbakadiyo tipa sunge sa aboro ní abawiriki. Pa fu Yesu tiko fu Mbori ayugu gupai a nga ko ima ida ka hi arungosi na ki kpi gbegberẽ kpio tipa ka songoda ga Mbori bakere pagbia. Wa Yesu aduna nyemu Bako, ko aduna ngbarago ka manga gupai Bako akpinyemuhe na ka fu tiko nimotumo. (Yo. 14:31) Ko adu na ngbarago a wa ko aini gupai nga ko nika fu ungako nimotumo fu Mbori tipa ka ngbe rani be ingapai na kpio. Ya mo Mbori aidi na Yesu ho ko afutiko ni ka manga gi bakere asunge re? Ii.

11. Wai Yekova ayugu gupai nga ko aima ida na Yesu nigu Masiya i agumba pako?

¹¹ Agu abake aKitabu Wene Pangbanga nadu biama nga Matayo, Marako, Ruka, na Yoane agumba gupai ziazia namangi ho Yesu aguari ni ime yo nga gu nayugu gupai nga Yekova aima ida naako. Fugo Yoane Bafu Bapatiza nga: “Mi bi Toro ko nizorõ ngbangbaturũ yo wa mbipo; ko ki nye ri [Yesu] . . . Mi bi he, mi nga dezire ko a, ya Wiri Mbori nga ko.” (Yo. 1:32-34) Ti gu regbo re a, Yekova afura ki yaa: “Wire du re, nyemuko namanga re, ngba ko ti re gbe.”​—Mt. 3:17; Mk. 1:11; Ruka 3:22.

Ko Anye Niruruko Dati Kpio

12. Ginipai Yesu amangihe tipa agarã biata na beberehe fuo zioko bapatiza?

¹² Vuru agu agarã biata na beberehe Yesu arakihe fuo zioko bapatiza, ko afutiko sa sunge yugopai fu aboro tipa Bako na tipa paru gako bakere pagbia. Yesu anaambu ambu wa ko anaata rogo Ringara Mokido ninduko, ono he ho narengbe ka rugusa ko ti manga dezirepai tipa rengo te. (Yo. 4:6, 34; 18:37) Yesu ayugupai fu aboro tipa ga Mbori Kindo. Wa Yesu ahusi aborokaza, ki rigi ndurumo aboro gomoro, na ki zingisi kangba aboro a bekpio, ko ayugukpia agu apai ga Mbori Kindo nika mangaha tipa aboro.​—Mt. 11:4, 5.

13. Ginipai Yesu ayuguhe nibipa kparakpee?

¹³ Kuba gupai nga Yesu nidi taarimo tipa tiko mbiko agu apai ko aayugoho na gu iiriwoapai ko aamangaha, ko amoi wene kpiapai nifuko taarimo fu kina Yekova. (Yo. 5:19; 11:41-44) Yesu ayugu agu apai a nyakipaha gbe si aida ani kpari tipaha. Si naida gaani akpee duna gupai rogoho nga rimo Mbori nga Yekova du ‘niʹirisiirisihe’ na ga Mbori ruru pagbia diba gu gbegberẽ zogarago nga ga Satana tipa gupai Mbori “akpi nyemu he” mangi auru kpotosende “wa du he ngbangbaturũ yo.” (Mt. 6:9, 10) Yesu ayawee ani nimangipai ringbisihe kuti gu kpee re ‘nigbata ani ga Mbori ngbii mbata na gako rurupai.’​—Mt. 6:33.

14. Wa Yesu avurangia rengberengbe boro, tipagine si aidi ti ni ko asaditiko aʹasada gbe ka manga gupai Mbori akpinyemuhe beko?

¹⁴ Ho regbo kpio Yesu aambeda ni, ko atona ka berã gbe kuriipa gu bakere sunge nadu kuriko. Pa hi Yesu arungosi na ki kpi iigira kpio asa gupai nga rimo Yekova du nitaasitaasihe na gupai ko akpinyemuhe mangi. Arame bisue mbata fu kpi Yesu, ko akpari ki yaa: “Mbisimore narungo arungo awere; mi aya wãi? ‘Buba, mo bátasi re ti gi rago re.’ A si mi aye sa ni kuti gi rago re.” Fuo gumbako gipai re, ko atona ka berã gbe tipa gupai paha anyaki gbe, ki kpari ki yaa: “Buba, mo táasi rimoro.” Yekova akaragapai fuko nibasa ki yaa: “Mi taasi he, mi atáasa ha ataasa berewe a.” (Yo. 12:27, 28) Nirengo, Yesu aima ida ka gbia gu kere asada kura boro aagbianga ha ya. Na ho ko agi gu Fugo Bako ni re, si aima fu gu kido fuko nga ko nikadu adu na diabese ki kiisipa ga Bako bakere pagbia. Na ko aima duna diabese nirengo!

Gupai Kpio Yesu Anyasihe

15. Ho Yesu ambedi ni ka kpi, tipagine ko aya ti ni wee: “Si nyasi”?

¹⁵ Ho Yesu ambedi ni ka gbe yangara ongako ti gu ngbunduru ngua i akenge ko kuti ni, ko ayaa: “Si nyasi.” (Yo. 19:30) Yesu amangi bakere apai ki nyasihe nigu undohe nga ga Mbori vuru agu agarã biata na beberehe ko adihe kutingba gako sunge fuo zioko bapatiza. Ho Yesu akpi ni, bakere bazigizo amangi, si ki sa gu ga aRomo barukurii aborovura naangerakurii pa imoko ko yaa: “Wiri Mbori nga ko ni rengo.” (Mt. 27:54) Gu barukurii aborovura re aima bi Yesu aboro nisawia ko mbiko ko aya Wiri Mbori nga ko. Wa Yesu avura gbia tiko na dungu kere arungosi, ko aka kindi kuti rurupai na ki yugu Satana nigbegberẽ iraziree. Satana afura tipa agu aboro dunduko nasongoda ga Mbori bakere pagbia ki yaa: “Agu ahe dunduko du be boro ni afu kina ha tipa ungani.” (Eyo. 2:4) Pa nye Yesu niruruko ayugu gupai nga Adamu na Eva arengbe arengba ka nye niruruyo ka i atinga gu wiri tooni asada naye fuyó ya. Ono gu bakerepai ga Yesu raka na kpioko amangihe nga, si akiisipa ga Yekova bakere pagbia. (Oni gedi Asanza 27:11.) Ya mo kurapai ho kpio Yesu namangihe? Ii, kurapai kinaho!

16, 17. Wai Yekova afu mosoro fu Wiriko, na ginipai Bairarani nga Yesu Kristo amangaha kindi?

¹⁶ Badungu ga Yekova amoyambu naraki mbata fu ye Yesu ku sende no. I adu niruruyo bangiri Mbori, Ko ki fu maabangirise fuyó tipa zingabekpio. (Yes. 25:8; Dan. 12:13) Ono riimburu ginipai ziazia Mbori nga Yekova narengbe ka fu maku fu kpakpa aboro i raki nyeanye kindi? Ziazia Kekeapai nagumbaha furani niyaa: “[Yesu Kristo] Mbori amoi ko ko du ni motumo ga aboro ingaapai, wa i naida pa kureko. Rogo gere, Mbori ayugu waĩ ko nasa aboro ni ruru yo, wa ko ambu gu gbegberẽpai i anamanga mbata mbiko gako hipai. Si nayugo ho wa du rago re ya Mbori tigako du ni ruru ko, ko nadia pai ri agu yo idi pa Yesu.”​—Rom. 3:25, 26.

¹⁷ Yekova afu maku fu Yesu nizingisa Ko ko bekpio ki moiko rogo gu bangiriba kiipaha kisusi gu ko adu rogoho mbata fu ye ko ku sende no. Yesu naraka awere nigu maraika kaa kpingo ya. (Eb. 1:3) Wadu Yesu Kristo ni Gbiamotumo na ni Bakindo, ko naundo apefuoko kindi i naakiiso ga Mbori rurupai. Ani na bakere tambuahe tipa gupai nga gu Barani du ngbangbaturũ yo nga Yekova, ko nafu mosoro afu fu agu aboro nakiiso gako rurupai na kini mangisunge fuko a wa Wiriko amangihe!​—Oni gedi Atambuahe 34:3; AEbere 11:6.

18. Ginipai ani ka inoho rogo gu kekeapai ngbe fuo gere?

¹⁸ Gu ruru aboro naraki kusayo tona ti Ebere aduna dawedawe pagume dagbayó na Yekova bambiko i adu na idapase kutiko na kidu naa kido nga gu Tita Dee ko agumba pani nikaye aye. Yekova aima ino ya Wiriko nika ka aka kuti rurupai na kpioko nika dia “gu ingapai nga ga zegino ku sa yo.” (Yo. 1:29) Kpio Yesu nafu undo afu a fu agu aboro naraka awere. (Rom. 3:26) Ono gini amaku rengbe ga Kristo motumo ka fuhe furoni awere? Ani ka inopa agi amaku re rogo gu kekeapai ngbe fuo gere.

[Gu rukutu kekeapai du bandu kpewaraga yo]

[Gu kpiahe du ti kpewaraga 15]

Oni ini gupai Yesu azi bapatiza ti ni?

[Gu kpiahe du ti kpewaraga 17]

Gaoni Karagapai Nga Gine?

• Wai i atikango kuti ga Mbori rurupai?

• Tipagine Yesu azi bapatiza ti ni?

• Ginipai kpio Yesu amangihe?