Agedi Gaani Awaraga Nasanahe . . .

Wari du gu Paradiso ni Ziazia Kekeapai Agumbapaha?

▪ Yesu akido gu iradĩ i ahasi yó naako nadu na ngara ki yugu gako idapase kutiko nga: “Ani adú na mo Paradiso yo.” (Ruka 23:40-44) Wari gu Paradiso i akido gu kumba re tipaha adu ni? Ya mo Paradiso adu ngbangbaturũ yo, auru kpotosende, watadu rogo gu kura ba i asapangbanga aboro rogo yo?

Atitarani araki bambata kusayo Paradiso yo. Ziazia Kekeapai nayaa: “Yekova Mbori ki moi ati ku uroyo Edene yo; ko ki moi gu kumba koyo ko amangi ko. Yekova Mbori ki di gu kumba re ki moi ko ku ati Edene yo ko nisópo ho ki nibanda ha.” (Bambata Pai 2:8, 15) Ho i asa agi afugo re ni kurogo pa-Giriki, gu fugo nga “ati” i asaha nga pa·raʹdei·sos, nga gu gu fugo nga “Paradiso” aye ti ni.

A wa arogotise nitona kaa kiiso kporo watadu kaa dudua abambu ho agude naatona kaa nge ni, kinawo a si aidi bambata avungurani kiisi Paradiso ki susi gu ngbanda nga ga Edene, ho ka agude ange ni. Mbori aya fuyó wee: “Oni zúga azuga, ki nge ange, ki hisi kpotosende berewe ki zogo ho.”—Bambata Pai 1:28.

Ga Bakusirani ringbisapai adu tipa aboro nga, i niiraki kini vungu agude Paradiso yo auru kpotosende herẽ. Ka i araki nyeanye kindi Edene yo auru kpotosende zanga kpio. Ka kpotosende ada ninyenye kporo watadu wene ba fu aboro dunduko. Si ziazia tie nga, agu ahe du auru kpotosende nafu bakere ngbarago afu furani! Mbori akusi rani ani raki auru bawene kpotosende.

Ya mo ga Mbori ringbisipai ariatihe? Oó. Yekova nakido rani nga: “Wo gimi apai nga gu nakura ngbare yo; si akáraga nga tihe fere gbua te, ono si anyása gu pai ngba ti re.” (Yesaya 55:11) Agarã ima susa susi wa 3,000 kusayo tingbafuo Mbori kusi aboro, na Ziazia Kekeapai naya tipa Bakusiahe wee: “Ko nambakadi kpotosende ki mangi he” na “ko amanga nga ha ni kungba he te,” ono “ko ambakadi he aboro niraki rogo ho.” (Yesaya 45:18) Ga Mbori mbakadapai arianga tihe te. Kpotosende nika satihe asa ni Paradiso.

Si nipa ngbarago nga badungu agu apangbanga du rogo Ziazia Kekeapai nagumbapa Paradiso nga si nikadu kina auru kpotosende. Nikpiapai, ga Yesaya sangbanebi nayaa: “I adúdua abambu ki niraki rogo; i arũka bakakue aati yo ki niri zuzuhe.” (Yesaya 65:21) Wari i naadua dua abambu ni, na kini rũku bakakue kini ri zuzuhe? Auru kpotosende du agi apai re naamanga ni. Asanza 2:21 nayawee: “Ruru aboro aráka zegino, airarengo ki nye rogo ho.”

Zavura Yesu ko aima fura a tipa gu Paradiso nga ga kpotosende. Nirengo, ko aima kido pa gu Paradiso nga ga ngbangbaturũ a, ono si adu tipa siasia aboro niumba yó. (Ruka 12:32) Tingbafuo kpio agi aboro re, i nazingisa yó bekpio i ga ku ngbangbaturũ yo ka zogarago na Yesu ku auru Paradiso kpotosende herẽ. (Yugoti 5:10; 14:1-3) Agi aboro duna maabangirise ka zogarago na Yesu re, gayó sunge nika ngia ka zogarago ku aʹuru kpotosende no na kini bi gupai nga apai namanga rogo Paradiso nga ga kpotosende kina kuti ga Mbori mbakadapai.

Yesu aima ino nga si nangia gupai Mbori akpinyemuhe tipa kpotosende. Nirengo, Yesu adu kina ngbangbaturũ yo ho Bako ambakadi gu ati ni nangia ga Edene. Ngbadimo nizazaha tipa raka rogo gu Paradiso nga ga kpotosende fu agu aboro nayugo gayó idapase areme. (Yoane 3:16) Ga Yesu kidohe fu agu aboro nayugo gayó idapase nga: ‘Ani adú na oni Paradiso yo.’—Ruka 23:43.

[Gu kpiahe du ti kpewaraga 10]

© FORGET Patrick/SAGAPHOTO.COM/Alamy