Wai si Aida I Yugupai fu Agude Tipa Mbori Gini Apai Rengbe Ka Undo Avunguagude I Yugupai Fu Awiriyo Wenengai?

“Agi apai re, nga gu mi aruga roni kuti ni areme, si du ku kpotoroni yo; oni ki niyugu he fu awironi sirisiri, ki nipeke pa ha fu yo ho oni ka nisungu ni rogo gaoni bambu, ho oni ka nita ni gene a, ho oni ka nipi ni sande a, na ho oni ka niguari ni ku ari a.”​—PA FU RUGUTE NI UE HE 6:6, 7.

Avunguagude rengbe ka bi tiyo ti kura aregbo nga gu tindiro nga ga raba awiriyo ima fu rii ome yó. Ka si du nga i sana aboro watadu i gbata aberãpai tipa wai rengbeyo ka raba awiriyo, i rengbe ka gbiatiyo na badungu arugute nga gu nika vundo yó berewe nibakerehe gbe ka i ainongo gu ka i mangisunge nani ya. Agumeyo gbiati abakureayo rengbe ka fu aberãpai fuyo tipa wai si aida i raba awiriyo. Amagazini, abuku, gbiati agu apai du rogo Internet na badungu arugute rogoho nga gu natagbaga tihe atagbaga ti kura aregbo.

Ono tipa Ziazia Kekeapai tigaha, si agumbanga kina gupai gbua si aida avunguagude yuguhe fu awiriyo te, ono si nafu rugute a tipa wai si aida i yugupai fu awiriyo. A wa ke yó ho rogo gu veresi du kuari ti tonatona gi kekeapai re, si naida avunguagude nigbata gene naaʹuru dunduko tipa kaa yugopai fu awiriyo tipa Mbori. Aberãpai gu tangarayo ho biama kusende re nga gu du mburuhe rii Ziazia Kekeapai nga gu naima undo badungu avunguagude tipa i yugupai fu awiriyo tipa Mbori.

1. Oni mangisunge na agu ahe Mbori akusihe tipa ka yugopai fu awironi tipa Mbori. Gu mokedi nangia Pauro akepai ki yaa: “Bambiko gu gako [Mbori] apai ka i abi nga ya nga gako nyenye tandu na sino Mbori i nabi he abi ziazia, tona kina ho rago aenge ni. I nabi he kina rogo agu ahe yo ko amangi.” (ARomo 1:20) Avunguagude ima rengba ka undo awiriyo i bi Mbori nigu Boro rengbeyo arengba ka zio bakure naako nimangayo sunge na agu ahe ko akusihe tipa ka undo awiriyo i ini asinoko.

Gi ngbatunga birĩ yugopai re du Yesu amangisunge nani ho ko anaayugopai ni fu gako abawiriki. Nikpiapai, ko aya fuyo wee: “Oni bi azire ari yo, ami aru nga ahe te, ami ake nga ahe a te, ka ami aiga nga ahe ku rogo agbamu yo ya; Baroni du ngbangbaturũ yo nariga ra. Genoroni asusa nga genora te?” (Matayo 6:26) Yesu asayo ane i bi gupai nga Yekova nga Mbori nyemuse na nunga. Ono Yesu aima undoyo i ini gu kurapai berewe. Ko aundo yó i berẽkurii wai Yekova ayugu agu asinoko re fu awiriko.

Bakindo Soromo afura tipa gu tatamana Mbori afuhe fu angbari na ki yugu gupai rengbe ani ka wirikaha ti ra. Ko ayaa: “Ako iranyomoro, mo ndu koyo du angbari ni; mo berẽ pa gaami mangaapai ka du ni iratatamana. Nga agu ra adu nga gbia ku ri ra ya, babiapai watadu barugupai a te. Ami nambakada gaami riahe kita, ki nidungura gaami riahe ti regbo ke ahe.” (Asanza 6:6-8) Nairiwo gu bawene gene ko ayugu gupai ngbaha nga si naida ani moi agu asásá daada na ki mangisunge na gu tandu Mbori afuhe furani tipa ka da ti gu gaani asásá re!

Avunguagude rengbe ka wirika gu wene gene yugopai nangia ga Yesu gbiati Soromo ka i mangi agi apai du kusende re: (1) Ka i sana awiriyo i yugu agu angua gbiati anya ngbatiyo. (2) Ka i wirikapai naayo tipa agu anya gbiati angua re. (3) Na ka i yugu agu apai rengbeyo ka wirikaha ti gu kusikusi ahe re fu awiriyo.

2. Oni wiriki gu sino Yesu adu nani koyo du agu aboro ni ko anaayugopai fuyo. Dagba agu aboro dunduko nga aguyo naraki, kina Yesu sa nga gu boro naadu na nyanyakipa apai ngbako ka gumbaha. Ono tie, ko anaadia bakere regbo kaa sasana aboro na asanahe. Ko aduna nyemu ka ino agu aberãpai naadu rii agu aboro yo ko aayugopai fuyo. (Matayo 17:24, 25; Marako 8:27-29) Teketeke a, avunguagude na dungu apai ngbayo si aida i yuguhe fu awiriyo. Ono tie, tipa i du niwene abayugupai, si naida i wiriki Yesu nimbu yó regbo fu awiriyo tipa i gumba agu abipai du yó nani.

Ginipai ka mangi ka si du nga agude namangapai niirairaha na si kini di yó na gbanga regbo tipa i wirikipai? Oni makianga pa wai Yesu anaayugopai fu gako abawiriki. Kura aregbo kinaho i anaapaya dagbayo nikerehe na i adu ni agu aboro si anaadia yó na gbanga regbo tipa i wirikipai. Ono wa si avura duwo, Yesu adu kindi na zerangbaduse na kini gumba gupai fuyo dedede nga si naida i du na umbasitise. (Marako 9:33, 34; Ruka 9:46-48; 22:24, 25) Agu avunguagude nawirika Yesu, i naruga awiriyo na zerangbaduse, na ka si du nga awiriyo ni agu agude si adia yó na gbanga regbo tipa i gi rogopai yo, i nadogoda gupai ngaha daho agu agude re nika giarogoyo ni.a

3. Oni yugupai na kpiapai. Si naida avunguagude mangisunge na gu rugute Pauro afuhe fu agu awirina naadu Roma yo. Ko aya fuyo wee: ‘Si du wa mo niyugupai fu kura boro, mo nayugo nga pai fu tiro te? Wa mo nitungusi pai fu boro ya ka ni dĩ nga he ya, mo nadĩ he?’​—ARomo 2:21.

Gu rugute du rogo gu veresi du kuari re na nyanyakipaha gbe bambiko agude nagbe berãyo gbe kuti gupai i abi avunguyo i nimangihe susi gu avunguyo agumbaha. Ka avunguagude amanga gupai i ayugoho fu awiriyo, si nika sa awiriyo i mangihe a.

4. Oni tona yugopai fu gude mburu kindi tooni. Rogo gu dagbarago Timoteo nangia ga Pauro badia sunge amokedi araki rogoho mbuko tooni, aboro agumba rurupai tipa ko. (Amokedi 16:1, 2) Gupai sa dagba akuraha nga gu nasa gupai nga i gumba rurupai tipa ko nga mbuko kindi “ni gude,” i atona kaa yugo “Ziazia Kekeapai” fuko. Navungu Timoteo gbiati titako aundongo ko gbua ko gedi Ziazia Kekeapai te, ono i anaaundo ko a ko niberẽkurii agu apai ko anaagedaha rogo Ziazia Kekeapai.​—2 Timoteo 1:5; 3:14, 15.

Wari gu Rengbe Oni ka Gbia Undo Ni?

ADezire Yekova nakusa badungu awaraga nga gu i ambakadaha tipa si undo avunguagude i yugu rengo fu awiriyo tipa Mbori. I nakusa agu akuraha nzunzu tipa kina agude. Agu akuraha i akusaha tipa si undo avunguagude na agu awiriyo naima sono tipa i ini wai ka banda gayo fugodagbase wenengai.b

Rengo ngaha nga, mbata fu avunguagude yugupai fu awiriyo tipa Mbori, si naida i ini akaragapai kuti gu nyanyaki asanahe rengbe awiriyo ka sanaha. Nikpiapai, si naida oni ini karagapai aino kuti agu asanahe duwa: Ginipai Mbori ambugene ti ni fu gbegberẽ apai si naamanga? Ga Mbori ringbisapai tipa kpotosende nga gine? Wari du kpikpi aboro ni? ADezire Yekova nikadu na ngbarago ka undo roni oni gbia akaragapai kuti agu asanahe re na agu akuraha wa ka oni ruho na gaoni aborokporo dunduko ka mbeda na Mbori.​—Yakoba 4:8.

[Gu rukutu kekeapai du bandu kpewaraga yo]