Ya mo Si Naida Mo Naakparakpee?

Dungu aboro ninaasanahe niya, ‘Ka si du nga Mbori ima ino apai dunduko, kodihe na gimi aberã na gimi azingo, tipagine si aida mi kpari fuko ti ni?’ Wene sanahe du ngaha. Ati Yesu aya Mbori ima ‘ino agu apai zingoho amanga rani mbata fu ani sanako’? (Matayo 6:8) Bakindo Davide naraki bakuru kusayo aima ino gipai re a si du ko akepai ti ni ki ya: “Ako Yekova, mo ngére, mbata fu gumba mi pai ni mirãre, mo niima ina ha dunduko.” (Atambuahe 139:4) Ono tipagine si aida ti ni mo nikpari fu Mbori? Tipa ka karagapai sa gu sanahe re, ani bingo agu apai Ziazia Kekeapai apehe tipa agu akpee nga ga airisimbori.a

KPARAKPEE NAMBEDISA RANI NA MBORI

Wa Ziazia Kekeapai avura kaa ya wẽ Yekovab Mbori ima ino apai dunduko, si nayugo gupai ayugo a nga anga gupai du ko na nyemuhe gbua ka ino gu rengo du tipa airisiko te. (Atambuahe 139:6; ARomo 11:33) Ono ko na bakere nyemu ka ino agu apai du berãrani yo bambiko ko naida ani mbedi na ko gbe. (Atambuahe 139:23, 24; Yakoba 4:8) Si nga ndu gupai Yesu aya ti ni fu apefuoko wẽ i nikpari, si ki vura du vurũ nga Bako ima ino gayo azingo. (Matayo 6:6-8) Ho ani agumba agu apai ni du berãrani yo fu Bakusirani nga Yekova, ani nambeda na ko gbe.

Ti kura aregbo, si rengbe arengba ka du furani ni mbumbuhe ani ini gupai nzunzu si aida ani kpari tipaha. Ho duhe ni wa gure, Mbori rengbe arengba ka ino agu apai du tipa rani nga gu ani ainongo wai ka gumbaha fuko ya, na ko ki mangipai tipa gaani azingo. (ARomo 8:26, 27; AEfeso 3:20) Ho ani aye ka ino gupai ni nga Mbori ima undo rani, zavura ngba gu gene adunga adu ziazia ya, si nambedisa rani ambedisa na ko.

YA MO MBORI NAKARAGAPAI SA AKPEE DŨ?

Ziazia Kekeapai nagumba gu rengo furani nga, Mbori Du na Tanduapai Dũ nakaragapai akaraga sa agu akpee nga ga gako ruru amoyambu, na si nape gupai a nasa Mbori ka ko ginga gu kpee nga ga kura aboro ya. Ni kpiapai, ti gu regbo zuu amoipai ni kerehe rogo gu ringara Yisaraere naadu mbata, Mbori arugu gako nebi nangia Yesaya ko ya fu aboro: “Ho oni ka nikpári kpe ni ni dungu he, mi ayé nga ture sa ni te; beroni yo hi be kure.” (Yesaya 1:15) Sidu, agu aboro nasoga ga Mbori andiko watadu nakpara na gbegberẽ nduhe, si aidanga i moiberãyo nga Mbori nika gia gayo kpee agia te.​—Asanza 28:9; Yakoba 4:3.

Ono Ziazia Kekeapai nape gupai nga: “Ka ani ho gu he ku sangba gako nyemuhe yo, ko gi pa rani agia.” (1 Yoane 5:14) Ono ya mo gure nga Mbori nakaragapai nibasa kuti agu kpee dunduko nga ga airisiko? Anga wo duhe ti aregbo dũ te. Mo bingo gupai naadu tipa gu mokedi nangia Pauro, nazungodi Mbori bara biata ko di gu ‘kiwe naadu tii kpotokoyo.’ (2 AKorindo 12:7, 8) Si rengbe ka du nga kaza-bangirise du Pauro aambu behe. Gupai re aima fu rungo fuko. Mbori afu tandu fuko ko nihusi aborokaza na ki zingisi aboro a be kpio, ono ko aarengbanga ka husa tiko te. (Amokedi 19:11, 12; 20:9, 10) Wa vura duhe nga Mbori aakaraganga pai fuko ngba gu gene ko aaidaha te, ko aima dia ga Mbori undo na tambuahe.​—2 AKorindo 12:9, 10.

Kura aboro kinaho du payo rogo Ziazia Kekeapai nga aguyo Mbori aakaraganga pai kuti gayo akpee ngba iiriwo gene ya. (2 Abakindo 20:1-7) Na anga wo Mbori anaakaragapai ngba iiriwo gene gbe te. Kura aidipase kinaho rago agberẽ tiyo mbiko i abihe nga Mbori akaraganga pai kuti gayo akpee te. Bakindo Davide asana Yekova ki ya: “Ako Yekova, rago adú waĩ? Bangiro nigo ti re kindi?” (Atambuahe 13:1) Ono ho Davide atingidipa wai ni Yekova abatasi ko bara dunguhe, si anyakasi gako kido kuti ko. Rogo kina gu bangisa kpee re, Davide aya: “Mi akida kuti ga weneringise; kpotore yo adu pusiapusia rogo ga bata.” (Atambuahe 13:5) Wakina Davide, si naida agu airisimbori du areme kpatagara kuti kpee kindi daho i ka ino gupai ni nga Mbori ima karagapai kuti gayo kpee.​—ARomo 12:12.

WAI MBORI AKARAGAPAI KUTI AKPEE

Mbori nakaragapai akaraga sa gu ndikidi azingo du tirani.

Anga aregbo dunduko avunguagude naamanga agu apai awiriyo asanahe tipaha te. Wakina gure a, kura aregbo kinaho Mbori akaraganga pai sa gaani akpee ngba gu gene ani aidaha watadu ti gu regbo ani aidaha ti ni ya te. Ono si naida ani du na gu kido nga, Bakusirani naakaragapai akaraga kuti agu akpee ani amangaha nibi gu ndikidi azingo du tirani.​—Ruka 11:11-13.

Mbori nakaragapai ngba gu gene ani abingo ho ya.

Na ka si du nga ani nakpara tipa Mbori di gupai kusayo nafuda rani ono ka ko adianga ha kusayo ya, ya mo si naida ani kakuti gupai nga ko akaragapai wagu tooni te? Oó, ono si naida ani berẽ wenengai singia Mbori ima karagapai zanga ani inihe. Ni kpiapai, si rengbe ka du nga wene bakurearani aima fu undo furani ti kina boro wene regbo. (Asanza 17:17) Si rengbe arengba ka du nga Yekova du nafõngbadu gu bakurearani re ní undo rani. Kurigure, ga Mbori karagapai kuti gaani akpee rengbe arengba ka ye rogo Ziazia Kekeapai yo. Ani rengbe arengba ka gbia undo rogoho yo tipa ka mangapai sa gupai nafuda rani.​—2 Timoteo 3:16, 17.

Dedede, Mbori naadianga gu kpakaraapai kusayo nafuda rani te, ono ko nafu ome furani tipa ani hihe. (2 AKorindo 4:7) Ni kpiapai, ho Yesu azungodi Bako ni ko di gu kpakarapai kusayo ko adu rogoho mbiko ko abihe nga si rengbe arengba ka ye na gbarasarimo Mbori, Mbori akedi maraika ko ye ka nyakasa ko. (Ruka 22:42, 43) Wakina gure a, Mbori rengbe arengba ka mangasunge na wene bakurearani ní fu ngarasaro furani ho ani aidaha ni. (Asanza 12:25) Wa duhe nga ngbatunga gi karagapai kuti kpee re ziazia te, si naida ani ningere angera wenengai tipa agu agene Mbori akaragapai ngbaha kuti gaani akpee.

Mbori nakaragapai ti gu regbo ngba bangiriko.

Ziazia Kekeapai naya wẽ Mbori nainapai fu aboro umbasitise ‘ho ragoho arengba ni’ bangiriko. (1 Petero 5:6) Sidu tie, ka ani bi gupai nga si naima aima tipa Mbori akaragapai kuti gaani kpee, ka ani bingo ho nga ko aberãnga parani ya te. Ono tie, Yekova nawisigo gaani akpee na kini gbata gu regbo ngba angba tipa ka karagapai furani.

Mo bingo gi kpiapai re: Ani yanga mo na tooni wiro ti ni nasana ro mo ngbe ngbagida fu ru. Ya mo ka marã du bero mo ndu nibasa ka ngbe ngbagida? Ka mo bihe nga gu gude re ata danga ba ora na ngbagida te, mo rengbe ka gbiso pa ngbe ru agbiso ku mbatayo. Ono mo ki ngbe ru ho mo nika bihe ni nga wene regbo du tipa gu gude re tona ora na ngbagida. Wakina gure a, Mbori rengbe ka fu ‘agu ahe furani du nyemuhe kpotoraniyo’ ti wene regbo ka ani asanako kindi tipaha.​—Atambuahe 37:4.

YEKOVA NADEGATUKO ADEGA

Ziazia Kekeapai nazungodi ndikidi aKristano ka i mbunga kparakpee ya. Ono kura aboro rengbe ka ya, ‘Pehe ngba yo ipi ti mangimangihe.’ Rengo du tigu nga, ka si du nga pai kinaho nafuda rani kindi nga gu aidanga ka go ya, watadu boro namanga rani gbegberẽ, si rengbe arengba ka du furani ni mbumbupai ka sungudo ga Mbori karagapai. Ono si ni wenepai ani tingidi gupai Yesu apehe tipa kpatagara kuti kparakpee.

Yesu agumba sanza tipa gu rungorungo dekurugbo naadogoda fuo basapungbanga tipa ka gbia ruru sarangbanga. (Ruka 18:1-3) Wa gu basapungbanga re avura ká aká mbata ka undo ri, ko aru ki ya fu tiko: “Ka mi avura gunde nga ti Mbori, ki niberẽ pa aboro ya; were bambiko gi de re nadogosa re, mi nikakaraga pa vurari, si ngia ri nikaye kindi mi ki mbu be ri.” (Ruka 18:4, 5) Ka si du nga gbegberẽ basapungbanga naundo dekurugbo, angbatika Barani nga Mbori tigako, ko akaraganga pai fu agu aboro “nakpara fu ko na uru na yuru” te?c A wa Yesu ­agumbaha, Mbori nika ‘karagapai ni ngarã.’​—Ruka 18:6-8.

Wa vura duhe nga kura aregbo kinaho rengbe omerani ka bata be sanahe tipa undo, si aidanga ani mbuhe te. Ho ani akpatagara ni kuti kparakpee, ani nayugo gupai nga ani na ndikidi nyemu gupai nga Mbori undo rani. Ani nawirika wai a ka ino wai Mbori akaragapai kuti gaani akpee na gipai re kini mbedisi rani na ko gbe. Nirengo, si naida ani du na gu kido nga, Yekova nika karagapai akaraga sa gu wene akpee ani afuhe ni idapase.​—Ruka 11:9