Ani du ni Kodikodi Rani Rogo Gi Zegino Re

1, 2. Ginipai Mbori aidaha tipa airisiko nga paranga aboro na sosono yo?

YA MO paranga boro nga mo? Kangia wo du, mo du na kido nga, wa du mo rogo ga Yekova riigbu, mo na kikiipa ro. Rogo dungu aringara, dungu agu aboro nazio bapatiza nga paranga aboro. Nairiwo gu ngbarago du ani na ni ka bi wai dungu paranga aboro akodatiyo na agu aboro diberã ka mangasunge fu Yekova!

² Wa du mo nga paranga, ya mo rago naangba tiro kadu dagba paranga akuaro? Si nawira wa mo nidu adu na ngbarago. Ani nidu na ngbarago ho ani sungo ni na agu aboro du garãyo wa gaani. Ono tie, singia paranga boro nga mo watadu sosono boro, ka apai vura du tipa ro wai, gupai si aida mo inihe nga Mbori naida ani kodi tirani na airisoko. Gu mokedi nangia Pauro akepai nga Mbori nakpinyemu gupai nga “aboro bati dunduko, ki ye sa gu inahe nga ga rengo.” (1 Tim. 2:3, 4) Rogo Yugoti 7:9, si nasakapai tipa agu airisimbori ye “dagba rika aboro dunduko, na angbatunga yo, na aboro, na angbatunga afugo dunduko.”

3, 4. (a) Gini sino du areme ti paranga aboro? (b) Gini bipai nandu sa na AEfeso 4:25?

³ Nairiwo gu kparakparapai du dagba agu airisi Yekova nga paranga aboro ti gu paranga aboro nga ga zegino yo! Dungu agu aboro airisongo Yekova ya naraka gu raka nga ga gbangbati, kaa manga kina agu apai ngbatiyo. Bete abawetekepai nayamba yo nga “Aparanga gi Garã.” Gu gene i afura ngbaha na i avoda tiyo ngbaha, si nayugoho nga sunge ti sosono aboro te mbiko i namanga “agu apai garãha naima susa.”

⁴ Gere nga gupai ani abihe abi si nimangi. Rogo gi gene re, si ni kpakarapai fu gu paranga aboro nairiso Yekova i ne gi sino re watadu ka du na ga Mbori bipai. Zavura rogo bambata sa kama agarã, Pauro azungodi akurako aidipase i ne “gu toro namanga pai awere rogo agu awiri yo nakeretu” i ‘anaata rogoho mbata.’ (Oni gedi AEfeso 2:1-3.) Si naida ani tambua gu paranga aboro bihe nga si naida i ne gu ngbatunga toro re ka mangasunge sa na awirinayo. Ngbatunga gu bipai re na ngbanya na gupai Pauro apehe nga “ani nga apa akuarani.” (Ef. 4:25) Wa ani ambeda kuti digido gi zegino re, pa mangasunge na awirinarani wa sa nika nyaka kisusi gu nidu mbata. Ani wisigingo pai tipa bete akpiapai nga ga Ziazia Kekeapai rengbe ka undo rani ani zi tirani kuti akuarani.

I ADU NI KODIKODI YO

5, 6. Gini kpiapai nga ga kodatise du rogo gu pangbanga du tipa Roto na awiriko?

⁵ Mbata kusayo, Yekova anidu na ngbarago tipa ka banda gako aboro ho i anaakodatiyo ni ka undo akurayo ti regbo fudifudiapai. Gu ga Mbori amoyambu du ti gi gaani regbo re nga aparanga na sosono yo ima rengba ka wirikapai ti agu akpiapai nga ga Ziazia Kekeapai re. Kpiapai sa dagba agi akpiapai re nga ga Roto.

⁶ Roto na gako aborokporo adu rogo kerepai mbiko Mbori aaida ka gbarasa gu gbata i aaraka rogoho nangia Sodomo. Ga Mbori maraika aya fu Roto ko guari ki ndu kurii abaagangara tipa ka bata niya: ‘Mo óro ka batasa ungaro.’ (Bam. P. 19:12-22) Roto agisangba yo, na awiriko ue nga adegude ki gi gupai ko apehe na ki guari rogo gu gbata re. Si nafu kina gberãrago nga gayo mbembedi aboro aabatanga te. Agu aparanga napazua awiriko aabihe nga gu gbinza bakumba re “nananga yo ananga.” Gipai re asa gupai nga i kpi. (Bam. P. 19:14) Kina Roto na awiriko naadu ni kodikodi yo naabati.

7. Wai Yekova aundo agu aboro naadu ni kodikodi yo ti gu regbo aYisaraere akuru Ezipeta yo?

⁷ Ani bingo gu kura kpiapai. Ho aYisaraere akuru ni Ezipeta yo, i akuranga ni kparakakparaka yo nga boro na boro nindu ngba gani gene te. Na ho Moize ‘ataĩ beko kurii baime’ ni na Yekova ki kparakaha, ko aasinga nisako watadu na kina bete aYisaraere fuoko te. Mbiko ga Yekova bandahe, i dunduko naasi. (Gate 14:21, 22, 29, 30) I adu ni kodikodi yo, na “bakere rimbasa kungba aboro” adu dagbayo nakuru na yo nga agu aboro naangianga aYisaraere ya. (Gate 12:38) Boro ho watadu badona ho nga ga paranga aboro naabihe nga si naida i ndu ngba gu gene naangba tiyo watadu gu i bihe ni wenehe te. Ya mo ka si aru fuyo ka i amangipai wa gure na ki zanga ga Yekova bandahe?​—1 Kor. 10:1.

8. Ti rago Yosefata, wai ga Mbori aboro ayugu gayo kodatise?

⁸ Ti rago Bakindo Yosefata, avura ga Mbori aboro aye ka zubo yo, i angia gu “bakere rimbasa aboro” naadu patiyo kirikiri. (2 Peka 20:1, 2) Gu wenepai namangi nga ga Mbori aboro aˈasadanga ka diabe agi avurayo re ngba gayo ome te. I angere ku be Yekova. (Oni gedi 2 Pekapai 20:3, 4.) Aboro ni basasa aamanganga pai wa gu i akpinyemuhe te. Ziazia Kekeapai naya: “AYudo ki ru dunduko ku bara bangiri Yekova, na gayo rukutu agude na adiayo, na awiriyo.” (2 Peka 20:13) Singia paranga aboro na sosono yo, i dunduko namangipai kina sa tipa ka pekafuo ga Yekova rugute, na ko aima bandayo be avurayo. (2 Peka 20:20-27) Anga gipai re nga wene kpiapai furani tipa wai si aida ani du ni kodikodi rani ti regbo akpakarapai te?

9. Ginipai ani awirikaha ti wai agu aKristano naadu mbata adu ni kodikodi yo na gu bipai i adu na ni?

⁹ Aboro aima ino agu aKristano naadu mbata nga i anaamangapai na kodatise. Ni kpiapai, fuo dungu aYudo na agu boro nasatiyo ku rogo pambori nga ga aYudo da ni aKristano, i “anye rogo ga amokedi yugopai yo na gayo ngbanya nyanyaki nikuadi kpokuta nikpari kpe.” (Amo. 2:42) Gi gayo kodatise re adu ni yuguyuguhe ti regbo rungosiro, nga gu regbo nzunzu i aaida i ningarasi tiyo dagbatiyo. (Amo. 4:23, 24) Ya mo oni idi kuti gupai nga ti regbo akpakarapai si naida ani nimangipai kina sa?

ANI DU NI KODIKODI RANI WA GA YEKOVA URU AMBEDA

10. Gini regbo kodatise nika du na nyanyakipa ha?

¹⁰ Barambeda, ani nika gbiatirani na gu kere regbo naamanganga mbata ya. Gu nebi nangia Yoere aya si “nga rago bitimo nga rago du iyo.” (Yoe. 2:1, 2; Zef. 1:14) Tipa ga Mbori aboro, si nika ngia regbo kodatise. Ani tingidi gu fugo Yesu naya: “Gu ngbi dunduko du ni kparakpara ha ni sa ha si apáya apaya.”​—Mt. 12:25.

11. Ginipai i naringbisihe du rogo Atambuahe 122:3, 4 nga gu rengbe kadu tipa ga Mbori aboro areme? (Oni bi gu sura du ti tonatonaha.)

¹¹ Ti regbo gu kereapai nika amanga rogo gi zegino re, si aida ani du ni kodikodi rani. Gu kodatise nga ga toro si nika ida si du dagbarani, ani rengbe ka ringbisaha kuti wai abambu adu ni kpamiakpamia rogo gu Yerusarema naadu mbata. I adudua agu abambu re mbembedi na akuraha si ki sa bake papara Atambuahe ko ya tipa Yerusarema wẽ si nga “gu bakporo kpamia tihe rogo ho sa.” Gipai re aundo agu aboro naaraka yo i niundo akurayo na kini bandayo. Kurigure, paduhe mbembedi na akuraha nayugo gu kodatise nga ga toro naadu dagba gu rikaaboro ho i adu ni ni gu “ngbatunga aboro nga ga Yekova yo” nadunguratiyo ka irisoko. (Oni gedi Atambuahe 122:3, 4.) Si naida ani du ni ‘kpamiakpamia’ rani tona kina awere daho gu kere regbo du ku mbatayo re kada ni.

12. Ginihe nika undo rani ani bati be gu zubohe nika gbia ga Mbori aboro?

¹² Tipagine si nika du ti ni nyanyakipa pai ani du ni ‘kpamiakpamia’ rani ti gu regbo re? Yezekere kapita 38 nape sangbanebi du tipa wai “Gogo ni du rogo gu ringara nga ga Magogo” nika zubo ga Mbori aboro. Si aidanga ani mbu apai ti giu regbo re si kparaka rani te. Nirengo, ndupai adu nga ho ani gbata undo be zegino ti gu regbo re te. Kuba gure, si nika ida ani du ni mbembedi na awirinarani. Rengo ngaha nga, ani abatanga kango gupai gbua nga ani rogo gu badona re te. Yekova na Wiriko nika manga ome ka batasa agu aboro nika yamba rimoko ti gu kere regbo re. (Yoe. 2:32; Mt. 28:20) Wa vura duhe wo, ya mo ani rengbe ka ya agu aboro akodanga tiyo na ga Mbori akandoro watadu kparatiyo kusayo tiko nga i abatanga te?​—Mika 2:12.

13. Ginipai rengbe gu paranga aboro nagunde ti Mbori ka wirikaha be gupai ani nawisigihe re?

¹³ Ya mo mo nabihe ni patatamana ka zanga pekafuo gu paranga aboro nabihe nga si naida i nikoditiyo na kina agu akurayo namanga apai wa yo? Ani nambeda kuti gu regbo si nika ida ani du sa na akuarani, ani dunduko nga sosono aboro na paranga yo wa sa. Nirengo, gere nga regbo ani wirika ka mangaapai kina kubani sa, ka sonosa gu kodatise nika du na nyanyakipa ha ti gu regbo re.

“ANI NI BA SA SA NGA APA AKUARANI”

14, 15. (a) Ginipai Yekova araba sosono aboro na paranga yo tipaha areme? (b) Gini rugute Yekova afuhe furani tipa ani du ni kodikodi rani?

¹⁴ Yekova naundo rani tipa ani “nimangi pako kina ku bani sa.” (Zef. 3:8, 9) Ko naraba rani ani rẽ tipa gako nyenye ringbisapai. Si nakoda gine? Ko naida “ka pora ahe apora sa dunduko kina ku rogo Kristo yo.” (Oni gedi AEfeso 1:9, 10.) Nirengo, ko naida gako kusikusiahe dunduko du kina sa, na ko nika manga gipai re amanga. Ya mo gipai re aundonga ro nga paranga boro mo nimangipai kina sa na ga Yekova riigbu te?

¹⁵ Yekova nayugopai furani tipa ani du ni kodikodi rani awere, nga gu kodatise nika nyeanye kindi. Dedede, Ziazia Kekeapai naya ani du wa kpoto “banda tihe abanda dagba ha wa sa,” ani du na “gu nyemuse nga ga awirina,” ani ‘ngarasi tirani dagba rani,’ na ani ‘nyakasi tirani dagbarani.’ (1 Kor. 12:25; Rom. 12:10; 1 Tesa 4:18; 5:11) Yekova ima inoho nga aKristano nga kpakpa aboro, na si rengbe ka saha ni mbumbupai furani ani du ni kodikodi rani, sidu, si naida ani mangi ome nyanyaki ka ‘vú akuarani.’​—Ef. 4:32.

16, 17. (a) Ndu gu dunguratise nga ga aKristano nga gine? (b) Ginipai rengbe paranga aboro ka wirikaha be ga Yesu kpiapai?

¹⁶ Yekova nafu agu adunguratise nga ga aKristano furani tipa si kodi rani. Wo ani naageda gu ngarasaro du rogo AEbere 10:24, 25. Ndu gupai du adunguratise ti ni nga ka undo rani “ani bérẽ pa akuarani ka nyakasa yo kuti nyemuse na wene mangaapai.” Ono tie, adunguratise na nyanyakipa ha mbiko si naundo rani “ani rúgu akuarani aruga; ki nimangi he susi, wa bi oni he ya gu uru re si nambeda.”

¹⁷ Ho Yesu adu ni paranga, ko amoi wene kpiapai nga ga bi ngbatunga gu mbakadapai re na nyanyakipa ha. Ho garãko adu ni nga 12, ko adu na avunguko pati bakere dunguratise nga ga toro. Ti gu kura regbo sa, ko aingi be avunguko anginga mbiko ko andu ka ngimbaro na akurako ya. Kuba gure, aYosefa na Maria agbia ko ko nisakipai na abayugupai yekaru yo.​—Rk. 2:45-47.

18. Wai rengbe gaani kparakpee ka sarani ani du ni kodikodi rani na akuarani?

¹⁸ Kupati kpinyemu akuarani na ndu tipa adunguratise ka nyakasa gaani kodatise, si naida ani kpari tipa akuarani a. Ka ani asana Yekova tipa ko mangipai fu awirinarani, gure nikaa yugo gupai nga ani naberãpa yo aberã. Anga kina sosono aKristano sa rengbe ka manga gipai re te. Kangia paranga boro nga mo, ya mo mo naakpara tipa awirinamo rogo toro tipa ka nyakasa gamo pagume na yo? Manga mo ho wo nika yugo gupai nga mo aziongo tiro kuti gi zegino i nika gbarasa barambeda re te.

ANI YUGU GUPAI NGA “ANI NI BASASA NGA APA AKUARANI”

19-21. (a) Rogo gini gene ani ayugo gupai nga “ani ni ba sa sa nga apa akuarani”? Oni funga kpiapai. (b) Ginipai mo nawirikihe ti wai awirina aundo ti regbo agberango?

¹⁹ Ga Yekova aboro naraka ringbisihe kuti gu rugute du rogo ARomo 12:5 naya: “Ani ni basasa nga apa akuarani.” Ani naabi gipai re abi ti gu regbo gberãngo amanga. Rogo Bamburu 2011, bavugumo mai amangi Philippine yo rogo gu gbaria nga Mindanao. Rogo yuru sa, si agbarasipa akporo nga 4,000 kodihe na gu nga ga dungu awirinarani. Ono tie, be-basunge atingidi gupai nga “mbata fu agu ariigbu ninaafu undo da, awirinarani rogo gu kura aba aima tona keda undo fu awirinayo.”

²⁰ Wakina gure a, ho kere bazigizo amangi ni Japan yo, dungu awirinarani pa gayo ahe agberẽ. He ahenga be aguyo kandara sa te. Wirinarani nga Yoshiko gari kporo agbere, ri aaraka nga amairo 25 (akirometere 40) tuturũ ti Bambu Kindo. Ri aya: “Kusa, kina ngbarani nazere ka bi gupai nga fuo susa uru sa fuo manga bazigizo, gu babiapai ninaata ata na gu kura wirina aye ka ngera tirani.” Ri ape kurapai nga: “Ani adu na tambuahe ka bi wai i aangerafuo rani rogo toro yo vurube dungurati. Kurigure, i agamu aroko-zere, arakata, amangu, na aroko pigo furani.” Wirina sa du rogo gu rondo du tipa fu undo aya: “Awirina rogo apapara Japan dunduko naamangi pai kina kubani sa tipa ka undo awirinayo. Kura awirina aye kina boro Amerika yo tipa ka undo. Ho i asana aguyo ni tipa ndu gupai i naye gbanga nunguro ti ni wa gure, i aya, ‘Ani ni kodikodi rani na awirinarani Japan no, na i naida na undo.” Ya mo rago angbanga tironi tipa kadu rogo gu riigbu naberãpa gaha aboro nyanyaki te? Mo rengbe kadu na kido nga Yekova na ngbarago ka bi ngbatunga gu toro kodatise re.

²¹ Ka ani du na gu sino re tirani awere, si nika undo rani ho ani ka gbiatirani ni na fudifudiapai ku mbatayo, ka si vura du nga gene berani tipa ani ini gupai du tipa awirinarani rogo kura aringara te. Nirengo, gu sino re naraba rani awere tipa gu fudifudiapai si awira wa ani nika gbiatirani na ni rogo gi zegino re. Fumiko naadu dagba agu aboro kere bavugumo amangi yo Japan yo aya: “Digido gi zegino re ima mbeda. Si naida ani undo akuarani aidipase aundo a wa ani angera ku mbatayo tipa gu regbo agberango nika dunga ti ni berewe ya.”

22. Gini nyenye undo rengbe ka ye mbiko gu kodatise nga ga aKristano?

²² Gu paranga aboro na sosonoyo nawirika wai kadu ni kodikodi yo awere nambakada tiyo tipa ka bata ti digido gi zegino re. A wa si adu mbata, gaani Mbori nika batasa gako aboro abatasa. (Yes. 52:9, 10) Mo bihe nga mo nika duadu dagba agu aboro i nika batasa yo ka si du nga mo namanga ome tipa kadu dagba ga Mbori aboro du ni kodikodi yo. Gu kurapai rengbe ka undo ro nga du na tambuahe tipa agu ahe ani agbiaha. Gu kekeapai ngbefuo gere nika sakapai tipaha.