Oni Ini Gipai Re?

Ya mo si aruaru i yambu agu ababagiahe naana baga anya yekaru Yerusarema yo nga “abatuka”?

RINGBISIHE kuti gu pangbanga du rogo ga Matayo Kitabu Wene Pangbanga, “Yesu [arimi] ku rogo ga Mbori yekaru, ki bafu agu yo ku zegi yo dunduko nanababaga ahe na agu yo nanangbeka ahe yekaru yo, ki vavagadi ga abaundaamarã ambisa, na agu ambata nga ga agu yo nanababaga ambipo. Ko ki ya fu yo, ‘Si ni keke he ya, “I ayá ti gi bambu, bambu kparakpe”; ono oni sa ha ni yaro abatuka.’ ”​—Mt. 21:12, 13.

Gu kuru apangbanga nga ga aYudo nayugoho nga ababagiahe anaanze rii ngongo agu aboro naana ngbeka ahe beyo gbegberẽ ni geda yo geno ahe kina boro kuari gbe. Ni kpiapai, gu kekeapai nga Mishnah (Keritot 1:7) afura tipa gu regbo naadu ti bambata sa kama agarã yo Fuo Batikayo Kristo nga gu regbo geno agbungu ue tipa zo motumo agu kuti denario sa nga ga dahabu ru. Gure nangia gu marã agu aboro naawirikanga pai ya arengbe ka gbiaha ti mangayo sunge tipa aʹuru 25. Agbungu angia gu motumo Mbori aidipaha fu rungorungo aboro; ono tie, geno ra aima ye ka gu kuari ni kerehe. (Pa Mot. 1:​14; 5:7; 12:​6-8) Gu Bayugupai nangia Simeon Gamaliel azingi be gi mangaapai re, na ki zogosi bange agu amotumo si aaida aboro ni tumoho, gipai re ki sa geno agbungu ue si ti ni ipo bara kama kina wai si adu mbata.

Na ngbanya kuti agu apai ani nabihe kuari re, si aruaru Yesu yambu agu ababagiahe naadu yekaru yo nga “abatuka” mbiko i aanze ti vuro aboro na ki du na gbangbati.