Undo fu Aborokporo

1. Wai Rago Sabiti anaaundo aborokporo ti regbo awiri aYisaraere?

¹ Iriso Rago Sabiti angia wene mbakadapai be Yekova tipa ka undo aborokporo. Awiri aYisaraere ani ongodi ti gayó asunge na kidu na regbo beyo tipa ka berãkurii pa ga Yekova wene sino gbiati gu pagume nadu dagbayó na ko. Avunguagude anaamangasunge a na gu regbo re tipa ka rimiso agu andiko nga ga Yekova ku ngbadu awiriyo yo. (Pa Rug. 6:6, 7) Rago Sabiti anaafu momu fuyó naʹaposo dunduko tipa i naaberãkurii padu yó wenengai rogo toro yo.

2. Ginipai ndiko Rago Sabiti ayugoho furani tipa Yekova?

² Rengo ngaha nga, ti gi gaani regbo re, Yekova ayanga furani ani niirisi Rago Sabiti te. Ono tie, gu ndiko re nayugopai furani tipa gaani Mbori. Aregbo dunduko ko aida gako aboro naagbia wasa gbiati ngbarago rogo toro yo. (Yes. 48:17, 18) Areme, gene sa Yekova ayugo gu nyemupai du ko nani koyo du ani ni nga vurube Gu Irisombori Nga ga Aborokporo.

3. Ndu manga gu Irisombori nga ga Aborokporo nga gine?

³ Ndu Manga Gu Irisombori Nga ga Aborokporo Nga Gine? Rogo Ngi 2009, ani atona kaa manga Gu Wisigo Buku Nga ga Dungurati ti bangisa regbo na Gu Sukuru Nga ga Siokrasia gbiati Gu Dunguratise Nga ga Sunge. Ndu manga gi ariapai re angia ka fu momu fu aborokporo tipa i naanyakasa gayó pagume na Yekova ni siayo nyemu sa rogo aposo dunduko tipa gu Irisombori nga ga aborokporo. I angarasi aborokporo dunduko nga i mangisunge na gu regbo i anaadiaha mbata tipa gu wisigo buku nga ga dunguratise tipa kaa sakapai rogo Ziazia Kekeapai yo yee na gayó aborokporo gbe riipa agu apai si aidaha rogo gayó ramukporo.

4. Ya mo si nga aborokporo nimangi gu Irisombori Nga ga Aborokporo gbua tipa saa sa? Oni sakinga rogoyo.

⁴ Tipa kadu pati Gu Wisigo Buku Nga ga Dungurati, si anaadia rani na regbo tipa ka vo rokoo, ka ndu kubaha yo, gbiati kura apai. Tipa dungu rani, gu regbo ani anaadiaha tipa ka mbakadatirani anaasusa gu ndikidi regbo asusa ani anaadiaha kupati gu dunguratise nanaadia saa sa gbua re. Ono tie, na gu ariapai du awere tipa gu ringbisapai nga ga gaani dunguratise, ani namangasunge na gu regbo re awere tipa kaa iriso Yekova wa aborokporo. Sidu tie, si aidanga ani nimangi gaani Irisombori Nga ga Aborokporo gbua tipa saa sa te. Kuba gure, si naida ani berẽkurii pa agu arengba na azingo nga ga gaani aborokporo na ki sigira gu regbo ani ka diaha kutini rengbe arengba.

5. Ya mo si nga oni di gu regbo re dunduko kaa sakapai wa sa? Oni sakinga rogoyo.

⁵ Ya mo Si Nga Oni Di gu Regbo Re Dunduko Kaa Sakapai Wa sa? Ho arogotise watadu agu aborokporo du na agude beyo asaka agu apai ni du rogo Ziazia Kekeapai wa sa, i nangarasa tiyo dagbatiyo. (Rom. 1:12) Si nambedisa yó wa sa. Sidu tie, sakapai tipa agu apai nga ga Ziazia Kekeapai si aida si du ni meme papara Gu Irisombori Nga ga Aborokporo. Ono tie, aborokporo nibasasa rengbe arengba ka dia bete gu regbo re ka wisigopai nisayo. Nikpiapai, fuo saka yó pai dunduko wa sa, i rengbe ka sungo kina rogo gu ba yó re ono boro na boro kini wisigipai nisani, ní rengbe ka nyasa gani mbakadatise tipa dunguratise watadu ka geda amagazini. Gu kura aborokporo nadia berã ka zanga bi terevizioni ni gu nyemu re.

6. Wai gu rengbe oni ka manga gu sakapai re?

⁶ Wai gu Rengbe Oni Ka Mangaha? Anga si nga si du ti aregbo dunduko ni kina gu sakapai nga ga sanahe na karagapai te. Tipa ka sa gu Irisombori nga ga Aborokporo si du ni guhe nikadu adu na nyemuhe ti aborokporo, kura aboro sia gupai nga kaa mangaha wakina gu dunguratise ani naamangaha bebere poso. I nakparakaha kurogo dungu apaparaha na kini mangihe ngba dungu agene. Nikpiapai, i rengbe ka geda Ziazia Kekeapai wa sa, ka mbakadatiyo tipa papara dunguratise wa sa, na ki mbakaditiyo a tipa sunge tungusapai wa sa nimanga yó yugupai na kpiapai tipa wai ka tungusapai. Aberãpai tipa mangaha gu du ti kpewaraga 6.

7. Wai gu si aida avunguagude sa aborokporo i du ti regbo manga gu Irisombori Nga ga Aborokporo?

⁷ Wai gu Si Aida Avunguagude Sa Aborokporo I Du Ti Regboho? Gaoni aborokporo rengbe ka wirikapai wenengai gbe ka apai amanga rogo zereda na nyemuse. Kura aregbo kinaho rengbe oni arengba ka mangaha zegiyo ka rago duadu yo wenengai. Ka oni bihe nga si naida oni ru beberehe tipa ka ongoda, oni ruaru. Kura aborokporo nasia ka mbira wiri nzinziri ime tifuo mangayó gu Irisombori Nga ga Aborokporo. Wa vura duhe nga, si aidanga avunguagude mangisunge na gu regbo re tipa ka bira awiriyo watadu ka ruga yó te, i rengbe arengba ka dia bete regbo ka fura tipa gupai i nabihe nga si naida i fura afura tipaha. Ono tie, si adu niwenehe gbe ka i fura na agude tipa agu apai nabi yó ti kura regbo tipa ka zanga ba zee tiyo dagba awirinayo. Si aidanga gu Irisombori Nga ga Aborokporo du niba uguhe na niguhe aboro nika berã kina gupai nga si agumba nyasi areme te te, si naida aborokporo duadu na ngbarago wakina gu betedi Mbori ani airisoko.​—1 Tim. 1:11.

8, 9. Gini ngbatunga mbakadatise si aida abariikporo mangihe?

⁸ Wai gu Rengbe Bariikporo ka Mbakada Tiní? Aborokporo nika gbia undo gbe ka bariikporo mbakadi tiní mbata fu regbo tipa gu Irisombori Nga ga Aborokporo ki mbakadi gupai i nika sakapai riipaha na wai i nika manga gu sakapai re. (Snz. 21:5) Si adu nipatatamana ka kumbakudee sana diani mbata nibipa gupai i nika sakapai riipaha. (Snz. 15:22) Abariikporo, si angba a gbe ka oni sana awironi i gumba pa gupai i aida oni sakipai tipaha. Manga oni he wo nika undo roni oni ini agu apai ngbatiyo na agu apai i abakabangiriyo riipaha.

⁹ Kura aposo kinaho bariikporo nikaa dianga bakere regbo adia gbe kuti mbakadatise tipa gu Irisombori Nga ga Aborokporo ya. Apai kinaho i nikaa mangaha rogo aposo dunduko, sidu, si adunga nga bairakporo naakusa vovo apai rogo aposo dunduko tipa i naasakapai riipaha te. Ko rengbe ka bi gupai nga mbakada ko tiko nibasa tifuo nyasa yó gu Irisombori Nga ga Aborokporo tipa gu kuraha nikadu niwenehe mbiko gu regbo re, agu azingo nga ga toro du gako aborokporo nani kindi riko yo. Gu kura abairakporo nakeka agu apai i nika sakapai tipaha ki moihe rogo gu ba aborokporo nika bihe abi rogo taata. Mangayó ho wo nika fu maabangirise fu gayó aborokporo tipa gupai i nika sakapai riipaha na ki undo yó a tipa i mbakadi tiyo tipaha ka si du nga si naida i mangihe amanga wo.

10. Wai rengbe agu aboro naraka nisayo ka mangasunge na gu regbo du tipa gu Irisombori Nga ga Aborokporo?

¹⁰ Ginipai ka Mangi ka Mi Du Nisare? Agu aboro naraka nisayo rengbe ka mangasunge na gu regbo du tipa gu Irisombori Nga ga Aborokporo kaa wisigopai nisase. Wene wisigopai nisase nakoda geda Ziazia Kekeapai, mbakadatise tipa adunguratise, gbiati geda Ngbaõbambu Sinziri na Awake! Gu kura abatungusipai nasia pai sa ka wisigopai riihe. Ti kura aregbo, ní rengbe ka yamba kura batungusipai watadu aborokporo tipa i ye kadu nani pati sakapai tipa agu apai du rogo Ziazia Kekeapai.

11, 12. Gini bete amaku duho ti manga gu Irisombori Nga ga Aborokporo dedede?

¹¹ Gini Amaku Rengbe Ani ka Gbiaha Ti Manga Gu Irisombori Nga ga Aborokporo Dedede? Agu aboro namanga ndikidi irisombori na ngbaduyó yo dunduko nambeda koyo du Yekova ni. Kurigure, agu aborokporo nairisombori wa sa, i nanyakasa gu pagume du dagbayó. Arogotise sa afura tipa agu amaku i agbia mbiko gu mbakadapai re ki yaa: “Ni agu abazakigene adunga agude berani ya, ani ninaapido gu uru ani amanga gaani Irisombori nga ga Aborokporo na kina boro nyemuhe. Si nanyakasa gaani nyemuse dagbarani na kini mbedisi rani a na gu Barani du ngbangbaturũ yo. Rogo agi auru du were, ho ani azinga ni wiso rogo gu uru ani asigiraha tipa kaa wisigopai wa sa, boro na boro nasana kurani ki yaa: ‘Mo ini ginipai ani ka mangaha areme nyemu? Gu Irisombori Nga ga Aborokporo!’”

¹² Gu mbakadapai nga aboro nimangi gu irisombori nga ga aborokporo re naundo agu aboro aundo a duna dungu asunge beyo. Naagude sa nga guri du nasonosa agude ue na kini tungusapai ni nazakigene ti aregbo dunduko akepai ki yaa: “Mbata, gaani wisigopai wa aborokporo anaandunga wenengai te. Ani anaamanganga ha ti aregbo dunduko te mbiko mi anidu na bakere mbugo. Mi ainongo wai ka mi ru ka sa apai dunduko si mangi te. Sidu, mi nake gi waraga re furoni tipa ka tambua roni bakere gbe tipa gu mbakadapai nga ga gu Irisombori Nga ga Aborokporo. Ani namangaha awere dedede na kini gbia amaku bakere gbe.”

13. Ginipai rengbe ka yugo gupai nga gaoni aborokporo nagbia undo agbia ti gu Irisombori nga ga Aborokporo?

¹³ Wakina gupai nadu tipa Rago Sabiti, gu Irisombori nga ga Aborokporo nga gamunihe be gu Barani du ngbangbaturũ yo nga gu rengbe ka undo aborokporo. (Yak. 1:17) Gu gene awiri aYisaraere anaabanda Rago Sabiti ngbaha nanaayugo pa wai i anaanyakasa gayó pagume na Yekova. Teketeke a, gu gene ani amangasunge ngbaha na gu regbo Irisombori Nga ga aborokporo nika yugo pa wai ani agbia undo ti ni. (2 Kor. 9:6; Gara. 6:7, 8; Koro. 3:23, 24) Ka gaoni aborokporo amangasunge na gi mbakadapai re ngba wene gene, i ada ada kuti gupai bake apapara Atambuahe akehe ki yaa: “Ono si ni wene he fere ka mbeda na Mbori; mi moi Gbia nga Mbori ni gi bagbuko.”​—Tam. 73:28.

[Gu kpiahe du ti kpewaraga 5]

Si aidanga gu Irisombori Nga ga Aborokporo du niba uguhe na niguhe aboro nika berã kina gupai nga si agumba nyasi areme te te, si naida aborokporo duadu na ngbarago wakina gu betedi Mbori ani airisoko

[Gu kpiahe du ti kpewaraga 6]

ONI BANDAHA

Bete Aberapai Tipa Gu Irisombori Nga ga Aborokporo

Ziazia Kekeapai:

• Oni gedi papara gu geda Ziazia Kekeapai nga ga aposo dunduko wa sa. Ka si du nga gu papara Ziazia Kekeapai oni agedaha re na fugo dungu aboro rogoho, gu ní rengbe kaa gedaha wa bagumba pangbanga gu kura aboro kini gedi fugo gu kura aboro.

• Fuo geda oni pangbanga rogo Ziazia Kekeapai, oni asadi ka wirikanga agu aboro oni nagedi pai tipa yó re rogo mangimangipai yo.

• Oni asia aborokporo nibasasa dunduko tipa i gedi agu akapita oni ka sakapai riipaha na i ki keke agu asanahe gbiayo tiyo nani rogo gayó gedapai. Fuani, oni ki mangi wetekapai riipa gu gayó asanahe re naayó wa sa dunduko.

• Rogo aposo dunduko, oni ke veresi ri kpewaraga ki saki rogoyo na ki asadi kaa gumbaha ngbarironi. Oni dungura agu akpewaraga re fuo bete aposo ki fugu he na ki bi bange averesi wai rengbe oni ka tingidaha ngbarironi.

• Oni gi gu geda Ziazia Kekeapai i ade fugoho na kini pekefuoho rogo gaoni Ziazia Kekeapai.

Adunguratise:

• Oni mbakadi gu kura papara adunguratise wa sa.

• Oni wiriki agu abia i nika bihe ba dunguratise yo.

• Ka boro du dagbaroni duna gumbapai rogo Gu Sukuru Nga Siokrasia watadu na yugopai Nga ga kpiapai ti regbo Gu Dunguratise Nga ga Sunge, oni sakipai tipa mangaha wa sa, watadu oni sana gu boro nandu ka mangaha re ní yugukpia wai ní andu ka mangaha.

Agu Apai Si Aidaha Rogo Gaoni Kporo:

• Oni sakipai riipa agu apai du rogo gu buku nga Young People Ask watadu gu nga Learn From the Great Teacher.

• Oni yugupai na kpiapai tipa wai rengbe gude ka diabe gupai ka kuru sa ru sukuru yo.

• Oni mangi kpiapai na yugopai nga gu avunguagude amanga tiyo rogo nga i nga agude na agude ki mangi tiyo nga i nga avunguagude. Rogoho, agude wetekapai riipa pai sa na ki sakipai riipaha na avunguyo.

Sunge Tungusapai:

• Oni mangi kpia gu yugopai oni ka mangasunge nani gene sunge tungusapai yo.

• Oni sakipai tipa agu asásá rengbe gaoni aborokporo ka mangaha tipa ka kiiso gayó sunge tungusapai ti regbo Tingida Pakpio Yesu watadu ti gu regbo du yó na ongoda.

• Oni mbu regbo fu aborokporo nibasasa dunduko tipa i wetekepai tipa wai ka fu karagapai kuti gu sanahe rengbe yó ka gbiatiyo nani gene sunge tungusapai yo na ki yuguhe rogo mangimangipai yo.

Gu Kura Aberãpai:

• Oni gedi kekeapai rogo gu vovo magazini kuru wa sa.

• Oni gumba gupai fu aborokporo nibasasa dunduko nga i gedi gu kekeapai du rogo gu vovo magazini duho na ki ke gupai nga gu ngbatiyo na ki sana yó i fura tipaha ti regbo gu Irisombori Nga ga Aborokporo.

• Ti kura aregbo, oni yambu gu kura batungusipai watadu arogotise tipa i ye kadu na oni pati gaoni Irisombori Nga ga Aborokporo, oni rengbe arengba a ka sasana yó nibipa gu Irisombori Nga ga Aborokporo.

• Oni bi agu avidio nga ga aDezire Yekova na ki sakipai tipaha.

• Oni sakipai wa sa rogo gu buku nga “Young People Ask” watadu gu riipai nga “For Family Review” rogo Awake!

• Oni sakipai tipa gupai du riihe nga “Teach Your Children” watadu “For Young People” rogo Ngbaõbambu Sinziri.

• Oni gedi papara gu vovo Yearbook duho na ki sakipai riihe watadu gu buku i akusihe rogo gu Bakere Dunguratise Nga ga Aʹuru Biata nasusi.

• Fuo du oni pati gu bakere dunguratise nga ga aʹuru biata watadu ga aʹuru ue, oni sakipai tipa gu memeapai oni agihe baha yo.

• Oni wisigi agu ahe Yekova akusihe na ki sakipai tipa gupai rengbe oni ka wirikaha ti ni tipa Yekova.

• Oni mangi ngbatunga agu pai duwa ke gbakigbaki kpiarago, ke sura ahe na agu akuraha wa sa.