Gu Gene Rengbe Ani ka Undo Agu Aboro Ngbaha Ainongo Gedapai Wenengai Ya

1. Gini kparakapai rengbe ani ka gbia tirani na ni ka ani ayugopai fu agu aboro ainongo gedapai wenengai ya?

¹ Gu kura airakporo kinaho naida aida na agu apai nga ga toro, ono i ainongo ka gedapai wenengai te, zee rengbe arengba ka mangayo ka ani fu Ziazia Kekeapai fuyo watadu gu kura buku nga i gedihe. Ka ani fu gu buku nga Ziazia Kekeapai Ayugoho fu ngbatunga agu aboro re ti tonatonaha, si arengbanga ka ye na wene sangbanapai te. Ginipai rengbe ani ka mangaha ka undo yo rogo toro yo? I asasana agu abatungusipai naima tungusapai tipa badungu agarã rogo aringara naima susa 20 tipa gupai i naamangaha. Agu aberãpai i afukuhe gu duku kusende re.

2. Gini awaraga rengbe ani ka mangasunge na ni na agu aboro ainongo gedapai wenengai ya?

² Ka si du nga ni nagedapai tooni watadu ni agedanga pai kandara tooni te, mo rengbe ka tonaha singia na gu burosua nga Oni Degeturoni fu Mbori watadu Oni Degeturoni fu Mbori Tipa ka Raka Nyeanye Kindi. Batungusipai sa rogo gu ringara nga Amerika ninaayugo agu aburosua ue re dunduko fu boro na ki gumba gupai nga ni sia gu sa nga gu ngba tini. Gu be-basunge nga ga Kenya agumba gupai nga agu aburosua re ima undo rogo gayo dagbarago nikerehe, bambiko gupai nga rogo dungu aba Africa no, i nayugopai fu aboro rogo apangbanga angianga gu nga kita sana boro na sanahe ni kini karagapai kutini ya. Wa vura duhe nga gu boro naima wirikapai rengbe arengba ka ida na gu sakapai nga ga sanahe na karagapai, gu boro naawirikanga pai ya, si arengbanga ka ndu na ni wenengai te. Ka si du nga gu bawiriki Ziazia Kekeapai re rengbe arengba ka gedapai tooni, abatungusipai natona sakapai na ni rogo agu aburosua nga Gu wene pangbanga Naye be Mbori!, Mo Rengbe Arengba ka Duni Bakurea Mbori!, watadu gu buku nga My Book of Bible Stories.

3. Ginipai rengbe ani ka mangaha na si ki undo rani ani yugupai fu agu aboro ainongo ka gedapai wenengai ya?

³ Oni Tambua Yo: Agu aboro ainongo ka gedapai wenengai ya, zee ima rengba ka manga yo. Tipa ani ­rengbe ka yugo rengo fuyo, gu bambatapai si aida ani mangihe nga ka sayo i du na kido kuti tiyo. Aboro kinaho nga aguyo arengbanga ka gedapai ya ono berãyo naima ngara na i ima ­rengba ka wirikapai. Oni yugu irisa fuyo na kini mangi yo ngba iriiri gene. (1 Pet. 3:15) Ka i bi gupai nga oni nafu tambuahe afu fuyo tipa gu ome i amangaha na i namanga sonakumbatayo amanga, si nika fõ yo i ndu kumbutayo na wisigo Ziazia Kekeapai. Sidu, oni tambua yo atambua wenengai.

4. Wai rengbe ani ka ngarasa agu aboro ani awirikapai na yo nga aguyo ainongo gedapai wenengai ya tipa i mbakaditiyo tipa wirikapai?

⁴ Ka si vura du nga gu boro oni awirikapai na ni ainongo gedapai wenengai te, oni ngarasi ni angarasa ni naambakada tini tipa wirikapai. Gu kura abatungusipai rogo gu ringara nga South Africa ninaangarasa agu aboro i awirikapai na yo nga i naasana agu aboro i araka na yo watadu abakurea yo nga aguyo naima ino gedapai i undo yo. Gu kura batungusipai rogo gu ringara nga Britain ninaafu gako buku wirikapai fu gu boro ko awirikapai na ni ho i awirikapai ni tipa bete agenewaraga tipa ni bi wai duhe taata tipa ka gbia akaragapai ho aboro agbahe ni tiihe. Gu kura batungusipai rogo gu ringara nga India ninaangarasa agu aboro ko awirikapai na yo tipa i naawisigo asura watadu gu kpia aboro du rogo gupai i andu ka wirikaha na ki berẽkuriihe mbata fu i wirikihe.

5. Wai rengbe ani ka yugo zerangbaduse ho ani awirikapai ni na boro?

⁵ Oni Du na Zerangbaduse: Ka si vura du nga kina gini buku oni amangasunge na ni vurũ, oni nyakasi gu bangua apai du rogoho, na ki undo gu boro oni awirikapai na ni ni girogoyo wenengai. Ho oni atonaha atona ni, si angba gbe ka oni asakapai gbua tipa aminiti wa 10 kuti 15. Ka oni wisigingo badungu apai kina ti bangisa regbo ya, oni wisigi bete agenewaraga. Oni du na zerangbaduse ka si du nga ni nagedapai yee. Wa nyemu Yekova nika ti ku kpotoni yo, si nika fõ ni afõ tipa ni mangi ome ka gedapai wenengai. Tipa ka undo gu boro oni awirikapai na ni tipa ni ini gedapai wenengai, si naida oni naayamba ni tipa adunguratise na ni kini du kinaho ti tonatonaha.

6. Wai rengbe ani ka undo aboro i wiriki gedapai?

⁶ Ka agu aboro nawisigo Ziazia Kekeapai ini wai ka gedapai, si nika undo yo i mangi sonakumbatayo rogo toro yo niipo. (Tam. 1:​1-3) Badungu abatungusipai naundo agu aboro i awirika Ziazia Kekeapai na yo i ini gedapai nimanga yo sunge na gu burosua nga Apply Yourself to Reading and Writing ti digido wirikapai tipa bete aminiti. Ka rago gbere ti gu boro oni awisigopai na ni re, oni ngarasi ni na ki gumbapa agu apai funi nga gu ni nawirikihe na kini mangihe. Oni kido ni na gupai nga Yekova nika fu maku afu kurii gu ome ni amangaha, na ki ngarasi ni tipa ni naamanga kparakpee tipa undo. (Snz. 16:3; 1 Yo. 5:14, 15)  Gu kura abatungusipai rogo gu ringara nga Britain ninaangarasa agu aboro i awirikapai na yo tipa i naamaa agu asásá rengbe yo arengba ka da ti ni​—⁠wa gu nga inido geda A, B, kuti Z. Fuo gure ni ki tona geda bete averesi gbiati agu awaraga du ni aakpuraha. Undo boro tipa ni wiriki gedapai nakoda fõngbadu ni yo ni idi ka gedapai angianga kina yugo wai funi gbua rengbe ni ka gedapai ya.

7. Tipagine si aida ani gumbapa rengo agumba ti ni fu agu aboro ainongo gedapai wenengai ya?

⁷ Yekova abingo agu aboro ainongo gedapai wenengai ya na umba payo te. (Eyo. 34:19) Yekova nangera ku ngbadu boro yo. (1 Peka 28:⁠9) Ka oni henga gumbapa rengo fu aboro mbiko gupai nga i ainongo gedapai te ya. Badungu aũsunge duho rengbe oni ka mangasunge na ni. Niyangaraha, oni rengbe ka ga na ni ku rogo gu buku nga Ziazia Kekeapai Ayugoho na ki undo ni ni ini dungu apai rogo Ziazia Kekeapai.