Mo du na Rubangirise ka Zanga Gbaraga Ziree

Areme, apangbanga rengbe ka gbandaka ti amirioni aboro ni wiri ipiipihe vurube awaraga, radio, terevizioni, gbiati Internet. Agu aboro nairiso gu “Mbori nga irarengo,” si aidanga i gbaragi agu apangbanga adunga ni ruruhe ya te, zavura ka si vura du vurũ nga i ainongo ho te. (Tam 31:5; Gate 23:1) Gu pangbanga du ni ziree i adogoda pepehe ima rengba ka ye na kerepai. Ho mo aida ka diaberã ni tipa pangbanga singia si ni ruruhe, mo sana tiro nga:

• ‘Ya mo gu pangbanga re naye be gu boro du mi na kido kuti ni?’ Gu boro nagumba gu pangbanga re arengbanga ka ino gu futufutuapai du tipaha dunduko te. Ho apangbanga atanga ni ti aboro, si na ariatihe aˈaria, sidu, si naida mo du na rubangirise ka si du nga mo ainongo da du naatona gu pangbanga re te. Agu aboro du na amomu rogo dungurati aboro na biyo nga i nga mburu agu apangbanga du ni ruruhe, sidu, si naida i du na rubangirise na peka agu apangbanga i ainongo pai tipaha ya.

• ‘Ya mo gu pangbanga re nagbarasa rimo kura boro?’ Ka si du nga gu pangbanga re nasa kura aboro i du na gbegberẽ bipai tipa boro watadu badona, si adu ni wenepai ka mo gumbanga ha kumbatayo ya.—Snz 18:8; Frp 4:8

• ‘Ya mo gu pangbanga re nga gupai si aida boro idi kutini?’ Mo du na tatamana ho mo adegaturo ni kuti iiriwo apangbanga.

ONI BI GU VIDIO NGA WAI RENGBE MI KA MBU GUMBARIMO? NA FUOHO, ONI KI KARAGAPAI KUTI AGI ASANAHE RE:

• 

  Ringbisihe kuti Asanza 12:18, gini kerepai rengbe afugo ka ye na ni?

• 

  Wai gu rengbe AFiripoio 2:4 ka undo rani ani mangi wene adiaberã nibipa agu apai ani apehe tipa kura aboro?

• 

  Ginipai si aida ani mangihe ho aboro atona ni kaa fura gbegberẽ tipa kura aboro?

• 

  Gini asanahe si aida ani sana tirani na ni mbata fu ani tona fura tipa kura aboro?