Wai gu Rengbe Mo ka Manga Kparakpee na Mbori ki Degetuko Kutini?

MO KPARI FU YEKOVA MBORI TI RIMO YESU

‘Gu he oni ka nikpari pa ha fu Buba, ko afu he afu fu roni ni rimore.’​—Yoane 16:23.

Afugo Yesu nayugo gupai ziazia nga Yekova naida gupai nga ani kpari fuko, angianga vurube akpiahe, asanto, amaraika, watadu agu atitarani naima kpiko ya, ono ti rimo Yesu Kristo. Ho ani akpara ni fu Mbori ti rimo Yesu, ani nayugo ho nga ani ima rugatirani na gupai nga Mbori nadegatuko kuti gaani kparakpee mbiko gupai Yesu amangihe furani. Yesu aya, “a nga boro sa ka ye koyo du Buba ni gbua te, kina mbiko re.”—Yoane 14:6.

MO FURA KINA BORO KPOTORO YO

‘Oni úka kpotoroni yo ku bara bangiriko.’​—Atambuahe 62:8.

Ho ani akpara ni fu Yekova, si naida ani fura fuko wa gu rengbe ani ka fura fu gu barani du na nyemuse. Kuba gupai nga ani naageda kparakpee rogo buku watadu kaa dogoda gupai ani aima zioho kurirani yo, si naida ani fura fu Mbori na irisa na si ye kina boro kpotorani yo.

MO KPARI RINGBISIHE KUTI GUPAI MBORI AKPINYEMUHE

‘Ka ani ho gu he ku sangba gako nyemuhe yo, ko gi pa rani agia.’​—1 Yoane 5:14.

Yekova nagumba gupai furani rogo Ziazia Kekeapai yo ko nika mangaha furani, na gupai ko aida ani mangihe fuko a. Tipa gupai nga Mbori degetuko kuti gaani akparakpee, si naida ani kpari “ku sangba gako nyemuhe yo.” Tipa ani mangi gipa re, si naida ani wisigi Ziazia Kekeapai tipa gupai nga ani du na rengba ka inoko wenengai. Ka ani mangihe wo, gaani akparakpee nika sa ngbarago tiko.

GINI APAI RENGBE ANI KA KPARA TIPAHA?

Ani Kpari Tipa Gaani Azingo. Ani rengbe ka kpara fu Mbori tipa agu ahe ani aidaha na auru dunduko, wa gu nga riahe, roko, gbiati gu ba ka ani araka rogo ho. Ani ima rengba a ka kpara tipa tatamana, tipa gupai nga ani du na rengba ka manga wene adiaberã, na kini kpari tipa ome tipa gupai nga ka hi gaani fudifudiapai. Ani rengbe ka kpara tipa idapase, mbupai ti gaani aingahe, na tipa ga Mbori undo.—Ruka 11:3, 4, 13; Yakoba 1:5, 17.

Ani Kpari Tipa Kura Aboro. Agu avunguagude nakpinyemu awiriyo nidu na ngbarago ho awiriyo akpinyemu tiyo ni dagbatiyo. Ani nga awiri Yekova, na ko naida gupai nga ani kpinyemu akuarani na kini ngerefuo yo. Si rẽarẽ ani mangi kparakpee tipa gaani badiarogatise, awirani, gaani aborokporo gbiati abakurearani. Gu bawiriki nangia Yakoba akepai ki ya, “oni kpári tipa akuaroni.”—Yakoba 5:16.

Ani fu Tambuahe fu Mbori. Baibiri nape gupai tipa Bakusirani nga: ‘Ko amangi wene pai, ki fu mai fu roni ngbangbaturũ yo, na rago ida riahe gbe, ki hihisi kpotoroni yo ni riahe na ngbarago.’ (Amokedi 14:17) Ho ani aberã ni kurii agu apai dunduko Mbori namangihe furani, si nafõngbaduraniyo ani fu tambuahe fuko rogo kparakpee yo. Na si naida ani yugu gupai fu Mbori a nga ani na tambuahe ni gia ani sangbako.—AKorosaio 3:15.

MO DU NA ZERANGBADUSE NA KI KA KUTI KPARAKPEE

Ti kura aregbo, rago ima rengba ka gberã tirani mbiko gupai nga ani agbianga karagapai ni ipo kuti gu gaani kparakpee naye kina boro kpotorani yo te. Ya mo si naida ani da kuti gu digisopai nga Mbori aberãnga parani te? Wagusa te! Mo makianga agi akpiapai re nga gu nayugo gupai nga gupai si aidaha nga ani naamanga kparakpee amanga kindi.

Steve i ni fura tipa ko rogo gu kekeapai du ti tonatona gi waraga re ape gupai nga, “Wa ka i nayanga mbiko kparakpee ya, ka mi dunga na maabangirise berewe rogo raka yo te.” Ginipai naye na gi ariapai re? Ko atona wisigo Ziazia Kekeapai na ki wiriki gupai nga si naida ko naamanga kparakpee na ki kpatagara kuti ni. Steve nape gupai nga “Mi nakpara fu Mbori kaa tambuako tipa agu aundo dunduko mi nagbiaha be awirina, mi na ngbarago awere kisusi wai mi adu na ni mbata.”

Ginipai tigaha du tipa Jenny, nga guri naabi tiri nga ri arẽnga Mbori degetuko kuti gari kparakpee te? Ri aya, “Ho mi abi tire ni nga sunge tire te, mi azungadi Mbori ko undo re mi rugutire nandu gupai mi abi tire ti ni nga sunge tire te.” Wai gu gipai re aundo ri? Ri aya, “fura fu Mbori rogo kparakpee yo ima undo re mi naabi tire wa gu ko abire, nga ka si vura du vurũ nga kpotore yo na sapangbanga re, ko asapanga ngbanga re te. Na si ima undore a mi naamanga asadatise amanga kindi.” Gini sangbanapai si naye na ni? “kparakpee ima undore mi naabi Yekova nga ko kina tini, ko na nyemuse, ko nga Buba, na ko nga gu Bakure nikaa undo re ti aregbo dunduko ka mi kakuti manga gupai ko aidaha.”

Mo makianga gupai a naadu tipa Isabel. Ho ri adu ni na vuse, gari munganga agumba gupai furi nga gu gude ri nika vunga ru re, u nika du ni kere gbarĩgbarĩ ru. Gipai re aima ba gberãrago tiri ni kerehe. Na zavura gu kura aboro afu gu berãpai furi nga ri ba gu gude re kusayo. Ri aya, “mi aberẽhe ti gimi nga mi nika kpiakpi be gu kere egerã naadu kpotoreyo.” Ginipai ri amangihe? Ri agumba gupai nga, “Mi amangi kparakpee fu Mbori bara dunguhe tipa gako undo.” Fuo bete regbo kusa, ri avungu kumbagude ki yambu rimo nga Gerard, na ko adu ni gbarĩgbarĩ ko. Ya mo Isabel abihe nga Mbori aima karagapai kuti gari akparakpee? Ii, ri aima bihe wo! Ngba gini gene? Ri aya, “wa mi abi wire du garako awere nga 14, ko ni gbia ngbarago ti raka ko ki vura du vurũ ni gbarĩgbarĩ ko, mi nabihe nga ko nga wene karagapai kuti gimi akparakpee, na ko nga gu wene maku Yekova Mbori nafuhe fere.”

Gi ngbatunga wene afugo naye kina boro kpotoseyo re, nasarani ani berãkuriipa agu afugo nga ga bake papara Atambuahe nga gu naya: “Ako Yekova, mo agía pa gu he rungorungo aboro nakpi nyemuhe; mo anyákasa kpotoyo yo, mo adéga turo ka gia ha.” (Atambuahe 10:17) Gere nga gu wene nduapai si aida ani naamanga kparakpee amanga ti ni kindi!

Ani nabi badungu ga Yesu akparakpee rogo Ziazia Kekeapai yo. Gu ini ani paha gbe nirengo, nga gu ko ayuguhe fu gako abawiriki. Ginipai rengbe ani ka wirikaha ti ni?