Si Naida Dungurati Undo Abawiriki Ziazia Kekeapai I Mangi Sonakumbatayo ki Zi Bapatiza

1-2. Da rengbe ka undo bawiriki Ziazia Kekeapai ni mangi sonakumbatayo ki da ti zio bapatiza?

AMY naraka Fiji yo aya, “Mi aima kpinyemu gupai mi aawirikaha rogo gimi wirika Ziazia Kekeapai. Mi aima inoho nga rengo du naadu. Ono ho mi atona kaa koda tire ni na awirina, si aundo re mi mangi aˈariapai na ki zi bapatiza.” Ga Amy kpiapai nayugo gu nyanyakipa pai furani nga: Gu boro nawirika Ziazia Kekeapai rengbe kaa manga sonakumbatayo kindi ki zi bapatiza ho ni agbia undo ni be kura aboro rogo dungurati.

² Abatungusipai dunduko rengbe ka fubee tipa ka undo vovo aboro i da ni papara dungurati. (Ef. 4:16) Nazakigene sa naraka Vanuatu yo du rimori nga Leilani, aya: “Fugo sanza gu duho ninaaya, agu aboro dunduko du rogo gbaria nafubee kuti pa sonosa gude. Mi naberãha nga kina gu bangisapai re du tipa sa aboro ni abawiriki; dedede, aboro dunduko rogo dungurati naundo na paye na boro ku rogo rengo.” Tipa gude sono na ki da ni nyanyaki boro, agu aboro naundo ru nga gau aborokporo, abakurearu, gbiati gau abayugupai sukuru yo. I namanga gipai re ni ngarasa yo ru na kini yugu nyanyakipa apai furu. Wakina gure a, abatungusipai ima rengba ka fu arugute fu abawiriki Ziazia Kekeapai, ka ngarasa yo, na kini moi wene kpiapai fuyo, nga gu nika undo yo i mangi sonakumbatayo na ki da ti zio bapatiza.—Snz. 15:22.

3. Ginipai mo nawirikihe ti agu apai Ana, Dorin, gbiati Leilani agumbaha?

³ Tipagine si aida gu batungusipai namanga wisigo Ziazia Kekeapai na boro du ti ni na ngbarago ho kura abatungusipai rogo dungurati aundo gani bawiriki Ziazia Kekeapai ni? Oni bingo gupai gu kparakpara nazakigene naraka Moldova yo du rimori nga Ana agumbaha, ri aya, “Bawiriki Ziazia Kekeapai naida na bakere undo, na si ni bakpakarakpakaraha tipa bangisa bayugu Ziazia Kekeapai sa fu gi undo re dunduko ni tini.” Kura kparakpara bazakigene nga Dorin, nga guko du kina Moldova yo a aya: “Dedede, kura abatungusipai ninaape gupai nga gu ninaazio ngbadu bawiriki Ziazia Kekeapai yo, nga gupai kaa yengo gu berãre yo ya.” Leilani ape gu kura ndupai si aida ani du ti ni na ngbarago ho gu kura aboro aundo ni, ri aya: “Ho bawiriki Ziazia Kekeapai abi wai ni awirina ayugo nyemuse funi na kini berãpa ni, si nasa ni ni rugutini na gupai nga ani nzunzu nga ga Yekova aboro.”—Yo. 13:35.

4. Gini apai ani nika sakapai tipaha rogo gi kekeapai re?

⁴ Ono tie, mo ima rengba ka bakabangiro nga, ‘Waigu rengbe mi ni tire ka undo Bawiriki Ziazia Kekeapai tipa ni mangi sonakumbatayo baraho duhe ni nga mi nawirika Ziazia Kekeapai na ni te?’ Ani wisigingo pai tipa gupai rengbe ani ka mangaha ho boro nayambu rani ni ani du pati wisigo Ziazia Kekeapai na ni, na gupai rengbe ani ka mangaha ho gu bawiriki Ziazia Kekeapai re atona ye ni tipa adunguratise. Ani nika bi wai a rengbe abaakumba ka undo abawiriki Ziazia Kekeapai tipa i mangi sonakumbatayo ki da ti zio bapatiza.

HO I NAYAMBU RO NI MO DU PATI WISIGO ZIAZIA KEKEAPAI NA BORO

5. Ginipai si aida mo mangihe ho i nayambu ro ni mo du pati wisigo Ziazia Kekeapai na boro?

⁵ Ti regbo wirika Ziazia Kekeapai, ga bayugupai sunge du ngaha ka undo bawiriki Ziazia Kekeapai ni girogo Fugo Mbori yo. Ka bayugu Ziazia Kekeapai yambu ro tipa oni ndu na ni fuo gani bawiriki Ziazia Kekeapai, gamo sunge nga ka undo ni. (Batu. 4:9, 10) Ono ginipai rengbe mo ka mangaha tipa kadu ni wene moundo ti regbo wisigo Ziazia Kekeapai na boro?

6. Ho mo andu ni kadu pati wisigo Ziazia Kekeapai na boro, waigu rengbe mo ka mangapai kuti gu rugute du rogo Asanza 20:18?

⁶ Mo mbakadi tiro wenengai tipa gu wisigo Ziazia Kekeapai re. Ni bambatapai, mo sana gani bayugu Ziazia Kekeapai tipa ni pe bete apai foro tipa gani bawiriki Ziazia Kekeapai. (Oni gedi Asanza 20:18.) Mo ima rengba ka sanahe nga: “Ginipai mo nainihe tipa gamo bawiriki Ziazia Kekeapai? Gini riipai oni nika wisigoho na ni? Ginipai mo aida gamo bawirikipai wirikihe rogo gi wisigopai re? Ya mo pai ho si aida mi mangihe watadu ka mi mangingo ho ya na ya mo pai ho si aida mi gumbaha watadu ka mi gumbanga ha ti regbo wirika Ziazia Kekeapai ya? Waigu rengbe mi ka ngarasa bawiriki Ziazia Kekeapai tipa ni mangi sonakumbatayo?” Si ziazia nga, bayugu Ziazia Kekeapai agumbanga gu gbugbuapai dunduko foro du tipa gani bawirikipai te, ono gupai ni nika gumbaha foro nika undo ro aundo. Gu mokedi du rimori nga Joy ninaafura tipa agi apai re na agu aboro ri naandu na yo fuo gari bawiriki Ziazia Kekeapai. Ri aya: “Gi sakapai re ninaaundo gu boro mi naandu na ni fuo gimi bawiriki Ziazia Kekeapai tipa ni ini gupai ni nika pehe ti regbo wisigo Ziazia Kekeapai.”

7. Tipagine si aida mo mbakadi tiro ti ni wenengai ka si du nga i yambu ro mo du pati wisigo Ziazia Kekeapai nga ga boro?

⁷ Ka si du nga i yambu ro mo ye kadu pati wisigo Ziazia Kekeapai, si adu ni wenepai ka mo mbakadi gu waraga oni andu ka sakaha. (Eza. 7:10) Dorin, nga gu wirina i nifura tipa ko kusayo aya: “Mi nidu na ngbarago ho gu boro ani andu na ni ambakada tini ni tipa wirikapai. Gipai re nasa gupai nga ni fubee kuti wirikapai wenengai.” Kurigure, bawiriki Ziazia Kekeapai nika bi gupai nga oni dunduko ue ima mbakada tironi wenengai na gipai re nika maa wene kpiapai fu ni. Ka si vura du nga regbo bero tipa ka mbakadaha sirisiri te, si adu ni wenepai tipa ka dia regbo ka ino gu memeapai du rogo gu wirikapai re.

8. Ginipai rengbe ka undo ro mo mangi kparakpee tipa memeapai ti regbo wisigo Ziazia Kekeapai na boro?

⁸ Kparakpee nga nyanyakipa papara wisigo Ziazia Kekeapai, si du mo berẽpa gupai mo nika pehe ka bayugu Ziazia Kekeapai sana ro mo mangi kparakpee. Mangaha wo rengbe ka sa gupai nga mo mangi kparakpee tipa kina boro memeapai. (Tam. 141:2) Hanae, nga guri naraka Japan yo natingidapa gu kparakpee kindi gu boro naaye na gari nayugu Ziazia Kekeapai amangihe. Ri aya: “Mi abi gupai nga ri na nyanyakipa bakure na Yekova na mi aaida kadu wakina ri. Mi abi tire a nga i ima kpinyemu re ho ri ayambu rimore ni rogo gari akparakpee yo.”

9. Ringbisihe kuti Yakoba 1:19, ginipai rengbe mo ka mangaha kadu ni wene moundo ti regbo wisigo Ziazia Kekeapai na boro?

⁹ Mo songodi bayugu Ziazia Kekeapai ti regbo wirikapai. Omamuyovbi nga nazakigene naraka Nigeria yo aya: “Wene moundo nadega tuni wenengai ti regbo wisigo Ziazia Kekeapai na boro. Ni nafu wene akaragapai, ono ni afuranga ni bakerehe te, ni ima rugatini na gupai nga, bayugu Ziazia Kekeapai du nangbembatayo.” Sidu, gini regbo rengbe mo ka gumbapai na ginipai rengbe mo ka gumbaha? (Snz. 25:11) Mo degeturo wenengai ho bayugu Ziazia Kekeapai na bawiriki Ziazia Kekeapai afura ni. (Oni gedi Yakoba 1:19.) Mangaha wo nika undo ro mo du regerege ka fura ti gu regbo rẽarẽ. Kina rengo du nga si naida mo berẽ aberã mbata fu mo fura. Ni kpiapai, mo afuranga ni bakerehe watadu ka defugo ngba bayugu Ziazia Kekeapai ho ni asakapai ni te, na mo atonanga fura tipa kura apai kia te. Ono ka mo fu guru karagapai, kpiapai watadu sanahe, mo ima rengba ka undo ka sa gu memepai oni asakaha si du ziazia. Ti kura aregbo, mo ima rengba ka bihe nga, dungu apai ho rengbe mo ka pehe tipa gupai i asakaha te. Ono ka mo tambua bawiriki Ziazia Kekeapai na kini yugu nyemupai koyo du ni ni, mo ima rengba ka undo ni ni bakerehe gbe ni mangi sonakumbatayo.

10. Waigu rengbe gu pangbanga du tipa ro ka undo bawiriki Ziazia Kekeapai?

¹⁰ Mo pe gu pangbanga du tipa ro. Ka si rẽarẽ, mo pe pa wai ni guruhe fu bawiriki Ziazia Kekeapai mo awiriki rengo, gu kpakaraapai mo adibe he, watadu wai Yekova naundo ro. (Tam. 78:4, 7) Si ima rengba kadu nga gere nga kina boro gupai bawisigi Ziazia Kekeapai aida ka giaha. Si ima rengba ka nyakasa gani idapase na ki ngarasi ni tipa ni naamanga sonakumbatayo kindi ki da ti zio bapatiza. Na si ima rengba ka yugo wai fu ni rengbe ni ka diabe agu aˈasada ni agbia tini na ni. (1 Pet. 5:9) Gabriel naraka Brazil yo nga gu ko namangasunge awere ni bazakigene, natingidapa gupai naundo ko ho ko aawirika Ziazia Kekeapai ni. Ko aya: “Ho mi agi agu apangbanga ni du tipa awirina, mi aye ka ino gupai nga, Yekova nabi agu akpakarapai abi ani agbiatirani na ni. Na ka si du nga i aima diabehe, mi ima rengba ka diabehe a.”

HO BAWIRIKI ZIAZIA KEKEAPAI AYE NI TIPA ADUNGURATISE

11-12. Tipagine si aida ani di bawiriki Ziazia Kekeapai ti ni kugume esuesu ho ni aye ni tipa adunguratise?

¹¹ Tipa gupai nga bawiriki Ziazia Kekeapai mangi sonakumbatayo ki zi bapatiza, si naida ni naandu tipa agu adunguratise nga ga dungurati dedede na kini gbia undo ti ni. (Eb. 10:24, 25) Si nawira gupai nga, gani bayugu Ziazia Kekeapai nika yamba ni tipa ni ye tipa dunguratise ni bambataha. Ho ni nika ye ni, ani dunduko rengbe ka ngarasa ni tipa ni naaye aye kindi ku Bambu Kindo yo. Gini agene rengbe ani ka manga gipai re ngbaha?

¹² Oni di bawiriki Ziazia Kekeapai kugume esuesu. (Rom. 15:7) Ka bawiriki Ziazia Kekeapai bi gupai nga i ima diani kugume ba adunguratise yo, si ima rengba ka sa ni ni naaye aye kindi ku Bambu Kindo yo. Ku ba gupai nga ka sa ni ka rago ngbanga ti ni ya, oni fu sene fu ni zaaza na ki yugu ni fu kura aboro. Ka oni berẽnga ha nga boro kinaho nangera fuoni ya, gani bayugupai ima rengba ka ye kusa watadu ni namanga kuraapai. Oni gbeberã roni wenengai kuti gupai bawiriki Ziazia Kekeapai agumbaha, na oni ki yugu gupai nga nyemu ni kina tironi. Waigu rengbe pa dia oni bawiriki Ziazia Kekeapai kugume esuesu ka undo ni? Oni bingo gu kpiapai nga ga Dmitrii nazi bapatiza bete agarã kusayo nga gu ko namangasunge awere ni moundo abaakumba. Ho ko aatingida pa gu bambata regbo ni ko andu tipa adunguratise, ko aya: “Kura wirina abi re mi naru zegiyo Bambu Kindo yo ni gunde agunde na ko aye fuo re ani ki rimi na ko ku dimoyo. Badungu aboro naye ka fu sene fere. Kina ngba re nazere. Si aima ngba tire nikerehe mi ki bihe nga, ka ini yanga ani na adunguratise rogo auru dunduko rogo poso yo. Mi aabingo ngbatungapai wa gere mbata rogo gu kura ba te.”

13. Gini sangbanapai rengbe gaoni mangaapai kadu na ni kurii bawiriki Ziazia Kekeapai?

¹³ Oni moi wene kpiapai. Gaani wene kpiapai rengbe ka undo bawiriki Ziazia Kekeapai ni idi kuti gupai nga ani nzunzu nga ndikidi aKristano. (Mt. 5:16) Vitalii, nga gu ko namangasunge awere ni bazakigene Moldova yo aya: “Mi aima ino wai kura aboro rogo dungurati aaraka, kini berẽ na kini mangiapai. Gipai re naasa re mi idi kuti gupai nga, aDezire Yekova nzunzu du na ndikidi pambori beyo.”

14. Waigu rengbe gamo kpiapai ka undo boro ninaamanga sonakumbatayo kindi?

¹⁴ Tipa bawiriki Ziazia Kekeapai rẽ tipa ka zio bapatiza, si naida ni mangipai kuti gupai ni awirikaha. Taatapai nga gipai re ti aregbo dunduko te. Ono ho bawiriki Ziazia Kekeapai abi wai ni agu arugute nga ga Ziazia Kekeapai aundo ro ho mo amangapai ni kutini, ni ima rengba ka ida ka wirika gamo kpiapai. (1 Kor. 11:1) Oni bingo gu kpiapai nga ga Hanae, i nifura tipa ri kusayo. Ri aya: “Awirina aamanga gupai amanga mi aawirika wai ka mangaha. Mi abi wai rengbe mi ka ngarasa kura aboro na kini mbupai fuyo na wai rengbe mi ka yugo nyemuse. I anaafura dedede ni wenehe tipa kura aboro. Na mi aida ka wirika gayo kpiapai.”

15. Waigu Asanza 27:17 aundo rani ani bi gupai si aida ani zi bakure ti ni na bawiriki Ziazia Kekeapai wa ni andu kumbatayo kaa ye tipa adunguratise?

¹⁵ Oni zi bakure na bawiriki Ziazia Kekeapai. Wa bawiriki Ziazia Kekeapai nikaa ndu kindi kumbatayo kaa ye tipa adunguratise, oni yugu gupai nga oni ima kpinyemu ni. (Frp. 2:4) Oni ima rengba ka asada ka ino ni wenengai. Oni rengbe ka gumbapa wai fu ni du oni na ngbarago tipa agu aˈariapai ni amangaha. Oni rengbe ka sana ni tipa gani wirika Ziazia Kekeapai, gani aborokporo, na gani sunge. Ono si naida oni du na rubangirise ka zanga sana ni na agu asanahe nika ba zee tini. Ngbatunga gi fugodagbase re ima rengba ka sa roni oni ini tironi wenengai. Ho oni nika du ni ni abakure na bawiriki Ziazia Kekeapai, oni nika du na rengba ka undo ni ni mangi sonakumbatayo ki da ti zio bapatiza. (Oni gedi Asanza 27:17.) Hanae namangasunge awere ni nazakigene. Ho ri aatingidapa gu bambata regbo ni ri atona nduge tipa adunguratise, ri aya: “Ho mi azi abakure ni rogo dungurati, mi anaangera kumbatayo tipa adunguratise na nyemuhe, na mi anaandu koyo zavura ho mi anidu ni na mbugo. Mi anaagbia ngbarago ti kodatise na vovo abakureami, na gipai re aundo re mi mbu agu abakure kusayo naairisongo Yekova ya. Mi aaida kadu mbembedi na Yekova gbiati awirina. Sidu, mi adiberã ka zio bapatiza.”

16. Gini kurapai berewe rengbe oni ka mangaha ka undo bawiriki Ziazia Kekeapai ni du na ngbarago kadu rogo dungurati?

¹⁶ Wa bawiriki Ziazia Kekeapai amanga sonakumbatayo na kini mangi aˈariapai, si naida ani undo ni tipa ni bi gupai nga ni nga papara dungurati. Ani rengbe ka manga gipai re ni dia ani ni kugume. (Eb. 13:2) Denis naraka Moldova yo natingidapa gu regbo ko aawirika Ziazia Kekeapai ti ni, ko aya: “Awirina aima yamba rani bara dunguhe na diare tipa ani koditirani na yo. I agumbapa wai furani Yekova aundo yo. Gipai re aima ngarasa rani. Ani aima du na gu kido nga ani naida ka iriso Yekova, na wene raka napido rani kumbatayo ka ani mangihe wo.” Ho bawiriki Ziazia Kekeapai nika da ni ni gu batungusipai ata ziongo bapatiza ya, ani ima rengba ka yamba ni tipa ani ndu na ni gene tungusapai yo. Diego nga batungusipai du Brazil yo, aya: “Badungu awirina nanaayamba re ani naandu na yo gene tungusapai yo. Gere nangia wene gene tipa ka ino yo wenengai. Ho mi amangihe ni wo, mi aima wirika dungu apai, mi abi tire nga mi mbembedi na Yekova gbiati Yesu.”

WAIGU RENGBE ABAAKUMBA KA UNDO?

17. Waigu rengbe abaakumba ka undo bawiriki Ziazia Kekeapai?

¹⁷ Oni di regbo na abawiriki Ziazia Kekeapai. Abaakumba, ka oni yugu nyemuse na kini yugu gupai nga oni naberãpa abawiriki Ziazia Kekeapai aberã, oni ima rengba ka undo yo i mangi sonakumbatayo ki zi bapatiza. Ya mo oni rengbe kaa fura dedede na abawiriki Ziazia Kekeapai ba adunguratise yo? I nika bihe abi nga oni naberã payo aberã ka si du nga oni nika tingida rimoyo, gbe ho i natona fu akaragapai ni. Ya mo mo rengbe ka gbia regbo ka kura na batungusipai ho ni andu ni ka manga wisigopai na gani bawiriki Ziazia Kekeapai? Mo ima rengba ka undo bawiriki Ziazia Kekeapai kisusi gu mo aberãha. Nazakigene du rimori nga Jackie naraka Nigeria yo aya: “Kina ngba dungu abawiriki Ziazia Kekeapai ninaazera ka bi gupai nga gu wirina ani naye na ni tipa wirikapai nga bakumba rogo dungurati. Bawiriki Ziazia Kekeapai sa aya: ‘Ka gimi pasita mangingo pai wa gure te. Ko naandu kaa bi kina airakumuko sa na kina gu ka boro fu marã fuko!’” Gu bawiriki Ziazia Kekeapai re nandu andu awere tipa adunguratise.

18. Waigu rengbe abaakumba ka mangapai kuti gupai du rogo Amokedi 20:28?

¹⁸ Oni raba abayugu Ziazia Kekeapai na kini ngarasi yo. Abaakumba na nyanyakipa tindiro beyo nga ga undo abatungusipai tipa i du ni wene abatungusipai na ni wene abayugupai. (Oni gedi Amokedi 20:28.) Ka zee amanga boro amanga ka nungusa wisigo Ziazia Kekeapai ho du mo ni pati ni, mo ima rengba ka nungusa gu wisigo Ziazia Kekeapai re. Jackie i nifura tipa ri kusayo aya: “Abaakumba ninaasana re dedede tipa gimi abawiriki Ziazia Kekeapai. Ho mi nidu ni na akpakarapai ho mi awisigo Ziazia Kekeapai ni na boro, abaakumba ninaafu wene arugute fere.” Abaakumba ima rengba ka manga badungu apai tipa ka ngarasa abayugu Ziazia Kekeapai. (1 Tesa. 5:11) Jackie ape kurapai berewe nga: “Mi nidu na ngbarago ho abaakumba angarasa re ni na kini pe gupai fere nga, i na tambuahe tipa gu nyanyaki sunge mi amangaha. Ngbatunga agi afugo re ninaafu wasa fere wakina zezere ime rogo kere uru. Gi gayo wene afugo re ninaaundo re tipa mi bi tire nga, mi namangapai amanga wenengai na gimi abawiriki Ziazia Kekeapai na si nasa re mi du na bakere ngbarago.”—Snz. 25:25.

19. Gini ngbarago rengbe ani dunduko ka gbiaha?

¹⁹ Ka si vura du nga bawiriki Ziazia Kekeapai berani awere te, ani ima rengba ka ngarasa kura boro tipa ni mangi sonakumbatayo ki zi bapatiza. Zanga kaa fura ni bakerehe, ani ima rengba ka songoda bayugu Ziazia Kekeapai ti regbo wisigo Ziazia Kekeapai na gaani wene akaragapai. Ani ima rengba ka zio bakure na abawiriki Ziazia Kekeapai ho i aye ni ku Bambu Kindo yo, na ani ima rengba kadu ni wene kpiapai fuyo. Abaakumba rengbe ka ngarasa abawiriki Ziazia Kekeapai ni dia yo regbo na yo na i rengbe ka ngarasa abayugu Ziazia Kekeapai ni rabayo yo na nifu yo tambuahe fuyo. Ani na bakere ngbarago ho ani amangapai ni ka undo boro tipa ni kpinyemu Yekova na kini irisiko, ka si vura du kina tooni vurũ.