Paranga Aboro—Oni Naamanga Sonakumbatayo Kindi Tifuo Bapatiza

1. Gini weneapai badungu paranga aboro naima mangaha?

ROGO agarã dunduko, akutu paranga aKristano nazio bapatiza. Ya mo mo mangi gi diandue re? Kangia mo nga boro sa dagba yo, agu awirinamo nga ga toro yo na ngbarago na mo, na Yekova na ngbarago a! (Snz. 27:11) Mo berẽnga tooni kuriipa gu badungu weneapai mo naima mangaha. Ni kpiapai, mo ima wisigo Baibiri, isoke tipa agarã. Gamo wisigopai ima saro mo idi kuti gupai nga, Baibiri nga Fugo Mbori. Ono tie, gu susi asusa gbe nga, mo ima ye ki ini Bake gu ziazia buku re na ki kpinyemu ko. Gamo nyemuse tipa Yekova ima sona ki da ti gupai nga mo awere nga boro sa dagba gu gako amoyambu yo kpara gayo raka fuko na ki zi bapatiza. Mo ima manga bawene diaberã!

2. Ginipai ani nika sakapai tipaha rogo gi kekeapai re?

² Mbata fu mo zi bapatiza, mo aima gbia tiro na akpakarapai nga gu naasaha foro ni mbumbuhe mo nye niruru ro fu Yekova. Ono wa mo nikaa nyaka, mo nikaa gbia tiro agbia na vovo aˈasada. Satana nika asada ka sa ro mo mbu kpinyemu Yekova na ki mbu iriso Ko. (Ef. 4:14) Ka mo ya mbunga gupai re si mangi ya. Ginipai rengbe ka undo ro mo nye niruru ro fu Yekova na ki banda gu kidohe mo amangihe ka irisoko? Si naida mo naandu kindi kumbatayo kaa mangasunge nyanyaki tipa kada ni gu Kristano naima nyaka rogo toro yo. (Eb. 6:1) Waigu tie rengbe mo ka manga gupai re?

WAIGU RENGBE MO KA MANGA SONAKUMBATAYO WANGIA MO KRISTANO?

3. Gini sonakumbatayo si aida aKristano dunduko mangihe tingbafuo bapatiza?

³ Tingbafuo bapatiza, ani dunduko si aida ani mangipai kuti gu rugute gu mokedi nangia Pauro afuhe fu agu akurako aidipase naadu Efesa yo. Ko angarasi yo tipa i da ni agu aKristano niima “nyaka.” (Ef. 4:13, NW) Naida ka ya si aaida i naandu kindi kumbatayo kaa manga sonakumbatayo. Ani ima rengba ka rugatirani na gupai Pauro aaida ka gumbaha ho ko aringbisi sonakumbatayo rogo toro yo ni kuti gu sona nga ga gude. Avungugude ima kpinyemu ru na i na ngbarago tipa pa ru. Ono u arengbanga ka nye ni gude nyeanye kindi te. Fuo regbo kusa, si nika ida u mbu “agu apai nga ga agude.” (1 Kor. 13:11) Kina gu bangisapai re du tipa aKristano. Tingbafuo bapatiza, si naida ani naandu kindi kumbatayo kaa manga sonakumbatayo. Ani wisigingo pai tipa bete aberãpai nga gu rengbe ka undo rani ani mngi gupai re.

4. Gini sino rengbe ka undo ro mo mangi sonakumbatayo rogo toro yo? Oni sakingo rogoyo. (AFiripoio 1:9)

⁴ Gamo nyemuse tipa Yekova naasona. Mo ima kpinyemu Yekova ni bakerehe. Ono gamo nyemuse tipa ko ima rengba ka sona ni bakerehe gbe. Ngba gini gene? Gu mokedi nangia Pauro apepa gene sa rogo AFiripoio 1:9. (Oni gedihe.) Pauro amangi kparakpee nga ga AFiripoio “nyemuse moi pai ki susi asusa gbe.” Sidu, ani ima rengba ka sonosa gaani nyemuse tipa Yekova. Ani rengbe ka manga gupai re ni gbia ani “inahe na pa kparia pai dũ.” Kina wai ani nika ino Yekova ni bakerehe, kinawo a ani nika kpinyemuko ni bakerehe na kini bi gako asino gbiati gene mangaapai na nyanyakipaha. Gu nyemupai du ani na ni ka sa ko ko du na ngbarago nika da ni nyanyakihe, na ani ki zanga ka ida ka ba gberãrago tiko. Ani nika manga nyanyaki asadatise ka ino gupai ko akpinyemuhe na wai rengbe ani ka mangapai ringbisihe kutini.

5-6. Waigu rengbe gaani nyemuse tipa Yekova ka sona? Oni sakingo rogoyo.

⁵ Yesu aima wirika asino Yekova ngba rengberengbe gene. Sidu, ho ani aye ni ka ino Yesu wenengai, ani nakpinyemu Yekova ni bakerehe. (Eb. 1:3) Gu bawene gene kisusi rengbe ani ka ino Yesu ngbaha nga ka wisigo agu Akitabu Wene Pangbanga du biama. Ka si du nga mo ata tonanga geda Ziazia Kekeapai na aˈuru dũ te, mo ima rengba ka tonaha awere ni geda mo agi apangbanga du tipa Yesu re. Wa mo nikaa geda agu apangbanga du tipa Yesu, mo gbeberã ro kuti asino ko. Ko adu ni gu boro si adu taata fu aboro i naafura na ni; ko anaatinda rukutu agude ni nyemuse. (Mk. 10:13-16) Yesu angia wene sino boro na kidu ni gu boro nanaafura zaaza na aboro, na gako abawiriki anaagundenga ka pepa wai fuko i anidu te. (Mt. 16:22) Rogo gi gene re, Yesu aawirika gu Bako du ngbangbaturũ yo. Yekova ima du ni gu boro a duhe taata gbe fu aboro i fura na ni. Ani ima rengba ka fura na ko rogo kparakpee yo. Ho ani amanga kparakpee ni, ani ima rengba ka kusuko kpotoraniyo fuko. Ani ima du na gu kido nga ko asaranga ngbanga rani tipa mangaha wo te. Ko ima kpinyemu rani; ko naberãpa rani aberã.—1 Pet. 5:7.

⁶ Yesu aima du na nunga aboro tiko. Gu mokedi nangia Matayo akepai nga: “Ho ko abi arimbasa ni, nungayo ki mangi ko, bambiko i arungo, ki nigbandaka, wa kina agu akandoro adu nga na babandara ti ra ya.” (Mt. 9:36) Na gini bipai du Yekova na ni? Yesu aya: “Baroni du ngbangbaturũ yo, sangbako nga ka gu ni kpi nga sa dagba gi rukutu yo re ya.” (Mt. 18:14) Agi afugo re nasa rani ani du na ngbarago bambiko si nayugo gupai furani nga Yekova ima kpinyemu rani ni bakerehe gbe! Wa ani nikaa ino Yesu wenengai gbe, gaani nyemuse tipa Yekova nika sona.

7. Waigu rengbe kodatise na agu aKristano naima nyaka rogo toro yo ka undo ro?

⁷ Mo ima rengba a ka wirika wai ka yugo bakere nyemuse na ki da ni gu Kristano naima nyaka rogo toro yo gbe ho mo adia regbo ni na agu awirina naima nyaka rogo toro yo rogo gamo dungurati na kini ini yo. Mo bi wai du yo na ngbarago. I abiranga tiyo tipa gu diaberã i amangihe ka iriso Yekova te. Mo sana yo i peke bete agu apai naamangi fuyo tingba sunge fu Yekova. Ho mo aida ka manga nyanyakipa diaberã ni, mo sana yo tipa rugute. Mo tingidi gupai nga, “bambiko rimbasa aboro rondo, yo du pa zereda ni.”—Snz. 11:14.

8. Ginipai rengbe mo ka mangaha ka mo bi gupai nga mo na akapa tipa gupai Baibiri agumbaha?

⁸ Mo dibe gamo akapa. A wa i nipehe rogo genewaraga 2, Satana nika asada ka sa ro ka mo mangingo sonakumbatayo rogo toro yo ya. Gene sa rengbe ko ka manga gipai re ngbaha nga ka kusa akapa berãro yo nibipa kura ayugopai nga ga Baibiri. Ni kpiapai, isoke, kura aboro nika asada ka sa ro mo idi kuti gupai nga Mbori aakusanga rani te, ono ani akuru nisarani. Ho mo adu ni ni tooni gude, si nawira gupai ni rengo nga mo aaberãnga paha te, ono isoke awere, i nayugoho foro sukuru yo. Gupai gamo abayugu agumbaha tipa ka songoda gupai nga ahe akuru nisaha ima rengba kaa ngera bangiro wa gupai du ni ruruhe. Ono tie, i aˈasadanga ka ino singia Bakusiahe ti ni te. Mo tingidipa gu bangua rengo du rogo Asanza 18:17, nga gu naya: “Gu boro nagumba pa gani pai mbata, ni wiri kina ruru boro, daho gu kurani ka ye ni ka wisiga ni.” Kuba gupai nga kaa ida agu apai dunduko mo awirikaha sukuru yo, si naida mo wisigi gupai Fugo Mbori agumbaha wenengai. Mo mangi wetekapai rogo gaani awaraga. Mo fura na agu awirina naaima ida kuti gupai mbata kusayo nga ahe akuru nisaha. Mo sana yo tipa gupai sayo i idi kuti gupai nga Bakusiahe kinaho nga guko naima kpinyemu rani. Ngbatunga gu fugodagbase re ima rengba ka undo rani ani bi gu gopai nayugo gupai nga Bakusiahe kina ti ni.

9. Ginipai oni awirikaha ti gu kpiapai nga ga Melissa?

⁹ Wirina du rimo ri nga Melissa agbia undo ni bakerehe ti gu wetekapai ri amangihe nibipa kusa ahe.b Ri aya: “Sukuru yo, abayugupai nasakapai tipa gupai nga ahe akuru nisaha ngba gu gene nasa aboro i bihe nga rengo du. Ti tonatonaha, mi aagunde agunde ka mangapai kuti gimi akapa. Ti tonatonaha, mi aaidanga ka manga wetekapai te, bambiko mi aagunde agunde nga mi nika ye ka bi gupai nga rengo du nga ahe akuru nisaha. Ono mi aberẽ gupai nga Yekova naida ani du na wene nduapai berani tipa gaani aida. Sidu, mi atona mangapai kuti gimi akapa. Mi agedi gu buku nga Is There a Creator Who Cares About You? na agu aburosua nga Was Life Created? na The Origin of Life—Five Questions Worth Asking. Gere nga gupai nzunzu mi aaidaha. Mi abihe nga ka mi aima manganga gipai re bakuru kusayo.”

10-11. Ginipai rengbe ka undo ro mo nye ni gigiri ro rogo mangaapai yo? (1 ATesaroniko 4:3, 4)

¹⁰ Mo ne iraira mangaapai. Ho du mo ni ni sosono gude, gu nyemupai nga ga kodaba ima rengba kadu ni nyanyakihe gbe, na ti kura aregbo, kura aboro ima rengba ka asada ka sosoda ro mo mangi wasiwasi kodaba. Gure nga gupai Satana aida mo mangihe. Ginipai rengbe ka undo ro mo nye gigiri rogo mangaapai yo? (Oni gedi 1 ATesaroniko 4:3, 4.) Ho mo amanga kparakpee ni fu Yekova nisaro, mo pekepa agu apai namanga ro fuko. Mo pepa wai du mo fuko na ki sana ko ko nyakasi ro. (Mt. 6:13) Mo tingidi gupai nga Yekova naida ka undo ro angianga ka fu mbusa foro ya. (Tam. 103:13, 14) Ziazia Kekeapai ima rengba ka undo ro a. Melissa, i nifura tipa ri kusayo aasota ka ne iraira aberã. Ri aya: “Geda Ziazia Kekeapai na aˈuru dunduko aundo re mi naasovura kindi kuti gimi iraira nyemuapai. Si atingidi re na gupai nga, mi nga ga Yekova boro, na mi naida ko aida rogo gimi raka yo.”—Tam. 119:9.

¹¹ Ka mo asadingo ka mangapai kuti gamo akpakarapai ni kina tiro ya. Mo fura na vungu ro tipa gupai mo asota na ni. Rengo ngaha nga taatapai ngaha ka fura tipa ngbatunga agu apai re te, ono tie, si ni nyanyakipa pai ka mangaha wo. Melissa aya: “Mi amangi kparakpee tipa wingbaduse, na fuani, mi ki fura na buba tipa gimi kpakarapai. Tingbafuo gure, mi agbia bakere zereda nga ga berãse yo. Mi aima ino gupai nga Yekova adu na ngbarago na mi.”

12. Waigu rengbe mo ka manga wene adiaberã?

¹² Agu abangua arengo nga ga Baibiri naangbe foro kumbatayo. Wa mo nikaa nyaka, avunguro nika mbu ro mo naamanga badungu gamo adiaberã nitiro. Ono badungu apai kinaho kindi mo ata inongo ho ya. Waigu rengbe mo ka ne manga gu ingahe rengbe ka gbarasa gamo pabakure na Yekova? (Snz. 22:3) Wirina du rimori nga Kari asakipai tipa gupai naundo ri ri mangi bawene adiaberã. Ri arugu tiri na gupai nga, ka mo du ni gu Kristano naima nyaka rogo toro yo, si aidanga mo duadu na andiko bero tipa apai dunduko rogo gamo raka yo te. Ri aya: “Si aaida mi rugu tire na wai Yekova abi apai angianga ka peka fuo kina andiko ya.” Ho mo ageda Ziazia Kekeapai ni, mo sananga tiro nga: ‘Ginipai gi papara pai re agumbaha fere tipa ga Yekova berãpai? Ya mo si na abangua arengo rogoho nga gu rengbe ka undo re mi mangi gupai du ni ruruhe? Ka ngia wo duhe, waigu mi nika gbia undo ho mi nika mangapai kutini ni?’ (Tam. 19:7; Yes. 48:17, 18) Ka mo aageda Ziazia Kekeapai na kini berẽkurii gaha abangua arengo, mo nika bihe taata gbe ka manga agu adiaberã nafu ngbarago fu Yekova. Wa mo nikaa sonakumbatayo kindi, mo nika bi gupai nga si aidanga mo du na ndiko bero tipa ai pai te, bambiko mo nika ruga tiro na ga Yekova berãpai tipa apai.

13. Waigu rengbe wene abakure ka undo ro? (Asanza 13:20)

¹³ Mo sia agu abakure kpinyemu Yekova. Agu aboro mo asia yo ni abakure ima rengba ka undo ro mo da ni gu Kristano naima nyaka rogo toro yo. (Oni gedi Asanza 13:20.) Wirina du rimori nga Sara aazanga gari ngbarago. Fuani, pai amangi nga gu naaundo ri ri du na bakere ngbarago berewe. Sara aya: “Mi agbia wene abakure kina boro ti wene regbo. Mi gbiati kura paranga wirina ni dee anaadia regbo kina sa rogo aposo yo dunduko kaa mbakada gu Ngbaõbambu Sinziri du tipa wisigoho. Kura nakureami aundo re mi tona fu akaragapai ti regbo adunguratise. Mbiko gu undo nga ga abakureami, mi atona bi wisigopai nisase gbiati kparakpee na nyanyakipaha gbe. Mi atona ka sonosa nyanyaki pagume na Yekova na mi atona kadu na ngbarago berewe.”

14. Waigu Julien azi wene abakure?

¹⁴ Waigu rengbe mo ka zio bakure na agu aboro nika du na wene maapai kurii ro? Julien, nga guko namangasunge awere ni bakumba aya: “Ho mi adu ni ni wiri paranga, mi anaazio wene abakure ho ani anaamangasunge tungusapai ni. Agu abakure re adu zaaza, na i aundo re mi bi wai rengbe sunge tungusapai kadu ni pa ngbarago. Mi atona ka maa mangasunge Kindo ti aregbo dunduko ni gimi sasa. Mi arugu tire a na gupai nga gu ndupai mi aadunga ti ni na dungu wene abakure bere ya angia mi anaangera tipa kina agu abakure garã yo adu wa gimi. Fuo regbo kusa, mi azi wene abakure a Betere yo. Gayo kpiapai aundo re mi sia wene aũngbarago na gipai re asa re mi du mbembedi gbe na Yekova.”

15. Gini zahe nibipa abakure Pauro afuhe fu Timoteo? (2 Timoteo 2:20-22)

¹⁵ Ginipai si aida mo mangihe ka mo bi gupai nga dia regbo na kura boro rogo dungurati ima rengba ka gbarasa gamo pagume na Yekova? Pauro aima ino gupai nga kura aboro adu kinaho rogo dungurati naaberãnga na kini mangipai wa aKristano ya na sidu, ko ape gupai fu Timoteo nga ka ko kodinga tiko na yo ya. (Oni gedi 2 Timoteo 2:20-22.) Gaani pabakure na Yekova ima du na nyanyakipaha. Ani ima manga nyanyaki asadatise ka mbeda na Yekova, sidu, si aidanga ani mbu abakure i gbarasipa gu pabakure du dagbarani na ko re te.—Tam. 26:4.

WAIGU RENGBE MAA ASASA KA UNDO RO MO SONO ROGO TORO YO?

16. Gini ngbatunga asasa si aida mo siaha?

¹⁶ Mo moi wene asasa. Mo sia agu asasa nika nyakasa gamo idapase na ki undo ro mo da ni gu Kristano naima nyaka rogo toro yo. (Ef. 3:16) Ni kpiapai, mo ima rengba ka manga diaberã kaa wisigo Ziazia Kekeapai na kini gedihe dedede. (Tam. 1:2, 3) Watadu mo ima rengba ka asada kaa manga kparakpee dedede gbe na kpotoro yo. Isoke, mo naida ka yugo bakere zatise rogo wai mo asia aũngbarago na wai mo amangasunge na gamo regbo. (Ef. 5:15, 16) Ho Yekova abi ro ni mo nimangi nyanyaki asadatise tipa ka manga sonakumbatayo, ko nadu na ngbarago.

17. Waigu mo nika gbia undo ka mo aaundo kura aboro?

¹⁷ Ho mo aundo kura aboro ni, mo nada ni gu Kristano naima nyaka rogo toro yo gbe. Yesu aya: “Fu he ngba ti dia ha.” (Amo. 20:35) Mo nika gbia undo ni bakerehe ka mo amangasunge na bete gamo regbo gbiati gu ome du mo na ni wangia mo paranga boro tipa ka undo kura aboro. Ni kpiapai, mo ima rengba ka maa gu sasa nga ga ka undo sosono aboro gbiati agu aboro du kpokorokpokoro rogo gamo dungurati. Ni kpiapai, mo rengbe ka undo yo ni ndu mo ka ngbeka ahe fuyo watadu niundo mo yo i ini mangasunge na gu gayo aũsunge nga ga erekturoni. Ka si du nga mo nga gu wirina nga kumba, mo moi gu sasa nga ga da ni mounda abaakumba tipa gupai nga ka undo awirinamo bakere gbe. (Frp. 2:4) Mo naayugo nyemuse a fu agu aboro adunga rogo dungurati ya nitungusa mo gu wene pangbanga nga ga Kindo fuyo. (Mt. 9:36, 37) Ka rengba du, mo moihe ni gamo sasa kaa mangasunge fu Yekova ti aregbo dũ.

18. Waigu rengbe mangasunge Kindo ti aregbo dũ ka undo ro mo mangi sonakumbatayo?

¹⁸ Mangasunge Kindo ti aregbo dunduko rengbe ka fu badungu amomu foro tipa mo sono rogo toro yo. Ka si du nga mo nga bazakigene, mo ima rengba kadu na rengba ka ndu tipa Gu Sukuru Du Tipa Abatungusipa Kindo. Mo ima rengba ka mangasunge Betere yo watadu ka mangasunge gu meka arago nga ga siokrasia. Paranga wirina nga nazakigene du rimo ri nga Kaitlyn aya: “Dia regbo gene tungusapai yo na agu awirina naima nyaka rogo toro yo aima undo re mi sono rogo toro yo tingbafuo zio mi bapatiza. Gayo kpiapai aima fõngbadure yo mi naawisigo Baibiri ni bakerehe gbe na ki mbakadi gimi gene yugopai.”

19. Gini amaku mo nika gbiaha wa mo nikaa manga sonakumbatayo rogo toro yo kindi?

¹⁹ Wa mo nikaa ndu kumbatayo kaa sona rogo toro yo, mo nika gbia ngbarago ti badungu amaku. Mo amanganga sunge na omero tipa kaa manga agu apai anyaka nga paha ya te. (1 Yo. 2:17) Mo nika ne gu imisiri naye ti manga gbegberẽ adiaberã. Kuba gure, mo nika gbia ndikidi diabese gbiati ngbarago. (Snz. 16:3) Gamo wene kpiapai nika ngarasa akuaro aidipase, paranga yo na sosono yo a. (1 Tim. 4:12) Na gu nyakipaha kisusi a nga, mo nika gbia gu zereda gbiati ngbarago naye mbiko fu ngbarago fu Yekova na ti du na mbembedi pabakure na ko.—Snz. 23:15, 16.