Ani Ima Rengba ka Raka Nyeanye Kindi

1. Waigu du pa berã ani kurii ga Yekova kidohe tipa nyenye unga na nyanyakipaha?

YEKOVA nafu gu bawene kidohe furani nga ga “nyenye unga.” (Rom. 6:23) Ho ani aberã ni kuriipa gu kidohe Yekova afuhe furani, gaani nyemuse tipa ko nanyaka gbe. Oni berẽnga kurii gipai re: Gu Barani du ngbangbaturũ yo ima kpinyemu rani ni bakerehe gbe na pai ho nika kpara rani tiko te.

2. Waigu gu kidohe du tipa nyenye unga aundo rani?

² Ga Mbori kidohe tipa nyenye unga naundo rani ani hi gaani fudifudiapai awere. Zavura ho avurarani nikaa serekpo rani ni nga i nika imo rani, ani ambunga iriso Yekova te. Tipagine? Ndupai sa nga, ani ima ino gupai nga ka ani kpi ni rururani fu Yekova, ko nika zingisa rani be kpio na ani kidu na gu maabangirise nga ani akpingo berewe te. (Yo. 5:28, 29; 1 Kor. 15:55-58; Eb. 2:15) Tipagine rengbe ani kadu ti ni na gu kido nga, ani ima rengba ka raka nyeanye kindi? Oni bingo agi andu apai re.

YEKOVA NARAKA NYEANYE KINDI

3. Tipagine rengbe ani kadu ti ni na gu kido nga, Yekova ima rengba ka banda rani ani raki nyeanye kindi? (Atambuahe 102:12, 24, 27)

³ Ani ima ino gupai nga Yekova ima rengba ka banda rani ani raki nyeanye kindi mbiko ko nga Mburu unga, na ko naraka nyeanye kindi. (Tam. 36:9) Bete averesi du re nga gu nayugo gupai nga Yekova aima duho na ko nika duho nyeanye kindi. Atambuahe 90:2 nape gupai tipa Yekova nga ko aima duho “mbata rago nikaenga nye anye kindi.” Atambuahe 102 nape bangisapai wakina gure. (Oni gedi Atambuahe 102:12, 24, 27.) Na gu nebi nangia Abakuka ake gupai tipa gu Barani du ngbangbaturũ yo nga: ‘Ako Yekova gi Mbori, nga gimi Kparakpara Ziazia ko, mo adu nga kina ho mbata rago nikaenga te? Mo akpí nga te.’—Abak. 1:12.

4. Ya mo si naida ani bakibangirani ka si du nga si ima kpakara furani ka rugatirani na gu berãpai nga Yekova aima duho na ko nika duho nyeanye kindi? Oni sakingo rogo yo.

⁴ Ya mo si nikpakara kpakara ha foro ka rugatiro na gu berãpai nga Yekova aima duho ‘nyeanye’ kindi? (Yes. 40:28) Si ima kpakara fu dungu aboro a i rugutiyo na gupai re. Eriu aya tipa Mbori wẽ: “Ka i gedi nga agarãko te.” (Eyo. 36:26) Ono tie, pa zanga ani rugatirani na pai ayugongo gupai nga gupai re nga rengo te te. Ni kpiapai, wa vura duhe nga ani aruganga tirani wenengai na pa wai imarago amangasunge te, ya mo gure nayugo gupai nga he ho ti ni nga imarago te? Wa gu sa te! Wakina gure a, ani nga aboro ima rengba ka zanga rugatirani dunduko na wai rengbehe kadu nga Yekova aima duho na ko nika duho nyeanye kindi. Ono gere ayugongo gupai nga Mbori araka nga nyeanye kindi te te. Padu Bakusirani ho arunga riipa gupai ani narengbe ka rugatirani na ni watadu gu ani arengbanga ka rugatirani na ni ya te te. (Rom. 11:33-36) Na ko aima duho mbata fu ai he rogo haurago duho—kodihe na uru gbiati akerekuru. Yekova nakido rani na gupai nga, “ko namangi kpotosende ni gako tandu.” Na ko aima duho mbata fu ko “zaraga angbangbaturũ.” (Yere. 51:15; Amo. 17:24) Gini kura ndupai duho rengbe ani kadu ti ni na gu kido nga, ani ima rengba ka raka nyeanye kindi?

YEKOVA AKUSI RANI ANI RAKI NYEANYE KINDI

5. Gini maabangirise bambata arogotise adu na ni?

⁵ Si adu nga gu rakirakiahe dunduko Yekova akusihe ku auru kpotosende, si nika kpi akpi, kpara kusayo sa ti kina aboro. Ko afu gu kparakpara maabangirise fuyo nga ga zanga kpi. Ono tie, Yekova aza Adamu nga: “Gu ngua nga ngua ina wenepai na gbegberẽpai ka mo rí nga zuzuhe ya, bambiko ni gu rago ka mo ri zuzuhe mo akpí akpi ni rengo.” (Bam. P. 2:17) Ka aAdamu na Eva agisangba Yekova, ka i akpingo te. Si rẽarẽ tie ka da kuti gupai nga, ka Yekova ambuyo ambu kusa i ri “ngua unga.” Ka gipai re ayugu gupai nga ko ima idaha fuyo i ‘nye ni ungayo kindi.’b—Bam. P. 3:22.

6-7. (a) Gini kuraapai nayugo gupai nga i aakusanga aboro i kpi te? (b) Gini apai mo akpinyemu ka mangaha rogo paradizo? (Oni bi asura.)

⁶ Bete aboro birĩ-inohe ima bi agu agopai nga gu nayugo gupai nga, berãrani ima rengba ka igo badungu apai kisusi gu rengbe ani ka wirikaha rogo gaani bagizo raka yo awere. Gipai re ima du ni iiriwoho. Rogo 2010, gu kura kekeapai nga ga gu magazini nga Scientific American Mind ape gupai nga, berãrani ima rengba ka igo atingidapai nga gu bakio ho naima susa agu ambakadapai nga ga Terevizioni nga gu rengbe kadu tipa agarã 300. Na si ima rengba kadu nga, berãrani ima rengba ka banda dungu apai kisusi gure. Gere nayugo gupai nga Yekova ambakadi berãrani tipa si igi dungu apai kisusi agu apai ani awirikaha vura agarã yo 70 watadu 80.—Tam. 90:10.

⁷ Yekova aima kusa rani a na gu nyanyaki nyemupai nga ani naaraka araka kindi. Ziazia Kekeapai nape gupai tipa aboro nga, Mbori amoi “nyenye apai a ku berã boro yo.” (Batu. 3:11) Si du nga ndu gupai ani abi kpio ti ni ni vurarani. (1 Kor. 15:26) Ho ani ni naawoka ni nikerehe, ya mo ani ni naasungo gbua zanga manga ai pai na kini sungudi ka kpi? Oó. Dedede, ani ninaandu fuo amunganga na kini di adawa tipa ka husa gu kaza re. Nirengo, ani ninaamanga ai gupai rengbe ani ka mangaha tipa ka zanga kpi. Na ho gaani boro akpi ni, singia ni ni paranga ni watadu ni gbinza ni, ani nidu na bakere gberãrago tipa gbanga regbo. (Yo. 11:32, 33) Ani ima rengba kaa ndu kumbatayo kaa wirikapai nyeanye kindi na ani na gu nyanyaki nyemupai rogo rani yo nga ka raka nyeanye kindi bambiko gu Bakusirani nga boro nyemuse nakusi rani ngba gu gene re. Si tie ziazia nga, ko nika sa gupai asa nga ani raki nyeanye kindi. Ono ani na kina kura badungu andu apai berani ka ida kuti gupai nga, ani ima rengba ka raka nyeanye kindi. Ani bingo bete agu apai Yekova amangihe mbata kusayo na gu ko amangaha awere nga gu nayugo gupai nga ko ata arianga gako bambata ringbisapai te.

GA YEKOVA RINGBISAPAI ATA ARIANGA TIHE TE

8. Nibipa ga Yekova ringbisapai tipa rani, gini kidohe ani agbiaha rogo Yesaya 55:11?

⁸ Wa vura duhe nga aAdamu na Eva amangi ingapai na ki ye na kpio kurii awiriyo, Yekova aˈarianga berãko nibipa gako ringbisapai te. (Oni gedi Yesaya 55:11.) Gako ringbisapai kindi, nga ka fu gu momu furani nga ga raka nyeanye kindi. Ani ima ino agi apai re mbiko agu apai Yekova nagumbaha na ki mangihe tipa ka digiso gako ringbisapai.

9. Ginipai Mbori nakidohe tipaha? (Daniere 12:2, 13)

⁹ Yekova ima kidohe nga, ko nika zingisa agu aboro azingisa be kpio kpiki na ki fu gu momu fuyo nga ga raka nyeanye kindi. (Amo. 24:15; Tito 1:1, 2) Gu ruru kumba nangia Eyobo aima du na gu kido nga, Yekova naida aida ka zingisa agu aboro kpiki. (Eyo. 14:14, 15) Gu nebi nangia Daniere aima ino gupai nga, i nika zingisa aboro azingisa be kpio na i kidu na gu momu nga ga raka nyeanye kindi. (Tam. 37:29; oni gedi Daniere 12:2, 13.) Agu aYudo a naadu ti regbo Yesu aima ino gupai a nga, Yekova ima rengba ka fu “nyenye unga” fu gako ruru amoyambu. (Rk. 10:25; 18:18) Yesu aima fura tipa gi kidohe re bara dunguhe, na ko nitiko Bako aima zingisako be kpio.—Mt. 19:29; 22:31, 32; Rk. 18:30; Yo. 11:25.

10. Ginipai agu azingabekpio naadu mbata ayugoho? (Oni bi asura.)

¹⁰ Yekova nga Bafu-Unga na ko na ome beko ka zingisa aboro be kpio. Ko afu ome fu Eriya tipa ko zingisi wiri gu dekurugbo naadu Sarefata yo. (1 Aba. 17:21-23) Kusa, gu nebi nangia Erisa azingisi wiri gu dee nangia boro Sunema. (2 Aba. 4:18-20, 34-37) Agu azingabekpio re gbiati agu akuraha nayugo gupai nga, Yekova na kina ome beko ka zingisa aboro be kpio. Ho Yesu adu ni auru kpotosende, ko aima yugo gupai nga Bako aima fu gu ome re fuko. (Yo. 11:23-25, 43, 44) Na wa du Yesu awere ngbangbaturũ yo, i ima ‘asia pa ahe fuko dunduko ku ngbangbaturũ yo na ku sende no.’ Sidu, ko ima rengba ka digiso gu kidohe nga, agu aboro “dunduko du rogo amurã yo” i nika zingisayo azingisa be kpio na gu maabangirise nga ga raka nyeanye kindi.—Mt. 28:18; Yo. 5:25-29.

11. Waigu motumo tumorii asaha furani taata tipa ani raki nyeanye kindi?

¹¹ Tipagine Yekova ambu Wiriko ti ni ko naima kpinyemuko gbe ko kpi iigirã kpio? Yesu afu karagapai kuti gu sanahe re ho ko aya ni wẽ: “Mbori akpi nyemu aboro akpi zegino dũ, wa ko afu bangisa Wiriko, ya gu ni ka idi pa ko ni kpi nga te, ono nyenye unga du adu be ni.” (Yo. 3:16) Nifu Mbori Wiriko ni motumo tipa ka dada gaani aingapai, ko asaha furani taata tipa ani gbia nyenye unga. (Mt. 20:28) Gu mokedi nangia Pauro asaki gi nyanyakipa papara ga Mbori ringbisapai re ho ko ake gupai ni nga: “Wa kpio aye be boro, a wo zinga kangba aboro be kpio aye be boro. Bambiko wa aboro nakpi akpi dunduko rogo Adama yo, a wo rogo Kristo yo i adu adu ni ungayo dunduko.”—1 Kor. 15:21, 22.

12. Waigu ga Mbori Kindo nika undo ka digiso ga Yekova ringbisapai tipa rani?

¹² Yesu ayugupai fu apefuoko tipa i naamanga kparakpee tipa ga Mbori Kindo ye na gupai Mbori akpinyemuhe mangi auru kpotosende. (Mt. 6:9, 10) Gu papara ga Mbori ringbisapai re nga aboro raki nyeanye kindi auru kpotosende. Tipa ka manga gipai re, Yekova ima maa Wiriko ni Bakindo gu Kindo nga ga Masiya. Na Mbori aima digo ni dungura aboro du bange yo nga 144,000 auru kpotosende, nga aguyo nika mangasunge na Yesu tipa ka digiso gupai Mbori akpinyemuhe.—Yugo. 5:9, 10.

13. Ginipai Yekova amangaha awere, na ginipai si aida mo mangihe?

¹³ Yekova nadungura “bakere rimbasa aboro” awere, na ko naraba yo tipa i raki tii gu zogarago nga ga gako Kindo. (Yugo. 7:9, 10; Yak. 2:8) Wa vura duhe nga badungu aboro rogo zegino areme ni kparakakparaka yo mbiko sogote na vura, agu aboro nga “bakere rimbasa aboro” namanga nyanyaki asadatise tipa ka dia ngbatunga asogote dunduko kusayo tiyo. I nayugo gipai re rogo gayo mangaapai yo nga i nataka gayo abasape ni marã sopabino. (Mika 4:3) Kuba gupai nga i naasovura nga gu naye na bakere kpio, i naundo aboro i gbia “ndikidi unga” niyugo yo pai fuyo tipa ndikidi Mbori gbiati gako ringbisapai. (1 Tim. 6:19) Gayo aborokporo ima rengba ka sogayo watadu i ima rengba kadu na zingo marã mbiko i nasongoda ga Mbori Kindo, ono Yekova ima rengba ka fu agu ahe fuyo du yo na zingoho. (Mt. 6:25, 30-33; Rk. 18:29, 30) Agu arengo re nakido rani na gupai nga, ga Mbori Kindo nga ndikidipai na si nikaa ndu kindi kumbatayo kaa digiso ga Yekova ringbisapai.

BAWENE APAI DU KUMBATAYO

14-15. Waigu gu ga Mbori kidohe du tipa dia kpio nyeanye kindi kusayo nika digisotihe?

¹⁴ Yesu awere nga Bakindo ga Mbori Kindo ngbangbaturũ yo na ko nika digiso agu akidohe dunduko Yekova namangihe. (2 Kor. 1:20) Natona rogo 1914, Yesu aima digo ni dibe avurako. (Tam. 110:1, 2) Yesu na agu aboro ko nika zogarago na yo nika gbarasa gbegberẽ aboro dunduko kusayo barambeda auru kpotosende.—Yugo. 6:2.

¹⁵ Ti regbo ga Yesu Zogarago Tipa Agarã Kutu, ko nika zingisa kpikpi aboro na ki undo aboro giasangba dunduko tipa i da ni rengberengbe yo. Tingbafuo yangara asada, agu aboro Yekova nika sarangbanga yo nga i du ni ruruyo nika dia ‘kumbo ringara, ki nye anye kindi.’ (Tam. 37:10, 11, 29) Si nipa ngbarago tie nga, i nika gbarasa, ‘yangara vurarani nga kpio.’—1 Kor. 15:26.

16. Ginipai si aida si du ni gu nyanyakipa ndupai nasarani ani irisi Yekova?

¹⁶ Ani ima bi gupai rogo gi kekeapai re nga, gaani maabangirise tipa ka raka nyeanye kindi, mburuhe nyanyaki rii Fugo Mbori. Gu maabangirise re ima rengba ka undo rani ani nye ni rururani ti gi kpakarakpakara yangara arame re. Ono tipa ka sa ngbarago ti Yekova, si naida kura badungu apai aida tipa si fõngbaduraniyo susi gu gbua nga kadu na nyemu ka raka nyeanye kindi. Gaani nyanyakipa ndupai ani aida ka nye niruru rani ti ni fu aYekova na Yesu nga, ani ima kpinyemu yo dudunguro. (2 Kor. 5:14, 15) Gipai re nafõngbaduraniyo ani wiriki yo na kini pepa gu maabangirise du ani na ni zaaza fu kura aboro. (Rom. 10:13-15) Ho ani awirika wai ni kadu ni agu aboro adunga na gbangbati ya na kidu ni agamuhe, ani nada ni gu ngbatunga aboro Yekova aida i du ni abakureako nyeanye kindi.—Eb. 13:16.

17. Ginipai si aida ani ni basasa dunduko mangihe? (Matayo 7:13, 14)

¹⁷ Ya mo ani adu dagba agu aboro yo nika gbia nyenye unga? Yekova ima fu gu momu re furani. Awere, si naida ani sia ka ndu ngba gu gene nandu sa unga. (Oni gedi Matayo 7:13, 14.) Raka nika du wai ho ani nikaa raka ni nyeanye kindi? Ani nika sakapai tipa karagapai kuti gu sanahe re rogo gu kekeapai ngbefuo gere.