Be Yekova ni Guruhe Te

1. Waigu Moize ayugu kido kuti Yekova ho ko angbe ni fu aYisaraere ka kusayo Ezipeta yo?

GU BUKU nga AEbere fura tipa dungu aboro nga aguyo naadu na idapase kuti Yekova. Boro sa dagba agu aboro re naadu na bakere idapase nga Moize. (Eb. 3:2-5; 11:23-25) Ko ayugu idapase ho ko angbe ni kumbatayo fu awiri aYisaraere ka kusayo Ezipeta yo. Ko aagundenga be gu bakere Bakindo nangia ga Ezipeta ko na gako abanzengere te. Ko akido kuti Yekova, na ki ngbe kumbatayo fu aYisaraere rogo Zamba Baime na kusa, ho i du ni ngbakungbo yo. (Eb. 11:27-29) Dungu aYisaraere akapa akapa singia Yekova angera fuoyo, ono Moize aandu kindi kumbatayo kaa kido kuti Mbori. Mbori aima ngerefuo yo, Ko afu riahe na ime fuyo tipa gupai nga i raki mbikoho ngbakungbo yo nga gu ba ahe akuranga gbe rogoho ya.a​—Gate 15:22-25; Tam. 78:23-25.

2. Tipagine Mbori asana Moize ti ni nga: “Be Yekova ni guru he?” (Pa Geda Aboro 11:21-23)

² Ono tifuo garã sa kusa, wa vura duhe nga Moize adu na gi nyanyaki idapase re na ki kusi aYisaraere Ezipeta yo, Moize atona ka kapa singia Yekova afu pasio fuyo a wa gu Ko apehe. Moize ainongo wai ka Yekova arengbe ka fu pasio si ki rengbe na gi dungu amirioni aboro naadu ngbakungba yo re te. Yekova afu karagapai fu Moize ni sanako ko na gu sanahe nga: “Be Yekova ni guru he?” (Oni gedi Pa Geda Aboro 11:21-23.) Ane, gu fugo nga “be Yekova” nafura tipa ga Mbori ziazia toro watadu gako ome rogo mangapai yo. Gupai Yekova aasana Moize na ni nga, ‘Ya mo mo naberã gupai nga ka mi mangingo gupai gumba mi he nga mi nika mangaha te?’

3. Tipagine duhe ti ni ni nyanyakipa pai furani tipa ani berẽkurii pa gu regbo Moize na aYisaraere aadunga na gu kido nga Yekova aima rengba ka fu guhe fuyo i aaidaha ya?

³ Ya mo mo abakingo bangiro singia Yekova angerafuo gamo azingo nga ga borose watadu gu nga ga gamo aborokporo? Singia mo aberẽhe wo watadu mo aberãnga ha wo te, ani wisigingo gu raka nangia ga Moize na ga agu aYisaraere naadunga nakido kuti Mbori nga ko nika ngerafuo yo ya. Na ani nika bi bete averesi nga gu nika nyakasa gaani kido kuti Yekova nga ko nika ngera angerafuo rani ti aregbo dũ.

ONI WIRIKIPAI BE MOIZE NA AYESARAERE

4. Tipagine dungu aYisaraere atona ka kapa ti ni nga Yekova arengbanga ka ngerafuo yo te?

⁴ Tipagine dungu aYisaraere atona kapa ti ni nga Yekova aarengbanga ka ngerafuo gayo azingo te? Gu rikaaboro nangia aYisaraere na gu “bakere rimbasa kungba aboro” naangianga aYisaraere ya, aye kadu rogo bakere ngbakungbo tipa bete regbo wa i aandu nunguro Ezipeta yo ku rogo Ringara Mokido. (Gate 12:38; Pa Rug. 8:15) Gu dungu aboro nangianga aYisaraere ya ambu be ri manu gbiati aYisaraere na i dunduko naakpakanahe tipa gipai re fu Moize. (Geda 11:4-6) Aboro aaida ka ri gu pasio na gu kura ahe i anaarihe Ezipeta yo. Bambiko wa aboro akpakanahe fu Moize, ko aberẽ gupai nga ko du si aaida ko gbata pasio ka fuhe fuyo dunduko, ono ko aainongo wari ka ko agbiaha ni te.​—Geda 11:13, 14.

5-6. Ginipai rengbe ani ka wirikaha ti wai gu kura kungbo aboro adu na maapai kurii aYisaraere?

⁵ Agu aboro naangianga aYisaraere ya aadunga na tambuahe tipa gu dungu weneapai Yekova amangihe fuyo te, na aYisaraere atona ka berã wakina yo a. Kina gu bangisa pai re rengbe ka manga tipa rani a. Ho agu aboro du pati rani adunga ni na tambuahe ya, ani ima rengba a ka tona du na zanga tambuahe tipa agu ahe Yekova afuhe furani. Ani ima rengba ka tona berã tipa agu ahe naadu berani mbata watadu ani ima rengba ka tona kpi gu kura aboro tipa agu ahe du be yo. Ono ani nika du na ngbarago ka ani wiriki ka rengba kina be agu ahe du berani.

⁶ Si aaida aYisaraere tingidi gupai nga Mbori aima kido yo nga ho i nika da ni rogo vovo kpuyo, i nika du na badungu aũborose beyo. Si adu nga gu kidohe re nika digiso tihe rogo Ringara Mokido, angianga ho i adu ni ngbakungbo yo ya. Wakina gure a, kuba gupai nga ani namaa berãrani tipa guhe rengbe ani ka gbiaha rogo gi sino raka re, si naida ani berẽpa gupai Yekova nakido paha kumbatayo rogo vovo zegino. Ani ima rengba a ka berẽpa agu averesi rengbe ka undo rani ani sonosi gaani kido kuti Yekova.

7. Tipagine rengbe ani kadu ti na gu kido nga be Yekova ni guruhe te?

⁷ Wa vura duhe wo, mo ima rengba ka bakabangiro nga tipagine Mbori asana Moize ti ni nga: ‘Be Yekova ni guru he?’ Si wa ka i ya Yekova aˈasada ka undo Moize tipa ka ko berẽnga kina pa gu ome du Beko sa ya, ono gupai rengbe ko ka mangaha. Sidu, wa vura duhe nga aYisaraere adu ngbakungbo yo tuturũ, Yekova aima rengba ka fu pasio fuyo kpaima. Mbori ayugu gako ome na ‘nyanyaki beko ni taĩtaĩ beko’. (Tam. 136:11, 12) Sidu, ho du ani ni rogo kpakarapai, ani ima rengba kadu na gu kido nga Yekova ima rengba ka undo rani wa du ani ni basasa rogo ai gu ba du ani rogoho.​—Tam. 138:6, 7.

8. Ginipai rengbe ka undo rani ka ani mangingo kina gu bangisa ingahe dungu agu aboro naadu ngbakungbo yo amangihe ya? (Oni bi sura a.)

⁸ Yekova amangi gupai ko akidohe tipaha na ko akedi ambirigba ni badungu ra fu gako aboro. Ono tie, aYisaraere atambuanga Mbori tipa gi iiriwopai ko amangihe re te. Kuba gure, i aadungura ambirigba susi agu ra i aaida na ami. I amangisunge uru na yuru pitipiti tipa ka dungura dungu ambirigba. Ngbadu Yekova aimi nikerehe kuti agu aboro “nakpi nyemu he ni kere he” re na ko ki fu mbusa fuyo. (Geda 11:31-34) Ani ima rengba ka wirikapai ti gu kpiapai re. Si aidanga ani da ni aira angbu te. Singia ani nga airakumuko watadu airarungo, si naida ani ‘dúngura ũkumuko ni gaani ku ngbangbaturũ yo’ ni sonosa ani gaani pagume na Yekova gbiati Yesu. (Mt. 6:19, 20; Rk. 16:9) Ka ani mangihe wo, ani ima rengba kadu na gu kido nga Yekova nika fuhe afu furani.

9. Ginipai rengbe ani kadu na kido tipaha?

⁹ Yekova nga regerege ka undo gako aboro areme a. Wa vura duhe wo, anga si nga zingo marã watadu riahe amanganga rani te te.b Ono ani ima rengba kadu na gu kido nga Yekova ambunga rani te. Ko nika ngera angera fuo rani rogo gaani akpakarapai yo. Waigu rengbe ani ka yugoho nga ani nakido kuti Yekova ko ngerefuo rani? Ani bingo akpiapai ue: (1) ho ani agbata sunge ni ka ngerafuo gaani aborokporo na (2) ho ani abakabangirani ni singia marã adu berani ngba gbinza rani.

MANGAPAI KUTI GU KPAKARAPAI NGA GA ZINGO MARÃ

10. Gini kpakarapai nga ga zingo marã rengbe ani ka gbiatirani na ni?

¹⁰ Wa digido gi sino raka re ambeda, ani ima rengba kadu na gu kido nga zingo marã nikaa kio kina kumbatayo. Agu akpakarapai nga ga birĩ-zogarago, vura dagba abanzengere, gberãngo, watadu vovo riri kaza ima rengba ka sa gupai nga ani mangisunge na marã ni bakerehe watadu ani ima rengba ka zanga gaani sunge, agu ahe du berani watadu kpurani. Si ima rengba kadu nga si naida ani gbata vovo sunge rogo gu ba du ani rogoho watadu ani ima rengba ka berã pa ga na gaani aborokporo kurogo kura ba tipa ka ngerafuo yo. Ginipai rengbe ka undo rani tipa ani mangi agu adiaberã nga gu nika yugo gupai nga ani nakido kuti Yekova?

11. Ginipai rengbe ka undo ro mo mangipai kuti gu kpakarapai nga ga zingo marã? (Ruka 12:29-31)

¹¹ Si ni nyanyakipa pai mo peke pa gamo akpakarapai fu Yekova. Gipai re nika undo ro ni bakerehe. (Snz. 16:3) Mo sana ko tipa tatamana tipa ka manga agu adiaberã du ni wenehe na tipa ko undo ro mo nye zezeredi na ka zanga ‘saka pai kpotoro yo’ tipa gamo pai. (Oni gedi Ruka 12:29-31.) Mo naasana ko kindi tipa ko undo ro mo rengbe kina be agu ahe du bero. (1 Tim. 6:7, 8) Mo mangi wetekapai rogo gaani awaraga yo tipa ka gbia agu aberãpai rengbe mo ka mangapai kutini ho du mo ni na zingo marã. Dungu aboro ima pe gupai nga agu avidio na kekeapai du rogo jw.org tipa marã ima undo yo.

12. Gini asanahe rengbe ka undo Kristano tipa ni mangi wene adiaberã tipa gani aborokporo?

¹² Kura aboro aima ida pa gu sunge nga gu nadia yo kusayo pati gayo aborokporo tuturũ, ono kusa i aye ka bi gupai nga wene diaberã nangiaha te. Mbata fu mo idi pa sunge, ka mo berẽnga kina pa gu marã mo nika gbiaha ya, ono mo berẽpa singia si aundo ro na gamo aborokporo mo nye mbembedi na Yekova. (Rk. 14:28) Mo sana tiro nga: ‘Ginipai rengbe ka manga tipa gaani rogatise ho ka mi mera ni? Ya mo mi adu na rengba kadu pati adunguratise dunduko, tungusapai, na kini di regbo na awirinami?’ Ka si du nga agude kina bero, mo ima rengba ka sana tiro na gi nyanyaki sanahe re: ‘Waigu rengbe mi ka sonosa awire “ni ga Gbia rabahe na rugahe” ka si du nga mi pati yo te?’ (Ef. 6:4) Ho mo amanga diaberã ni, mo mangipai kuti gupai Yekova aidaha, angianga kuti agu apai agumero watadu abakureamo apehe nga aguyo amanganga pai kuti gupai Baibiri apehe ya.c Tony, nga gu ko naraka Asia yo ku dioyo, agbia dungu asunge rogo kura ringara nga gu ka ko agbia bakere marã ti ni. Ono tie, tingbafuo manga ko kparakpee tipa gipai re na ki fura na diako, ko adiberã ka zanga ndu tipa gu sunge re na kuba gure, ko aberẽ tipa wai rengbe yo ka aria gayo raka si du taata. Areme, Tony nape gupai nga: “Mi aima du na mamu ka undo dungu aboro i ini Yekova na awirina na bakere ngbarago ka iriso Yekova. Gaani aborokporo ima ino gupai nga ka ani aaraka kuti gupai du rogo Matayo 6:33, Yekova nika ngera angerafuo rani.”

MBAKADAPAI TIPA GAANI AZINGO BOROSE KUMBATAYO

13. Ginipai rengbe ani ka mangaha awere tipa gupai nga marã du adu berani ho ani nika gbinza ni?

¹³ Ani ima rengba a ka yugo bakio gaani kido kuti Yekova ho ani amanga mbakadapai tipa ho ani nika gbinza ni. Baibiri nape gupai furani nga ani mangisunge nyanyaki tipa gaani aũborose kumbatayo. (Snz. 6:6-11) Ka si du nga rengba ho berani tipa igo marã kumbatayo, si ni wenepai ani mangihe wo. Kina rengo du nga ha nga marã naundo rani aundo ho du ani ni rogo zingo. (Batu. 7:12) Ono tie, si aidanga ani sa marã si du ni bambatapai rogo gaani raka yo te.

14. Waigu rengbe AEbere 13:5 ka undo rani ka ani naabakanga bangirani gbe ya?

¹⁴ Yesu apepa gu pangbanga nga gu nayugo gupai nga, ka boro aigo marã ono “ka ni akumuko nga fu Mbori ya,” ni nga iramungo. (Rk. 12:16-21) Boro ho ini gupai nika manga gba te. (Snz. 23:4, 5; Yak. 4:13-15) Gu kura akpakarapai kinaho ani agbiatirani na ni wangia ani apefuo Kristo. Yesu ape gupai nga, ka ani aida kadu ni apefuoko, si naida ‘ani mbupa’ gaani ahe dunduko tipa kadu ni gako abawiriki. (Rk 14:33) Gere nga gupai namangi tipa agu AKristano naadu Yuda yo ti regbo Amokedi. Na i adu regerege ka mbupa gayo ahe. (Eb. 10:34) Ti gi gaani regbo re, dungu awirina aima zanga gayo ahe mbiko gupai nga i aidanga ka songoda gupai nga ga birĩ-zogarago te. (Yugo. 13:16, 17) Ginipai naundo yo i mangi gupai re? I adu nakido kuti ga Yekova akidohe nga: “Mi ahe nga unda ro wa sa te, mi ambú nga ro a wa sa te.” (Oni gedi AEbere 13:5.) Ani namanga gupai rengbe omerani na ni tipa gaani raka kumbatayo, na ani na gu kido nga Yekova nika undo rani aundo ka gupai mangi ani aaberãnga paha ya.

15. Gini ruru bipai si aida agu avunguagude nga aKristano du na ni tipa awiriyo? (Oni bi sura a.)

¹⁵ Rogo gu kura angbatunga, arogotise navunga agude tipa i undo yo na marã ho i nika gbinza ni. Ho i amangaha ni wo, agi arogotise re nabi awiriyo nga “mbakadapai tipa gbinza yo.” Ono Baibiri nape gupai nga si naida avunguagude ngerefuo awiriyo. (2 Kor. 12:14) Na kina rengo dunga ha nga, ho avunguagude agbinza ni, i ima rengba ka ida gupai nga awiriyo ngerefuo yo, na dungu agude na ngbarago ka manga gipai re. (1 Tim. 5:4) Ono agu avunguagude nakido kuti Yekova ima ino gupai nga i rengbe kadu na ngbarago ho i aundo awiriyo ni tipa i du ni ga Yekova amoyambu kuba gu nga ka sonosa awiriyo na gu sasa nga i gbia marã tipa ka ngerafuo yo ho i nika gbinza ni.​—3 Yo. 4.

16. Waigu rengbe avunguagude ka undo awiriyo tipa gupai nga i rengbe ka ngerafuo tiyo kusa? (AEfeso 4:28)

¹⁶ Ho mo aundo awiro ni tipa wai rengbe yo ka ngerafuo gayo azingo kusa, mo yuguhe fuyo nga mo nakido kuti Yekova. Ho du yo ni kindi ni rukutu agude, mo yuguhe fuyo nga mangasunge nyanyaki nga wenepai. (Snz. 29:21; oni gedi AEfeso 4:28.) Wa i nikaa sona, oni undoyo i mangisunge nyanyaki sukuru yo. Avunguagude ima rengba ka manga wetekapai tipa ka gbia gu bangua arengo nga ga Baibiri tipa ka undo awiriyo i mangi agu adiaberã nga ga tatamana tipa gu ngbatunga wirikapai i nika wirikaha. Gu sasa nga ga avunguagude nga, ka undo awiriyo tipa i rengbe ka ngerafuo tiyo na kidu na regbo tipa ka tungusapai gbe watadu ka mangasunge abazakigene.

17. Ginipai rengbe ani kadu na kido tipaha?

¹⁷ Agu aboro nakido kuti Yekova ima rengba kadu na gu kidonga ko nika ngera angerafuo gayo azingo. A wa ani ambeda kuti gi digido sino raka re, si naida ani kido kuti Yekova. Ka kina ginipai vura manga, si naida ani du na gu kido nga Yekova nika mangasunge na gako ome tipa ka ngerafuo gaani azingo nga ga borose. Ani ima rengba kadu na gu kido nga Yekova nika ngera angerafuo rani rogo agu aba du ani rogoho.