‘Oni Sía gu ni . . . Oni ka Manga pa Ni’

1. Ginipai si aida ani mangihe tipa kadu na ndikidi ngbarago, na tipagine? (Yesaya 48:17, 18)

GU BARANI du ngbangbaturũ yo ima kpinyemu rani ni bakerehe, na ko naida ani gbia ngbarago ti raka awere na kumbatayo. (Batu. 3:12, 13) Ko ambakadi rani tipa ani mangi agu apai du ni iiriwoho. Ono tie, ko aafunga gu rengbanapai furani du tipa zoga tirani watadu ka maa gaani ndiko ni tirani tipa gupai du ni ruruhe na gu du ni irairaha te. (Batu. 8:9; Yere. 10:23) Ko ima ino gupai nga tipa ani du na ndikidi ngbarago, si naida ani raki kuti gako arugute.​—Oni gedi Yesaya 48:17, 18.

2. Ginipai Satana aida ani idi kutini, na waigu Yekova nakaragapai kuti gu kitangbangase re?

² Satana naida ani idi kuti gupai nga ani ima rengba kadu na ngbarago zanga Yekova, na aboro ima rengba kadu na diabese ka zoga tiyo. (Bam. P. 3:4, 5) Tipa ka yugo na ni nga Satana nga iraziree, Yekova ambugene fu wiri aboro i zogo tiyo tipa bete regbo. Si taata furani tipa ani bi gupai nga ga Satana zogarago na diabese te. Ono tie, Baibiri fura tipa dungu akumba na adee nga aguyo naadu na ngbarago bambiko i aairiso Yekova. Yesu Kristo nga gu boro naadu na ngbarago kisusi yo dũ. Rogo gi kekeapai re, ani nika sakapai tipa ndu gupai Yesu asia ka iriso Yekova ti ni. Na tifuo gure, ani nika sakapai tipa ndu gupai si aida ani naairiso gu Barani nga Yekova ti ni. Ni yangaraha, ani nika fugö gu bete ndu apai ani asia ka iriso Yekova ti ni.

NDU GUPAI YESU ASIA KA IRISO YEKOVA TI NI

3. Ginihe Satana afuhe fu Yesu, na ginipai Yesu asia ka mangaha?

³ Ho Yesu adu ni auru kpotosende, ko adu na siapai tipa gu boro ko nika iriso ni. Ngbutuko fuo Yesu zi bapatiza, Satana aya ko ima rengba ka fu agu akindo dunduko du auru kpotosende ka si du nga Yesu nika irisoko kandara bara sa gbua. Yesu akaragapai nga: “Satana, mo gúari erẽ! bambiko si ni keke he ya, ‘Mo irisi Gbia nga gamo Mbori mo rá fu kina ko.’” (Mt. 4:8-10) Tipagine Yesu amangi gu siapai re ti ni? Oni bingo bete gu nduapai re.

4-5. Gini bete nduapai Yesu asia ka iriso Yekova ti ni?

⁴ Gu bangua ndupai Yesu asia ka iriso Yekova ti ni nga nyemuse​—Yesu adu na dudunguro nyemuse tipa Bako. (Yo. 14:31) Na kurigure, Yesu aairiso Yekova bambiko si angia rurupai ka mangaha wo. (Yo. 8:28, 29; Yugo. 4:11) Yesu ima ino gupai nga Yekova nga Bakusiahe, na ko ima rengba ka kido kutiko, na ko nafu ahe furani kpaima. (Tam. 33:4; 36:9; Yak. 1:17) Yekova aima digo nipe agu apai nga rengo fu Yesu na ko du nafu agu ahe dunduko fuko naadu beko. (Yo. 1:14) Satana kia ti Yekova. Satana du nasa gupai nga aboro mangi ingapai na ki kpi. Ko nga iraziree na boro ngbaduse na ko aidanga wenepai tipa kura aboro te. (Yo. 8:44) Yesu aima ino Yekova wenengai na ko aima ino Satana wenengai a. Ono tie, ko aaidanga kadu wa Satana na ki samungu kuti Yekova te.​—Frp. 2:5-8.

⁵ Gu kura ndupai Yesu asia ka iriso Yekova ti ni nga, ko angere kumbatayo tipa gupai pa nye ko ni ruruko ti ngba gako sunge nika digisoho. (Eb. 12:2) Yesu aima ino gupai nga ka ko nye ni ruruko, ko nika ziasi rimo Bako na ki di ingapai kusayo na kpio.

NDU GUPAI SI AIDA ANI IRISI YEKOVA TI NI

6-7. Tipagine dungu aboro airisongo Yekova ti ni areme ya, ono tipagine si aida ani irisi kina ko sa ti ni?

⁶ Dungu aboro areme airisongo Yekova te mbiko gupai nga, i ainongo gu wene asinoko du ti ni te na i ainongo gu wene apai ko namangihe fuyo te. I wakina agu aboro Pauro atungusipai fuyo Atenai yo. I ainongo Mbori te.​—Amo. 17:19, 20, 30, 34.

⁷ Pauro asakipai fu aboro Atenai nga ndikidi Mbori “nafu unga fu aboro dũ, na onga na ahe dunduko.” Ko ape kura pai nga: “Ani ni ungarani, ki nita ata, ki du kina ho rogo ko yo.” Mbori nga Bakusiahe, ko ‘amangi arika aboro dunduko wa sa,’ si du rẽ ko arẽ na gaani iriso ti ni.​—Amo. 17:25, 26, 28.

8. Ginipai Yekova nikaa manganga ha ya? Oni sakingo rogoyo.

⁸ Wa duhe nga Yekova nga Bakusiahe na ni Bakere Bakindo nga ga zegino, ko ima rengba ka manga ai gupai ko aida ka mangaha. Ka ko idi ka sa rani ngbaome ani irisiko, ko ima rengba ka mangaha wo. Ono tie, ka Yekova mangingo pai wo te. Kuba gure, ko ima fu dungu nduapai furani nga ko kina ti ni, na ko ima kpinyemu rani ni bakerehe gbe. Ko naida dungu aboro du ni abakureako nyeanye kindi. (1 Tim. 2:3, 4) Sidu, Yekova naraba rani ti ni ani yugupa gu wene apai ko nika mangaha fu aboro na gu gene ko nika mangaha ngbaha. (Mt. 10:11-13; 28:19, 20) Na ko ima fu dungurati furani ani airisiko rogoho na kini gbia gu undo ani aidaha be agu abaakumba nakpinyemu rani.​—Amo. 20:28.

9. Ngba gini gene Yekova nayugu gako nyemuse fu aboro dũ?

⁹ Yekova nayugo gako nyemuse ni fuko wene ahe fu agu aboro aidanga kuti gupai nga ko kina ti ni ya. Oni berẽnga kurii gipai re: Vuru dungu kutu agarã yo, dungu aboro ima diaberã ka manga gupai du ni ruruhe bangiriyo na gupai du ni irairaha kuba gupai nga ka giasangba Yekova. Wa vura duhe wo, Yekova nandu kumbatayo kindi kaa fu guhe fuyo i aidaha na kini gbia ngbarago ti raka. (Mt. 5:44, 45; Amo. 14:16, 17) Mbiko ko, i ima rengba kadu na abakure na aborokporo nga aguyo nakpinyemu yo, i ima rengba ka vunga agude, i ima rengba ka mangasunge, na i ima rengba ka gbia ngbarago rogo raka yo. (Tam. 127:3; Batu. 2:24) Agi agopai re nayugo gupai nga gu Barani du ngbangbaturũ yo ima kpinyemu rani wa du ani dunduko. (Gate 34:6) Ani bingo agu andu apai awere ani asia ka iriso Yekova ti ni na wai ko afu maku fu agu aboro nasia ka irisoko.

GU NDUPAI ANI ASIA KA IRISO YEKOVA TI NI

10. (a) Gini bangua pai ani airiso Yekova ti ni? (Matayo 22:37) (b) Waigu mo nagbia undo ti ga Yekova zerangbaduse? (Atambuahe 103:13, 14)

¹⁰ Wakina Yesu, gu bangua ndupai ani airiso Yekova ti ni nga gaani dudunguro nyemuse tipa Ko. (Oni gedi Matayo 22:37.) Ani nambeda koyo du Yekova ni ho ani awirikapai ni tipa wene asino ko. Ni kpiapai, oni bingo wai du Yekova na zerangbaduse na ani. Ho aYisaraere abasasangba Yekova ni, ko azungodi yo nga: “Oni sá tironi, aboro ni ba sa sa ti gayo gbigbitapai.” (Yere. 18:11) Yekova ima ino gupai nga ani nga kpakpa aboro na ani nga nvutu sende. (Oni gedi Atambuahe 103:13, 14.) Ho mo aberãpa agu aregbo ni Yekova nambupai foro, ya mo si asanga ro tipa mo irisiko nyeanye kindi te?

11. Gini bete nduapai duho ani nasia ka iriso gu Barani du ngbangbaturũ yo ti ni?

¹¹ Gupai nasa rani a ani du na nyemu ka iriso Yekova nga si nga gu rurupai si aida ani mangihe. (Mt. 4:10) Kurigure a, ani ima ino gupai nga ka ani nye niruru rani fu Yekova, dungu wene apai nika manga ni sangbana gipai re. Ho du ani ni niruru rani fu Yekova, ani naziasi rimoko na ki yuguhe nga Bakitingbanga nga iraziree na ki sa ngbarago ku kpoto Barani yo. Na ka ani sia ka iriso Yekova areme, ani nika du na gu maabangirise nga ga irisoko nyeanye kindi!​—Yo. 17:3.

12-13. Ginipai ani awirikaha ti gu kpiapai nga ga Jane na Pam?

¹² Ho du ani ni kindi ni paranga agude, ani ima rengba ka wirika ka kpinyemu Yekova ni bakerehe gbe, na gaani nyemuse tipa ko nika nyaka wa ani nikaa sona. Oni bingo gupai namangi tipa awirina ue nangia agume rimoyo angia Jane na Pam.a Garã Jane adunga 11 na garã Pam kidu nga 10 ho i atona wisigo Baibiri ni. Wa vura duhe nga avunguyo aadunga na nyemu ka wiriki Baibiri te, i aidihe fu Jane na Pam i ni wirikipai na aDezire Yekova kinagu ka si du nga i nikaa ndu a wa sa na gayo aborokporo kurogo gayo pambori ti digido poso. Jane aya: “Gupai aDezire Yekova aayugoho fere rogo Baibiri yo aundo re tipa ka mi di nga kere angua watadu ka manga wasiwasi kodaba sukuru yo wa gu kura agude aamangaha ya.”

¹³ Tingbafuo bete agarã, agi adegude re ada dunduko ni abatungusipai. Kusa, i atona sunge abazakigene wa i aangera fuo gbinza avunguyo. Ho i angera ni kusayo rogo gayo raka yo, Jane aya: “Mi awiriki gupai nga Yekova nangera angerafuo abakureako a wa gu 2 Timoteo 2:19 apehe nga, ‘Gbia ini agu yo nga gako yo.’” Kango ho tipa gupai nga Yekova nangera angerafuo agu aboro sia ka irisiko te!

14. Waigu rengbe ani ka songodapai ku bara rimo Yekova yo? (Oni bi sura a.)

¹⁴ Ani naida gupai nga aboro ini gu rengo du tipa Yekova. Ni kpiapai, mo berẽnga pa gu bawene bakureamo du na wene asino, kidu ni boro gamahe na kini mbupai. Rogo gu kura uru sa, boro kini kitingbanga bakureamo nga ni nga kere boro na ni irabiriki. Ginipai ka mo mangihe? Mo du wa ka mo songodipai ku bara ni yo. Wakina gure a, ho Satana na agu aboro du kutii gako ome aˈasada ka gbarasa rimo Yekova ni nipeka yo aziree tipa Ko, ani nasongodapai ku bara Yekova yo ni pe ani rengo tipa ko. (Tam. 34:1; Yes. 43:10) Ani nayugo na ni nga ani sia ka kpinyemu Yekova na kini irisiko rogo agu apai yo ani apehe na kini mangihe.

15. Gini bete weneapai namangi fu Pauro mbiko gupai nga ko amangi ariapai rogo gako raka yo? (AFiripoio 3:7, 8)

¹⁵ Ani nga regerege ka manga ariapai rogo gaani raka yo tipa ka sa ngbarago ti Yekova watadu ka manga dungu apai tingba gaani sunge fuko. Ni kpiapai, gu mokedi nangia Pauro adu na nyanyakipa bangiriba beko rogo gu pambori nangia ga aYudo, ono ko ambu gu pambori re tipa ka da ni ga Kristo bawiriki na ka iriso Yekova. (Gara. 1:14) Ni sangbana gipai re, ko araki wene raka na ko agbia gu mamu nga ga zogarago na Kristo ngbangbaturũ yo. Ko aadunga na gberãrago nga ko asia ka iriso Yekova te, na ka ani aairiso Yekova a, ani abiranga tirani te.​—Oni gedi AFiripoio 3:7, 8.

16. Ginipai ani awirikaha ti gu kpiapai nga ga Julia? (Oni bi sura a.)

¹⁶ Ka ani moi iriso Yekova ni bambatapai rogo gaani raka yo, ko nika fu maku awere furani na kumbatayo a. Oni bingo gu kpiapai nga ga gu wirina du rimori nga Julia. Ho Julia adu ni nga tooni degude, ri anaabi bia rogo gari pambori. Gu kura bakere bayango sa aini pai tipa wai ri abi bia ni bawenehe na ko ki di ri ka raba ri. Ni kina ipiipihe, dungu aboro ainipai tipa Julia na ri ki tona kaa bibia rogo agu aba dungu aboro ainipai tipaha. Ho ri adu ni rogo gu bakere bawirikapai nga ga manzigo, gu kura gude rogo gari riko atona ka fura fu ri tipa Mbori na ki saki gupai nga rimo Mbori kina ti ni nga Yekova. Fuoho aaturongo te, Julia ki tona wisigo Baibiri bara ue rogo poso yo. Niyangaraha, ri adiberã ka mangasunge na gari regbo na ome tipa ka iriso Yekova kuba gu nga kaa bibia. Gu diaberã re aadunga taata te. Ri aya: “Dungu aboro ape gupai fere nga si nipa mungo fere ka mbu bibia tipa ka iriso Yekova, ono mi aaida ka mangasunge na gimi raka naabaha tipa ka iriso Yekova.” Waigu ri abi tiri areme tingbafuo gu diaberã ri amangihe agarã susi 30 kusayo? “Mi na bakere ngbarago nga mi asia ka iriso Yekova na mi ima ino gupai nga Yekova nika ringbisa gimi nyemupai aringbisa kumbatayo.”​—Tam. 37:4.

ONI NAANDU KUMBATAYO KINDI KAA IRISO YEKOVA

17. Waigu du gu rengo pai nga ani naraka mbembedi kuti digido gi sino raka re namaapai kurii agu aboro sia ka irisombori na agu aboro ata sianga ka irisoko kindi ya?

¹⁷ Ani naraka mbembedi kuti digido gi sino raka re. Gu mokedi nangia Pauro aya: “Bambiko rago koyo ngbutuko, gu ko nikaye ki ye, ko aima nga kindi te.” (Eb. 10:37) Gini maapai du gipai re na ni kurirani? Gizo nga gu regbo nye koyo tipa aboro sia ka iriso Yekova te. (1 Kor. 7:29) Na ka si du nga ani aima manga gu siapai nga ga irisombori, ani ima inoho nga ka si vura du nga ani nika hi aˈasada, si nika du tipa “rago koyo ngbutuko.”

18. Ginipai aYesu na Yekova aida ani mangihe?

¹⁸ Yesu angarasi aboro nga i da ni gako abawiriki na kini ndu kumbatayo kindi kaa pekafuoko. (Mt. 16:24) Ka si du nga ani ima iriso Yekova tipa dungu agarã, si naida ani diberã kaa ndu kumbatayo kindi kaa irisoko. Si naida na bakere asadatise tipa kaa ndu kumbatayo kindi kaa iriso Yekova. Si arengbanga kadu taata te, ono ani ima rengba kadu na ngbarago na kini gbia ngbarago ti agu amaku duti irisoko zavura awere!​—Tam. 35:27.

19. Ginipai ani awirikaha ti gu kpiapai nga ga Gene?

¹⁹ Kura aboro naberã gupai nga iriso Yekova naida gupai nga boro mbupa dungu apai. Ka si du nga paranga boro nga mo, ya mo mo nabihe nga si ima kpakara foro tipa mo irisi Yekova? Paranga wirina du rimoko nga Gene aya: “Mi abihe nga mi agbianga ngbarago ti raka te mbiko gupai nga mi nga Dezire Yekova. Si aangera wa dungu paranga aboro aasona kini gbia ngbarago ti apai wa do agbere, zio badia, watadu ngi agu ambaro nga ga vidio nga ga zuu, baraho mi aadia bakere gimi regbo ni kaa ndu ku ba adunguratise yo na tungusapai.” Waigu gi berãpai re adu na ome kurii Gene? Ko aya: “Mi atona ka manga gu gbegberẽ apai kura paranga aboro aamangaha, tipa bete regbo mi agbia ngbarago agbia. Ono mi aagbianga ngbarago nzunzu te. Mi atona ka berãkurii gu wene apai naye mbiko mangapai kuti gupai Baibiri apehe na ki diberã ka tona iriso Yekova na kpotoreyo dũ. Natona ti gu regbo re, mi nabihe nga Yekova ima karagapai kuti gimi akparakpee akaraga dũ.”

20. Ginipai si aida ani diberã tipaha?

²⁰ Bake papara Atambuahe abibia fu Yekova nga: “Boro maku nga gu boro sia mo ni ki mbedisi ni na mo, ni nye rogo gamo avurukporo!” (Tam. 65:4) Ani dinga berã adia tipa kaa ndu kumbatayo kindi kaa iriso Yekova. Wakina Yosua, ani naya: “Ono mi ni tire na gimi aborokporo, ani amánga kina pa Yekova.”​—Yos. 24:15.