Si ni Wene he Furani “ka Mbeda na Mbori”!

1-2. (a) Ginipai si aida ani mangihe tipa ka sonosa mbembedi pabakure na boro? (b) Ginipai ani nika sakapai tipaha rogo gi kekeapai re?

YA MO mbembedi bakureamo ho ti ni? Waigu mo asonosi gamo pagume na ni? Si nawiraha wa mo adi regbo na ni ki wirikipai tipa agu apai mangi ni rogo raka yo na ki ini agu apai ni aidaha na agu ni asogaha. Mo aye ka ino gupai nga ni na gu wene asino ti ni nga gu mo aida ka wirikaha. Na mo ki kpinyemu gu bakureamo re.

² Sonosa mbembedi pabakure na boro naida aida na regbo gbiati ome. Kina gu bangisapai re rengbe ani ka pehe tipa sonosa mbembedi pagume na Yekova Mbori. Gi kekeapai re nika sakapai tipa wai rengbe ani ka mbeda na gaani Mbori na agu aundo du ti mangaha wo. Ni bambataha, ani sakingo pai tipa ndu gupai duhe ti ni ni wenehe ka mbeda na gu bawene Bakurearani nga Yekova.

3. Tipagine si aida ani berẽ ti ni kurii agu aundo naye ti mbeda ani na Yekova? Oni yugungo ho na kpiapai.

³ Zanga kapa, oni ima ida kuti gupai nga mbeda na Yekova Mbori nga wenepai. Ono berãkuriipa wai duhe ni wenehe gbe ima rengba ka fõngbaduraniyo ani naandu kindi kumbatayo kaa mbeda na ko. (Tam. 63:6-8) Ni kpiapai, ani ima ino gupai nga ri wene riahe, manga mangonvo, gbia ongoda, na kini mbiri ime ni bakerehe nga wenepai tipa rani. Wa vura duhe wo, badungu aboro agbenga berãyo tipa gipai re te na i aberãnga pa kpotoyo te. Ono tie, kina wai ani nikaa berãpa wai agi apai re aundo rani gbe, kina wo a ani nikaa berãpa mangaha. Wakina gure a, ani ima ino gupai nga si ni wenepai furani ka mbeda na Yekova, ono berã ani kurii ndu gupai duhe ti ni ni wenehe ima rengba ka fõngbaduraniyo ani naandu kindi kumbatayo kaa mbeda na Ko.​—Tam. 119:27-30.

4. Ginipai bake papara Atambuahe 73:28 apehe?

⁴ Oni gedi Atambuahe 73:28. Gu boro nake Atambuahe 73 angia Revi i amoiko ko ni mangisunge ni bayango rogo ga Yekova yekaru. Si nawiraha wa, ko aima mangasunge fu Yekova ni ruruko tipa dungu agarã. Ono wa vura duhe wo, ko aima ino gupai nga si ni nyanyakipa pai fuko ko nitingidi gupai nga “mbeda na Mbori” ni wenepai fuko na ko aaida gu kura aboro ini gupai nga pabakure na Mbori nga wenepai tipa yo a. Tipagine duhe ti ni ni wenepai tipa ka ino Yekova wenengai na ki nyakasi gaani pabakure na ko?

“MBEDA NA MBORI” NAYE NA NGBARAGO

5. (a) Tipagine pa mbeda ani na Yekova aye na ngbarago ti ni furani? (b) Waigu gu tatamana Yekova afuhe foro aundo ro na ki banda ro? (Asanza 2:6-16)

⁵ Kina wai ani nikaa mbeda gbe na Yekova, kina wo a ani nika du na bakere ngbarago. (Tam. 65:4) Dungu nduapai duho nika sarani ani du na ngbarago. Ni kpiapai, ho ani ageda agu apai ni ko apehe furani rogo Baibiri na kini gi sangbako, ani nada ni airatatamana. Ngbatunga gu tatamana re nabanda rani ti gbegberẽ maapai kurii na ti manga kere aingahe. (Oni gedi Asanza 2:6-16.) Si du nga ndu gupai Baibiri ape gupai ti ni nga: “Boro ngbarago nga gu ni ini tatamana na, gu boro du na rugatinapai.”​—Snz. 3:13.

6. Ginipai nasa bake papara atambuahe ko zanga gako ngbarago?

⁶ Rengo ngaha nga, zavura abakurea Yekova nidu adu na gberãrago ti kura aregbo. Bake papara Atambuahe 73 adu na gberãrago ho ko atona ka berãpa agu apai ni ko aberẽhe nga si arunga te. Ko atona berã gupai nga gbegberẽ aboro naraka fiõfiõ wa vura duhe nga i amanganga gupai Mbori akpinyemuhe na kini gi sangbako te na gipai re asa gu bake papara atambuahe re ko du na zinga, zavura ko aaida kadu na agu ahe naadu beyo. Ko aberẽ gupai nga aboro zuu na aboro rũko arengbe ka gbia ai guhe i aaidaha, kpotoyo kidu wenengai na ka i arungonga ya. (Tam. 73:3-7, 12) Bambiko ko abi iraira sarangbanga, ko aberẽ gupai nga undoho du ti iriso Yekova te. Ko adu na bakere gberãrago na ki pe gupai nga: “Ni rengo mi vura giriso kpotore vurũ ki zundu bere wa du mi nga boro wenesa.”​—Tam. 73:13.

7. Ho du ani ni na gberãrago, ginipai rengbe ani ka mangaha? (Oni bi gu sura duti kpotoho a.)

⁷ Wa vura duhe nga bake papara atambuahe aima du na bakere gberãrago, ko aima mangapai ka aria gako aberã. Ko “arimi ku rogo ga Mbori kparakpara ziazia ba,” yo Yekova arugu gako berãpai ni. (Tam. 73:17-19) Ho du ani ni na bakere gberãrago, bawene Bakurearani nga Yekova ima inopai tipaha. Ka si dunga ani na bakere gberãrago, ani ima rengbe ka kpara fu Yekova na ki sanako ko undo rani ani ini gupai ka ani mangihe. Gu rugute du rogo Fugoko na gu ngarasaro du be awirinarani nika fu ome furani ani naandu kindi kumbatayo kaa irisoko zavura ti gu regbo du ani na gberãrago. Zavura ho du ani ni na bakabangirise, Yekova nika undo rani aundo tipa ani nye zezeredi.​—Tam. 94:19.a

HO DU YEKOVA NI NGA MBEMBEDI BAKUREA RANI, ANI IMA RENGBA KADU NA WENE RAKA AWERE GBIATI MAABANGIRISE KUMBATAYO

8. Ngba gini kura nyanyakipa agene du pa mbeda na Mbori ni wenehe furani?

⁸ Mbeda ani na Mbori ni wenehe furani ngba gu kura nyanyakipa agene ue. Ani ima rengba kadu na wene raka ka si du nga ani na mbembedi pagume na Mbori. Na ani ima rengba kadu na maabangirise tipa kumbatayo na kidu na gu kido nga si nika manga amanga. (Yere. 29:11) Ani sakingo pai tipa agi aundo re wenengai.

9. Waigu pa mbeda ani na Yekova asarani ani du na bakere ngbarago?

⁹ Ho du ani ni na mbembedi pabakure na Yekova, ani ima rengba kadu na wene raka. Dungu aboro areme nape gupai nga Mbori ti ni te, sidu, i ainongo ndu gupai aboro araka ti ni auru kpotosende te na i idi kuti gupai nga boro ho nika raka kumbatayo te. Ono tie, vurube wisigo ani Fugo Mbori, ani ima du na kido nga Mbori kina ti ni na “ko nafu mosoro fu agu yo nagbata ko.” (Eb. 11:6) Berewe a, Yekova akusi rani na gu nyemupai nga ani irisiko. Sidu, ho ani airisoko ni ani nadu na ndikidi ngbarago.​— Pa Rug. 10:12, 13.

10. Ginipai Yekova nakidopaha fu agu aboro na kido kutiko? (Atambuahe 37:29)

¹⁰ Dungu aboro na ndikidi maabangirise kumbatayo te. Gupai i amangaha gbua nga i namangasunge, ki mangi rogatise, ki vungu agude, na ki mbakadi tiyo tipa gu regbo i nikaa dunga na rengba ka mangasunge ya. I ainongo gupai Mbori nakido paha kumbatayo te. Ono ani ima ino gupai nga, Yekova nangera angerafuo gako amoyambu. (Tam. 25:3-5; 1 Tim. 6:17) Ani ima du na kido kuti gu Mbori ani nambedi na ko, na ani ima du na kido tipa gupai ko nakido paha furani. Ani na badungu weneapai ani angera kumbatayo tipaha, gu susi gbe nga ka irisoko nyeanye kindi Paradizo yo.​—Oni gedi Atambuahe 37:29.

11. Ginipai namanga ho du ani ni ni abakurea Mbori, na waigu rengbe ani ka sa ko ko du?

¹¹ Mbeda na Mbori ni wenehe furani ngba kura dungu agene. Ni kpiapai, Yekova nakidohe ka mbupai furani ti gaani aingapai ho ani asa berã ni. (Yes. 1:18) Sidu, si aidanga ani naandu kindi kumbatayo kaa bakabangirani tipa agu aingahe ani amangihe mbata kusayo te. (Tam. 32:1-5) Na ani nadu na ngbarago ho ani asa ngbarago ni ti Yekova. (Snz. 23:15) Nirengo, mo ima rengba ka berãpa gu kura amaku nga gu naye ti mbembedi pabakure na Mbori. Ani bingo gupai awere rengbe ani ka mangaha ka mbeda na Mbori.

WAI KAA NDU KUMBATAYO KINDI “KAA MBEDA NA MBORI”

12. Ginipai mo namangihe tipa ka mbeda na Mbori?

¹² Mbata fu ani zi bapatiza ki da ni boro sa dagba aDezire Yekova, ani aima mbu dungu apai tipa ka da ni abakurea Yekova. Ani awiriki gu rengo du tipa ko na tipa Kristo Yesu, ki saberã rani ti gaani aingapai, ki yuguhe nga ani na idapase kuti Mbori, na ki mangi ome ka giasangba ko. Ono tipa ka mbeda gbe na Mbori, si naida ani naandu kindi kumbatayo kaa manga agi apai re.​—Koro. 2:6.

13. Gini apai biata rengbe ka undo rani tipa ani naandu kindi kumbatayo kaa mbeda na Mbori?

¹³ Ginipai nika undo rani tipa ani nye kindi kaa mbeda na Mbori? (1) Si naida ani naandu kindi kumbatayo kaa geda Baibiri na kini wisigihe. Ho ani ageda Baibiri ni, si naida ani mangipai susi gu gbua nga ka wirika apai tipa Mbori. Si naida ani asadi ka rugatirani na gu gene Mbori aberã ngbaha, ki mangi gupai ko aida ani mangihe, na kini raki ngba gu gene ko aida ani raki ngbaha. (Ef. 5:15-17) (2) Si naida ani nyakasi gaani idapase ni berã ani kurii gu badungu agopai nayugopa gako nyemuse furani. (3) Si naida ani naandu kumbatayo kindi kaa soga agu apai naba gberãrago ti Yekova na ki ne zio bakure na agu aboro namanga ngbatunga agu apai re.​—Tam. 1:1; 101:3.

14. Ginipai rengbe ani kaa mangaha na aˈuru dunduko tipa ka sa ngbarago ti Yekova? (1 AKorindo 10:31) (Oni bi asura a.)

¹⁴ Oni gedi 1 AKorindo 10:31. Si ni nyanyakipa pai furani ani mangi agu apai ani nainihe nga si nika sa ngbarago ti Yekova. Ono si naida ani mangi dungu apai kisusi gu nga ka tungusapai na ka ndu tipa adunguratise. Si naida agu apai ani amangaha na aˈuru dunduko naasa ngbarago ti Yekova. Ni kpiapai, ho ani ape rengo ni rogo agu apai dunduko ani amangaha na kini gamu ahe fu kura aboro, ani nasa ngbarago ti Yekova. (2 Kor. 9:7; Eb. 13:18) Ko naida ani yugu gupai nga ani na tambuahe tipa gu unga ko nafuhe furani. Sidu, ani na rubangirise tipa bakio gu riahe ani arihe na guhe ani ambiraha, na ani namanga gu kura apai nasa kpotorani si du wenengai. Ho Yekova abi rani ni ani ni asaditirani ka sa ngbarago tiko rogo agu apai dunduko ani amangaha, si nasako ko kpinyemu rani ni bakerehe.​—Rk. 16:10.

15. Waigu Yekova aida ani naamangapai na kura aboro?

¹⁵ Yekova nayugo weneringise fu aboro dunduko, singia i nairisoko watadu i airisongo ko te. (Mt. 5:45) Ko naida ani du a na weneringise fu kura aboro. Ni kpiapai, si aidanga ani ‘gúmba gbegberẽpai tipa boro wa sa te, ka ani dú nga ni akpiki pai ya, . . . Ono niyugu zera dunduko fu aboro dũ.’ (Tito 3:2) Sidu, ka si vura du nga aboro aidanga kuti Yekova te, ani aberãnga gupai nga parani nyaki tiyo te. (2 Tim. 2:23-25) Ani nambeda na Yekova ni manga ani pai na aboro dunduko rogo weneringise yo.

MO MBEDI NA YEKOVA ZAVURA HO MO NAMANGI AINGAHE NI

16. Waigu bake Atambuahe 73 atona ka bi tiko tingbafuo ko irisi Yekova tipa dungu agarã?

¹⁶ Ti kura aregbo, mo ima rengba ka tona kaa bihe nga Yekova ambeda nga na mo te bambiko agu aingahe mo namangihe. A wa ani nasakipai tipaha, pai wakina gure aima manga bake papara Atambuahe 73. Ko aya: “Ndure ambedi ka kpara ku bani, kpandure ambedi ka zerenga.” (Tam. 73:2) Ko aidi kuti gupai nga ko adu na “arungo” na kpotoko yo kidu “ni iramungo” “ki du wa nya” ku bara bangiri Yekova. (Tam. 73:21, 22) Ono ya mo ko aberẽhe nga Yekova akpingo nyemuko berewe na ki mbupai fuko mbiko gako aingahe te?

17. (a) Ginipai bake papara atambuahe amangihe ho ko adu ni na bakere gberãrago? (b) Ginipai rengbe ani ka wirikaha ti gako pangbanga? (Oni bi asura a.)

¹⁷ Ka si du nga bake papara atambuahe aberẽ gupai nga Yekova ima mbuko, si nawiraha wa ko abi tiko wa gure tipa bete regbo. Ko aima ino gupai nga si naida ko mbedi na Yekova. Ko ake gupai nga: “Wa si avura du wo mi du na mo kindi; mo nazada kumbabere. Mo nagasa re na sangbaro, ku mbata yo mo adia re sa taarimo.” (Tam. 73:23, 24) Si naida a ani sana Yekova ko nyakasi rani ho ani abihe ni nga ani narungbura rogo idapase yo watadu ho du ani ni na gberãrago mbiko gaani aingahe. (Tam. 73:26; 94:18) Ka ani vura manga kere ingahe, ani ima rengba ka karaga tirani fuo Yekova na kidu na gu kido nga ko “zaza tipa vu aboro.” (Tam. 86:5) Ho du ani ni na bakere gberãrago, si ni nyanyakipa pai ka mbeda na gaani Mbori.​—Tam. 103:13, 14.

“MBEDA NA MBORI” NYEANYE KINDI

18. Tipagine rengbe ani kaa ndu kindi kumbatayo ti ni kaa mbeda na Yekova nyeanye kindi?

¹⁸ Ani ima rengba ka nye kaa mbeda na Yekova nyeanye kindi. Ani ambunga wirikapai tipa ko te. Baibiri nape gupai nga ga Yekova agene, gako tatamana, na gako inohe “na gasi rugatise.” (Rom. 11:33) Ani nika nye kaa wirikapai tipa Yekova nyeanye kindi.

19. Ginipai Atambuahe apehe furani tipa kumbatayo?

¹⁹ Atambuahe 79:13 naya: “Ani nga gamo aboro nga akandoro ga banambu afu tambuahe ti ni foro nye anye kindi; ani ayugo pa tambua ro fu rika ngbatunga aboro da ti gu kura rika ngbatunga aboro.” Wa mo nika nye kaa mbeda na Mbori, mo ima rengba kadu na gu kido a nga mo nika gbia nyenye amaku agbia na ki pe gupai na kido nga: “Mbori nga ga kpotore yo ũnyaka nga gi ũkumuko nye anye kindi.”​—Tam. 73:26.