Oni Rengbe Arengba ka Giarogo agu Apai Yo Du Rogo Ziazia Kekeapai

2. Oni Zaki Berãroni Ka Gedaha

Ya mo bakurearoni apekenga gbegberẽ apai furoni tipa gu boro oni aabingo ni rogo gaoni raka ya? Ho oni abi gu boro re ni, ya mo oni aatingidanga kina pa gu gbegberẽ apai bakurearoni agumbaha furoni tipa ní, si ki sa roni ka oni moingo berãroni tipa wene asinoni ya tee? Pai rengbe ka manga wakina gure nibipa Ziazia Kekeapai.

GU MOKEDI nangia Pauro agumbapa gupai rengbe ka manga ka ani agedanga Ziazia Kekeapai na zakizaki berãrani ya. Ko akepai tipa agu aYuda nadu ti ragoko ki yaa: “Mi nga dezire yo ya nyemu Mbori ti yo ono ku sangba inahe yo te.”—ARomo 10:2.

Gu kura aYuda nadu rogo bambata sa kama agarã aidanga na gupai nga Yesu nangia Masiya te, wa Ziazia Kekeapai avura ka saka rogoyo rogo Kuru Ndiko vurũ. Agu apai dunduko Ziazia Kekeapai agumbaha tipa Masiya aringbisitihe kuti Yesu gbiati agu apai dunduko ko amangihe. Ono wa si avura duwo, gu iraira aberã i aima rimisoho kurii aboro yo, si asa gupai nga ka i ruganga tiyó na Fugo Mbori ya.

Ginipai rengbe ani ka wirikaha ti gipai re? Gupai ani awirikaha ti ni nga, si naida ani naageda Ziazia Kekeapai na zakizaki berãrani. Agu apai nga ziree i arimisihe ku berã aboro yo, si rengbe arengba ka sa yó ka i rugunga tiyó na gupai nga rengo du rogo Ziazia Kekeapai ya.

Kpiapai tipa gipai re nga, bayugu pambori sa du Amerika yo aya tipa Ziazia Kekeapai wee, “si nga gu kitabu aboro akehe nigayo berã nitiyo, na badungu agu apai du rogoho nandu kia ti akuraha, na guho naafunga agu arugute rengbe aboro ka kido kuti ni te.” Ka si du nga boro nageda Ziazia Kekeapai na gupai berãniyo nga “si nga gu kitabu aboro akehe nigayo berã nitiyo,” ní nikaa siaka kina agu arugute rogoho ngbaa tiní, ono ki mbu agu andunga na ní wenengai ya.

Ziazia Kekeapai nangarasa rani ani naagedaha sirisiri. Si naya tipa agu aboro Beroya nadu ti rago Pauro wee: “I adi pai wenengaĩ ka berã ha, niwisigi Ziazia Kekeapai na uru, si ngia agi apai wo re.” (Amokedi 17:11) Wakina aboro Beroya, si naida oni zaki berãroni azaka ka geda Ziazia Kekeapai, ki do gu iraira aberã nidu rironi yo tipaha. Oni gedi Fugo Mbori na zakizaki berãroni, kidu na nyemu ka ino gupai Mbori agumbaha rogoho.