Pa Ingapai Ima Go Berãrani Yo?

MBEMBEDII kusayo, abatungusipai nga ga kanisa yó anaaru mbatayo kini takingbayo naapa agu aingapai i aya is nga “gu kere aingapai du saba,” nga kere nyemu kodaba, angbu, kere nyemu aũkumuko, nyomoro, zinga, kpiboro, na rukö. Batungusipai aninyakasipa agbegberẽ sangbana ingapai na kini nyakasi gupai fu aboro nga i saberã yó ti gayó aingapai. Ono apai awere kia. Bakeke awaraga sa ayaa: “Awere, abatungusipai aidanga ka fura tipa agu apai i abihe nga si nika ba gberarago ti agu aboro nagiaha te, ono i nafura tipa kina agu apai du aboro na nyemu ka giaha.”

Abakeke awaraga apangbanga ima kparia gipai re a. Agi apai du kusende re nga bete agu i akusihe rogo awaraga apangbanga nibi gipai re:

▪ “Gupai nga ga ingapai, saberã, gbiati vu boro, aboro kanisa afuranga berewe tipaha gbe te, ono i nanyakasa kina gupai fu aboro nga i mangi gupai nika sa payo si du kuari, na i nikpi kina nyemu tiyo.”​—Star Beacon, Ashtabula, Ohio.

▪ “Badungu aboro aberãnga gupai nga i nga aboro-ingapai te, na i agundenga ti manga ingapai a te.”​—Newsweek.

▪ “Ani asananga he berewe nga ‘Ginipai Mbori akpinyemu mi mangihe’ te, ono ani nasanahe ki yaa, ‘Ginipai si aida Mbori mangihe fere?’ ”​—Chicago Sun-Times.

Wa duhe nga dungu ngbatunga aboro naraka rogo bangisa rago, aboro namanga ndundu amanga ka gumba gupai fu akurayó si aida i mangihe. I nayawee si arunga boro bisira gu mangapai nga ga kurani te. I nabihe nga bakere ingapai du nga ka bisira gu mangapai nga ga kura aboro. Si kini sa aboro i dakuti gupai nga: ‘Gupai mo aberãha, si ngba angba tipa ro, ono ka mo asadingo ka rimiso gamo berã kurii kura boro yo ya. Ti gi regbo ani araka ti ni re, boro naraka ngba gu gene ní aida ka raka ngbaha. Anga bangisa boro gbua ini gupai du niruruhe te. Gupai du berã kura aboro yo rengbe arengba ka ru a.’

Gi ngbatunga berã re sa gupai nga aboro naabi agu apai nga ingapai ni agu apai agberãnga ya. Gu fugo nga “ingapai,” si akuranga ngba aboro yo gbe te. Mbata kusayo, ho kumba na dee anaaraka ni sa zanga i rogotiyo aroga nzunzu, aboro anaabihe nga i “namanga ingapai,” ono awere, i naya gbua wee “wana sungu na nawana.” Aboro ayanga berewe boro mangi “bäri” te; i naya gbua wee wana “ndu fuo” dia wana, watadu nawana “ndu fuo” kumbaku nawana. Ho boro “adĩ he” ni, ní nayawee ní “adi he.”

Nirengo, badungu agu apai nga ingapai aboro abihe awere nga si agberãnga te. Ono tipagine berã aboro naʹariatihe ti ni wa gure? Ya mo ingapai ima nyasa? Ya mo si ninyanyakipa pai ani ini gu rengo du tipa ingapai?