Gu Rengo Du Tipa Ingapai

YA MO gu boro nawoka, ní rengbe ka yawee ní awokanga te mbiko ní kuo guhe i maaha ti kpotoni ka bi ba faa kpotoni? Wagusa te! Wakina gure a, wa aboro navura ká gupai nga he kinaho nga ingapai, si ayugongo gupai nga ingapai ho te te. Fugo Mbori nga Ziazia Kekeapai nagumba badungu apai furani tipa ingapai. Gini apai du nzunzu si agumbaha tipa ingapai?

Aboro Aima Ti Budungu Dunduko

Agarã wa ue kutu kusayo, gu mokedi nangia Pauro aduna bakere gberarago mbiko gupai nga, ‘gu wenepai ko akpinyemuhe ko amanga nga ha te, ono gu gbegberẽpai ko akpinga nyemuhe ya si ko amanga.’ (ARomo 7:19) Ka ani agumba rengo, ani idi aida kuti gupai nga, apai namanga tipa rani wakina gu nadu tipa Pauro re. Isoke ani nakpinyemu ka raka ringbisihe kuti Agu Arugute Nadu Bawe watadu gu kura arugute, ono ani ki bi gupai nga ani amanganga ha wo te. Anga si nzunzu nga ani du naida ka kuo rugute te, ono kpotorani du du nirurungburaha. Tipagine duhe ti ni wo? Pauro asakirogoyo ki yaa: “Gu pai mi akpi nga nyemu he ya, ka mi amanga ha, a nga mi ka amanga ha berewe te, kina [gu] ingapai nye kpotore yo.”​—ARomo 7:20.

Wakina Pauro, aboro dunduko i avungayo na rungbura tiyo, si kini yugu gupai nga i avunguyo na kina ingapai tiyo na i nga aboro zangarengba. Pauro ayaa: “Aboro aingi ainga dũ, ki ti bungudu ti ga Mbori taarimo.” Gine nasa gupai nga pai mangi wa gure? Pauro agumba nduhe ki yaa: “Wa gbegberẽpai akuru ku zegino mbiko boro sa [nga Adamu], kpio ki du mbiko gbegberẽpai; si du kpio andu andu ti ni sa aboro dũ, bambiko i aingi ainga dũ.”​—ARomo 3:23; 5:12.

Badungu aboro aidanga kuti gupai nga gu ingapai bambata atitarani amangihe nakpara rani ti Mbori na ki sa rani ani du nikpakpa aboro te, ono tie, si nga gupai Ziazia Kekeapai ayugoho. Wa Yesu adipai rogo gu bambata kapita nga ga Bambata Pai ki gumbaha, si nayugo gupai nga ko aima ida kuti gupai nga gu pangbanga du tipa Adamu na Eva, kina rengo du ngaha.​—Bambata Pai 1:27; 2:24; 5:2; Matayo 19:1-5.

Bangua yugopai sa nga sa Ziazia Kekeapai nga, Yesu aye ku sende no ka tumorii aboro be ingapai, nga agu aboro duna idapase kutiko. (Yoane 3:16) Tipa ani duna maabangirise tipa nyenye unga, si naida ani di Yesu kugume bambiko ko Mbori akedi ko ko ye ka batasa aboro giasangbaa. Ono ka si du nga ani ainongo guhe nzunzu nga ingapai te, ani arengbanga ka dia Yesu kugume te.

Gu Motumo Yesu Afuhe na Gupai Si Aidi Ti Ni Ko Fuhe

Yekova amangi bambata boro nangia Adamu ko raki nyeanye kindi. Kinagu ka ko asamungu kuti Mbori, si ka ko akpi ti ni. Ho ko asamungu ni, ko ada niboro ingapai. (Bambata Pai 2:15-17; 3:6) Adamu amangipai kia ti gu ringbisapai nga ga Mbori, ko ki da nikpakpa boro, na gako pagume na Mbori ki gberẽ. Ho ko amangi ingapai ni nikuo ko ga Mbori ndiko, ko atona ka gbinza, na niyangaraha, ko ki kpi. Ono tie, awiri Adamu dunduko, kodihe na ani a, i avungayo na kina ingapai tiyo, na i kidu kina ngbagene kpio. Tipagine duhe ti ni wo?

Si wo mbiko gupai gbua nga, aboro-ingapai arengbanga ka vunga agude ami ki zanga ingapai te. Awiri Adamu dunduko nga aboro-ingapai, na “mosoro ingapai nga kpio.” (ARomo 6:23) Gu veresi re nafu maabangirise afu a furani, mbiko si nayawee: “Ga Mbori gamunihe gbua nga nyenye unga rogo Kristo Yesu yo gaani Gbia.” Gure wa ka i yawee mbiko gu motumo Yesu afuhe nikpiko, asangbana ga Adamu ingapai rengbe arengba ka guari kusayo ti aboro giasangbaa.a (Matayo 20:28; 1 Petero 1:18, 19) Gure nasa roni oni du wai?

Ga Kristo Nyemuse “Nasoda Rani”

Ziazia toro asa Pauro ko fu ga Mbori karagapai kuti gu sanahe du kuari re. Ko ayaa: “Nyemu Kristo [“gu nyemuse du ti Kristo tipa rani,” NW ] nasoda rani; bambiko ani naya wẽ, boro sa akpi tipa yo dunduko, . . . ko akpi tipa yo dunduko, ya agu yo du ni ungayo ka i du nga ni ungayo fu tiyo ya, ono fu gu ko nakpi tipa yo ki zingi berewe.” (2 AKorindo 5:14, 15) Ka boro idi kuti gupai nga ga Yesu motumo rengbe arengba ka batasa ní be asangbana ingapai, na ní kidu na tambuahe tipa gu motumo re, si naida ní niraki ringbisihe kuti agu apai Mbori akpinyemuhe beni. Gipai re nakoda gupai nga ní inipa agu apai Mbori akpinyemuhe, ki raba sangbakpotoniyo si nimangisunge ringbisihe kuti agu arugute nga ga Ziazia Kekeapai, na ki raki ringbisihe kuti ni.​—Yoane 17:3, 17.

Iraira mangaapai nagberesa gaani pagume agberesa na Yekova Mbori. Si nawira gupai nga zee aima zio Bakindo Davide ho ko ainipa gu kere ingapai ni ko amangihe nga ka manga bäri na Bataseba na ka imo kumbaari. Ono gupai rago agberẽ tiko nani gbe nga, gako ingapai aba gberarago ti Mbori. Ko aya fu Yekova wee: “Kina ro sa, mi aingi pai kuti ro, ki mangi gi gbigbitapai re ku bangiro.” (Atambuahe 51:4) Wakina gure a, ho Yosefa adu ni rogo asada ka manga bäri, sangbakpotokoyo asako ko sanahe ki yaa: “Waĩ tie ka mi mangi gi bakere gbigbitapai re, ki ingi pai kuti Mbori?”​—Bambata Pai 39:9.

Sidu tie, anga gupai nasa rani ani bi gupai nga ani mangi ingapai nga kinaho i abi rani ni nani zee ki zi rani te. Anga kina agu apai ani abihe nga ka si kuru kubangiri aboro i bihe nigbegberẽpai, si si aida ani he mangaha te. Ho ani akuo gu ga Mbori andiko ni du tipa kodaba, zanga du niʹirabiriki, irisa, irisombori, na gu kura apai, si nagberesa gaani pagume agberesa naako. Ka ani taino aino kini mangi ingapai kaa ndu nani kumbatayo, gure nga ani nasa tirani ni avura Mbori. Gere nga gupai si aida ani berẽkuriihe wenengai.​—1 Yoane 3:4, 8.

Sidu, ya mo he ho nga ingapai? Ii, he kinaho nga ingapai, naima du, na si kinaho a kindi. Aboro du natona kaa fura tipaha kia tipa ka si dunga nikere he ya. Badungu aboro aima mungosi sangbakpotoyo yo, na aguyo agianga gupai sangbakpotoyo yo agumbaha te. Agu aboro naida Mbori idi naayó, si aida nga i duwa gure te. A wa ani nabihe, anga mosoro ingapai nga kungbo zee te, ono si nga kpio. Ingapai naye na kpio.

Ono gu wene pangbanga duho nga, ka aboro saberã yó ti gayó aingapai nzunzu na ki mbuhe, Mbori mbupai ambu fuyó mbiko gu motumo tumorii Yesu afuhe. Pauro ayaa: “Aboro maku nga agu yo vu yo yo ti gayo ingaapai, nga agu yo dadi yo gayo gbegberẽapai; boro maku nga gu boro Gbia ageda nga gani gbegberẽpai kuti ni ya.”​—ARomo 4:7, 8.

[Gu rukutu kekeapai du bandu kpewaraga yo]

[Gu kpiahe du ti kpewaraga 9]

Pa raka ani ringbisihe kuti Sangba Mbori nasa rani ani duna wene pagume na Mbori gbiati aboro

[Gu kpiahe du ti kpewaraga 10]

Kanisa Aʹaria Gaha Yugopai

Badungu aboro Katoriko naagianga rogo gupai yo nzunzu nga ga Rimbo ya. Gu yugopai nga ga Rimbo re atona ka go kusayo tooni tooni, na awere, si rogo akatekisimo berewe te. Rogo 2007, gu Kanisa Nga ga Katoriko adigisi gu yugopai re nzunzu rogo gu waraga nafura tipa “gu nduapai ruhe aru ti ni ani du na maabangirise nga, gu rukutu agude nakpiko mbata fu bapatiza, ami rengbe arengba ka bata ki gbia nyenye ngbarago.”​—International Theological Commission.

Gine nasa gupai nga kanisa mbu gu yugopai nga ga Rimbo re? Bambatapai nga, kanisa aidi ka kura kusayo tii gupai i akusihe badungu agarã kusayo, nga kaa zinahe fu avunguagude na gupai nga ga Rimbo tipa i naabapatizi awiriyo niipo. Ono pa kpi gu yugopai nga ga Rimbo re nakusa kura asanahe akusa a.

Ga aboro yugopai du watadu ga Ziazia Kekeapai? Gu yugopai nga ga Rimbo atona rogo 12 kama agarã ti regbo gu sakapai nadu tipa paragotorio. Gu Kanisa Nga ga Katoriko ayawee mbisimo nga he du rogo boro yo akpingo ho ní akpi ni ya. I atona ka sakapai tipa mbisimo agu agude nakpiko ono ka ami arengbanga ka ndu ku ngbangbaturũ yo ya bambiko ami aziongo bapatiza te, ono ka ami arẽnga tipa iferno a ya. I abihe nga si ruaru i yawee mbisimo agu agude re nandu tigaha kurogo kura ba i ayambu rimoho nga “Rimbo,” na gu regbo re du gupai nga ga Rimbo atona.

Ono tie, Ziazia Kekeapai ayanga wee mbisimo nga he du rogo boro yo nabata ho ní akpi ni te. Gupai si apehe nga, mbisimo nga kina boro nitini, ‘nakpi akpi’ ka ní ingipai. (Yezekere 18:4) Wa duhe nga he ho nakura ti boro ho ní akpi ni te, ba ho nga Rimbo a te. Kurigure, Ziazia Kekeapai nayawee ho boro akpi ni, ní ainongo wiripai berewe te, ní wakina gu boro nara ara.​—Batungusipai 9:5, 10; Yoane 11:11-14.

Ziazia Kekeapai nayawee gu rukutu agude du avungura nga aKristano, Mbori nabi ra niziazia ra. (1 AKorindo 7:14) Ka si du nga si naida rukutu agude zi bapatiza azio tipa ka gbia bata, gure nga sunge ti gupai gu veresi re agumbaha te.

Gu yugopai nga ga Rimbo adu wakina senga Mbori, bambiko si asa aboro i naabiko nigu kere boro nafu mbusa fu agu aboro amanganga gbegberẽpai ya, baraho du ko nigu Barani duna nyemuse, namangapai niruruhe. (Pa Fu Rugute ni Ue he 32:4; Matayo 5:​45; 1 Yoane 4:⁠8) Gipai nga ga Rimbo re aima digo nikapa bangiri agu aboro nakpinyemu rengo!