Bidzelyibu cós ni más galán

NOʼ MILLONES de cristianos ni diti rony Laninin. ¿Rac arrepentiryibu ni ma goloʼyibu guicyibu que ma diti gonyibu láani la? ¿Rasetnaladxyibu toibtica de láani la? ¿Ronyibu crer que xiinyibu casnit cós tzaay la? Guibiʼno xi raniʼ tipnés testigos xtuny Jehová ni rabés gadzéga gudx.

Rasetnaladxyibu Jesús. «Antes ni ñaca testigo xtuny Jehová, diti tampa goyaʼya guidaʼ. Nosi goyaʼya Laninin o ló Pascua, per diti guirá ór. Ná scú órni goyaʼya diti buni pensary lóo Jesús. Nigoreʼ ni diti roni Laninin radopa né congregación xtuni chop buelt lainy xomal né rasudi stipnés buñ ni rasuidy la Biblia de Jesús». (EVE, AUSTRALIA).

Radudyibu galrrascad. «Rioʼya nakit órni buñ rascad naʼ cós ni diti rabésa. ¡Nigolú rioladxi láani! Láaca rioladxi goni tarjeta o goni dibuj né guiscada láani stipnés. Modcu layibu rioʼyibu nakit né naʼ láaca». (REUBEN, IRLANDA DEL NORTE).

Racnéyibu buñ ni caquiin láani. «Nigolú rabaladxdo órni ronydo galrro par buñ ni caxoʼ. Rioʼ ór, láaca rinédo postre, guieʼ o toib galrrascad ni gony que guisacyibu sacró. Né ndeʼ labúu gony buñ láani ortísi». (EMILY, AUSTRALIA).

Radopyibu né xfamilbu. «Órni xfamildo radop par guiguaʼdo sacró, mbiox nap oportunida de guimbutzaay bixio, bixiogol o prim xtuny. Diti racanaldo costumbres né lanii, por ngú xfamildo nan que órni riguendo layibu ronydo láani portín ronladxdo layibu, diti portín noʼ ni rony lafuers lóodo». (WENDY, ISLAS CAIMÁN).

Guiguaʼyibu sacró. «Órni buni Laninin nigolú goyoʼ xchiina, diti gopa tiemp par ñoni pensary ñoʼya goxt. Ma bisudi ni ná la Biblia xi galnasác guidudy Dios a buñgudxlio, né ma bidzela paz. Naana que xiina sabany ló toib Gudxlio galán». (SANDRA, ESPAÑA).