«Goniiny layibu que stipnaʼca nasudi galnigolú»

NI BUNI LÓ DZÚ NI SEE:

Goola lainy toib gudxyen ni laa Santo Domingo, República Dominicana; naʼca ni rarop de tap xiin bixiosa né xinaʼya. Bixiosa né xinaʼya goyoʼyibu lad toib religión né goniiny layibu nasniʼsyibu lóodo ló religión cuca. Tap íz antes ni ñaala, bimbuyibu tipnés misioneros ni nac Mormón né bidziguiaʼyibu portín misioneros cuu góc buñtzay né buñ nayaa. Diti xidzú xfamila góc primer famil de República Dominicana ni goyoʼ lad Iglesia de Jesucristo de los Santos de los Últimos Días, ni láaca rimbu buñ xomod Iglesia Mormona.

Naʼ guirási ór goyoʼya ló dxiin ni buny buñ ló Iglesia cu, per ni más bioladxi láani ngú balaati rasac par layibu famil né valores morales. Nigolú sacró gosaca portín góca Mormón né goloʼya guica gaca misionero.

Órni gopa 18 íz, xfamila goyee gudx Estados Unidos par labúu ñaʼya toib scuel xirop. Tobiz después bixoya né soosi, ni nac testigos xtuny Jehová, bieedyibu bidguenyibu lóodo gudx Florida né biruʼyibu lóodo ñoʼdo né layibu toib samblia ro rasuidyibu la Biblia. Bidziguiaʼya órni bibiʼya que guirá buñ cayopy guirá textos ló Biblia xtuny né cacaʼyibu ni cacadiagyibu ló guiich, por ngú gonaba toib guiich né toib plum né láaca buni scúca.

Bixoya gonyibu que nainy naʼ gaca misionero, por ngú órni bilox samblia, gochyibu naʼ, que nainy layibu gacnéyibu naʼ par nimbutzaaya ni ná la Biblia. Bioladxi ni gochyibu naʼ portín más bimbuya Libro xtuny Mormón que Biblia.

¿XIMOD BITZAʼ LA BIBLIA MOD BIBANI?:

Órni bibiguetyibu lidxyibu, ma por teléfono biiydo diitz ni ná la Biblia. Guirá ór buny animaryibu naʼ nadzaʼga ni roni crer né ni ná la Biblia. Goniiny layibu que ma por stipnaʼca nayobi galnigolú.

Goyoʼ xidal cós ni buni crer, portín ngú ni bisuidyibu naʼ ló religión xtuni per diti goona pal nigolúpa radzakni né ni ná la Biblia. Soosi bixel ronoʼya toib revista ni laa, ¡Nanísi goyoʼ! número 8 de noviembre íz 1995, ni rabeʼ testigos xtuny Jehová, ro sieed chop artículos ni ritlaa de Mormón. Bidziguiaʼya ni goyoʼ xidal cós de religión xtuni ni diti bimbuya, por ngú biyobi ló sitio oficial xtunydo par nabiʼya pal nigolúpa ni ritlaa ló revista cu; né scú, nigolú ni ritlaa lo revista cu. Né bidzela más prueby órni goyaʼya museo xtuny Mormón ni noʼ gudx Utah.

Naʼ buni crer que la Biblia né Libro xtuny Mormón radzakni saʼni. Per órni, gosaló biila la Biblia bidudi cuent que diti radzakni saʼni. Por ejemplo, ló Ezequiel 18:4 la Biblia ná que alma raityni. Per, ló Libro xtuny Mormón náni ló Alma 42:9 que alma diti labúu raityni.

Diti nosi chop galrrasuidy reʼ ni diti radzak saʼ bichel xpensari, láaca xpensary nacionalistas xtuny Mormón. Toibtica pensary ni gopyibu ngú que lagary móz ni góc laa Edén goyoʼni lagary ni laa nigoreʼ condado de Jackson (Misuri, Estados Unidos). Stoib pensary ni gopyibu ngú ni goniʼ profetas xtuny Iglesia, que «órni Gobierno xtuny Dios gony mandary, bandera xtuny Estados Unidos siásni nayaa né buñ ma gap libertad né guiráyibu sapyibu derechos xtunyibu».

Gonabdiidza naʼ xi nasaclóo xcudxi né stipnés gudxrop órni ñac ngú. Toib godzu toib buñ ni rimbuya ni casuidy par gac misionero goniné naʼ por teléfono. Gonabdiidza láabu: «Pal xcudxlo nadíil né stoib gudx ¿nadíilo né Mormón de gudxcu la?». Bidziguiaʼya órni goniʼbu que scú. Bisuidraya xcalrrasuidy religión xtuni né goninéya buñ ni rasanir ló Iglesia, layibu gochyibu naʼ que galrranabdiitz xtuni sadxin midid sarexani.

Diti gosaca sacró mod gochyibu naʼ. Gosaló gonabdiidza naʼca, xigony goniiny naʼ ñaca misionero né bidudi cuent, que par naʼ nacni xomod nitisi galrracné ni radudy buñ saʼ; láaca bioladxi mod bibiʼ né mod gop buñ respet misioneros. Per ni gocni la goxeʼsi goona de Dios. Ná ma xidal buelt biila textos ni sieed ló la Biblia, diti goyoʼya galrrasaʼ nasudi xipa náni. Nili goona xi raniiny Dios gony par Gudxlio né guiránac buñ.

¿XÍ GALNASÁC MA CUAʼYA?:

Órni bisudi ni ná la Biblia né testigos xtuny Jehová goona xidal cós: ximod laa Dios, xi rac buñ órni raity, xi dxiin nap Jesús ló ni nainy Dios gony né Gudxlio... Ndeʼra ma casudi ni ná la Biblia, ¡né nigolú bioladxi ñaabi buñ ni casudi! Ná goona que noʼ Dios, per nigoreʼ ma labúu goninéya laabu suusi ñacbu ximigdxina. 12 de july íz 2004 goyonisa xomod testigo xtuny Jehová né xhoop beʼo después góca precursor.

Buni dxiin gáay íz ló sede mundial de testigos xtuny Jehová, ni noʼ Brooklyn (Nueva York). Nigolú bioladxi ni labúu gocnéya par nareʼ Biblias né stipnés guiich par gacné xidalguixo buñ ni noʼ ló guidopynac Gudxlio. ¡Balaati rabaladxi por guirá íz ni cayacnéya buñ cayimbu Dios!