Toib galrrascú ni bislooy que Dios nac mal

NI NÁ BUÑ

«Almas xtuny buñ ni raity por ni bunyibu galkié, rienni ló infierno órni raityibu, né lagarycu raʼijni por tipzó» (Catecismo de la Iglesia Católica). Per noʼ tipnés líderes religiosos ni raniʼ que buñ ni noʼ ló infierno noʼyibu sit de Dios.

NI NÁ LA BIBLIA

«Alma ni rony galkié alma cú saity» (Ezequiel 18:4). «Gueʼet diti nan xitcal» (Eclesiastés 9:5). Ma bienno, alma raity né buñ ni ma goity diti nan xitcal, ¿ximod labúu tzoʼyibu «ló guii por tipzó» o tzoʼyibu sit de Dios?

Ló la Biblia, diitz hebreo né griego órni rac traducir «infierno» radudyni diitz toib lagary, lainy «baʼ» ro ragach buñ. Por ejemplo, órni Job bixoʼ gonabbu xcalrracné Dios: «Más galán nacachlanlo naʼ lainy baʼ» (Job 14:13). O xomod rony traducir La Sagrada Biblia, de Guillermo Jünemann, «infierno». Job diti goniiny ñoʼbu lainy toib lagary ro ñaʼijbu sit de Dios; nosi ni goniiny láabu ngú nasaladxbu lainy baʼ.

¿XIGONY RAQUIIN GANLO LÁANI?

Órni ronyno pensary que Dios nac mal, ralsitno de láabu. Rocío, de México ná: «Dzú góca mbioxien bisuidyibu naʼ que noʼ infierno, nigolú bidzubi Dios né por ngú diti buni crer que napbu cualidades sacróyen. Buni pensary que guirási ór cadzuitzbu né nacbu mal».

Ni rasetlaa la Biblia de Dios né ni rac né gueʼet, bitzaʼ mod buny pensary Rocío. Láabu nábu: «Sacró gosaca, gocni suusi nabeʼyibu toib guix nanaʼ ladi. Bidudi cuent que Dios raniiny cós sacróyen par lóono, que ronladxbu lóono né que naʼ labúu gonladxi láabu. Nigoreʼ rabiʼya láabu xomod toib buñ ni ronladx xiin, né rioladxbu que xiimbu tzeeni galán layibu» (Isaías 41:13).

Xidal buñ nap religión portín radzuibyibu infierno, per Dios diti rioladxbu gonyno ni nábu portín radzuibyno láabu. Jesús goniʼ: «Gondxiʼ Jehová, Dios xtunylo» (Marcos 12:29, 30). Scú láani, órni rienno que Dios rony xinésni guirá ór, diti sasac naganno gapno confianz que sonybu xinésni ló dzú ni sietra. Xomod Elihú, ni góc ximig Job, labúu gapno confianz guinino diitz reʼ: «Diti gony buñ pensary que Dios ni rony xinésni gony cós ni nigolú mal» (Job 34:10).