¿Xigony goola la Biblia?

¿Ronylo pensary xomod layibu la? Sigory goniiny looy ñoʼolo la Biblia, per noʼ ni bicaa looy. Xidal buñ diti ná goʼol la Biblia portín rasac naganyibu guienyibu láani. Per ¿ñonylo pensary modreʼ pal nadudylo cuent que la Biblia labúu coʼ nakit looy né labúu gacnéni looy laʼga nabanylo la? ¿Né pal ñanlo que noʼ toib mod ni labúu guioladxlo ñoʼolo la Biblia gaʼ? ¿Nasaguelo ñanlo xí labúu guidudy la Biblia looy la?

Cuá cuidad xi goniʼ tipnés buñ ni gosaló bíil la Biblia né ximod gocnéni layibu.

Ezekiel, ni nap más de 20 íz ná: «Antes góca xomod toib buñ ni see ló néz ni diti nan pu nís guinás, per ni ma cayoola la Biblia ma naana pu nís guinása. Napni consej ni labúu gacné buñ dzú ná dzú».

Frieda, ni nap más de gaal íz, ná: «Por nitisi cosien maca bidzutzi, per nigoreʼ ni cayoola la Biblia ndeʼ racné naʼ. Ma diti tampa radzutzi né nigoreʼ ma noʼ más ximiga».

Toib buñgonaʼ ni nap más de 50 íz ni laa Eunice ná: «Cayacnéni naʼ gaca buñtzay né guisiana tipnés cós ni diti galán nac».

Pal roʼolo la Biblia sioladxlo guibanylo, xomod gosaclóo tipnés buñ ni ma bisetlano né xidal millón de buñ (Isaías 48:17, 18). La Biblia labúu gacné looy par labúu gonylo xinésni, gacnéni looy par gaplo ximiglo, diti tzoʼlo ló galrrasaʼ né guisuidylo galnigolú ni bisaʼ guirá cós ni noʼ, ndeʼ ni más rasac ganlo. Consej ni sieed ló la Biblia sieedni de Dios, pal rasobno ni ná la Biblia diti sachéno. Jehová guirá ór radudy consej lóono ni más galán.

Ni raquiin gonyno ngú salóno golno la Biblia. Ló stipnés artículos ni sieed rasetlaa stipnés mod par salólo goʼolo la Biblia né modcu sioladxlo gonylo láani.