Cós ni raquiinno par guisuidyno buñ
1. ¿Ximod toib herman nac xomod toib buñ ni nan ronytzaay yac?
1 Toib buñ ni ronytzaay yac napyibu xidal cós ni raquiinyibu. Tipnés cós raquiinyibu láani rioʼ órsi, per noʼ cós ni raquiinyibu guirási ór. Buñ ni nangoluʼ ronytzaay yac nosi rinéyibu cós ni más raquiinyibu né cós ni más nanyibu raquiinyibu. La Biblia raiby lóono gonyno dada rutirigaʼlni lóono par guininéno buñ xtiitz Dios. Scú láani, Dios ranab que lóono gacno buñ ni ronygoluʼ dxiin (2 Tim. 2:15). ¿Xí láani ngú cós ni más raquiinno? Nacni la Biblia, ndeʼ raquiinno par gonyno más xpiin Jesús (Mat. 28:19, 20). Por ngú, raquiin gonyno dada rutirigaʼlni lóono par guiquiinno galándiguieʼ la Biblia. Per guirá herman raquiin guisuidy guiquiinyibu stipnés cós ni napno par guisuidyibu ni nigolú a stipnés buñ (Prov. 22:29).
2. ¿Xí cós napno ni más raquiinno par guisuidyno buñ?
2 Cós ni más raquiinno par guisuidyno buñ. Napno la Biblia par guisuidyno buñ, per ¿xí stoib cós napno? Ndeʼ nacni toib libro ni laa, ¿Xí ni merpa rasuidy la Biblia?, ngú ni más raquiinno par guisuidyno buñ. Órni ralox rasuidyno libro reʼ né buñ, raquiinno libro ni laa, «Tzodieʼto ló xcalnadxiʼ Dios», né modreʼ buñ guientzaay ximod guisobyibu xilitz la Biblia. Por ngú, raquiin guimbutzaayno né guiquiinno chop libros reʼ. Per diti nosi ngú, láaca raquiin gapno tipnés follet. Xomod follet ni laa, ¡Diitz sacró ni sieed de Dios! ndeʼ racné lóono par salóno guisuidyno buñ. Pal lagary ro ranino xtiitz Dios radzelno buñ ni diti roʼoltzay o raniʼ stoib diitz né diti noʼ libros ló diitz ni raniʼyibu labúu guiquiinno follet ni laa, Bicadiag ni ná Dios o Bicadiag ni ná Dios né labúu guibanylo tipzó. Noʼ stoib cós ni labúu guiquiinno, nacni follet ni laa, ¿Chú layibu rony ni ná Jehová ló xtzúno? ni racné a buñ ni casuidyno par guimbuyibu xcudx Jehová. Videos láaca raquiingoluʼni par gonyno más xpiin Jesús né guiquiinno láani galán. Tipnés videos laa, ¿Xigony guisuidyno la Biblia?, né ¿Ximod rasuidyno buñ de la Biblia?
3. ¿Xí guisuidyno ló Xchiin Dios ni Ronyno par ló beʼo ni sietra?
3 Ló Xchiin Dios ni Ronyno par ló stipnés beʼo ni sietra guisuidyno ximod guiquiinno libros né follet galándiguieʼ. Pal ronyno rutirigaʼlni lóono par guiquiinno láani sacró, casobno litz reʼ ni biduidy Pablo a Timoteo: «Cuá cuidad looyca né xcalrrasuidylo. Dipa guisianlo gonylo guirá cós reʼ, ni gonylo ndeʼ salaalo looyca né salaa guirá ni cacadiag looy» (1 Tim. 4:16).