Ni ranabdiitz buñ ni roʼol

¿Ximod bitzaʼ mod bienno laa Jehová né soberanía xtunybu ni bireʼ ló artículo ni laa, «Que tu nombre sea santificado», de Guiich ni caniʼ de juny íz 2020?

Ló artículo cu bisuidyno que nosi noʼ toib cós ni guiránac buñgudxlio né ángeles racaló: gac nayaa laa Jehová. Ni gac nayaa laa Jehová, ni radudy diitz que mod rony mandarybu más galán láani, nosi nacni toib cós de cuestión reʼ. Né que buñgudxlio guisian Jehová o yaca nacni stoib cós de cuestión reʼ ni rasacgoluʼ.

¿Xigony rareʼ loguiaʼ que cuestión ni más rasac né ni más xiroʼ nacni de laa Jehová né mod gac nayaani? Guibiʼno tzón razón.

Primer, ló lagary móz ni goyoʼ lainy Edén, Buñdzab cualóbu laa Jehová, o mod gócbu. Galrranabdiitz ni buny Buñdzab a Eva bidudyni diitz que Dios diti radudybu ni napbu né que nigolú nanoybu. Né después, Buñdzab goniʼ que diti nigolú ni goniʼ Jehová, né modcu bidudybu diitz que Jehová nac toib ni rascú. Órni bunybu ngú, goniʼbu galrrascú de laa Jehová. Órcu bidxinbu gócbu «Buñdzab», ni radudy diitz «ni rascú» (Juan 8:44). Eva buny crer galrrascú ni goniʼ Buñdzab por ngú diti bisobbu ni ná Dios, modcu cualóbu derech ni nap Dios par gony mandary (Gén. 3:1-6). Ló naareʼ Buñdzab racalóra laa Dios; né xcalrrascúbu ronybu que buñ guinabdiitz pal nigolú guirá ni raniʼ Jehová. Né sigory guirá buñ ni rony crer galrrascú cu diti rasobyibu ni ná Jehová. Par xpiin Dios diti noʼ injusticia más xiroʼ que ni rabiʼyibu ximod góc buidy laa nayaa xtuny Jehová. Ló guirá galrrascú reʼ ralainy galrrioʼob né cós mal ni rac ló Gudxlio.

Ni rarop, par guiguaʼ sacró guirá ni bisaʼbu, Jehová ma goloʼbu guicbu gony nayaabu laabu. Par láabu diti noʼ stoib cós ni más rasac que ndeʼ. Por ngú nábu: «Diti siañ guisiaaya laaya» (Ezeq. 36:23). Ló oración ni buny Jesús goniʼbu: «Gac nayaa laalo». Modcu goleʼ loguiaʼbu xi cós ni más rasac guinabno Jehová lóono ni nacno xpiimbu (Mat. 6:9). La Biblia rasetlaa xidal buelt que nigolú rasac guiliskiaʼ buñ laa Jehová. Guibiʼno tipnés ejemplos. «Colguidudy gloria Jehová ni laabu non guicaʼ» (1 Crón. 16:29; Sal. 96:8). «Colgony cantar alabanzas por laabu» (Sal. 66:2). «Sonyxiroʼya laalo por tipzó» (Sal. 86:12). Láaca, toibtica buelt ni Jehová pa goniʼ desde lainy guibá, Jesús noʼbu lainy templo de gudx Jerusalén né gonabbu Bixiosbu ndeʼ: «Bunyxiroʼ laalo». Jehová cuapy láabu: «Ma bunyxiroʼya láani né sonyxiroʼya láani stoib» (Juan 12:28).a

Ni rion, ni raniiny Jehová láani ngú que laa nayaabu diti guiañ gacxiroʼni por tipzó. Gonyno pensary balaati sasac laa Jehová después ni gony Mandary Cristo por Tipmil íz, órni ma bilox último prueby. ¿Xí láani sony pensary buñgudxlio né ángeles órcu de cuestión ni gac nayaa laa Jehová? Par ganno láani, guibiʼno chop cós ni raguiña cuestión cu: pal sasian buñ Jehová o yaca né derech ni nap Jehová par gony mandary. Ma diti sioʼ ni saniʼ pal guisian buñ Jehová. ¿Xigony? Portín ma diti sacyibu buñ galkié né ma godudyibu ló último prueby. Labúu sabanyibu tipzó. ¿Né xí labúu guinino de derech ni nap Jehová par gony mandary? Ndeʼ ma diti satzoʼni buñ nili sioʼ ni guiniʼ pal Dios nap derech gony mandary. ¿Xigony? Portín siendxichni que mod rony mandary Jehová más galán nacni. Guiráno, tanli buñgudxlio né ángeles sacacuentno sacró láani. Nigoreʼ, ¿xí sac né laa Jehová?

Laabu sac nayaani, né diti sioʼ ni toib galrrascú ni sony buidy laabu. Per xpiin Jehová ni noʼ tanli lainy guibá né ló Gudxlio sadziguiaʼrayibu laa Jehová. ¿Xigony? Portín sabiʼyibu que Jehová sonyra cós ni radziguiaʼ buñ. Jesús sacbu humilde né sadxiguetbu galmandarycu Bixiosbu, Dios sacbu «guiráxadit ni noʼ» (1 Cor. 15:28). Después ni gac ngú, guirá ni sabany ló Gudxlio sioʼ nakityibu portín sapyibu «libertad ni nap xiin Dios» (Rom. 8:21). Né Jehová sony cumplirbu ni ma goniʼ, gapbu toib famil ni tzoʼ toibsi tanli lainy guibá né ló Gudxlio (Efes. 1:10).

¿Né xí sasac xfamil xtuny Jehová órni gac guirá ndeʼ? Guirá ni sioʼ lainy guibá né ló Gudxlio, nigolú saniiny layibu gonyxirorayibu laa Jehová. Salmista David bicaʼ: «Gacxiroʼ Jehová Dios […]. Gacxiroʼ laa móz xtunybu por tipzó» (Sal. 72:18, 19). Sayopyno por tipzó razón copy por ni guiliskiaʼno laa Jehová.

Laa Jehová rony representarni guidopynacbu. Por ngú, órni ronyno pensary ló laabu, rieed ló xpensaryno xcalnadxiʼbu (1 Juan 4:8). Guirá ór sasetnaladxno que Jehová bisaʼ lóono por galnadxiʼ, né bunycuentbu Xiimbu por galnadxiʼ né que galnadxiʼcu bichiinni láabu par guislooybu que xinésni ngú ni rony mandarybu. Né sabiʼno ximod guislooy Jehová xcalnadxiʼ guirá ni bisaʼbu. Por tipzó sadzelno razón par guibigaxno Bixiosno ni noʼ guibá né gony cantarno alabanzas laabu (Sal. 73:28).