Hulda cuaʼ ni goniiny láabu

PAL looy ñeelo toib isla mitien ni noʼ Sangir Besar (Indonesia) ma xidzúyen íz, pentzi nabiʼlo tzón hermanas xtunyno ló play. Ná buñ de isla cu rimbu layibu por ni racnéyibu buñ guieen ni ná la Biblia, layibu diti buny predicaryibu ló play. ¿Xí bunyibu cu?

Primer, goyoʼyibu lainy nisdaʼ né biyopyibu guiee xiroʼ, ni góc midid toib pelot ni raguit buñ futbol, cualanyibu láani dada ló play. Después, gorúyibu ló xilet yac, né golaʼyibu láani par ñacni más mitien que toib dxitquit. De ngú goloʼyibu guieecu lainy cubet gom né biaʼpyibu ló squiler par nadxinyibu lidxyibu. Goloʼtzaybu guieecu ló sac xiroʼ. Né último, tipnés camión bitop láani né biquiinni par ñaʼ carreter.

Toibtica de hermanas cu, laa Hulda. Láabu labúu godudybu más ór que sa chop hermanas cu ló dxiinreʼ. Bidxiich ni cuaʼbu, biquiimbu láani par gocnébu xfamilbu né guirá gaxt. Per después goniiny naquiimbu bidxiichcu, par nasiʼbu: toib tableta par labúu ñoʼbu ló aplicación JW Library^®. Hulda gon que guirá videos né información ni noʼ ló Library labúu ñacnéni láabu par ñony predicarbu más sacró né ñentzaaybu más galán ni ná la Biblia.

Ló tibeʼo gorol, Hulda buny dxiin chop ór guirá rosil. Né guiee ni golaʼbu labúu bixtzabu toib camión mitien. Né labúu gopbu bidxiich par gosiʼbu tableta xtunybu.

Hulda goniʼ: «Nigolú bidzaga né bioʼob ladi. Per, órni gopa tableta xtuni ladxñaya né bibiʼya que labúu naquiinna láani par naniya xtiitz Dios más sacró né más naguel nasudi ni nadudy ló reunión, nili bisetnaladxi castig né galrrioʼob ni godudi ló». Láaca goniʼbu que tableta gocnéni láabu órni gosaló pandemia, órni guiráni gocni por zoom. ¡Balaati rabaladxno que Hulda cuaʼ ni goniiny láabu!