¿Dxu gyré bylaa ru Dios bidnǒ to guió guilnaadz lo guidzyliee lá?

Meñy yahc ni güyuʼ xdze Noé ptsô yame gyréhsy ni naadz (Génesis 6:5)

Adán no Eva güdahp xîñy yame, no nguély gahc bydáhl meñy lo guidzyliee. Were, sriěñy ángel yahc biznál yame ni ptsô Bindzǎb no bydê chehx yame Dios.

Biaht yame de gybâ no guhc yame bêy meñy guidzyliee lehty ncaʼyame meñy ngünâ yahc. Gyré xîny yame guhc meñy di rquihñy no ma ndíp que sriěñy meñy.

Güyuʼ xtahl meñy di rquihñy lo guidzyliee dzcáḻ. Lo Xdîdz Dios rnî «bydáhl ni di rquihñy lo guidzyliee» no meñy yahc tiirc güluʼ ihqy ntsô ni nahqsy.

Noé bzobdîdzme Dios no psâme to arc (Génesis 6:13, 14, 18, 19, 22)

Noé guhcme to mquiee tsiâwy. Jehová byziéñy lême gyniʼdyme meñy di rquihñy no to guió guilnaadz, ni ñuhts gydió lo guidzyliee.

Ráme lê nsâ to caj roo de yáhc ni ndâgü ni bêy ñaḻ lo nzeʼ. Ni rzaglo noo bêy xʼarc Noé. Ñahpme ni nguʼme we xfamiilyme no gyré lo clasy maʼ yahc.

Noé byziéñy sriěñy meñy yahc, tsiguiahc to guió guilnaadz, per nehx bieñy yame lême. Nuu yame aldxi byxihtsynǒü, no sriěñy yame moodni bydziaʼdzynǒ lême.

Ru byluux psâ Noé arc, güluʼ me maʼ yahc leṉ̃ü.