IsAmbulo Esiya KuJohane
10 Ngabona enye ingelosi enamandla yehla ivela ezulwini, ivunule* ngefu, kunothingo ekhanda layo, ubuso bayo bunjengelanga, + nemilenze* yayo injengezinsika zomlilo, 2 esandleni sayo yayiphethe umqulu omncane ovuliwe. Yabeka unyawo lwayo lwesokudla olwandle, kodwa olwesobunxele emhlabeni, 3 yamemeza ngezwi elikhulu njengalapho kubhonga ibhubesi. + Lapho imemeza, amazwi okuduma kwezulu okuyisikhombisa + akhuluma.
4 Lapho ukuduma kwezulu okuyisikhombisa kukhuluma, ngase ngilungele ukubhala; kodwa ngezwa izwi livela ezulwini + lithi: “Zivale ngophawu izinto ezishiwo ukuduma kwezulu okuyisikhombisa, ungazibhali.” 5 Ingelosi engayibona imi phezu kolwandle naphezu komhlaba yaphakamisela isandla sayo sokudla ezulwini, 6 yafunga Lowo ophila kuze kube phakade naphakade, + owadala izulu nezinto ezikulo nomhlaba nezinto ezikuwo nolwandle nezinto ezikulo, + yathi: “Ngeke kusabambezeleka. 7 Kodwa ngezinsuku ingelosi yesikhombisa + ezoshaya ngazo icilongo layo, + imfihlo engcwele + uNkulunkulu ayimemezela njengezindaba ezinhle ezincekwini zakhe abaprofethi + ngempela izogcwaliseka.”
8 Ngaphinde ngezwa izwi livela ezulwini + likhuluma nami lithi: “Hamba, uthathe umqulu ovulekile osesandleni sengelosi emi phezu kolwandle naphezu komhlaba.” + 9 Ngaya engelosini ngayitshela ukuba inginike umqulu omncane. Yathi kimi: “Wuthathe uwudle uwuqede, + uzokwenza isisu sakho sibe buhlungu,* kodwa emlonyeni wakho uzoba mnandi njengoju lwezinyosi.” 10 Ngawuthatha umqulu omncane esandleni sengelosi ngawudla, + emlonyeni wami wawumnandi njengoju lwezinyosi, + kodwa lapho sengiwudlile, isisu sami saba buhlungu.* 11 Kwathiwa kimi: “Kumele uphinde uprofethe mayelana nabantu nezizwe nezilimi namakhosi amaningi.”