‘Khuluma Izwi LikaNkulunkulu Ngesibindi’
“Bagcwala umoya ongcwele, bakhuluma izwi likaNkulunkulu ngesibindi.”—IZE. 4:31.
1, 2. Kungani kufanele silwele ukuphumelela enkonzweni yethu?
KUSASELE izinsuku ezintathu ngaphambi kokuba afe, uJesu wathi kubafundi bakhe: “Lezi zindaba ezinhle zombuso ziyoshunyayelwa emhlabeni wonke owakhiwe ngenjongo yobufakazi ezizweni zonke; khona-ke ukuphela kuyofika.” Ngaphambi kokuba enyukele ezulwini, uJesu ovusiwe wayala abalandeli bakhe ukuba ‘benze abantu bazo zonke izizwe babe abafundi, babafundise ukugcina konke abayale ngakho.’ Wabathembisa ukuthi wayeyoba nabo “izinsuku zonke kuze kube isiphelo sesimiso sezinto.”—Math. 24:14; 26:1, 2; 28:19, 20.
2 NjengoFakazi BakaJehova, sihlanganyela ngentshiseko emsebenzini owaqala ekhulwini lokuqala. Awukho umsebenzi obaluleke ngendlela efanayo nomsebenzi osindisa ukuphila wokushumayela ngoMbuso nokwenza abafundi. Yeka ukuthi kubaluleke kangakanani-ke ukuba silwele ukuphumelela enkonzweni yethu! Kulesi sihloko, sizobona ukuthi ukuqondiswa umoya ongcwele kusisiza kanjani ukuba sikhulume ngesibindi lapho sisenkonzweni. Izihloko ezimbili ezilandelayo zizobonisa indlela umoya kaJehova ongasiqondisa ngayo ukuba sifundise ngekhono futhi sishumayele njalo.
Kudingeka Sibe Nesibindi
3. Kungani ukuhlanganyela emsebenzini wokushumayela ngoMbuso kudinga isibindi?
3 Umsebenzi esiwunikwe uNkulunkulu wokushumayela ngoMbuso uyilungelo elingenakuqhathaniswa. Noma kunjalo, unezinselele. Nakuba abanye abantu bezamukela ngokushesha izindaba ezinhle zoMbuso kaNkulunkulu, abaningi bafana nabantu bosuku lukaNowa. UJesu wathi ‘abanakanga kwaze kwafika uzamcolo, wabakhukhula bonke.’ (Math. 24:38, 39) Kuphinde kube nalabo abasidelelayo noma abasiphikisayo. (2 Pet. 3:3) Singase siphikiswe abasemagunyeni, esifunda nabo esikoleni noma esisebenza nabo, noma ngisho nangamalungu omkhaya wethu. Ngaphezu kwalokho, sibhekene nobuthakathaka bethu siqu, njengokuba namahloni nokwesaba ukungemukelwa. Kunezinto eziningi ezingenza kube nzima ngathi ukuba “nenkululeko yokukhuluma” futhi sikhulume izwi likaNkulunkulu “ngesibindi.” (Efe. 6:19, 20) Ukuphikelela ekukhulumeni izwi likaNkulunkulu kudinga isibindi. Yini engasisiza ukuba sibe nesibindi?
4. (a) Siyini isibindi? (b) Umphostoli uPawulu wasiqunga kanjani isibindi sokukhuluma nabaseThesalonika?
4 Igama lesiGreki elihunyushwe ngokuthi “isibindi” lisho “ukukhuluma ngaphandle kokwesaba, ngokungagunci nangokucacile.” Leli gama linomqondo “wokungabi naluvalo, ukuzethemba, . . . ukungesabi.” Ukuba nesibindi akusho ukungabi naluzwela noma ukuba luhlaza. (Kol. 4:6) Nakuba sinesibindi, sifuna nokuba nokuthula nabantu bonke. (Roma 12:18) Ngaphezu kwalokho, njengoba sishumayela izindaba ezinhle zoMbuso kaNkulunkulu, kudingeka silinganisele phakathi kokuba nesibindi nokungacunuli ukuze singabacasuli abanye singahlosile. Ngempela, ukuze sibe nesibindi kufanele sibe nezimfanelo okudinga umzamo omkhulu ukuzihlakulela. Lolu hlobo lwesibindi aluveli ngaphakathi kithi noma ekuzethembeni. Ngemva ‘kokweyiswa eFilipi,’ umphostoli uPawulu nayehamba nabo ‘basiqunga kanjani isibindi’ sokukhuluma nabaseThesalonika? UPawulu wabhala: “NgoNkulunkulu wethu.” (Funda eyoku-1 Thesalonika 2:2.) UJehova uNkulunkulu angasusa ukwesaba esinakho futhi asinike isibindi esifanayo.
5. UJehova wabanikeza kanjani oPetru, uJohane nabanye abafundi isibindi?
5 Lapho “ababusi [babantu] namadoda amadala nababhali” bebaphenya, abaphostoli uPetru noJohane bathi: “Ukuthi kulungile yini emehlweni kaNkulunkulu ukulalela nina kunoNkulunkulu, yahlulelani nina. Kodwa thina, ngeke siyeke ukukhuluma ngezinto esizibonile nesizizwile.” Kunokuba bathandazele ukuba kuphele ushushiso, bona namanye amaKristu banxusa: “Jehova, naka izinsongo zabo, unike izinceku zakho ukuba ziqhubeke zikhuluma izwi lakho ngaso sonke isibindi.” (IzE. 4:5, 19, 20, 29) UJehova wasiphendula kanjani isicelo sabo? (Funda izEnzo 4:31.) Wabasiza ngomoya wakhe ukuba baqunge isibindi. Umoya kaNkulunkulu ungenza okufanayo nakithi. Singawuthola kanjani-ke umoya kaNkulunkulu futhi usiqondise enkonzweni yethu?
Ukuba Nesibindi
6, 7. Iyiphi indlela eqondile yokuthola umoya ongcwele kaNkulunkulu? Nikeza izibonelo.
6 Indlela eqondile yokuthola umoya kaNkulunkulu iwukuwucela. UJesu watshela izilaleli zakhe: “Uma nina, nakuba nibabi, nikwazi ukunika abantwana benu izipho ezinhle, kangakanani-ke ngoBaba osezulwini, uyobanika umoya ongcwele labo abawucela kuye!” (Luka 11:13) Ngempela, kufanele siwuthandazele njalo umoya ongcwele. Uma sesaba ukuhlanganyela ezicini ezithile zenkonzo—ukufakaza emgwaqweni, ukushumayela ngokwethukela noma ukusebenza insimu yamabhizinisi—singathandaza kuJehova sicele umoya wakhe ukuba usisize siqunge isibindi esisidingayo.—1 Thes. 5:17.
7 Yilokho okwenziwa udade ogama lakhe linguRosa.a Ngolunye usuku esemsebenzini, omunye uthisha asebenza naye wayefunda umbiko ovela kwesinye isikole ophathelene nokuphathwa kabi kwezingane. Lo thisha waphatheka kabi kakhulu ngalokho ayekufunda kangangokuba wakhala, “Kwenzekani kuleli zwe?” URosa wayengeke aliyeke leli thuba elihle kangaka lokunikeza ubufakazi. Wenzani ukuze aqunge isibindi sokukhuluma? Uthi: “Ngathandaza kuJehova ngacela umoya wakhe ukuba ungisize.” Wakwazi ukunikeza ubufakazi obuhle futhi wahlela ukuba baqhubeke nengxoxo yabo esikhathini esizayo. Cabanga nangalokho okwenziwa uMilane, intombazanyana eneminyaka emihlanu ehlala eNew York City. Uthi: “Njalo ngaphambi kokuba ngiye esikoleni, mina nomama siyathandaza kuJehova.” Yini abayicelayo? Bacela isibindi sokuba uMilane akwazi ukumelela uNkulunkulu wakhe futhi akhulume ngaye! Unina uthi: “Lokhu kuye kwasiza uMilane ukuba akwazi ukuchaza ukuthi kungani engazigubhi izinsuku zokuzalwa namaholidi, futhi kwamsiza nokuba angahlanganyeli kule mikhosi lapho igujwa.” Lezi zibonelo azibonisi yini ukuthi umthandazo uyasiza ekuqungeni isibindi?
8. Yini esingayifunda kumprofethi uJeremiya ngokuhlakulela isibindi?
8 Cabanga nangalokho okwasiza umprofethi uJeremiya ukuba abe nesibindi. Lapho uJehova emenza umprofethi ezizweni, uJeremiya wathi: “Bheka empeleni angikwazi ukukhuluma, ngoba ngisewumfana nje.” (Jer. 1:4-6) Nokho, ngokuhamba kwesikhathi uJeremiya waphikelela futhi waba nomfutho emsebenzini wakhe wokushumayela kangangokuthi abaningi bambheka njengombikezeli wezinhlekelele. (Jer. 38:4) Wamemezela izahlulelo zikaJehova ngesibindi iminyaka engaphezu kuka-65. Waziwa kakhulu kwa-Israyeli ngokushumayela kwakhe ngokungesabi nangesibindi kangangokuthi ngemva kweminyaka engaba ngu-600 lapho uJesu ekhuluma ngesibindi, abanye bakholelwa ukuthi wayenguJeremiya owayevusiwe kwabafileyo. (Math. 16:13, 14) Lo mprofethi owayemadolonzima ekuqaleni wawanqoba kanjani amahloni? Uthi: “Enhliziyweni yami [izwi likaNkulunkulu laba] njengomlilo ovuthayo ovalelwe emathanjeni ami; futhi ngakhathala ukuzibamba.” (Jer. 20:9) Yebo, izwi likaJehova laba namandla kuJeremiya futhi lamshukumisela ukuba akhulume.
9. Kungani izwi likaNkulunkulu lingasithinta ngendlela elathinta ngayo uJeremiya?
9 Encwadini ayibhalela amaHebheru, umphostoli uPawulu wathi: “Izwi likaNkulunkulu liyaphila, linamandla futhi libukhali kunanoma iyiphi inkemba esika nhlangothi zombili, lihlaba kuze kuhlukane umphefumulo nomoya, amalunga nomnkantsha wawo, futhi liyakwazi ukuqonda imicabango nezinhloso zenhliziyo.” (Heb. 4:12) Isigijimi sikaNkulunkulu, noma izwi lakhe, singasithinta ngendlela esathinta ngayo uJeremiya. Khumbula ukuthi nakuba kwasetshenziswa abantu ukuba babhale iBhayibheli, aliqukethe ukuhlakanipha kwabantu, ngoba laphefumulelwa uNkulunkulu. Kweyesi-2 Petru 1:21 siyafunda: “Isiprofetho asikaze silethwe ngentando yomuntu, kodwa abantu bakhuluma okuvela kuNkulunkulu ngoba babeqhutshwa umoya ongcwele.” Lapho sizinika isikhathi sokuba nesifundo somuntu siqu seBhayibheli esizuzisayo, izingqondo zethu ziyogcwala isigijimi esiphefumulelwe umoya ongcwele. (Funda eyoku-1 Korinte 2:10.) Lesi sigijimi singaba “njengomlilo ovuthayo” ngaphakathi kithi, kangangokuba ngeke sikwazi ukusigcina kithi.
10, 11. (a) Kufanele ibe njani imikhuba yethu yokutadisha ukuze sibe nesibindi sokukhuluma? (b) Yisho okungenani isinyathelo esisodwa ohlela ukusithatha ukuze uthuthukise izinga lesifundo somuntu siqu.
10 Ukuze isifundo somuntu siqu seBhayibheli sibe nethonya elinamandla kithi, kufanele senziwe ngendlela yokuba isigijimi salo sifinyelele ekujuleni kwethu, sithonye umuntu esinguye ngaphakathi. Ngokwesibonelo, umprofethi uHezekeli wanikezwa umbono lapho ayalwa khona ukuba adle umqulu wencwadi eyayiqukethe isigijimi esinamandla okwakufanele asitshele abantu ababelukhuni. UHezekeli kwakufanele asiqonde ngokugcwele lesi sigijimi futhi asenze sibe ingxenye yakhe. Ukwenza kanjalo kwakuyokwenza ukudlulisela leso sigijimi kube mnandi njengoju.—Funda uHezekeli 2:8–3:4, 7-9.
11 Sisesimweni esifana nesikaHezekeli. Namuhla, abantu abaningi abafune nakuzwa lokho okushiwo iBhayibheli. Ukuze siphikelele ekukhulumeni izwi likaNkulunkulu, kubalulekile ukuba sitadishe imiBhalo ngendlela esenza ukuba sisiqonde ngokugcwele isigijimi esikuyo. Kufanele sibe nomkhuba wokulifunda njalo, kungabi into okuqabuka siyenza. Isifiso sethu kufanele sibe njengesomhubi owahlabelela: “Amazwi omlomo wami nokuzindla kwenhliziyo yami makujabulise phambi kwakho, Jehova Dwala lami noMkhululi wami.” (IHu. 19:14) Yeka ukuthi kubaluleke kangakanani ukuba sizinike isikhathi sokuzindla ngalokho esikufundayo ukuze amaqiniso eBhayibheli angene ajule ezinhliziyweni zethu! Ngokuqinisekile, kufanele silwele ukuthuthukisa izinga lesifundo somuntu siqu.b
12. Kungani imihlangano yobuKristu isisiza ukuba siqondiswe umoya ongcwele?
12 Enye indlela yokuzuza emoyeni ongcwele kaJehova ‘iwukucabangelana ukuze sivuselelane uthando nemisebenzi emihle, singakuyeki ukuhlangana kwethu ndawonye.’ (Heb. 10:24, 25) Ukuzikhandla ukuze sibe khona njalo emihlanganweni yobuKristu, ukulalelisisa nokusebenzisa esikufundayo kuyizindlela ezinhle zokuqondiswa umoya. Kakade, umoya kaJehova usiqondisa ngebandla.—Funda isAmbulo 3:6.
Izinzuzo Zokuba Nesibindi
13. Yini esingayifunda kulokho okwafezwa amaKristu ekhulu lokuqala emsebenzini wokushumayela?
13 Umoya ongcwele ungamandla amakhulu kunawo wonke endaweni yonke futhi unganikeza abantu amandla okwenza intando kaJehova. Ngosizo lwawo, amaKristu ekhulu lokuqala afeza umsebenzi omkhulu kakhulu wokushumayela. Ashumayela izindaba ezinhle “kuyo yonke indalo engaphansi kwezulu.” (Kol. 1:23) Lapho sicabanga ngokuthi iningi lawo lalingabantu “abangafundile nabavamile,” kuba sobala ukuthi amandla ayewashukumisa ayemakhulu kakhulu.—IzE. 4:13.
14. Yini engasisiza ukuba ‘sivuthe emoyeni’?
14 Ukuphila ngendlela evumela umoya ongcwele ukuba uqondise ukuphila kwethu kungasishukumisela nokuba sifeze inkonzo yethu ngesibindi. Izinzuzo esizithola ngokuqhubeka sithandazela umoya, ngokukhuthalela isifundo somuntu siqu esizuzisayo, ngokuzindla ngalokho esikufundayo ngosizo lomthandazo nangokuba khona njalo emihlanganweni yobuKristu zingasisiza ukuba ‘sivuthe emoyeni.’ (Roma 12:11) Ngokuphathelene ‘nomJuda othile ogama lakhe lingu-Apholo, ongowokuzalwa e-Aleksandriya, indoda eqephuzayo, owafika e-Efesu,’ iBhayibheli lithi: “Njengoba ayevutha emoyeni, wakhuluma futhi wafundisa ngokuqondile ngezinto eziphathelene noJesu.” (IzE. 18:24, 25) Lapho ‘sivutha emoyeni,’ siyobonisa isibindi esengeziwe enkonzweni yethu yendlu ngendlu nalapho sishumayela ngokwethukela.—Roma 12:11.
15. Ukukhuluma ngesibindi esengeziwe kusizuzisa kanjani?
15 Ukuba nesibindi esengeziwe lapho sishumayela kuba nemiphumela emihle kithi. Isimo sethu sengqondo ngomsebenzi wethu siyathuthuka ngoba sikuqonda ngokugcwele ukubaluleka nokuba yinzuzo kwawo. Siba nomdlandla kakhudlwana ngoba sithola injabulo eyengeziwe lapho siphumelela enkonzweni. Intshiseko yethu iyakhula ngoba sikuqaphela ngokwengeziwe ukuphuthuma komsebenzi wokushumayela.
16. Yini okufanele siyenze uma intshiseko yethu ngenkonzo isinciphile?
16 Kumelwe senzeni uma sesiye saphelelwa intshiseko ngenkonzo noma isinciphile? Uma kunjalo, kufanele sizihlole ngobuqotho. UPawulu wabhala: “Qhubekani nihlola ukuthi nisokholweni yini, qhubekani nihlola lokho nina ngokwenu eniyikho.” (2 Kor. 13:5) Zibuze: ‘Ingabe ngisavutha emoyeni? Ngiyawuthandazela yini umoya kaJehova? Imithandazo yami iyabonisa yini ukuthi ngithembele kuye ukuze ngenze intando yakhe? Ingabe amazwi ayo abonisa ukuthi ngiyayazisa inkonzo engiyiphathisiwe? Injani imikhuba yami yokutadisha? Singakanani isikhathi engisichitha ngizindla ngalokho engikufundayo nengikuzwayo? Ngihlanganyela kangakanani emihlanganweni yebandla?’ Ukuzindla ngemibuzo enjengale kungakusiza ukuba ubone izindawo obuthaka kuzo bese uthatha izinyathelo ezifanele zokulungisa.
Vumela Umoya KaNkulunkulu Ukwenze Ube Nesibindi
17, 18. (a) Umsebenzi wokushumayela wenziwa ngezinga elingakanani namuhla? (b) Singayibonisa kanjani ‘inkululeko yokukhuluma enkulu kakhulu’ ekushumayeleni izindaba ezinhle zoMbuso kaNkulunkulu?
17 UJesu ovusiwe watshela abafundi bakhe: “Nizokwamukela amandla lapho umoya ongcwele ufika phezu kwenu, futhi nizoba ofakazi bami eJerusalema nakulo lonke elaseJudiya neSamariya nasezingxenyeni ezikude kakhulu zomhlaba.” (IzE. 1:8) Namuhla, lo msebenzi owaqala ngaleso sikhathi wenziwa ngezinga elingakaze libonwe. OFakazi BakaJehova abangaphezu kwezigidi ezingu-7 bamemezela isigijimi soMbuso emazweni angaphezu kuka-230, futhi bachitha amahora angaba izigidi eziyizinkulungwane ezingu-1,5 ngonyaka enkonzweni. Yeka ukuthi kujabulisa kangakanani ukuhlanganyela ngentshiseko kulo msebenzi ongasoze waphindwa!
18 Njengasekhulwini lokuqala, umsebenzi wokushumayela emhlabeni wonke namuhla uqondiswa umoya kaNkulunkulu. Uma senza ngokuvumelana nesiqondiso sawo, siyoba ‘nenkululeko yokukhuluma enkulu kakhulu’ enkonzweni yethu. (IzE. 28:31) Kwangathi-ke singaqondiswa umoya njengoba sishumayela izindaba ezinhle zoMbuso kaNkulunkulu!
[Imibhalo yaphansi]
a Amagama ashintshiwe.
b Ukuze uzuze kakhulu ekufundeni kwakho iBhayibheli nasesifundweni somuntu siqu, bheka isahluko esithi “Funda Ngokuzimisela” nesithi “Ukutadisha Kuyazuzisa,” amakhasi 21-32 encwadini ethi Zuza Emfundweni YeSikole Senkonzo Esingokwasezulwini.
Ufundeni?
• Kungani ukukhuluma izwi likaNkulunkulu kudinga isibindi?
• Yini eyasiza abafundi bokuqala ukuba bakhulume ngesibindi?
• Singaba kanjani nesibindi?
• Ukuba nesibindi kusizuzisa kanjani?
[Isithombe ekhasini 7]
Abazali bangazisiza kanjani izingane zabo ukuba zibe nesibindi?
[Izithombe ekhasini 8]
Umthandazo omfushane ungakusiza ukuba uqunge isibindi enkonzweni