Ukubonakalisa Ukholo Ngemisebenzi Emihle
1 Imisebenzi emihle iwubufakazi bokholo oluphilayo. Ngokwesibonelo, ukholo lushukumisela amaKristu ukuba enze ngozwela kulabo abasweleyo. (Jak. 2:14-17, 26) Ukholo olunjalo luye lwabonakala ngokuvelele ekusekeleni okunikezwa isimiso esiqhubekayo sokwakhiwa kwamaHholo oMbuso. Nakuba bebhekene nokucindezela okwandayo kokuphila kwansuku zonke, kanye nezindleko zokwakha ezikhulayo, oFakazi BakaJehova kuzo zonke izingxenye zomhlaba baye bazibonakalisa ‘bengabantu . . . abashisekela imisebenzi emihle’ ngokusebenza ngokuzithandela nangokunikela ngezimali ukuze kuhlangatshezwane nesidingo sezakhiwo ezengeziwe nezithuthukisiwe zamaHholo oMbuso. (Thithu 2:14) Njengoba “okunxanelekayo kwabo bonke abezizwe” kuqhubeka kugelezela enhlanganweni kaJehova, sinelungelo lokuqhubeka sibonakalisa ukholo lwethu ngemisebenzi yethu ngenxa yakho.—Hag. 2:7.
IZISEBENZI ZOKUZITHANDELA
2 Eminyakeni yamuva kuye kwafezwa umsebenzi omkhulu ekwakhiweni kwamaHholo oMbuso. AmaKomiti Ezokwakha Ezifunda aye asiza amabandla amaningi ngokwakhiwa kwamaHholo oMbuso awo amasha. Eziningi zezakhiwo ezintsha zamaHholo oMbuso zasekelwa ngokuphelele noma ngokwengxenye ngezimali zeNhlangano ezibolekisayo. Izisebenzi zokuzithandela ezinamakhono emisebenzi ahlukahlukene kanye nabadala abanokuhlangenwe nakho abakhonza emaKomitini Ezokwakha Ezifunda, basiza amabandla ngezakhiwo zawo zamaHholo oMbuso. Nalokhu futhi kuyisibonakaliso esihle sothando lobuzalwane, njengoba lomsebenzi ubahlukanisa namabandla nemikhaya yabo.—Roma 12:10; Heb. 13:1.
3 IHubo 110:3 lithi kuJesu omisiwe esihlalweni sobukhosi: “Abantu bakho bayazinikela ngenjabulo ngosuku lwempi yakho,” futhi lokhu kuyiqiniso hhayi nje kuphela emsebenzini wokushumayela nokwenza abafundi kodwa futhi nasezakhiweni. Yebo, kukho konke lokhu, sibheka kuJehova ukuba abusise lelilungiselelo. Njengoba iHubo 127:1 lisho: “Uma uJehova engayakhi indlu, basebenzela ize abayakhayo.”
AMABANDLA ANGASIZA
4 Kunokuningi ibandla ngalinye elingakwenza ukuze lisekele isimiso sokwakhiwa kweHholo LoMbuso. Ngokwesibonelo, amabandla acabangela ukwakha izakhiwo ezintsha angakhetha ipulani elula engeke ibize kakhulu noma idinge umsebenzi omkhulu. (Qhathanisa nabaseFilipi 1:10.) INhlangano inezinhlobonhlobo zamapulani amaHholo oMbuso angeyona inkimbinkimbi. Lapho sibheke phambili esibusisweni sikaJehova emabandleni ethu, kumelwe futhi sibe nokwahlulela okuhle ngamapulani ezakhiwo zethu ukuze zikwazi ukuhlangabezana nesidingo, ngaphandle kokubeka umthwalo ongadingekile phezu kwabazalwane.
5 Lapho nicabangela isakhiwo seHholo LoMbuso, isidingo sokusekela kwebandla ngokwezimali singaxoxwa ngokuqondile nebandla noma amabandla ahilelekile. Lapho abazalwane besekela ngokwezimali ngokwengeziwe ebandleni, kuncane abayodinga ukukuboleka eNhlanganweni noma enhlanganweni yezokwakha. Lokhu kwenza ukuba iNhlangano ibe nezimali ezengeziwe zokusiza amanye amabandla ukuze azisebenzise ekwakheni amaHholo awo oMbuso. Okwamanje iNhlangano inikeza amabandla abaNsundu namaKhaladi kuphela izimali ezibolekiswayo. Amanye amabandla aye athola izimali ezanele neminikelo ebandleni ukuze aqede isakhiwo sawo. Kuhle ukuhlolisisa ukuba khona kwezimali ezinjalo ngaphambi kokucela usizo. (Luka 14:28-30) Ukwakhiwa kweHholo LoMbuso elisha kudinga imali eningi, ngakho abaseFilipi 2:4 bayasikhumbuza: “Yilowo nalowo angabheki okwakhe, kepha yilowo abheke nokwabanye.”
6 Amanye amabandla noma abantu ngabanye bangase bafise ukusiza elinye ibandla, kodwa bangazi ukuthi kuphi noma hlobo luni losizo oludingekayo. Situsa ukuba nithintane neKomiti Yezokwakha Yesifunda eseduze, ukuze ninikeze usizo lwenu lokuzithandela. Uma ningakwazi ukuthintana nayo, iNhlangano noma umbonisi wenu wesifunda anganixhumanisa neKomiti Yezokwakha Yesifunda eseduze. Kunamakomiti ayi-16 anjalo, futhi labazalwane baye benza okuningi ukuze bathuthukise ukwakhiwa kwamaHholo oMbuso. Lamadoda anikela ngezimpelasonto zawo eziningi, ngakho uma ungase ukwazi ukusiza ngandlela-thile, siza uzenze utholakale.
ISIDINGO ESIKHONA
7 Nakuba kuye kwenziwa intuthuko enhle kakhulu phakathi neminyaka embalwa edlule ngesimiso sokwakhiwa kwamaHholo oMbuso, kusadingeka amaHholo oMbuso engeziwe ukuze ahlalise abazalwane bethu nabantu abathakazelayo abeza enhlanganweni. Futhi, lapho sibheka esikhathini esizayo, kusobala kakhulu ukuthi lokhu kwanda kuzoqhubeka. Embhalweni ogciniwe sinengqikithi yamaHholo oMbuso ayi-167 amabandla angaphezu kwe-1 000. Inani elikhulu lalamaHholo lisetshenziswa amabandla amabili noma ngaphezulu. Amabandla amaningi abaNsundu namanye amaKhaladi asahlangana ezakhiweni eziqashiwe, njengezindawo zomphakathi noma amakilasi ezikole. Lezi ngokuvamile azilaneli ibandla. Njengoba abazalwane bengenakuthola lutho olungcono ngokwengeziwe, kumelwe babekezelele izimo eziningi eziphazamisayo. Sifuna ukukhuthaza wonke amabandla anjalo ukuba aqhubeke nokufuna isiza futhi aqhubeke nokwandisa imali yokwakha iHholo lawo LoMbuso. Emadolobheni lapho sinamabandla aqinile khona akubonakali kuyinkinga ngamaningi awo ukuthola isiza nokuthwala izindleko zokwakha ihholo. Sithemba ukuthi eminyakeni embalwa ezayo sizoba namaHholo oMbuso anele kuwo wonke amadolobha amakhulu ukuze ahlalise abazalwane bethu. Amabandla akwaziyo ngokwezimali ukwakha amaHholo awo siqu, kumelwe asebenze kanzima ekufinyeleleni umgomo wawo. Wonke kumelwe abale izindleko ngokucophelela.—Luka 14:28.
8 Lapho sibheka emadolobheni amancane nasezindaweni ezisemaphandleni, lapho sinenani elikhulu lamabandla khona, sithola ukuthi awamaningi kuwo anamandla ngokwanele ngokwenani nangokwezimali okwakha amahholo afana nalawo amabandla asemadolobheni amakhulu. Muva nje amaHholo oMbuso amaningana “asemaphandleni” akhiwa ngezindleko eziphansi kakhulu. Lapho amabandla asemaphandleni noma ezigodini ezincane engase akwazi ukwakha ihholo elinjalo, situsa ukuba enze kanjalo. IKomiti Yezokwakha Yesifunda ngaso sonke isikhathi iyokujabulela ukusiza. (Siza ubheke isithombe seHholo LoMbuso laKwaMondi, Eshowe.)
9 Njengoba amabandla amaningi asemaphandleni engenakukwazi ukubhekana nemali ebolekwa eNhlanganweni, sinxusa wonke amabandla anjalo ukuba asebenzise izinto zebandla futhi akhe indawo yokukhulekela uJehova. Cabangela lokhu: Ingabe sonke asihlali yini ezakhiweni? Futhi ingabe ngasinye salezizakhiwo asakhiwanga ngothile? Ingabe eziningi zezindlu emaphandleni azakhiwanga abafowethu ngokwabo? Azakhiwanga ngezinto ezibizayo kodwa nokho zihlala iminyaka eminingi. Khona-ke, uma umkhaya owodwa ungakha indlu yawo siqu, ingabe imikhaya eminingi (noma mhlawumbe amabandla amancane ambalwa) ngeke yini ahlangana ndawonye futhi akhe indawo yokukhulekela kweqiniso? Ezindaweni eziningi ezinjalo, izindonga zingenzelwa izitini ezomiswe elangeni futhi kutholwe notshani bokufulela. Noma imali ingalondolozelwa uthayela wokufulela. Ngezindleko eziphansi ibandla lingakha isakhiwo esihlanzeke kakhulu sokusisebenzisa njengeHholo lalo LoMbuso endaweni. Sifuna ukunxusa wonke amabandla ukuba akucabangele ngokungathi sina ukwenza kanjalo, njengoba sesisondele esiphelweni futhi kusenamabandla amaningi kakhulu angenazo izindawo zokuhlangana ezifanele. Nalapha futhi, amaKomiti Ezokwakha Ezifunda akulungele ukusiza amabandla anjalo.
10 Lapho amabandla amabili noma ngaphezulu ehlanganyela iHholo LoMbuso elilodwa, kuyoba okudingekile ukuba kumiswe iKomiti Yokunakekela Ukusebenza KweHholo. Abadala bamabandla ahlanganyela ihholo bayohlangana futhi bakhethe abazalwane abathathu noma abane ukuba bakhe lekomiti. Labazalwane bayoba nomthwalo wemfanelo wokunakekelwa kweHholo LoMbuso namagceke. Yebo, abanakuwenza wonke umsebenzi bona ngokwabo kodwa bayolungiselela usizo ngesikhathi oludingeka ngaso nalapho ludingeka khona. Ukuze uthole imininingwane eyengeziwe ngokuphathelene nokusebenza kwalekomiti, siza ubheke INkonzo Yethu YoMbuso kaJuly 1976, ikhasi 6, uhlu 2, izigaba 1-3; INkonzo Yethu YoMbuso kaMarch 1987, amakhasi 5, 6.
IMIPHUMELA EMIHLE KAKHULU
11 Elinye ibandla eliseduze kwasePitoli labika okuhlangenwe nakho okulandelayo ngokuphathelene nesakhiwo salo: “IHholo LoMbuso lakhiwe endaweni esanda kushunyayelwa. Eziningi zezakhamuzi zazinesithakazelo esakhiweni futhi zabuza ukuthi kungani sasakhiwa. Ngokuhamba kwesikhathi abayisikhombisa baqala ukusebenza esakhiweni. Izifundo zeBhayibheli zaqaliswa nalabantu futhi ngokukhulu ukushesha bahlanganyela enkonzweni yasensimini. Abahlanu balabantu babhapathizwa eMhlanganweni WesiGodi ‘Wokulunga Kwaphezulu’ futhi abanye ababili bayaqhubeka nokuthuthuka.” Elinye ibandla esiFundeni saseKapa liyabika: “Umoya omuhle wokubambisana phakathi kwabazalwane nodade bamaqembu ezinhlanga ezihlukahlukene wawubahlaba umxhwele omakhelwane abaningi nabadlula ngendlela. Umakhi wenkontileka wadlula ngemoto esakhiweni ngomunye uMgqibelo ekuseni futhi wayengakukholelwa akubona. Wabona abazalwane nodade bamaqembu ezinhlanga ezihlukahlukene besebenza ndawonye ngokubambisana okuhle. Ngenxa yokusweleka kwabazalwane bokwenza umsebenzi odinga amandla, abanye odade babeqhuba ngisho amabhala futhi bedlulisa izitini. Abantwana bezinhlanga ezihlukene babesebenza ndawonye ngemigqa, bedlulisa izitini. Wayengakaze akubone lokhu ngaphambili, ngakho waya ekhaya ukuyolanda umkakhe ukuze naye futhi abone lokho okwakwenzeka.”
12 Phakathi nemisebenzi yokwakha isandla sikaJehova ezindabeni sibonakala ngezindlela eziningi. Ngokwesibonelo, lapho amathani amaningi enhlabathi yokugcwalisa ayedingeka ngokuphuthumayo, ngokungalindelekile kwafika iloli elikhulu kakhulu esakhiweni futhi umshayeli wabuza ukuthi yayidingeka yini inhlabathi yokugcwalisa. Umzalwane wabamba ithuba lokunikeza umshayeli ubufakazi obufushane futhi wahambisa omagazini ababili. Ngenxa yalokho, amaloli amakhulu ayisithupha alayishwe inhlabathi yokugcwalisa ehlanzekile athunyelwa mahhala ngesikhathi nje esifanelekile nangesilinganiso esifanele futhi. Kwesinye isakhiwo abazalwane babemba umsele ojulile wokuhambisa indle. Kwakunentuthuko encane kakhulu eyayenziwa ngenxa yesimo sesiza esinamadwala. Ngolunye usuku kusihlwa umbonisi owengamele wamukela ucingo. Owayeshaya ucingo wayecela imvume yokupaka imoto yakhe enkulu esizeni. Lapho ebuzwa ngohlobo lwemoto, kwakuwumshini omkhulu wokumba imisele. Ngosuku olulandelayo ekuseni, umsele wambiwa esikhathini esingaphansi kwehora! Umshayeli waphindela emuva ejabule futhi ibandla lajabula ngokulondolozelwa amasonto amaningi omsebenzi onzima.
13 Kwemukelwa iminikelo eminingi yokuzithandela. Iminikelo yezimali neyezinto zokwakha ngokuvamile yenziwa abantu abafunda iBhayibheli noFakazi BakaJehova. Lapho ezwa ukuthi ibandla lalizokwakha ikamelo lamaphayona njengengxenye yeHholo LoMbuso, omunye owesifazane owayefunda iBhayibheli wakhumbula ukuthi umyeni wakhe wayethenge amapanel amabili amakhulu okushisisa amanzi ngelanga, ayengakasetshenziswa. Wakhuluma nomyeni wakhe owavuma ukunikela amapanel esakhiweni. Ngenxa yalokho, lelikamelo linelungiselelo lamanzi amaningi nokho angaduli. Abantu bezwe nabo futhi bebezimisele kakhulu ukusiza. Inkontileka eyakha izindonga zikakhonkolo yaqashwa ukuba yakhe uphahla olude lodonga lukakhonkolo olungamamitha amabili ukuphakama oluzungeze ingxenye yendawo yokupaka. Lapho umsebenzi wakhe wenkontileka usuqediwe wenqaba ukuthumelela ibandla iakhawunti yesikweleti somsebenzi ayewenzile, ethi wayefisa ukunikela ngaloludonga. Sasiyini isizathu? Phakathi nokwakhiwa kodonga wajwayelana nabazalwane futhi wayamukele ubufakazi ababebunikeza ngokuhlakanipha. Wahlatshwa umxhwele yilokho akubona nakuzwa.
14 Inzuzo ephawulekayo yokuba neHholo LoMbuso elifanelekile, ukwanda kwababa khona emihlanganweni. Elinye ibandla lalibika abangama-80 ababa khona emhlanganweni wangeSonto. Nokho, ngokushesha ngemva kokuqedwa kweHholo LoMbuso ababa khona banda bafinyelela e-170. Ukukhula okuvelele kakhulu kwakungokwamaphayona, kunayi-8 avamile nesilinganiso samaphayona asizayo ayi-12 ngenyanga.
AMAZWI OKWAZISA
15 Amabandla aye abhala izincwadi ezwakalisa ukwazisa kwawo ngezimali ezibolekiswayo zamaHholo oMbuso ezinikezwayo. Isibonelo salezi amazwi okwazisa ashiwo ibandla laseThekwini: “Siyanibonga ngokusisiza ngalendlela, futhi qinisekani ngokwazisa kwethu okujulile ngehholo elihle kangaka esiziqhenya kakhulu ngokuba abanikazi balo. Bonke abazalwane nodade ebandleni lethu babe nesikhathi esijabulisayo esimisweni sokwakha, esaqedwa nje ezinyangeni ezimbili. Eqinisweni, siyakhumbulana kakhulu njengoba seliphelile.” INhlangano ingathanda futhi ukuzwakalisa ukwazisa kwayo ngendlela amabandla amaningi akhokha ngayo zinyanga zonke izimali ezibolekiswayo zamaHholo awo oMbuso. Uma lezimali zikhokhwa ngokushesha, ngokushesha izimali ezinjalo zingasetshenziswa iNhlangano kwezinye izakhiwo ezingokwasezulwini. Lokhu futhi kuyoba inzuzo ebandleni, ngoba kuyosho ukukhokha inzalo encane.
16 Lapho sibheka esikhathini esizayo, kusobala kakhulu ukuthi oFakazi BakaJehova bayoqhubeka nokwanda ngamanani. Ukuze silungiselele izidingo zethu zamanje nezesikhathi esizayo, kudingeka amaHholo oMbuso amaningi. Sithandazela isibusiso sikaJehova esiqhubekayo esimisweni sokwakhiwa kwamaHholo oMbuso. Ngokusekela kwethu ngenhliziyo yonke, singabonisa ukwazisa kwethu ngeHholo LoMbuso nendima yalo ekusisizeni ukuba sikhuthazane futhi “kuvuswe uthando nemisebenzi emihle.” (Heb. 10:24, 25) Lokhu kuhilela ukunakekela ngokwethembeka iHholo LoMbuso lethu nokusiza abanye ngeminikelo, umsebenzi wokuzithandela, nokunye ukusekela okudingekayo ngangokusemandleni ethu. Maqondana nalokhu, sonke masizimisele ‘ukungakhathali ekwenzeni okuhle, ngokuba siyakuvuna ngesikhathi esifaneleyo, uma singadangali.’—Gal. 6:9.
[Pictures on page 4, 5]
Kwa-Mashu, eThekwini
Katlehong East, eGermiston
Kraaifontein, eKapa
Soshanguve, ePitoli
Phoenix, eThekwini
Khayelitsha, eKapa
Ennerdale, eGoli
Kwa-Mondi, Eshowe
Mohlakeng, eGoli