Phatha Izwi Leqiniso Ngekhono
1 Ikhono lethu ekusebenziseni iZwi likaNkulunkulu lingathinta indlela abantu abasabela ngayo ezindabeni ezinhle. Ngakho, uPawulu wakhuthaza ukuhlakulelwa kokuba nekhono enkonzweni, ethi: “Khuthalela ukuba uziveze uthembekile kuNkulunkulu, isisebenzi esingenamahloni, [esiphatha, NW] kahle izwi leqiniso.”—2 Thim. 2:15.
2 Ikhono lokusebenzisa iBhayibheli kumelwe lihlakulelwe. Ukubekela eceleni isikhathi sesifundo somuntu siqu nokuba khona emihlanganweni yobuKristu kubalulekile. Nokho, kumelwe sisebenzise izinto esizifundayo ngokulisebenzisa njalo iBhayibheli enkonzweni. Lokhu kudinga umzamo oqhubekayo njengoba sifuna usizo lukaNkulunkulu nesiqondiso.—1 Joh. 3:22.
3 Gxila EZwini LikaNkulunkulu: Kubalulekile ukuba abantu baqaphele ukuthi isigijimi sethu asiveli kithi siqu kodwa eZwini likaNkulunkulu elilotshiwe. (Joh. 7:18) Ukubonisa umuntu lokho uNkulunkulu akushoyo ngendaba ethile eBhayibhelini kungaba nethonya elikhulu. Abantu abanezinhliziyo ezilungile badonselwa esigijimini esinamandla seBhayibheli. Lapho siyisebenzisa kakhulu ngokwengeziwe imiBhalo, siba nekhono ngokwengeziwe futhi siyokwazi ukwenza abanye ukuba bazi okwengeziwe ngeZwi likaNkulunkulu, eliyobazuzisa.
4 Abantu abaningi abajwayelene neBhayibheli. Lapho silisebenzisa, kumelwe senze okungaphezu nje kokufunda imibhalo. Ukulungiselela okucatshangelwe kuyadingeka ukuze sibone ukuthi sizowethula kanjani umbhalo othile. Imibuzo noma inkinga ephakanyisiwe ingase isetshenziswe ukuze kuvuswe isithakazelo. Futhi, kumelwe sikunikeze ukunakekela lokho esikushoyo ngemva kokuba umbhalo usufundiwe. Umuntu angase angalitholi iphuzu ngemva kokuba umbhalo ufundwe kanye kuphela. Ukuphinda ugcizelele amagama ayinhloko nokubonisa indlela asebenza ngayo kuyovumela ukuba imiqondo igxile.—Bheka Incwadi Yokuchasisa Isikole, izifundo 24 no-25.
5 Isipho: Phakathi noNovember sizobe sihambisa incwadi ethi IBhayibheli—Izwi LikaNkulunkulu Noma Elomuntu? Yini esingase siyisho kubantu lapho sihambisa lesisipho? Ngemva kokuzethula singase sithi: “Namuhla, abaningi babheka kubantu abahlukahlukene noma ezincwadini ezithile ukuze bathole isiqondiso. Ingabe wena unomuzwa wokuthi yimuphi umthombo ongcono kakhulu wesiqondiso esiwusizo? [Lindela impendulo.] Ake ucabangele lokho iBhayibheli elikushoyo ngomthombo weqiniso wokuhlakanipha. [Funda IzAga 2:6, 7.] Ukuhlakanipha kwabantu kuye kwabonakala kwehluleka ngokudabukisayo, kuholela enhlekeleleni nasekulahlekelweni yithemba. Nokho, ukuhlakanipha kukaNkulunkulu ngaso sonke isikhathi kuye kwabonakala kunokwethenjelwa futhi kuzuzisa. [Funda uIsaya 48:17, 18.] Ngakho-ke, kufanele sibheke kuNkulunkulu, okuwuyena onikeza isiqondiso esidingekayo ukuze sibhekane nezinkinga ezisehlelayo.” Khona-ke singavula esahlukweni 12 encwadini ethi Izwi LikaNkulunkulu bese siqondisa ukunakekela esigabeni 2. Ngemva kwalokho, iphuzu elifanelekayo elikulesisahluko lingahlobaniswa nendaba.
6 Ngemva kokusebenzisa izAga 2:6, 7 ukuze uqokomise ukuphakama kokuhlakanipha kukaNkulunkulu, chazela umninikhaya isizathu sokuba uhloniphe futhi wazise iBhayibheli. Mazise ukuthi izimfundiso zalo ziyomzuzisa futhi zimnikeze ithemba eliqinisekile lesikhathi esizayo. Ingxoxo enjalo ingavula amathuba okuveza ezinye zezeluleko ezihlakaniphile zeBhayibheli ngokuqondene nezinkinga zansuku zonke futhi ingase iholele esifundweni seBhayibheli.
7 UJesu njalo wayebhekisela emiBhalweni ekusizeni abantu abanhliziyo-ziqotho nasekulahleni abaphikisi bakhe. Kwakuwumkhuba kaPawulu ‘ukuvula nokuchasisa’ izinto ayezifundisa. (IzE. 17:2, 3) Ukuqiniseka kwethu nenjabulo enkonzweni kuyokwanda njengoba silwela ngobuqotho ukuba nekhono ngokwengeziwe ekuphatheni iZwi leqiniso.