Qapha Unembeza Wakho
1. Sithini isihloko somhlangano okhethekile wosuku olulodwa wonyaka wenkonzo ka-2013, futhi iyini injongo yalesi simiso?
1 Usuku ngalunye sichayeka ezimweni ezingasenza senze izinto ezingqubuzana nonembeza wethu. Yingakho umhlangano okhethekile wosuku olulodwa wonyaka wenkonzo ka-2013, oqala ngo-September 1, 2012, unesihloko esithi “Qapha Unembeza Wakho.” (1 Thim. 1:19) Lesi simiso siklanyelwe ukusiza ngamunye wethu ukuba ayinakisise indlela asebenzisa ngayo lesi sipho esimangalisayo esivela kuMdali wethu.
2. Imiphi imibuzo ebalulekile eyophendulwa phakathi nesimiso?
2 Naka La Maphuzu Alandelayo: Lesi simiso siyophendula imibuzo eyisikhombisa eyinhloko ephathelene nonembeza:
• Iziphi izinto ezingaba yingozi kunembeza wethu?
• Singawuqeqesha kanjani unembeza wethu?
• Kungenzeka kanjani ukuba umuntu abe msulwa egazini labo bonke abantu?
• Ukucabanga nokwenza ngokuvumelana nezimiso zeBhayibheli kwembulani ngathi?
• Singakugwema kanjani ukulimaza abanye ezindabeni ezihilela unembeza?
• Basha, ningabhekana kanjani nencindezi yokuba niyekethise?
• Yiziphi izibusiso ezitholwa yilabo abalandela unembeza wabo oqondiswa umoya?
3. Singazuza kanjani kulesi simiso?
3 Ngosizo lukaJehova singamelana nemizamo kaSathane yokonakalisa onembeza bethu. NgeZwi likaNkulunkulu nangenhlangano yakhe, uBaba wethu osezulwini onothando uyasitshela: “Nansi indlela. Hambani ngayo.” (Isaya 30:21) Lesi simiso singenye indlela uJehova asinikeza ngayo isiqondiso esinjalo. Ngakho-ke, yenza amalungiselelo okuba ube khona kuso sonke isimiso. Lalelisisa futhi ucabange ngendlela ozokusebenzisa ngayo lokho kwaziswa. Xoxani ngesimiso njengomndeni. Ukusebenzisa imfundo esizoyithola kuzosiqinisa ukuba siqhubeke ‘sinonembeza omuhle’ futhi kusisize ukuba sigweme ukuphambukiswa izinjabulo zesikhashana zezwe likaSathane.—1 Pet. 3:16.