ISikole Senkonzo Esingokwasezulwini Sika-2015 Sisisiza Ukuba Sithuthukise Ukufundisa Kwethu

¹ Umhubi uDavide wabhala: “Amazwi omlomo wami nokuzindla kwenhliziyo yami makujabulise phambi kwakho, Jehova Dwala lami noMkhululi wami.” (IHu. 19:14) Nathi sifuna ukuba amazwi ethu ajabulise uJehova ngoba siyalazisa ilungelo lethu lokukhuluma iqiniso ebandleni nasenkonzweni. ISikole Senkonzo Esingokwasezulwini singenye yezindlela uJehova asiqeqeshela ngayo inkonzo. Lokhu kuqeqeshwa kutholakala emabandleni angaphezu kuka-111 000 emhlabeni wonke isonto ngalinye. Kusize abafowethu nodadewethu abavela ezizindeni ezihlukahlukene ukuba babe izikhonzi ezifanelekayo zezindaba ezinhle, ezikwazi ukufundisa ngendlela ekholisayo, ngokungacunuli nangesibindi.—IzE. 19:8; Kol. 4:6.

² Isimiso sesikole sango-2015 sizoba nezihloko ezithathwe encwajaneni ethi ISethulo SeZwi LikaNkulunkulu, Ukubonisana nezinye izincwadi. Ngaphezu kwalokho, kwenziwe izinguquko esikhathini esabelwe amaphuzu avelele neSabelo No. 1. Ezigabeni ezilandelayo kuzoxoxwa ngalezi zinguquko nangeziqondiso zendlela izingxenye zesikole okufanele zethulwe ngayo.

³ Amaphuzu Avelele: Abazalwane ababelwa le ngxenye bazoba nemizuzu emibili yokukhulumela iphuzu elilodwa elingokomBhalo elithakazelisayo neliwusizo ekufundweni kweBhayibheli kwamasonto onke. Ukulungiselela kahle kuyobenza bakwazi ukuhlanganyela nebandla iphuzu elizuzisayo ngesikhathi esabelwe. Ngemva kwalokho, ibandla lizonikezwa imizuzu eyisithupha yokuba umuntu ngamunye akhulumele iphuzu elithakazelisayo alithole ekufundweni kweBhayibheli kwamasonto onke imizuzwana engu-30 noma ngaphansi njengoba kunjalo namanje. Kudinga ukulungiselela nokuzibamba ukunikeza impendulo ezwakalayo ngemizuzwana engu-30, kodwa ukwenza kanjalo kuyasiqeqesha. Kunikeza nabanye isikhathi sokukhulumela lokho abakufundile lapho becwaninga.

⁴ ISabelo No. 1: Isikhathi esabelwe ukufundwa kweBhayibheli sincishisiwe saba imizuzu emithathu noma ngaphansi futhi kuzofundwa ukwaziswa okufushane. Labo abathola izabelo zokufunda kufanele baprakthize izikhathi eziningana ngokufunda ngokuzwakalayo nangokunakisisa indlela efanele yokuphimisela amagama nokufunda ngokushelela ukuze bakuqonde lokho abakufundayo. Bonke abantu bakaJehova kufanele balwele ukufunda kahle ngoba ukufunda kunendima ebalulekile ekukhulekeleni kwethu. Yeka indlela esijabula ngayo ngokuthi izingane zethu eziningi zifunda kahle! Abazali kumelwe banconywe ngemizamo yabo yothando yokusiza izingane zabo zibe abafundi abahle.

⁵ ISabelo No. 2: Le kuzoba inkulumo yemizuzu emihlanu ezokwabelwa udade. Kufanele kusetshenziswe isihloko esabiwe. Uma le nkulumo ingasekelwe kumuntu othile oseBhayibhelini, kufanele ayenze isebenze esicini senkonzo yasensimini esingokoqobo nesisebenzayo ensimini yebandla. Uma isekelwe kumuntu othile oseBhayibhelini, umfundi kufanele ayilungiselele futhi akhethe imiBhalo efanelekayo azoyisebenzisa, aveze lokho esingakufunda esibonelweni salowo muntu oseBhayibhelini. Angase anezele neminye imiBhalo evumelana nesihloko. Umbonisi wesikole uyokwaba umsizi oyedwa.

⁶ ISabelo No. 3: Le kuzoba inkulumo yemizuzu emihlanu ezokwabelwa umzalwane noma udade. Uma yabelwe udade, kufanele inikezwe njengoba kuboniswe eSabelweni No. 2. Lapho yabelwe umzalwane futhi ingenalo lolu phawu (△), kufanele inikezwe njengenkulumo, isikhulumi sicabange ngezilaleli. Umfundi kufanele alungiselele le nkulumo futhi akhethe imiBhalo efanelekayo azoyisebenzisa, aveze nalokho esingakufunda esibonelweni somuntu oseBhayibhelini okusekelwe kuye inkulumo.

⁷ Isici Esisha ESabelweni No. 3 Esenziwa Abazalwane: Uma le nkulumo yabelwe umzalwane futhi inalolu phawu (△), kufanele yethulwe njengomboniso wesifundo somkhaya noma wenkonzo yasensimini. Ngokuvamile umbonisi wesikole uyokwaba umsizi nokuhlelwa kwenkulumo. Umsizi kufanele kube ilungu lomndeni wakhe noma umzalwane wasebandleni. Angase anezele neminye imiBhalo ekhanyisa izimiso zeBhayibheli ezivumelana nesihloko. Ngezinye izikhathi, le ngxenye ingase yabelwe umdala. Abadala bangazikhethela bona umsizi nokuhlelwa kwenkulumo. Akungabazeki ukuthi kuyolikhuthaza ibandla ukubona abadala benza imiboniso ekhombisa ikhono lokufundisa nelungu lomndeni noma nomunye umzalwane.

⁸ Iseluleko: Umbonisi wesikole uzosebenzisa imizuzu emibili ngemva kwenkulumo yomfundi ngamunye ukuze ancome futhi anikeze iseluleko esakhayo esisekelwe encwadini ethi Zuza Emfundweni YeSikole Senkonzo Esingokwasezulwini. Lapho umbonisi wesikole ethula inkulumo yomfundi esikoleni, ngeke amemezele ukuthi umfundi usebenzela kuliphi iphuzu leseluleko. Ngemva kwenkulumo ngayinye, umbonisi wesikole kufanele ancome umfundi ngobuqotho, amemezele iphuzu umfundi asebenzela kulo, asho ngokuqondile ukuthi kungani umfundi enze kahle kulelo phuzu noma achaze ngomusa ukuthi kungani kungamzuziza ukuqhubeka elinakisisa.

⁹ Iphepha leseluleko lomfundi lisemakhasini 79 kuya ku-81 encwadi yakhe ethi ISikole Senkonzo. Ngemva kokuba umfundi enikeze inkulumo, umbonisi wesikole uzobhala encwadini yomfundi bese embuza ngasese ukuthi usenzile yini isivivinyo sephuzu abesebenzela kulo. Angase ancome futhi anikeze umfundi ukusikisela okuwusizo ngemva komhlangano noma ngesinye isikhathi. Ukunakwa okukhethekile umfundi ngamunye akuthola esikoleni kufanele kubhekwe njengethuba lokumsiza athuthuke ngokomoya.—1 Thim. 4:15.

¹⁰ Uma umfundi edla isikhathi, umbonisi wesikole noma umsizi wakhe kufanele bakuphaphamele ukumenza akubone lokho ngokushaya insimbi noma ukushaya into ethile ukuze abonise umfundi ngobuhlakani ukuthi isikhathi sakhe siphelile. Umfundi kufanele asabele kulokho ngokuqedela lokho akushoyo abese esuka esiteji.—Bheka incwadi ethi ISikole Senkonzo, k. 282, isig. 4.

¹¹ Bonke abafanelekayo bakhuthazwa ukuba babhalise eSikoleni Senkonzo Esingokwasezulwini. (Bheka incwadi ethi ISikole Senkonzo, k. 282, isig. 6.) Imfundo etholakala kulesi sikole isize abantu bakaJehova ukuba bashumayele futhi bafundise izindaba ezinhle zoMbuso ngokuqiniseka, ngesithunzi nangothando. Akungabazeki ukuthi uJehova uyajabula ngokudunyiswa yibo bonke abazuza kakhulu emfundweni engokwasezulwini!—IHu. 148:12, 13; Isaya 50:4.