Imibuzo Evela Kubafundi
◼ Ingabe uDina, indodakazi kaJakobe, wadlwengulwa uShekemi, futhi ingabe kwabe kuyisenzo sobudlova kuphela, noma wayefuna ukushada naye?
Ngokusobala uShekemi waba nobuhlobo bobulili noDina ngokuphambene nesifiso sakhe. Wamdlwengula. Nokho, ukuvakashela kwakhe njalo abaseKhanani kwambeka esimweni esibucayi futhi ngokusobala kwaholela ekumthandeni ngamandla nasekufiseni ukumthatha njengomfazi wakhe.
Indaba ekuGenesise 34:1-3 ifundeka kanje: “UDina . . . waphuma ukuyobona amadodakazi alelozwe. UShekemi indodana kaHamori umHivi, inkosi yezwe, wambona, wamthatha, walala naye, wamona. Inhliziyo yakhe yabambelela kuDina indodakazi kaJakobe, wayithanda intombi, wakhuluma kuyo inhliziyo yentombi.” Naphezu kwemizamo kayise yokunciphisa ukuhlanganyela nabantu ababi baseKhanani ngokumisa itende ngaphandle komuzi kaShekemi futhi wazenzela umthombo ohlukile wamanzi, uDina wayelokhu ‘evamise ukuphuma ukuyobona amadodakazi alelozwe.’ (Genesise 33:18, NW; Johane 4:12) Igama eliyisezo lesiHeberu elihunyushwe ngokuthi “wayevamise ukuphuma” lisenkathini engaphelele, ebonisa isenzo esiqhubekayo. Lesisenzo esisenkathini efanayo sichaza futhi ukuthi, ngokuhambisana nalendaba, “wayephuma njalo” futhi “wayejwayele ukuphuma.” (1 Samuweli 18:13; 1 AmaKhosi 10:29) Ngakho-ke ithuba uDina alithola lokuphumela ngaphandle kwakungelona elokuqala. Ngokusobala wayethanda “ukubona,” nokujwayela kahle omakhelwane bakhe kulowomuzi.
Kwesinye isenzakalo phakathi nokuvakashela kwakhe okuvamile, uShekemi ‘wamthatha [uDina], walala naye, wamona.’ Ngokwegama lesiHeberu elichaza “ukumona,” iA Hebrew and English Lexicon ebhalwe uWilliam Gesenius ithi: “Ukona ubuhle bowesifazane, ngokuvamile ngendluzula.” Leligama elifanayo kubAhluleli 29:24 naku-AbaHl 20:5 lisho “ukudlwengulwa.” Nokho, ukuvuma okusesilinganisweni esithile ngasohlangothini lowesifazane kuboniswe kuDuteronomi 22:24 lapho leligama elifanayo lesiHeberu lisetshenziswe khona. Mhlawumbe ekuqaleni uShekemi noDina bobabili abazange bacabange ngobuhlobo bobulili, kodwa njengoba inkanuko yakhe yavuswa ubuhle balentombi emsulwa, enesithakazelo sokwazi, ngaphandle kokuzithiba kokwesaba uNkulunkulu, wenza lokho amadoda amaningi aseKhanani ayengase akubheke njengento engokwemvelo. Eqinisweni, wayesefike endaweni yakubo kaShekemi! Lapho uDina ngokusobala enqaba ukuba “adlulele kulokho,” wamehlula kalula.
Ngisho nalapho uDina ngokwesilinganiso esithile engazange avume, wayelokhu enomthwalo wemfanelo wokulahlekelwa ubuntombi bakhe. Nakuba ayevakashela kuphela “amadodakazi, alelozwe” ake ucabange nje ngokuziphatha kwawo. Iqiniso lokuthi abafazi bakaEsawu abangamaHeti (noma, ababengamaKhanani) “babalusizi enhliziyweni” kaIsaka noRebeka abesaba uNkulunkulu ngokuqinisekile kwakuyisibonakaliso sobubi kakade obase bukhona phakathi “kwamadodakazi alelozwe.” (Genesise 26:34, 35; 27:46) Ukuziphatha okubi kobulili, okuhlanganisa ukulalana kwezihlobo, ubungqingili, ukulala nesilwane ekugcineni kwaphenduka ingxenye ‘yemisebenzi eyayenziwa ezweni laseKhanani.’ (Levitikusi 18:2-25) Ngakho yini uDina ayekhuluma ngayo phakathi nokuvakasha okunjalo? Ingabe ngempela wayeqiniseka ukuthi uyogwema ubudlelwano nabafowabo bamantombazane kanye namasoka? Ukuzihlanganisa komuntu wesifazane, ngokusobala eyedwa, phakathi kwabantu abaziphatha kabi kanjalo kwakumema inkathazo. UDina wayekwazi lokho okwenzeka kokhokho bakhe ulsaka noRebeka lapho beseKhanani. Emehlweni amadoda onakele aseKhanani, uDina waba yisisulu esingokomthetho. Wazibeka ngokwakhe esimweni esibucayi futhi wathola umvuzo walokho ngokulahlekelwa ubuntombi bakhe, phezu kwanoma ikuphi ukwenqaba kwakhe komzuzu wokugcina.—Genesise 20:2, 3; 26:7.
Ngemva kwalesigigaba uShekemi wagcina uDina ekhaya kwabo futhi “wakhuluma” naye, ngokungathi ukhuluma ‘enhliziyweni yakhe.’ Uyise wathi: ‘Inhliziyo kaShekemi ibambelele [kuDina].’ Akunakwenzeka ukuthi uthando oluvutha kangako lwalungase lusunguleke ngokubonana nje kokuqala. Ngokusobala wayephawule izimfanelo zakhe ezinhle ngaphambili, mhlawumbe phakathi nokuvakashela kwakhe okuvamile. Manje wayesefuna ukushada naye. Yena noyise futhi kwakungenzeka baba nomuzwa wokuthi ukucela umshado ngandlela-thile kuyohlawula isenzo sendodana futhi kulungise isimo, kugcine ubudlelwano obunokuthula nendlu ebusisekile kaJakobe.—Genesise 34:3, 8.
Sonke lesigigaba saholela ekubulaweni kabuhlungu kukaShekemi, uyise, nawo onke amadoda omuzi. Lokhu kwenza ukuba indlu kaJakobe ibandlululwe futhi kwaholela ekusoleni kwakhe amadodana akhe ngolaka lwawo eminyakeni eminingi kamuva. (Genesise 34:30; 49:5-7) Yeka uchungechunge lwezenzakalo ezesabekayo, futhi zonke zazingenxa yokuthi uDina wehluleka ukuqaphela abangane bakhe. Lesigigaba esisemibhalweni ephefumlelwe siyisixwayiso ezintombini ezingamaKristu namuhla ezingase, ngenxa yokushisekela ukwazi, zilingwe ukuba zibe nobudlelwano nalabo abangezona izinceku zikaNkulunkulu.—IzAga 13:20.