Есфирь
10 Аҳ Ахашверо́ш иаҳра иаҵанакуаз адгьылқәа зегьы рҿы аџьатә уалдҵа алеигалеит.
2 Аҳ Ахашверо́ш иус дуқәа ртәы, иара убас уи Мардохе́и дышҳареикыз иазку аҭоурых ак агмыжькәа мидиатәи аҳцәеи персиатәи аҳцәеи рҭоурыхқәа рышәҟәы иануп. 3 Ауриа Мардохе́и аҳ Ахашверо́ш иаҳраҿы аҳ ишьҭахь аҩбатәи аҭыԥ ааникылон. Иара ауриацәа рыбжьара амчра ду иман, патугьы иқәын. Мардохе́и ижәлар, иашьцәа, ирыхәаша дашьҭан, урҭ ирхылҵуа рԥеиԥш дазхәыцуан*.