Лука иҟынтә ажәабжь бзиа

12 Уи аамҭазы зықьҩыла ауаа еизеит, шьапыргыларҭагьы ыҟамызт. Иисус иҵаҩцәа рахь дынхьаԥшын, ус реиҳәеит: «Шәгәышәҽаныз, афарисеицәа рымажәарҵәыга — рымц — шәҽацәышәыхьчала. 2 Иҵәаху зегь цәыргахоит, имаӡоугьы маатыр залшом. 3 Убри аҟынтә еибышәҳәо ауаа зегьы ираҳауеит, ауадаҿы маӡала ишәҳәо аҩнқәа рхыбқәа рҟынтә ауаа ирылаҳәахоит. 4 Уи адагьы, аҩызцәа, ишәасҳәоит: шәырцәымшәалан шәызшьыр зылшо, аха шәанԥслак ашьҭахь уаҳа ак шәзура злымшо. 5 Шәзыцәшәалаша сара ишәасҳәоит: Анцәа шәицәшәала, избанзар иара шәишьыргьы илшоит, шәанишьлак ашьҭахь, гееннаҟа* шәишьҭыргьы илшоит. Убри аҟынтә Анцәа шәицәшәала. 6 Хә-баӷырк ҩ-капеик* ҳәа акәӡами ишырҭиуа? Аха Анцәа руакгьы ихашҭӡом. 7 Шәара шәакәзар, иара шәхыцәхәыцқәаҵәҟьа зегь ԥхьаӡаны имоуп. Шәымшәан, шәара абаӷырқәа раасҭа еиҳа акыр шәаԥсоуп.

8 Сара ишәасҳәоит: ауаа рҿаԥхьа исыдгыло, ауаҩытәыҩса Иԥагьы Анцәа имаалықьцәа рҿаԥхьа уи дидгылоит. 9 Аха ауаа рҿаԥхьа мап сцәызкуа, ауаҩытәыҩса Иԥагьы Анцәа имаалықьцәа рҿаԥхьа уи мап ицәикуеит. 10 Ауаҩытәыҩса Иԥа иакәым изызҳәо игәнаҳа ианажьхоит, аха иԥшьоу адоуҳа аӡәы иакәым азиҳәозар, уи игәнаҳа ианажьхаӡом. 11 Ауаа рҿаԥхьа* шәандыргыло, анапхгаҩцәеи амчра знапаҿы иҟоу ауааи рахь шәаннарго, шәхы шәыхьчарц азы ишәҳәаша шәмоур, ма ишышәҳәаша шәзымдырыр ҳәа шәымшәан, 12 избанзар уи аамҭазы иԥшьоу адоуҳа ишәҳәаша шәыҵанаҳәоит».

13 Ус, ажәлар ирылагылаз аӡәы иҳәеит: «Арҵаҩы, сашьа иаҳәа, ҳаб иҟынтә иаҳҭынхаз абжа сиҭарц». 14 Иисус иҳәеит: «Сара ӡбаҩыс, мамзаргьы мазара шаҩыс сшәызҭада?» 15 Анаҩс иҳәеит: «Шәыԥсы цәгьамхарц азы шәхы шәацклаԥшла, избанзар ауаҩы амал ду имазаргьы, уи акәӡам аԥсҭазаара изҭо». 16 Нас иара аҿырԥштәы ааигеит: «Амал змаз аӡәы аҽаҩра бзиа иоуит. 17 Усҟан иара дхәыцуа далагеит: „Иҟасҵарызеи? Сҽаҩра агарҭа сымаӡам“. 18 Иара иҳәеит: „Иҟасҵаша здыруеит: саалаган, ацақәа зегь рбганы, еиҳау сыргылап, сҽаҩра зегьы, смазара зегьы еизганы убра иҭасҵап. 19 Нас исҳәап: ‚Акыршықәса исызхаша амазара еидыскылеит. Уажәшьҭа сыԥсы сшьалоит, акрыфо-акрыжәуа, сгәырӷьаҵәа сықәзаауеит‘“. 20 Аха Анцәа уи иеиҳәеит: „Агаӡа уара, уахаҵәҟьа уԥсраны уҟоуп. Нас, иззынхода еизугаз умазара?“ 21 Убри ауп ихьуа зхазы амал еизызго, аха Анцәа иҿаԥхьа иӷару».

22 Уи ашьҭахь Иисус иҵаҩцәа иреиҳәеит: «Убри азоуп изшәасҳәо: иаҳфарызеи ма иаҳшәаҳҵарызеи ҳәа ахәыцра шәаҟәыҵ, уи хьаас иҟашәымҵалан, 23 избанзар ауаҩы иԥсҭазаара афатәи ашәҵатәи раасҭа еиҳа ахә ҳаракуп. 24 Шәрыхәаԥш аҟәраанқәа: дара ак ларҵом, ак ҭаргалом, ацақәагьы рымаӡам, аха Анцәа урҭ акрырҿеиҵоит. Шәара аҵарақәа раасҭа еиҳагьы шәаԥсаӡами? 25 Ак хьаас иҟашәҵеит ҳәа шәыԥсҭазаара сааҭк* иадамзаргьы ишәзацҵома? 26 Абриҵәҟьа шәзыҟамҵозар, егьи зегь хьаас аҟаҵара заҭахузеи? 27 Шәрыхәаԥш ашәҭқәа: дара аџьабаа рбом, амаҭәа рӡахуам, аха сара ишәасҳәоит: амал ду змаз Соломонгьы урҭ шеилаҳәоу еиԥш деилаҳәамызт. 28 Иахьа иҟоу, аха уаҵәы амца иалажьны ирбылуа ашәҭқәа Анцәа абас еилеиҳәозар, шәара еиҳагьы еиӷьны шәеилеимҳәаӡои, ахаҵара ззымхо шәара? 29 Убри аҟынтә иаҳфарызеи, иаҳжәрызеи ҳәа ахәыцра шәаҟәыҵ, уи мыцхәы хьаас иҟашәымҵалан, 30 убриоуп егьырҭ ажәларқәа иҩуа изышьҭоугьы, аха Шәаб уи зегь шышәҭаху идыруеит. 31 Шәыԥсҭазаараҿы Анцәа Иаҳра еснагь зегь раасҭа ихадаз, усҟан Анцәа шәзызгәаҟуа зегь шәиҭоит.

32 Шәымшәан, аԥсаса маҷ, избанзар Шәаб Аҳра шәиҭар иҭахуп. 33 Шәмазара ҭины, аӷарцәа шәрыцхраала. Имхо аԥараҭрақәа ҟашәҵа — еизыжәгала ахаан инымҵәо амал ажәҩан аҿы. Уа еизыжәго амал аӷьычгьы игом, а́ҩгьы ирфом. 34 Шәмал ахьыҟоу ауп шәгәи шәыԥси ахьыҟало.

35 Шәмазеины шәыҟаз, шәкәаҷабқәагьы аркыз. 36 Шәара аԥшәма ачара аҟынтәи данбаауеи ҳәа иԥшу амаҵуцәа шәреиԥшзароуп, дааины ашә данаслак, иаразнак изаашәыртырц азы. 37 Насыԥ рымоуп аԥшәма данбаауеи ҳәа имыцәаӡакәа иԥшу амаҵуцәа! Аиаша шәасҳәоит: иара амаҵуцәа рымаҭәа ишәҵаны, акрыфара ҳәа иааиԥхьоит, рымаҵгьы иулоит. 38 Ианыхәлалак*, ма ҵхагәазы* данааилак, ишизыԥшу ибар, насыԥ рымоуп! 39 Шәазхәыц: аԥшәма аӷьыч данааиуа идыруазҭгьы, иҩны дыҩналар иуӡомызт, ус акәӡами? 40 Убри аҟынтә шәаргьы шәҽырхианы шәыҟаз, избанзар ауаҩытәыҩса Иԥа шәанымгәыӷуа асааҭ азоуп данаауа».

41 Усҟан Пиотр иҳәеит: «Иҳақәиҭу, ари аҿырԥштәы ҳара ҳзы мацара аума изааугаз, зегьы рзы иааугоу?» 42 Иисус иҳәеит: «Дызусҭада узықәгәыӷыртә иҟоу амаҵуҩ ҟәыш? Аԥшәма уи егьырҭ имаҵуцәа дырхаиргылоит, ианаамҭоу ирызхаша афатә риҭаларц азы. 43 Насыԥ имоуп уи амаҵуҩы, иԥшәма данаалак, идиҵаз аус дшаҿу ибар. 44 Аиаша шәасҳәоит, уи имазара зегьы дахаиргылоит. 45 Аха уи амаҵуҩы „сыԥшәма макьана дааӡом“ ҳәа ҳәаны, егьырҭ амаҵуцәа рыпҟара далагар, акрыфо-акрыжәуа, аҩы иҽаиршьлар, 46 данымгәыӷуа амши асааҭи рзы иԥшәма дааны, аума изааганы, аҳәатәхамҵацәа ахьыҟоу дрылаижьуеит. 47 Аԥшәма ииҭахыз здыруаз, аха иҟазымҵоз, иаарагьы иазыԥшымыз амаҵуҩы ӷәӷәала дрыпҟоит. 48 Аха изымдырӡакәа ииашам ҟазҵоз, имаҷны дрыпҟоит. Ауаҩы инапы иану рацәазар — инапы иану зегь ишахәҭоу иҟаиҵалароуп, иду рацәазар — иду зегь ииашаны иҟаиҵалароуп.

49 Сара адгьыл амца асыркырц сааит, нас, исҭахузеи уаҳа, уи амца акхьазар?! 50 Иҟоуп исхызгараны иҟоу даҽа ӡаахрак, шаҟа сгәаҟуазеи уи хыркәшахаанӡа! 51 Адгьыл ахь сзааз аҭынчра аазгарц азоуп ҳәа аума шәгәы ишаанаго? Мап, сара ишәасҳәоит: аҭынчра аазгарц азы акәӡам, ауаа еилысхырц азоуп сзааз. 52 Ҩнаҭак аҿы инхо хәҩык еиқәшаҳаҭхаӡом, хҩык ҩыџьа ирҿагылоит, ҩыџьа хҩык ирҿагылоит. 53 Аб иԥа диҿагылоит, аԥа иаб диҿагылоит, ан лыԥҳа дылҿагылоит, аԥҳа лан дылҿагылоит, анхәа лҭаца дылҿагылоит, аҭаца ланхәа дылҿагылоит».

54 Анаҩс Иисус ажәлар иреиҳәеит: «Мраҭашәарахь аԥҭа анцәырҵлак, афырҭын шьҭыҵуеит шәҳәоит, убас иагьыҟалоит. 55 Аладантәи аԥша анасуа, ишоурахоит шәҳәоит, ус иагьыҟалоит. 56 Ҩ-цәак зхарԥоу шәара! Адгьыли ажәҩани шәанрыхәаԥшуа, амш зеиԥшрахо жәдыруеит, нас, ижәбо ахҭысқәа ҵакыс ирымоу зышәзеилымкаауеи? 57 Иҟашәҵалар шәыхәҭоу аилкаара шәзашьҭами? 58 Иаҳҳәап, ак умазкуа ауаҩы амчра змоу иахь уаниго, ишәыбжьалаз аимак амҩан иӡба, уи — аӡбаҩ уиимҭарц азы, аӡбаҩ — имаҵуҩы уиимҭарц азы, амаҵуҩы — абахҭа уҭеимкырц азы. 59 Сара иуасҳәоит: иаауқәу зегь ушәаанӡа, уҭыҵраны уҟаӡам».