Ақәҵра
15 Убасҟан Моисеии израильааи Иегова абас ашәа изырҳәо иалагеит:
«Иегова ашәа изысҳәалоит, избанзар иара ихьӡ ҳареикит.
Аҽгьы аҽыуаҩгьы амшын иалаижьит.
2 Иах* сымч-сылшара иоуп, иара Сеиқәырхаҩ иакәны дҟалеит.
Иара Сынцәа иоуп, убри аҟынтә дсырҽхәалоит, саб Инцәа иоуп, убри аҟынтә дҳарасклоит.
3 Иегова аибашьҩы ӷәӷәа иоуп. Иара Иегова ихьӡуп.
4 Иара афараон иҽыуардынқәеи ируааи амшын иалаижьит,
Иреиӷьыз аибашьцәа Амшын ҟаԥшь аҿы иӡааҟәрылеит.
5 Еилашуаз аӡқәа урҭ ирхыҵәеит, ахаҳә еиԥш аҵахь ицеит.
6 Уарӷьа напы, Иегова, даараӡа иӷәӷәоуп,
Уарӷьа напы, Иегова, аӷа дҭанархоит.
7 Уара убриаҟара уҳаракуп, иуҿагыло зегь уриааир улшоит.
Амца еиԥш еилашуа угәыԥжәара ааушьҭуеит — иаргьы урҭ аҭәа еиԥш иқәнаблаауеит.
8 Уԥынҵа иҭҟьоз аԥсыԥ аӡқәа еиланаргылеит,
Арҩашқәа рымҩа кны, аҭӡамц еиԥш игылеит,
Еилашуаз аӡқәа амшын агәаҿы изымҵысуа иаанхеит.
9 Аӷа иҳәеит: „Срышьҭаланы сцап, сагьрыхьӡап!
Ирымоу зегь рымысхып, еимысҵәап, усҟан сгәы ҭынчхоит!
Саҳәа ҭызгап, снапаҿгьы урҭ аазгап!“
10 Уара амшын уаҭәҳәан, урҭ хнаҩеит.
Атса еиԥш аӡ дуқәа рҿы иӡааҟәрылеит.
11 Иегова, уара иуеиԥшу анцәа дыҟоума?
Уара уеиԥш иԥшьоу аӡәыр дыҟоума?
Уара уоуп изыцәшәалатәу, уара уоуп ашәақәа рыла ирҽхәалатәу — уара, аџьашьахәқәа ҟазҵо.
12 Уара уарӷьа напы анеиҵух, адгьыл урҭ ахәланагалеит.
13 Гәыбылрала иҭәу убзиабара иҿухыз ужәлар мҩақәнаҵоит,
Уара умч урҭ иԥшьоу унхарҭа ҭыԥ ахь инанагоит.
14 Ажәларқәа уи раҳауеит, иагьшәаӡыӡоит,
Филисти́а инхо зегь ашәара* рызцәырҵуеит.
15 Убасҟан едо́маа рабиԥарақәа рхадацәа шәаны иҵысҵыслоит,
Амчра ду змоу моавтәи анапхгаҩцәа аҟәара-ҟәараҳәа еиҵаслоит.
Ханаа́н инхо зегь ргәы каҳауеит.
16 Урҭ ашәареи агәыҭҟьеи иагоит.
Умч ду ахаҳә еиԥш изеиҭамҵуа иҟанаҵоит,
Ужәлар ииасны ицаанӡа, Иегова,
Иушаз ужәлар ииасны ицаанӡа.
17 Уара урҭ ааугоит, ушьхаҿгьы инурхоит*,
Ухазы анхарҭа ахьурхиаз аҭыԥ аҿы, Иегова,
Унапқәа рыла иҟауҵаз аԥшьаҭыԥ аҿы, Иегова.
18 Иегова наӡаӡа аҳра иулоит.
19 Афараон иҽыуардынқәеи иҽыуааи амшын ианалала,
Иегова амшын аӡқәа ирхынҳәын, урҭ ирыжәиҵеит.
Израильаа ракәзар, ибаз амшын аҵа иқәланы, амшын иагәылсны ицеит».
20 Аԥааимбарԥҳәыс Мариа́м, Ааро́н иаҳәшьа, ахьархьар аашьҭыхны лҿыналхеит. Усҟан аҳәса зегьы ахьархьарқәа рыманы илышьҭалан, акәашара иалагеит. 21 Мариа́м ахацәа инарымалдан, абас ашәаҳәара далагеит:
«Иегова ашәа изышәҳәала, избанзар ихьӡ ҳареикит.
Аҽгьы аҽыуаҩгьы амшын иалаижьит».
22 Анаҩс Моисеи израильаа Амшын ҟаԥшь аҟынтә иманы ддәықәлеит, даргьы ацәҳәыра Шур ахь инеит. Урҭ хымш ацәҳәыра иқәын, аха аӡы џьаргьы ирзыԥшаауамызт. 23 Израильаа Ма́ра захьӡыз аҭыԥахь инеит, аха уа аӡы рзыжәуамызт, избанзар уи аӡы ашан. Убри азы уи аҭыԥ Ма́ра* ахьӡырҵеит. 24 Ажәлар Моисеи иахь агәынамӡара аарԥшны «иаҳжәуеи?» ҳәа игәамҵуа иалагеит. 25 Усҟан Моисеи Иегова ацхырааразы диҳәеит, Иеговагьы аҵла иирбеит. Моисеи уи аӡы иҭаижьын, аӡы ужәыртә иҟалеит.
Уа Анцәа урҭ аӡбаразы амҩақәҵарақәеи аԥҟарақәеи риҭеит, убра иагьԥишәеит. 26 Иара иҳәеит: «Шәара Шәынцәа Иегова гәыкала шәизыӡырҩлар, иара ииашоуп ҳәа ииԥхьаӡо ҟашәҵалар, иԥҟарақәа, иара убас изакәанқәа зегьы шәрықәныҟәалар, египтаа идсырхьыз ачымазарақәа шәсырхьӡом, избанзар сара, Иегова, шәызхәышәтәуа соуп».
27 Анаҩс Ели́мҟа инеит, уаҟа 12 ӡыхьи, 70 пальмеи ыҟан. Уа аӡы азааигәара рлагер дыргылеит.