Апостолцәа иҟарҵоз аусқәа
13 Антио́хиатәи аизараҿы ԥааимбарцәаси рҵаҩцәаси иҟаз абарҭ ракәын: Варна́ва, Ниге́р ҳәа изышьҭаз Симео́н, Кире́на иатәыз Лу́ци, анапхгаҩы И́род аҵара ицызҵоз Манаи́н, иара убас Савл. 2 Дара Иегова* имаҵ ауреи ачгареи ианаҿыз аамҭазы иԥшьоу адоуҳа ус ранаҳәеит: «Иалшәх сара сзы Варна́веи Са́вли, урҭ ззыскыз аус нарыгӡарц азы». 3 Ианычга ашьҭахь, Анцәа иҳәан, рнапқәа Варна́веи Са́вли ирықәырҵан, ирышьҭит.
4 Иԥшьоу адоуҳа анапхгарала амҩа иқәлаз урҭ ахацәа раԥхьа Селевки́аҟа инеит, уантәи мшынла Кипрҟа ицеит. 5 Салами́нҟа ианнеи, ауриацәа рсинагогақәа рҿы еизоз Анцәа иажәа рылаҳәара иалагеит. Урҭ Иоаннгьы дрыцын. Иара урҭ дрыцхраауан.
6 Дара уи адгьылбжьаха зегь иалсит, Па́фос аҟынӡагьы инеит. Уа дырбеит иауриаз, Бар-Иисус зыхьӡыз хаҵак. Уи амагиа инапы алакын, насгьы дԥааимбарушәа ҟаиҵон. 7 Иара апровинциа напхгаҩыс иамаз Се́рги Павел зыхьӡыз ауаҩы имаҵ иуан. Се́рги Павел иҟәышыз уаҩын. Иара гәык-ԥсыкала Анцәа иажәа еиликаар иҭахын, убри азы Варна́веи Са́вли иара иахь иааиԥхьеит. 8 Аха Ели́ма* ҳәагьы изышьҭаз уи ахаҵа (ахьӡ Ели́ма иаанагоит «амагиа знапы алаку») урҭ дырԥырхагахарц далагеит, апровинциа иахагылаз Се́рги Павел Анцәа иажәа агәра имгарц азы. 9 Усҟан Павел ҳәа изышьҭаз Савл иԥшьоу адоуҳа ала ихы-игәы ҭәын, икылкааны Ели́ма днаихәаԥшын, 10 ус иҳәеит: «Аџьныш иԥа! Уара мыцла уеибаркуп, цәгьарамзар бзиарак угәы иҭам! Бзиарас иҟоу зегь уаҿагылоит! Иегова имҩа иашақәа реицакра уаҟәымҵӡои? 11 Иегова иуқәнагоу уақәиршәоит: аамҭак ула лашарак амбо иҟаиҵоит». Убри аминуҭ азы иааиқәлашьцан, ила иамбо дҟалеит, насгьы дшаҟь-шаҟьо, инапы данкны дызгашаз дишьҭалеит. 12 Апровинциа иахагылаз иҟалаз аниба, Иҳақәиҭу дхеиҵеит. Иара Иегова изкны еиликааз игәаҵанӡа инеит.
13 Павел иҩызцәеи иареи Па́фос иқәҵны, мшынла Памфи́лиа иаҵанакуа Пе́ргиаҟа ицеит. Аха Иоанн урҭ уа иааныжьны, Иерусалимҟа дхынҳәит. 14 Пе́ргиантәи Писи́диа иаҵанакуа Антио́хиаҟа инеит. Асабшазы асинагога иҩналан инатәеит. 15 Моисеи изакәани аԥааимбарцәа рышәҟәқәеи ирыԥхьаны ианалга, асинагога аиҳабацәа урҭ ус рарҳәеит: «Ҳашьцәа, ҳгәы шьҭызхша ажәа шәымазар, ишәҳәа». 16 Усҟан Павел дҩагылан, изыӡырҩырц азы инапала адырга дирбан, ҿааиҭит:
«Израильаа, насгьы Анцәа ицәшәо иауриам ауаа, шәысзыӡырҩы! 17 Израильаа Рынцәа ҳабацәа алихит. Урҭ Египет — атәым дгьыл аҿы — ианынхоз, иӷәӷәоу жәларны иҟаиҵеит, имч дугьы ихы иархәаны уи атәыла иалигеит. 18 Иара 40-ҟа шықәса рыҩныҵҟа ацәҳәыраҿы урҭ рахь ачҳара ааирԥшуан. 19 Ханаа́нтәи адгьыл иқәынхоз быжь-жәларк анықәига ашьҭахь, урҭ рыдгьыл ҳабацәа ириҭеит. 20 Арҭ ахҭысқәа 450-ҟа шықәса рыҩныҵҟа имҩаԥысуан.
Уи ашьҭахь аԥааимбар Самуил иҟынӡа Анцәа уи ажәлар аӡбаҩцәа риҭон. 21 Нас дара аҳ даҳҭахуп ҳәа иаақәгылан, Анцәа Вениамин ишьҭра иатәыз Киш иԥа Саул аҳас дриҭеит. Уи 40 шықәса аҳра иуан. 22 Анцәа Саул мап аницәик ашьҭахь аҳас Давид дриҭеит, уи изкны иара иҳәеит: „Сара дсыԥшааит Иессе́и иԥа Давид, уи ауаҩ сгәы дақәшәоит, иара исҭаху зегь ҟаиҵоит“. 23 Анцәа ишиҳәахьаз еиԥш, уи ихылҵыз руаӡәк — Иисус — израильаа реиқәырхаҩ иакәны дҟаиҵеит. 24 Уи даанӡа, Иоанн израильтәи ажәлар иаартны ирылеиҳәон, рыгәнаҳақәа ишрыхьхәыз аадырԥшырц азы аӡы рыҽӡаархыр шрыхәҭаз. 25 Иоанн имаҵзура анҵәамҭазы иҳәон: „Сара шәыззыԥшыз сакәӡам, уи сышьҭахь ааира даҿуп. Сара уи иеимаа аԥыртларагьы саԥсам“.
26 Сашьцәа, Авраам ихылҵқәаз, иара убас иауриам, аха Анцәа ицәшәо зегьы, ҳаиқәырхара иазку ажәабжь ззаацҳаз ҳара ҳауп. 27 Аха Иерусалим инхоз ажәларгьы, урҭ рнапхгаҩцәагьы уи аиқәырхаҩ дрыдрымкылаӡеит, иқәыӡбеит. Убасала дара инарыгӡеит ессабша ҳзыԥхьо, аԥааимбарцәа ирҳәаз ажәақәа. 28 Дызхыршьаауаз ҳәа акгьы шыҟамызгьы, Пилат ашьаҟа дкыдҵаны димшьыр рымуит. 29 Аҩыраҿы изкны ианыз зегь анынаӡа, ашьаҟа* дкыдырхын, адамра дҭарҵеит, 30 аха Анцәа уи иԥсы ҭеиҵеит. 31 Ԥыҭраамҭак иара Галилеиантәи Иерусалимҟа ицааз иҵаҩцәа дрызцәырҵуан. Уажәшьҭа дара уи иӡбахә ауаа ирыларҳәоит.
32 Ҳара ҳабацәа зқәыргәыӷыз иазку ажәабжь бзиа шәылаҳҳәоит. 33 Анцәа Иисус иԥсы ҭаҵаны, ҳабацәа зықәиргәыӷыз зегьы ҳара ҳзы инаигӡеит, аҩбатәи аԥсалом аҿы ишану еиԥш: „Уара сԥа уоуп. Иахьа сара абыс сузыҟалеит“. 34 Анцәа уи иԥсы шҭеиҵо, насгьы ибаауа ацәеижь уаҳа ишимоуа иазкны абас иҳәахьан: „Сара, Давид дшақәсыргәыӷхьаз еиԥш, есымша бзиа шәызбалоит, сажәа сахыԥом“. 35 Даҽа ԥсаломк аҿгьы иануп: „Уара гәыкала иузиашоу анышә дафар ууӡом“. 36 Давид иԥсы ҭанаҵы Анцәа имаҵ иуан. Даныԥсы, иабацәа анышә иахьамаз дыржит, ицәеижьгьы убраҟа ибааит. 37 Анцәа зыԥсы ҭеиҵаз иакәзар, анышә дамфаӡеит, дымбааӡеит.
38 Сашьцәа, идырны ишәымазааит, уи ибзоурала Анцәа шәыгәнаҳақәа шшәанаижьуа, уи ауп иахьа ишәылаҳҳәогьы. 39 Моисеи изакәан ала Анцәа шәуаа иашақәаны шәиԥхьаӡар илшомызт, аха Иисус дахьыԥсыз абзоурала, Анцәа уи игәра зго зегьы уаа иашақәаны иԥхьаӡоит. 40 Шәгәышәҽаныз, аԥааимбарцәа рышәҟәқәа рҿы иану шәмыхьырц азы: 41 „Шәыԥшы ахыччаҩцәа, шәахәаԥш шәара шәхаан иҟасҵо. Уи аӡәы ишәеиҳәаргьы, агәра жәгарымызт. Шәара уи џьашәшьоит, шәагьықәӡаауеит“».
42 Ацара рҽаназырк, ауаа рыҳәеит иааиуа асабшазгьы иааны, уи атәы рзеиҭарҳәарц. 43 Асинагогаҿы аизара анынҵәа, Анцәа имҵахырхәоз ауриацәеи апрозелитцәеи ԥыҭҩык Павели Варна́веи ирыцны ицеит. Павели Варна́веи урҭ ирацәажәон, насгьы Анцәа ибзиабара* иаԥсаны иаанхаларц ргәазҭарҵон.
44 Иааиз асабшазы Иегова иажәа иазыӡырҩырц азы ақалақь аҿы инхоз зегь аама уҳәо ауаа еизеит. 45 Ауриацәа арсҟаҩык ауаа шеизаз анырба, ишьыцын, Павел ажәа имаркуа, иҟоу зегь иарҳәо иалагеит. 46 Усҟан Павели Варна́веи мшәаӡакәа ус рҳәеит: «Анцәа иажәа зегь раԥхьаӡа иргыланы изаҳашаз шәара шәакәын, аха шәара уи шәаҳар шәҭахӡам, наӡаӡатәи аԥсҭазаара шәаԥсангьы шәхы шәыԥхьаӡаӡом, убри азы ҳара егьырҭ ажәларқәа рахь ҳцоит. 47 Избанзар Иегова абри аҩыза ажәа ҳаиҳәеит: „Сара уара ажәларқәа рзы лашарас уҟасҵеит, адгьыл аҵыхәанӡа ауаа аиқәхара иазку ажәабжь рылоуҳәаларц азы“».
48 Иауриамыз ари анраҳа, даараӡа игәырӷьеит, насгьы Иегова иажәа арҳаракра иалагеит, наӡаӡатәи аԥсҭазаарахь уназго амҩа ианылар зҭахыз зегьы Иҳақәиҭу дхарҵеит. 49 Уи аҭыԥ аҿы инхоз зегьы Иегова иажәа рылаҵәара иаҿын. 50 Аха ауриацәа Анцәа ицәшәоз ҳаҭыр зқәыз аҳәсеи еицырдыруаз ауааи Павели Варна́веи ргәаӷ ддыркын, ирышьҭашәарыцо иалагеит, насгьы ақалақь иалырцеит. 51 Усҟан Павели Варна́веи ршьапқәа ааршәшәаны асаба рықәырхын*, Ико́ниаҟа ицеит. 52 Аҵаҩцәа ракәзар, ргәы гәырӷьарыла иҭәын, иԥшьоу адоуҳагьы рыман.